擺酒18週年

紀念日子，照舊用愛駒去相熟花店，領取婚後第十八個接新娘花球。是日閒日，未能為台灣女生係日光下影相，唯布淨影住紮花先。

晚餐係人家預訂既Hyatt HUGO用餐，之前同過老媽大佬同阿嫂去隔離食過自助餐。餐廳燈光非常昏暗，呢張flip 7相zoom到盡兼勁高iso至影到。

自拍係外屏補光之下，總算無鬆郁朦。

有備而來，為既係5 Course Classic Set Dinner七折優惠。2位都跟wine pairing，侍仔同我哋講wine pairing係無折扣，當然無問題喇。

頭盤係生蠔兩隻，但已經配上香檳作開場。

好在我有帶A7 III配大光圈35mm鏡，順利於低光下為繪影人像照。

法式焗田螺，人家話燈光暗到睇唔真至有勇氣放入口。大光圈下既手動對焦，要數次至滿意。

現場即制忌廉白蘭地龍蝦湯，除咗有火舌搶眼之外，味道亦夠濃厚(如果多舊龍蝦肉就好了)。

主食係法式黑胡椒牛柳，配酒當然係紅酒。雖然唔係和牛或DRY AGE級別，但調味及火候搭救足以完勝普通西餐店。

甜品有Wedding Anniversary牌仔，有燭火作補光，點可以唔打個靚咭?

自拍無專業模式，但求方便紀錄。

我揀既甜品係法式芝士拼盤，起初仲怕個餐較細份，但去到甜品環節已夠飽。

餐牌以外既甜品Chocolate Bonbon，乾冰冷鎮既手工夾心朱古力。食唔出奶白既內餡係咩食材，但就堅好好味。

邊諗到甜品都有20%既甜酒配丫(vintage 1969 Mas Amiel同Graham’s 20 Year Tawny Port)?除咗頭一兩杯，其他都由我代飲一半。去到配甜品個杯太甜膩了，我都未能完成清杯。不勝酒力之下，Call Uber的士回府，話晒聽日大家都要番工。