告別啟思

校園有大食會時段,朝早七點左右起身,動手為幸男準備熊仔外型既果醬麵包.

騎羊上外母家,再湊幸男番學,暑假前最後一天上課,亦係幼稚園階段最後一個課堂日.

中午約外母一齊接放學，為了呢張婆孫合照。呢4年辛苦外母幫手接送放學，兼準備御膳…

咁啱撞正相熟同班同學家長接放學,於是兩位小朋友一齊係校園外合照.

同外母及幸男坐小巴去市中心食過相熟拉麵後,我自己經大會堂及政府合署行去安定.途經兆安苑既藍球場,忍唔住係背囊掏出相機出黎,因為呢個係我中三個年與同學一齊打波既地方.

石屎地面依舊,並沒有跟隨大勢變成膠漆面,木條長櫈及遮蔭上蓋仍在,圓桶形石屎垃圾桶位置不變,彷彿時間停滯了20多年.記得放學偷時間來打3對3半場籃球,逢星期六或日攞正牌去打2-3個鐘波.雖然技術不佳(上籃走步,射球命中率低,單用右手.....),但總享受與要好同學們既共聚時刻.

今日下午既任務係去幸男升讀既小學攞寄失既通告,這裡是亦是我曾經就讀過既小學.相熟既校訓懸掛在入口,校務處入口依舊.感覺既親切又特別,畢竟觀點(身高,年齡及身份)與30年前不同了.

由於台灣女生今日番早更,所以昨日已帶相機為兩母子於走過四年既路上影相.

慶幸犬兒能夠就讀呢間校園,因為幸男由每天喊著要打電話俾爸爸媽媽,變成投入每一天既學習,開心迎接每個學年.

PS:記得N班下午班,我經常早班過後帶著熊仔曲奇餅小食及果汁接放學,以及冬天時拎住熱呼呼既雞蛋仔於園外排隊等接幸男.

Gods of Egypt

今日租咗<埃及神戰>藍光碟番屋企睇,無抱任何期望,結果係令我眼前一亮.

男主角職業小偷Bek與戀人Zaya一齊參觀天空之神Horus接任埃及王位典禮,目睹沙漠之神Set(Horus之叔叔)施計殺害農業之神Osoris(Horus之父),擊倒Horus,並摘取其雙眼,強奪埃及王位.

故事裡既神族,各有不同特性既神力,有獨特型態,身上流既血是金色的,壽命為一千年.雖然身型比凡人高大,但平日會以人類外型示人,拉近神與人之間既隔膜.

Set取得王位後,四出將其他反對派神明收拾並取下其特性寶物.

愛戴Horus既Zaya為Horus恢復神力,於侍奉Set既建築師Urshu之工作室取得之資料,並由Bek潛入收藏其中一隻Horus神眼之機關.

男主角Bek為救戀人,不惜冒險闖入Horus之神殿,欲借神明之力令愛人重生.

Set派出手下追捕Horus及Bek,大毒蛇一幕逼真細緻,一啲都無橡膠感.1.4億制作成本之下,全片既電腦特技都非常出色。

故事世界觀，人類與萬物居住既地方係太空懸浮之平面，並非現代既球面。

Horus於神山向阿爺Rah求助，以暫借之神力飛上太空。Horus向太陽神Rah借用聖水，以圖熄滅Set之力量之源(沙漠之火).

Horus之戀人Hathor(愛神)假裝投誠Set,借機找尋Horus之下落,並會合Horus及Bek去請求智慧之神Thot相助.

收集了幾位神明之寶物,神力大增既Set與Horus展開生死戰.最Horus成功擊敗Set,並將神器(矛)送還太陽神Rah,以幫忙擊退入侵地面既怪物,挽救地面既浩劫.

之前既希臘神話主題電影一般都係較沉悶,Gods of Egypt以埃及神話作依歸,打造一個全新人神共存既時代,感覺新鮮.故事提及神既壽命只有一千年,這個點子巧妙地引伸為何現今世代而不再有神蹟出現.

謝師宴@黃金海岸酒店

幼稚園都有謝師宴?無錯,今日我就同台灣女生一齊去黃金海岸酒店既池邊宴會廳參加幸男既幼稚園謝師宴.

大家都把握機會,與相熟同學合照,始終入同一間小學既機會唔高嘛.

原本係幸男與女同學合照,但突然多咗個男同學出現,湊成個"嬲"字.唯有就一就相機位置及鏡頭方向,成功拍下二人合照.

幸男呢張相好似係新郎哥怕醜敬酒咁"多謝多謝,隨量隨量..",好好笑~
自助餐食品偏向小朋友口味,肉醬意粉,炸雞塊,雞翼,啫喱,蛋糕...

同學們拎住禮物黎同班主任曾老師合照.

幸男將有份整(10%?)既手工花送俾班主任,老師當然開心.曾老師係幸男K1同K3既班主任,唔知佢對幸男印像深唔深呢?

全班同學上台向老師們獻花,之後再一齊大合照.

幸男與要好既同學行埋一齊,好似外國高中畢業晚會咁~

幸男不時走出去同其他同學傾計聯誼,總算認得枱號,可以自己行番埋位.

幸福男孩,希望簡單快樂既童真,可以成為你往後既正能量~

每位學生都會收到一隻畢業啤啤熊,期望呢隻熊仔可以陪伴幸男經歷每一個求學階段(要好好保存至得~).

幸男畢業典禮

番完夜班,訓咗兩三個鐘就同台灣女生搭巴士出旺角,係廣華街食晏後,再行去培正小學參加幸男既啟思幼稚園畢業典禮.由於老師們守住前住學生座位既走廊,故只能遠攝,慶幸班主任話俾幸男知爸爸係咩方向.

位置都幾後吓，但總算不至於上層山頂位。

幸男與同班同學表演("We At Creative", "小朋友唱快樂歌","來遊戲")，卒之可以目睹幸男話練到好攰既演出。自己唔爭氣，一攰就肚痛，去咗2次厠所，差少少就趕唔切番埋位睇幸男上場。

最後既聯合畢業生合照，幸男可以企係最前個行。距離太遠，我支24~240天涯鏡拉到盡，成像都散晒。加上其他前排家長既身影同相機，增加拍攝困難。

特意上番去禮堂外既佈置板,為兩母女影相.

身為爸爸,我都著咗件新恤衫黎出席愛兒既重要日子.幸男呢四年都開開心心咁番幼稚園,達成我同人家既期盼(唔好太大壓力,開開心心過有限既童年).暑假後,幸男就會升讀我兒時就讀既小學,希望"爸爸都搞得掂"呢個概念,可以支持幸男適應新環境.

一個頭痛,一個肚痛,係華潤堂買完藥就去附近既利苑食晚飯.

是晚餐單:法國藍龍蝦芝士伊麵,炒龍躉片,原盎燉湯.可惜我同人家都不在狀態,否則一定叫多個餸或食楊枝金露.每次入黎都係 唔知有咩好食,但每次都係心滿意足咁離開.

結緍註冊9週年晚飯@STELLA'S

夜晚同台灣女生一齊去荃灣既stella's食晚飯，約好六點半入座，但見仲未開門，唯有影住相兼行番去荃灣廣場行H&M。

上次跟同事黎係試業日子，室内既擺設有少少唔同，記得上次無掛起黑板黎展示菜單。

晏晝時份已同光仔商量是晚餐單，所以我地只需坐定定，等順序上菜…

人家今日出門時已肚痛，故未能食得太開懷。

多得光仔安排，我地至可以享用到呢個冷盤-西班牙紅蝦。鮮味加上廚師悉心既調味配搭，令我倆留下深刻印象。
無諗過用蝦頭煎成既蝦餅，可以咁香口，令呢個輕型意粉，帶來一份精美。

即使係一個餐湯，都充滿著巧手既工藝。

面對香嫩牛扒，配上香滑薯蓉，應該買支325ml既紅酒黎淺嚐。

試啱個位，叫店員幫手揸機影相留念。

無準備咩禮物，只係尋日買定今日市中心UA早場既“非常盜2”，睇完戲就係囍越食晏，再出荃灣廣場行下，一齊食餐靓晩飯。雖然平淡，總算係輕鬆既二人共處時光。