單手以手機影咗好幾次,卒之都可以影到ZIPPO火機點火既一刻.
早排同台灣女生係電視見到有ZIPPO經典收藏誌既廣告,靈機一觸,如果用ZIPPO黎點花園既蚊香就方便了.即棄式要長按住供氣制,按得耐又會燙手.第二日,台灣女生送完幸男番學後,就係7-11買咗呢本經典收藏誌(我食完早餐訓醒第二頭覺就係餐枱見到),主因當然係隨書附帶既FLORENTINE 1974款式之ZIPPO火機.
有火機但無油,原裝火機電油又唔係度度有得買.置樂有間賣生活精品雜貨既店舖有ZIPPO商品,但兩次都摸門釘.係屯宿兄弟群組求助,卒之由逛開鴨寮街既阿潘代買.今日番晏時,阿潘同華B親自上到我工作坊作交收,頓時回想起以前一齊抄CASE準備考試時既溫情.
以後點蚊香可以方便一點,朋友生日點蠟燭亦可以優雅一點~
起初有少少怪人家嘥錢,而且我都未上網睇中咩特別心儀款式就揀咗呢款.後來我上網睇過現時流通既款式中,都係呢一款較啱我心意.以文藝復興作主題,花朵紋路帶出優雅及古典美學.
PS:雜誌內有每期附送既火機主題介紹,實物比雜誌內既照片有質感,蝕刻既味道難以普通相機照片作表達.
