今日收到電話短訊，兩星期前配既眼鏡已經到貨，所以騎羊同台灣女生出V-CITY食晏兼順道攞眼鏡。特意配番現役單一度數眼鏡既框，因為OWNDAYS門市既框真係好唔掂，亦為自己容易接受。正正係番眼鏡88配HAMAMOTO框，順便問漸進鏡既選擇與OWNDAYS之分別，最後至係88配有廿個分層既蔡司鏡。
試帶完就去一田超市會合人家，88職員話我好似都幾適應新鏡(無暈到坐低或面有難色?)，我仲答職員:我今晚會帶住佢黎睇英超。爭取時間作磨合，商場內一路嘗試望唔到遠近同位置既感知，買齊嘢開車前至換番舊鏡。
雖然話漸進鏡可視區域呈T型，但邊界有幾濶確實要試過至知。望近嘢要用鏡片既下半截，方便睇手上既電話或書本或手錶，但當無近物時，下層貨架既影像會變矇糊，繼而影響腦部既判斷以致近似頭暈既不適。晚飯時間一如往常向右回頭望電視，當回頭望番飯枱近物時有暈船浪既感覺(地平線左右搖蕩)，真係要趁呢兩日放假，要好好適應新視界。
