合併生日晚飯

每年台灣女生生日，都會出去食大閘蟹黎慶祝。由於明日係平日，要接幸男放學兼功課，所以提早一日夾埋我生日黎食（平常我只希望人家為我煮餐住家飯）。

近呢幾年轉去滬江食大閘蟹餐(最初係夜上海,再轉去香港老飯店)，今年都係為咗蟹粉翅呢個重頭戲。

蟹粉小籠包，今次無影低橙黄色既餡料…

人家就係試食過呢度既臭豆腐，而接受街檔既臭豆腐，當然要散叫一客~

大閘蟹出没，今次既大閘蟹大小一般,侍應生依舊為客人拆蓋及去腮.

數下手指,今年已經係第十年同人家一齊食大閘蟹.

清炒豆苗,蟹粉餈飯,雖然望落去好似較細份,但其實份量剛剛好.

雖然甜品與蟹粉無關,但人家都叫我影低碗薑汁湯圓,好頭好尾.

兩口子出街食飯好似好開心,但出門前都好勞氣.今日晏晝三點同幸男溫習默書,但幸男掛住望鐘(四點開始播心儀卡通),愈溫愈無心機.我嬲到將客廳既掛牆鐘拆下,將玩具扣留,並帶幸男去"思過區".

由呢張相就可以知道我有幾嬲,食飯時都仲記住晏晝既情景.多得外母上門照顧幸男,我地至可以出黎抖吓氣.

PS:尋晚係大姐屋企打邊爐,番到屋企已十二點有多,兩母子已訓著.我係睡房見枕頭上有個信封,好正常地聯想到生日咭.打開黎睇時,右邊既仿黑膠唱片轉動,加上咭內傳出"HAPPY BIRTHDAY TO YOU"既懷舊流聲機歌聲,此時此刻有點鬼片feel......