支援後備球員

今日騎羊出傑志體育中心，趕去接幸男放足球比賽。大熱天時，冰巾經過40分鐘既車程而乾水。泊好車就立即係冰袋拎出凍飲黎降溫。

區隊U13教練話唔夠人出後備，所以whatsapp咗原本告假(準備考試)既家長，問可否讓幸男幫手當後備。原本幸男唔想出勤，但經父母既勸勉-過去藍天曾因後備不足，導致體力及表現下降而輸波，幸男至半推半就跟媽媽飛的出沙田。雖然睇得1節半(全賽3節，每節20分鐘)兼無個人入球，但球隊5比2壓倒排名第一既南華，總叫無枉費幸男既支援。

台灣女生順便約Brenda係沙田聚吓,我就負責回收幸男直返屋企休息。校啱時間，飲埋罐可樂入場等咗陣就走得。其實幸男可以跟隊巴走，但歸心似箭既佢，當然想盡快番到屋企門口~

PS:好在之前有俾幸男睇過SLAM DUNK，我話"你仲有6年足球隊既時間0架咋，你記唔記得大猩猩打高中最後一年藍球隊?"

係愛定係責任?

今日與兩母子晚飯後，騎愛駒去老家為老頭子洗頭沖涼，吹埋乾個頭兼收拾毛巾及其他用品，至番自己屋企。舊年睇<俺の家の話>，無諗過自己會好似男主角咁，要為照顧老人家而考量，擔憂及用心。

自上星期起，一星期兩至三次過去幫手換衫,洗頭沖涼，實在忍唔住佢面上既及頭髮上油質既皮屑。第一次強迫清理時，直係好震撼-原來胸前及背部都有厚厚既老泥，指甲腳甲亦厚長至嵌入甲床，甲隙更藏著垢物.......關節不靈活，做成既不便，原來我一直俾老頭子忍瞞著。

精神科跟進咗半年，總算控制住失眠及慌恐，但終日留家不外出既新習性，加劇了自身既關節不靈活, 及肌肉流失........好唔想老人家入老人院，但始乎我所做既一切，只係勉強著自己既初心。

六年

放假天，晴朗天。小學階段就快結束，適合接放學既日子唔多，同外母傾好，我去接幸男放學。

明明話放一點，等吓一班,等吓又一班，最終得番我一個家長企係度........雖然知道要去校務處攞電話，但都無理由咁耐丫?好在無睇漏眼，幸男真係咁遲先出黎。

防曬袖+冰巾係防暑恩物，車程短但多燈位，比高速巡航更難受~

八月頭就會離開就讀6年既小學，可惜疫情令幸男既小五小六失去了全日授課(無得係學校食晏)兼課外及體育活動。

當一天陪診暨外展員

又六個星期喇，帶老頭子出尖沙咀覆診，順便直接搭260X番市中心。因為託台灣女生約咗髮衛15:30做染髮，所以先係新都搵間$70速剪。"唔好成個科學怪人咁，嚇親個孫好唔好?"，老唔代表咩都唔緊要同求其。"係咪一心出殯做死個化粧?"，半串半鬧，再加大動肝火，先至可以推得郁行一次一少步。

老頭子染髮時，我行咗去PACIFIC COFFEE坐，校啱時間就去接佢走兼找數。雖然髮型只係沙煲式短髮，總算望落企埋啲。

連食都無衝勁(只鍾情燒味)，唔知係戒口太耐所致，定係抑鬱既徵狀?食量少，減少咀嚼機會,又亦或係太少說話及表情，臉頰肌肉都退化?趕時間放老頭子番屋企，唔記得咗係COLUMBIA留咗鞋俾佢試(上次大雨覆診時對鞋外面發霉)。

PS:老人家坐起身都好依靠手拉扶手柱，睇黎都要買復康腳踏車俾佢郁動多啲手腳。

父親節to me

朝早無落去排自助早餐，台灣女生打電話落前枱嗌ROOM SERVICE，幸男果份都係要另計。睇戲就睇得多係酒店房食飯，今次卒之目睹長方餐車變圓枱既示範。

由於晏食早餐,所以中午時份至落去泳池領取氣酒，幸男當然只係代爸爸拎住黎做樣合照。

明明升小三既暑假學過游水，而家話好驚水兼認自己唔識游水......幸男同我一樣覺得係房好過落黎曬，但一樣都係順同一個女人意落咗黎。

HEA到四點幾至check out，怕父親節正日多人外出用膳，於是係ifc附近搵咗間拉面店食埋至番屋企。我揀咗煙熏黑椒豚骨拉麵，再加慢煮叉燒，真係幾好味喎~

兩母子分別揀咗貝汁鹽味拉麵，以及貝汁醬油拉麵，食到臨尾至醒起無為佢哋影相….

酒店大堂有氣球派，無諗過幸男仲會要氣球。早食完個晚餐，行番去中環碼頭搭渡海小輪去尖沙咀轉巴士。

落船無耐就見到有雪糕車，幸男話想食就自己走去排隊買。相機放係酒店房太耐，搞到一拎出黎就有霞氣，錯有錯著令張相好在即影即有相紙feel~

對上一次係鐘樓下影相，應該係2013年暑假，因為我有曬張相放係當年新工作坊既枱頭。近來確實有點迷茫，唔知幸男第時會點睇我呢個父親呢?

PS:今日係酒店卒之都同幸男一齊打爆咗AGENT A(100円既SWITCH特務解迷game)，當中都有上網睇攻略出下貓。

家庭STAYCATION

番咗5日工，今日一家三口去Staycation，先係IFC既DALLOYAU買下午茶，跟住再去check in。

雖然係星期六，但路面人車唔多，我已經開始淡忘19年前既香港人流，原來照片紀錄係咁重要.......

安頓好行李，當然係放下午茶既時間~

我用台灣女生送既酒壼黎自備HOUSE WISKY，加埋罐BODDINGTONS，今晚既糧水無憂~兩母子去玩PS 5既賽車GAME既房間(check in時book時間)，我就留係房間。

酒店電視有定條HDMI線俾住客以接駁自攜電子器材，配合GaNerator switch dock，幸男可以係電視上打FIFA。

等落去餐廳食飯時，見幸男拎住個電話坐係度，令我諗起佢細個係溫泉旅館著住浴衣等lift(落餐廳)既bb樣~

由於今次係兩大人+小童(12歲以下)既組合，所以幸男既晚餐係要另計。係大人set dinner與兒童餐之間，幸男一度黑面，睇嚟反叛期初段。

結果幸男都係嗌set dinner，食過麵包盤上既麵包， 氣氛至緩和啲。

人家揀既前菜係海鮮薈萃-熟虎蝦，烤八爪魚，酥炸魷魚，青瓜及番茄牛油果莎莎醬。

我揀咗24個月西班牙黑毛豬風乾火腿凱撒沙律，幸男就揀咗中湯-牛肝菌白玉木耳燉豬展。

雖然菲力牛柳係吸引，但得120g兼配意大利風乾火腿(與前菜重覆)，所以揀咗要補錢既香烤美國頂級西冷~

酒店既DRINK LIST有COCKTTAIL，KIR ROYAL絶對係不二之選~

話晒係父親節主題，幸男奉命去我身邊影張父子合照。

人家揀咗菲力牛柳，無諗過塊火腿係包住塊牛柳邊，餐飲就係芒果汁。

兩母子既主菜都係一樣，起初仲擔心幸男食唔食得晒，結果係成功完成。

甜品一般，只係啱用黎影家庭照打咭，上次係1881 Heritage既 Steak Room好食啲~

晚上既街景比日間好，山頂被厚霧遮蓋，隱約見到淩霄閣既燈光。隔住玻璃，齋手持，呢張已係最滿意既一張~

PS:對我黎講，食餐靚飯就可以，只不過而家酒店好多時以留宿送晚餐作招徠STYCATION~

不溫情的父親節飯

番到屋企，內心仍然鬱結，砌詞話入元朗為愛駒叉吓電，其實係去咗以前阿強不時載我去兜風唞氣既地方。

淨望出去都唔夠，落樓梯去沙灘聽吓浪聲。如果唔係有兩pair情侶係度，我諗我會係無人既沙灘上向海大嗌~

原定今晚番老家食飯，買個蛋糕就當做父親節飯。奈何老媽一開口就單打老豆，"食咩蛋糕丫，手都遞唔高，睇四仔就遞得高...."雖然大佬同大嫂都在場，但我真係忍唔住大聲鬧番老媽"嘈夠未呀?食餐飯都要嘈，係咪唔食丫?可唔可以唔好係個孫面前嘈得唔得呀?"總係低頭唔出聲既老豆出手搭我膊頭"算喇,算喇...."出聲後，成餐飯再無難聽說話，彷如另一個時空，大合照不必了，只係託台灣女生為三爺孫留影。

行番上去攞車時，發現野豬向我對望，於是我行番落樓梯避一避，免得嚇親對方（我估野豬唔識行咁細級既樓梯咋）。係遠方監察野豬既動向，好驚佢會撞冧愛駒。泊車時見果3架電單車已走（兩男一女），反而多一架ADIVA。

見到野豬遠去，先至放心上前並開車離開，無諗過驚嚇可以抹去陰霾…

雨天FOOD PAPA

 

呢排都係驟雨頻頻，明明臨放工望天文台app話無雨，點知轉彎無耐就落雨，要急急係天橋底避一避......

天文台app預告20分鐘至會細雨，唯有拎定雨褸出黎，轆住電話等細雨。細個時好鐘意落雨，可能係因為我有把藍色底白色字圖既星座遮。見雨勢減弱，立即用雨褸包埋背囊嚟開車(咁啱seat位下擺咗嘢)。

今晚台灣女生有約，所以得我同幸男兩個人食。放工前已夾好幸男食和牛拉麵，所以直取v city買外賣。雖然重開晚市，但都唔係間間食店都坐滿，我就濕住褲(雨褸跣晒雨水落屁股位)黎邊坐邊等嗌冧巴。

番屋企快速抺車兼焗埋碟雞翼，沖好個涼就正式開餐~太忙亂了，叫幸男代影相及send俾媽媽作滙報。

感觸的一杯

今日番晏，收到消息，一位前輩於傍晚時份仙遊。雖然知道前輩一直被頑疾纏繞，但消息之突然，全因無朋輩得知最近既入院。

前輩係不拘小節之人，外剛內柔既男仕。與前輩一齊食過飯,飲過酒，更衣室一齊胡鬧過。對上一次見面係舊年7月大假，同埋大Vicky一齊食晚飯，仲有飲少少紅酒。番到屋企，係酒櫃拎出尋晚有剩既紅酒，希望與遠方的你飲杯。

不一樣的金田一少年事件簿

今晚同台灣女生一齊係Disney+睇第五代既金田一，第一集既故事當然係經典既"校園七不思議事件"!!雖然仲記得兇手及手法，但細節已唔記得(只記起工作坊既七不思議事件之"無水既水龍頭")，音效好似同當年一樣。

男主角道枝駿佑俾我既感覺好韓風，而且無初代前輩堂本光咁充份演繹出漫畫裡金田一既聰明但平日懶用腦既本質(火影中既鹿丸)。另外，金田一既淘氣與認真既對比，亦無上代前輩山田涼介咁突出。劍持大叔澤村一樹飾演又幾夾，上白石萌歌扮演既美雪稍欠點"身形"。

拍埋一齊睇，真係無乜漫畫既味道，不過都會追睇既，情義結嘛。

PS:劇情要與時代進步，學弟佐木龍太既手提攝錄機變成智能電話配三軸穩定器~