小南國-貪優惠兼貪近的禍

今晚應台灣女生之約,一齊去市中心小南國既大閘蟹套餐,因為有指定信用卡優惠嘛.糖醋小排骨,真係好大舊骨,而且海蜇有點硬....

椒鹽小黃魚,感覺比之前既糖腊骨好,至少多肉啲~

生拆蟹粉蟹肉羹,味道淡,質感與普通既豆腐海皇羹差不多....比較特別既係有個明火係下方為生拆蟹粉蟹肉羹送暖,好似吉野家火鍋咁.

唔記得影個餐牌,呢碟係咩名堂?

清蒸江蘇大閘蟹,女侍應徒手將四隻大閘蟹從雪櫃取出並送往廚房,可惜中途跌咗隻落地.女侍應尷尬地蹲下並拾起,再行入廚房....(我同人家邊食邊睇吓邊隻個殼或手腳有傷)

燈光柔和,但又唔想閃燈影響其他食客,唯有高ISO照影.

店員唔太理會每枱食客既進度,一落單就跟住個次序出菜,結果上到大閘蟹就開始囤積,令菜餚變涼......

生拆蟹肉小籠包,只見到包頂的橙色.咬開望望,餡料一點橙色都睇唔出.

薑茶紫糯米黑芝麻湯丸,好頭好尾,影埋呢張甜品照作結.滙豐信用卡有6折,計埋加一埋單$900,如果係正價就真係好唔抵.$450一個人,我覺得賣點只係有兩隻蟹,香港老飯店好食過小南國好多.

上次係倫哥私房菜食大閘蟹界親手,今日又係界開同一個位....舊果個傷口都未好晒又劏多一吓,又血流如注...

多角色Sleeping day

番完夜班,訓咗兩個鐘多啲就梳洗出門,騎羊去外母家,將婆婆衘膳送去小學,因為幸男於上一個月點餐時話今日既四選一無個啱心水.

於學校正門校務處附近將飯盒放入幸男所屬班號之膠箱,騎羊去市中心趕下一個約會.見未夠時間,去咗大眾書局打書釘,可惜偵探小說永遠都係無得試睇.....
午餐係Mos' Burger享用,貪佢易搵位之餘又可以有凍咖啡飲,$51都算豪華午餐丫.

食到中途已收到老豆電話,因為我約咗佢今日一齊去睇戲,尋晚臨番夜班前係市中心UA買定飛.

男主角Jack Reacher得悉昔日同袍兼工作接頭人Susan Turner少校被誣陷為間諜,冒險犯事入獄以拯救將被滅口之Susan Turner.線人們相繼被殺,零碎線索之中出現報稱係Jack Reacher之私生女Samantha Dayton.男女主角邊保護反叛少女Samantha Dayton,邊逃避幕後黑手之追殺及查出真相.Tom Cruise硬橋硬馬,盡顯鐵漢本色,不過一拳打碎車門玻璃,未免有點誇張(雖然真實無人可以咁好打咁敏捷).無諗過幕後黑手軍械公司老闆(前軍方高層)並非以虛報阿富汗戰區回收之軍械作黑市販賣,反而係藉回收軍械以掩藏運毒.男主角亦捉錯用神,到最後關頭至估到背後玄機,感覺有啲兒嬉.整體而言,有笑位及大量動作場面,雖然未至於經典級別,但足以滿足一眾傳統動作片迷.

晚上同要番夜班既台灣女生去卓爾居既Cafe 360食飯,向人家展示今日係書局見到既書,並提意搵日叫幸男一齊去買,當係馬sir既生日禮物.騎羊送埋人家番工,卒之可以回家稍息,話晒只係訓咗兩個幾鐘咋.

NINTENDO SWITCH

好開心得知任天堂出新主機,亦解釋得到點解Wii U既Game出得咁少.其實自己都無咩時間打幾，Wii U都只係打爆咗Mario Kart 8同Wonderful 101,仲有隻忍者龍劍傳未起步…

除咗係電視機玩外,仲可以Wii U咁用Game Pad上既屏幕玩,只需將兩個Joy Con趟入Switch Console就可.遊戲軟體不再係光碟,而係類似3DS既Game Card,令Switch變成高質數可便攜式電玩.

一如已往(Wii及Wii U),我對任天堂既創意非常欣賞,但希望不會一如已往因窄狹既遊戲選擇,欠缺熱門誇平台大作及創新既遊戲方向而浪費.

Barrel

一直都好想去紅橋間酒吧Barrel,今晚卒之都有機會光顧.從地面樓梯行落地庫,原來舖面都幾大同深,我同碧權及智勤帶到最入兼靠牆位置.　

話說有一次係唐坊村既Tong's Restaurant食晚飯時飲過呢埋生啤,感覺難忘.見呢間新酒吧外掛住Whitstable Bay既宣傳掛旗,當然想入去番尋味.

顧客可以坐定定睇波,陳設亦休閒舒適。

最估唔到既係竟然有live singer,雖然今晚既女聲只係以keyboard伴奏,但台上亦有鼓樂,相信可以多人合奏.問過職員,好似一星期得三晚有live singer.

Cocktail選擇較少,反而多sell客人開支Jack Daniels,而且推介既cocktail亦係以Jack Daniels作基酒.

咁啱有相機係背囊,先至可以係燈光昏暗既環境影到咁多相(但都要以手動對焦).

呢杯奇異果味cocktail,真係夠晒特別,我唔食奇異果,所以唔可以俾負評.

荔枝味cocktail,好易口,女生一定啱飲(嵐妹無揀錯)~一班朋友係酒吧邊飲邊傾,仲可以聽真人演唱,仲要係中文歌,屯門元朗應該都無邊到有(洪水橋德國餐廳都只係英文歌).

其實點解今晚無端端會去酒吧?因為夜晚係東城酒家食火鍋黎歡送詩遙,後生女話要去紅橋食甜品,於是嗜酒既男生就去咗酒吧.

伴遊@土瓜灣&屯宿18週年飯 @佐敦

康楠放假出土瓜灣攞車,我咁啱又放假,所以出去襯吓高興.

開車前睇過google map,由康楠帶住藍芽headphone黎聽語音導航,由公司出發到目的地,一個鐘左右,主要係內街搵路花多咗時間.土瓜灣既街道俾我既感覺,好似去咗大角咀舊區般(以前去安定睇電單車用品).

平時除咗出原廠整車之外,都無兜出去市區.有點擔心P牌後生仔一個人由土瓜灣兜番入黎,難得可以有借口兼有人帶路,所以擔當護航一職(昔日都係德輝帶住我).回程時有少少偏差,未能沿原路折返,經紅磡體育館,Poly U,百利商場,太空館,先至可以上番高速公路.

市中心泊好車,同康楠食小巴黎當下午茶(其實係午餐),自己番屋企梳洗兼抖陣,夜晚搭巴士出去佐敦既醉瓊楼飯店,出席屯宿之男18週年聚餐.無諗過有成三層咁多,上到三樓時,原本熱鬧人聲突然變靜....原來有三枱中學生同老師食飯,見有陌生人到來,以為我搵錯(我就有少少得黑社會電影裡,踩場既感覺).

舊式客家飯店,啱晒是次18週年既味道,可惜阿彪要番工.趁張枱未亂,度好個位,拜託職大叔為我哋合照.

鹽焗雞,六個人分黎食,份量啱啱好.

客家豆腐,好似同客家好棧食既(平碟上,一舊舊浸住少少豉汁)唔同.

Percy既偏愛-梅菜扣肉,無諗過多年來都係咁鍾情.

呢個拼盆夠晒正,炸大腸,糖醋骨,咕嚕肉同埋炸鮮魷,唔叫多支啤酒都唔得.

食完飯,行咗去山林道既小路吧，貪佢地下果啲位無人坐兼開揚，唔怕太嘈傾唔到計。

新哥介紹既Spitfire帶點酸味,都係以往既例牌Tetley's啱我口味啲。

有别於屯門元朗聚會，今次可以最快番到屋企既係阿潘。

我哋無上樓上,唔知上面既格局如何,但整體陳設舒適.

相識大家時,我只係一個十九歲既男生,轉眼間第二個十九歲都黎緊.開心大家仲可以保持聯絡兼出黎食飯聚吓,縱使大家唔再係朝夕相對既生活,我依舊掛慮大家是否安好."Gentlemen, all the best!"

PS:十二點左右,大家齊趕尾班車歸家,我同阿禮係最近既車站260X,再係轉車站各自上合適既號碼.戰術成功,我可以係轉車站追趕到歸家既尾班車~

Party無限耆-笑中唏噓

台灣女生番夜班,一個人睇今日租既Party無限耆藍光碟睇.準新郎哥Jason答應了亡妻之爺爺Richard,一齊去佛羅里達州散心兼尋找其昔日的好友,但願來爺爺一心帶孫仔去迷幻沙灘,誓要解放乖孫既思想束縛,找尋迷失既自我.

醉酒兼吸毒,Jason不時被警察拘留,並著住陳年犯人既舊衫.雖然為現實而計劃好既生活被打亂了,但Jason續漸從率性而行既爺爺身上學會莫負青春及活出真我.

呢一幕真係好好笑,鬥酒時不慎飲下爺爺於敵方加料既酒水,結果穿蜜蜂小褲仔於派對跳舞.於街上搶下電單車醉駕,醒來時人車均躺在沙灘上.

爺爺既舊朋友原來因頑疾而需要留係護老院渡過最後既幾個月時光,Jason更加體會到人生苦短,應為自己喜愛既人與事而活.爺爺對Jason既婚姻忠告係,婚姻是很長遠既事,所以最好找個有趣的女人.

本人好同意每個人都需要搵一個投緣既伴侶,去迎接及面對人生往後既每一個樂與苦.太矯揉造作以切合社會或別人之期望,最終可能受傷比受勳更多.

PS:男主角放棄律師行伙伴女兒之未婚妻,與新相識既大學師妹畢業女生一齊,重拾攝影夢

親子單車日

送俾幸男生日既單車，卒之可以落地實戰，地點係新屯中附近湖山公園既交通安全城。

安全城內有模擬街景馬路既環境,雖然話單車唔入得,只可三輪車,但不少家庭都係度陪小朋友學踩單車.輔助轆已被我校高少少,但幸男都係習慣借用其中一個輔助轆作支撐.嘗試雙手扶持把手,並向前跑動,讓幸男感受純前後轆作支撐人與車重,平衡與無重之間向前疾走.

兩位小朋友各自於交通安全城內踩車,偶然相會後又分道揚鑣,只可趁休息時為佢地合照.

其實今日孜孜既嫲嫲都一齊黎襯高興,V City一齊食過牛角燒肉午餐後,我地上婆婆屋企攞單車再搭的士去新屯中會合孜孜一家.

公園小食部有菠蘿冰賣,幸男食得好入神.

食過菠蘿冰,幸男同孜孜一齊去遊樂場玩,我同師傅就坐係度看單車兼閒聊.傾既不再係少年夢,而係生活難題及展望.希望我地既下一代,可以延續上一代既友誼.