羊執事

番叮隔夜餸,加個杯麵,咁就係是日午餐,賣相都唔算差丫.

騎羊去置樂既救世軍家品店,為完好未拆封及新淨既玩具(幸男同我都有份)搵下一個主人.店舖將收集番黎既玩具家品轉售出去,但毛利用作營運及慈善.多得我Emily將呢個咁好既地方話俾我知,因為扔去堆田有點浪費兼對唔住地球先生.

係市中心買幸男既下午茶,騎羊番屋企執好個冰袋,做個好執事爸爸.

預鬆時間,泊好羊,仲可以影番張相黎留念,話晒都臨別在即.

見雨天場未開閘,係正門遮蔭位與一眾家長叉腰蹺手滑手機作等候.

吸取上次既經驗,特意帶咗個方兜俾幸男盛住個蛋糕黎食,唔怕跌落地兼一手忌廉.

家人接放學,係鋪有墊布既長整食下午茶,十足野餐咁,幸男當然開心寫意.

PS:雖然功課時間同我細個時相若,但要近三點至放學,確實比我果代少了休息及玩樂時間.希望悉心準備既茶點可以慰勞幸男,兼打打氣.

帶著興趣去搬屋

番晏前，轉努力係屋企執嘢，正當想扔走迷你情景玩具系列既購物籃時，靈光一閃，“可能啱柯柏文既比例喎”。經過一輪試位，造就咗呢幅“老柯購槍圖”。

如果購物籃大少少就好嘞，除咗手提時可以載得多啲嘢，拖頭形態時更可以有一個與車濶相若既斗。

放工騎羊兜去Oscar樓下，交收代購之免税物資兼短聚閒談。

番到屋企就急忙拆包裝，為Chivas Regal 21 Royal Salute拍照。

相比之下，21年比18年既色澤更琥珀。除咗厚度上有一定提升，味道上唔覺有特別唔同，但驚喜位係餘韻之持久～

PS: 響17因原酒耗盡已暫停供應市場，市面僅存既響17再被炒高，所以轉試Chivas Regal 21 。

本士文化：Racing Taxi

平時四驅車既主題多數係玩具模型商原創，萌系主題或crossover 期他動漫機械。

今日上網見到香港的士造形既四驅車，覺得好搞鬼，唔通香港的士俾遊客既印像係極速疾走？

搬屋前的奔波

番完夜班，中午訓醒就去食晏，兼走多2細箱紙盒去迷你倉。

番屋企低愛羊,搭小巴去市中心會合台灣女生,一齊搭巴士出旺角,睇吓裝修既瓷磚,面盆,座廁,花灑龍頭以及浴屏.由於店鋪七點左右就拉閘,所以唔係睇咗好耐.

行到一頭霧水,行番去附近既朗豪坊搵地方食晚飯,最終都係SKYBAR食.如果當年間Mr. Steak仲係度的話,我就一定會試吓dry aged牛排.生蠔拼盤同是日生蠔各一,兩口子好耐無出街食生蠔(二人世界不再嘛).

白酒忌廉青口,湯底真係又香又滑,用麵包蘸黎食,真係好夾,無醋油咁單調.

雖然侍應生話呢個位會喵嘈少少,但我就喜歡live band既感染力.

五成熟牛排,兩個人分黎食,份量都啱啱好(有生蠔作頭盤嘛)~當初入伙資金不足,無咩搞額外裝修.捱咗近七年,發展商既裝潢已經一一破損,加上浴室問題,不得不正視裝修事宜.......

陪太子玩水

放工騎羊番屋企攞埋冰袋飲品，再騎羊入黃金泳灘。假期日，停車場塞滿等位既車輛，我就係車罅間扭入僅餘既電單車排骨位。沙灘同停車場一樣，夠晒熱鬧。

落水前，兩母子合照～幸男上顎門牙缺口，好似廸士尼高飛。

準備落水啦，呢一幕有啲似將海龜放生咁…

天涯鏡拉近淺水區，小朋友同家長們一齊嬉水.不過離得太遠,唔夠大聲叫大家一齊望過黎入鏡。

婆婆為小朋友準備咗冰菠蘿,大家都心急掛住食,無心機合照。

全體大合照,小朋友既配合程度大致良好.我都有落水幫手看管小朋友,但自己比較喜歡游水既時光(已好耐無去泳池)。

大型充氣浮床,全部都係淘寶貨,要放氣壓扁,都花咗唔少時間。

尾段時間,小朋友係岸上玩沙,大人就動手收拾行裝.

人家帶幸男沖身後,我就騎羊將濕水既用品帶番屋企.自己沖完涼兼換衫,搭小巴去新金榮會合大隊食晚飯。

PS:懷念以前放工放假去沙灘飲酒曬太陽既閑情,番晏前去泳池既動力

T MAX-心動不如行動

之前已對TMAX 530 DX心動，最近官網公佈新色，前叉套及刹車鉗螺絲轉為金色，車身中間兩邊既回力刀型外殼由銀色轉成反光黑色，令我不得不作出行動。

早更過後，番屋企泊好愛羊，追住巴士app時間表岀村口搭巴士，上公路就訓…

假期六，店內都多人黎睇車。搵番較早前作電話查詢既職員,問多少少細節項目,再試騎座高一樣為80cm既X MAX,就係無現貨睇過既情況下開單落訂。

開完單,行去隔離舖既官方精品部,訂埋後座椅背,兼研究吓油箱袋既實物。YES GEAR職員開單時,我同職員講已夥拍現役愛羊12年,今次係人生第三架綿羊,如可以合作12年,到時我會50歲,掛靴前揸TMAX都叫榮休丫(職員賣口乖話我唔似38歲)~

一切準備就緒,八月番車就交一半車價,八月尾交車兼清尾數,即日安裝後座椅背。唯一擔心既係二代羊放賣既手續,以及腳踭唔到地黎騎新羊。

PS:記起第一代與第二代綿羊之間既空白期,雖然只係兩三個月,但感覺過得好慢同好無動力.........

番P補鐘

清玻璃櫃，長駐低層既栢靈頓熊要洗白白，當年以海量惠康印花換取(外母幕後幫忙)。

騎羊去相熟茶餐廳食晏,天時暑熱又猛太陽,幸好相熟泊位有少少樹蔭.為免飯後出車時會經歷生煎包,用seat位下既薄布作遮擋.

雖然今日早咗少少騎羊番工,但撞正排骨位有工程車阻塞,結果都係趕頭趕命咁去更衣室........

難得人腳齊,第二日又番晏,於是補鐘走人。一個人騎羊去新興食牛雜米，番屋企努力為收藏品封箱。

羊騎士之日常

背囊孭件獅子座,愛羊裝四件,好似走水貨咁,騎羊去迷你倉.

帶定個紅白藍袋,放係倉內作收納聖衣神話FX之用.驟眼望落去,應該夠裝晒十二盒.

回程兜番去燊光食晏,再將愛羊駛至藍地大街盡頭,方便去九記托啤酒,兼去老家送貨(話晒今晚番黎黐餐嘛～).

下一站就係接放學，由於無帶茶點，唯有貪方便去麥當勞買開心樂園餐。幸男未病好，只俾佢食粟米同飲橙汁(麥樂雞則外賣拎走)。

天氣太熱，忍唔住買杯凍咖啡，Mc Cafe 既價位都接近星巴克同Pacific coffee …

幸男放學前上體育堂，所以成頭大汗。其實放學時段，店內有唔少學生食茶點。

莆田補食外母生日飯

原定外母生日去“丁蘭居”既Anchor食自助餐，但因為幸男抱病而取消。台灣女生訂定枱去市中心既莆田食晚飯補數，適逢母親節，要七點半交枱。

鹽焗蟶子，殼熱肉嫩，鹽香提味～

馳名蟶子，再黎一碟蒜蓉蒸蟶子。莆田扁肉湯，冰鎮南日鮑，香伴海蜇花。

是晚之最莫過放黑胡椒螃蟹，以為細隻，叫咗2碟，點知幾大隻下。同職員講取消第二隻，但職員話已開料，只係唔可以一次焗2隻，要逐隻上。既然咁好食，又無得退，咪欣然接受囉～大排檔一隻薑葱蟹煲都要$300，大成培既$600一隻黑胡椒螃蟹顯得抵食！

玩物調遷

是日放假，訓晏少少就動手將客廳既聖域拆卸，將十二宮安放入盒。

基於裝修後既玩物擺位將會減少，不得不重組收藏品。幸好Jim係拉打迷，我可以為古迦搵個好歸宿。

歲月催膠,精巧既關節不敵十幾年既洗煉.....

本人好喜歡古迦座架之甲蟲裝甲模式,可能之前一直都係以左邊甲翼黎作支撐點,令關節位長期受壓。

食完晏番屋企繼續拆卸半個聖域,終於大功告成~

傍晚應台灣女生所約,一齊去參觀迷你倉。貪呢間係新開張夠乾淨之餘,隔間亦合乎最新既消防條例,全日冷氣開放(除咗零晨至天光),於是開咗人生第一個迷你倉,為期3個月(送半個月)。

由於無騎羊,唯有近近地行去工廠區內既PENTA HOTEL食晚飯。

香煎鱸魚配蕃茄本菇意大利飯,唔太食得出香煎既味道,反而之前試過既黑松露醬帶子意大利飯,更啱我口味。

白酒蜆肉扁意粉,蜆肉都算大粒,人家讚好食,我諗意思係好味過意粉屋??

上婆婆家接幸男番屋企,為免嘈到明日要早起身既兩母子,所以我匿入書房,用headphone黎打ARMS(問泰GG借玩)。雖然泰GG建議棄用體感操控以增加靈敏度,但我始終堅持呢個遊戲既賣點。

PS:如果switch支援藍芽headphone就好了,因為連住條電線黎雙手揮拳,有點怕纏結.....