裝修進度

 

之前咩都話無問題既吳師傅,有一日話唔識裝個抽油煙機,於是我哋要好急咁搵番中原黎約德國寶黎安裝.尋日打風,諗住今日都無機會有師傅有間黎搞,點知今朝office姐姐話今日可以有師傅黎裝.安裝師傅係之前黎睇位個位,所以自己暁入黎,唔洗行出去接.裝咗上去又幾好睇,夠簡約.
 

即場試機,無問題,外面既通風葉都運作正常,無話打唔開.

新居既小型裝潢大致上七七八八,全屋上油,,全屋燈飾安裝,釘頭轉擰頭燈座,廁所假天花,廚房廁所加電制兼鑽窿裝架,戶外防水電制,戶外水喉制......只係裝抽油煙機同界大人造石灶面(裝煮食爐)呢兩個工種要外援.聽日油多一兩層油兼全屋窗簾架安裝,183cm既雪櫃可以啱啱攝入掛牆廚櫃底,可以慳番改廚櫃既錢,用黎搵發展商封廚櫃頂虛位.

好在大假咁啱可以夾到用黎搞新屋, 窗花蚊網又可以趕到時間,如果要係番工日子搞的話,真係好煩上加煩......黎緊既時間就要努力執嘢入箱,希望大假尾段可以入住新居~

CHECK車日

一個人邊睇雜誌,邊啜ICE CUPPACCINO,無錯,今日係去咗觀塘CHECK車,所以係APM打發時間黎等攞車.自從APM開咗,我就多咗個地方等攞車,以前只可以係工廠區啲茶餐廳死坐死磨,再行吓啲小鋪,再唔係就坐公園.咁啱有本室內裝潢兼家具雜誌,啱晒搞新屋入伙既我.其實PACIFIC COFFEE啲雜誌少過STARBUCKS,但飲品同食品就好啲~

行咗陣商場,揀埋幸男既生日咭,台灣女生份生日禮物兼生日咭,近一點左右打去鈴木問,原來部車已搞定.係車行門口見到有三部祖國出品既電單車送到黎,雖然望落都係街車款,但DETAIL位都係差啲,話晒都係細CC車款,定價又比日本款低,無法子,一分錢,一分貨.........

騎羊番入屯門,唔洗一個鐘就到,老豆又係咁上下時間黎探幸男.每次見到幸男,老豆都係咁開心.

人急智生

今日番晏前騎羊去市中心食飯,點知食飽去攞車時發現布冚單車鎖壞咗(都用咗好幾年),無法打開.心急如焚,一黎趕住番工,二黎就算放低愛羊,收工都要摸黑番黎鋸鎖.

死擰爛擰,卒之有一下CHOK開咗個鎖,於是急急開布冚,燵車趕番公司.當番到公司停車場,另一個問題又出現,點樣固定個布冚呢?唔落又會好大塵,兼容易俾人HIGH花.靈機一觸,用車前方既小收納格內既方巾,捲成條狀,穿住布冚同前轆,再打個結.

跟住就跑去更衣室換衫,趕排LIFT番上工作間.................

小歌仔生日,拍拖紀念日

今日係小歌仔既生日,又係我同台灣女生既拍拖紀念日,由於工作兼湊仔,加埋搞新居既頻撲,攰到要壽星女入黎屯門黎食飯,地點揀咗黃金海岸餐廳.

幸男當然有份出席啦,成晩係度搣紙巾,搞到我執餐慒,可惜佢無點望鏡頭同壽星女合照......

無叫餐,除咗生蠔外,重叫多四款菜,有個白汁煮藍貝好好食,但唔記得影低個樣.

我同人家最近都攰到爆,殘到出樣,一影合照就睇得出................
 

食完嘢,小歌仔陪我哋坐的士出市中心間中原,搞冷氣機訂單,真係唔好意思.謹祝小歌仔,生日快樂,青春活力,身體健康(人愈大,愈覺得呢樣緊要)~

PS:係沙灘度黑媽媽,NEX-3既A mode兼無腳架輔助之下,都有咁既效果,本人已經好開心,覺得物有所值了!

玫瑰男

前幾日幸男開始低燒,尋日開始塊面同頸出紅疹,但見佢無再燒,食得又訓得,所以睇住先,聽同事講,話應該係玫瑰疹,無發高燒就應該無咩事.

今日同台灣女生番完早更,係市中心食吉野家食晏,臨出發去沙田買家品嘢前,打電話問外母有關幸男既狀況.點知外母話幸男個身都有疹,又無胃口食嘢,朝早七安士奶飲得五安士,啱啱食得半隻蕉(平時食一整隻),成日好想訓咁.聽到咁既消息,當然同人家一齊搭輕鐵番公司,騎羊番屋企望吓.

見幸男訓緊訓,我哋沖過涼,換套衫,CALL的士去睇私家醫生.一上的士,幸男開始有玩有笑,心知不妙,其實出門前問過外母有關幸男午餐既食量,外母答"食剩幾啖囉".入到診所,幸男唔肯自己磅重,姑娘話搵個大人抱住佢黎磅,之後減番大人個數.外母慌張到放低自己個袋落地面,想抱住幸男黎上磅,其實佢個女都有手可以咁做.

入到房見醫生,醫生問邊個係主要湊佢既,外母搶答"我".............醫生診斷為"玫瑰疹",過一兩日就會退,無高燒就可以了,埋單$250,syrup panadol同piriton.........
外母抱住幸男搭的士番屋企,而我同人家就搭巴士出沙田買新居家品,結果六點半至出到沙田,係ikea行到九點至係訂貨櫃枱排隊,十點半至走人.我就九點個陣已頂唔順,係ikea度食咗個$10熱狗餐(一隻熱狗,一杯汽水).番到屋企成十一點半,外母已換好衫等番屋企,幸男已食奶兼訓著咗,人家只係叮番熱啲湯當晚飯,今日真係好攰.................

太興晩飯

見到杯冰鎮奶茶,就知道係太興.無錯,今晚同台灣女生一齊番夜,所以騎羊出去卓爾居度食晚飯,星期日難搵位,咁啱有張雙人枱.話時話,太興既冰鎮奶茶係好味啲,因為無俾啲冰水溝淡味道.

又名"燒味怪"既人家,今次竟然唔叫燒味,點咗鐵板牛仔骨,同埋西蘭花炸蝦球,仲飲埋個老火湯添.其實我幾怕星期日番夜兼撞正同台灣女生一齊番,因為要外母一個人湊幸男,第二日SLEEPING,兩個人都無咩體力同精神湊幸男.

唯一好處係外母會係我哋A放工之前湊幸男上佢屋企,變相我地中間時間可以訓得好啲,唔會俾幸男嘈醒.

幸男遊德福

今日同台灣女生湊埋幸男出去德福見吓中大同學,一落車就去PACIFIC COFFEE開奶俾幸男,我同人家當然有幫櫬啦~食完奶,幸男同SILVIA,RITA,BRENDA玩咗陣,再一齊行商場.

夜晩係RUBY TUESDAY食,幸男一坐底就喊,好在環境都唔太靜,無咁醜怪嘛~

IRIS帶埋晴晴黎,晴晴依舊多表情,今次叫我個名時,發音準繩度高好多,叻女.

彤彤同有跟JUDY黎聚餐,JUDY話呢一身裝扮既主暊係"清秀"......................

尾段叫咗個甜品一齊分黎食,其實幸男有妤幾次都扭計喊,唔知係咪餐廳熱同嘈既關係,我要抱佢出去行陣至安靜.

影埋呢張大合照,我就最後一次抱幸男出去,今次係MCL度睇新海諴作品展(一個角位),抱到幸男訓著.係戲院大堂又行又企,一片心等人家話散場至入番去餐廳攞嘢.

花樣"笑"男

呢排幸男笑多咗,對父母黎講當然係喜訊,至少可以當作辛勞既小鼓勵.

名副其實既"笑到見牙唔見眼",本人都幾鍾意見到幸男咁既樣子.

 

幸男食糊仔時會咬住隻羮唔放,同你玩鬥力,我都試過用牙咬住另一端既位置黎同佢玩.見無人同佢玩,幸男就會自己拉番隻羮出黎.

大興遊

今日晏晝先去GORDON屋企探ARIEL,再同大伙人一齊去綺雯屋企,見到咁多鞋就知有幾咁熱鬧~

主人家當然有同BB新力軍-ARIEL影番張合照啦,之前係GORDON屋企坐個陣,覺得佢好有耐性,影相時盡顯慈父面相
.

幸男係媽媽既陪伴下,與主人家合照,可惜掛住玩水樽,無望鏡頭........

身為大哥哥既幸男無咩點關照ARIEL,除咗搶ARIEL既紗巾外,仲抆人哋衫尾,踢波就犯晒規.好在幸男都無話大力拍打ARIEL,幸男一向粗魯嘛.

其實姐姐們為我哋準備咗大餐,本人就最鍾意咖哩蟹,因為好耐無食,多謝主人家既款待,姐姐們既辛勞!

幸男今日仲同綺雯既愛犬握手,第一次摸小動物喔~可惜無大伙兒一齊影張大合照.

第二次農務

今日番完個幾忙既早更,騎羊番屋企換套衫,上埋對CON,出村口食個下午茶,就騎羊入元朗去德輝塊農地會合JACK,JACKY同賢仔.朝早德輝已搭好個涼亭仔,有啲似巴士站~

對上一次黎都已經係上個月七號,當時只係一大班人黎除雜草開荒,而家就真係似樣好多,有啲規模.

有個用廢木搭建既儲物櫃,真係不得不佩服德輝既手藝~

天氣太熱,後來農務總監JACK帶領住大家打大赤肋黎開工.雖然只係兩個鐘多啲既時間,但翻泥,鋤坑,打井水,運水灌溉,真係好攰,收工時右手已有三個水泡...

因為無晒啲雜草,多咗空曠活動地方,無咁多蚊同蟲咬,所以今次無好似上次咁長衫長褲.帶住太陽鏡黎做嘢真係爭好遠,無咁辛苦~騎羊番屋企接外母手湊幸男,臨九點攰到我有我係梳化一角訓,幸男有幸男攤正係梳化訓覺.....(台灣女生放工番入屋就見到)

仁義英雄Captain America

 

今日同德輝,賢仔一齊係新墟凱都睇3D版CAPTAIN AMERICA,雖然特技局限於二次世界大戰年代,但故事整體OK.男主角無開天劈地既超能力,只係由奀仔孱仔變咗高大兼體能發達既強化士兵.如果唔係有個稀有金屬既盾牌擋格,真係唔知要死幾多次.

我諗起中國既說話"仁者無敵",男主角為正義捨己救人既精神,感動同行既士兵,一齊出身入死,屢立戰功.雖然無壓倒性既勝利,但經努力同團隊合作而取得既成果,反而來得人性化.

好在之前租咗隻ＩＲＯＮ　ＭＡＮ２，因為今隻有ＩＲＯＮ　ＭＡＮ主角既老豆出鏡，科技博覽會亦有歷史關連．出完字幕後既預告片,話出年既"復仇者"會有好幾個超級英雄同場演出,相信到時CAPTAIN AMERICA會唔會被比下兼搶去鏡頭.....(可能定位係英雄團既領隊,負責發號司令同補位)

我愛住家飯

今晚台灣女生新自下廚,二人前三餸飯.一向鍾意舒舒服服咁坐係屋企食,但有咗幸男之後,人家都無咩時間同精力可以下廚.
蒸花甲,蒜香牛柳粒,清炒白菜,加埋支英國啤酒,心滿意足~
期待幸男大個啲,一齊坐係飯枱前,共享晚餐,一家人胡扯自己一大天的經歷及感受.

JACKY邀請大家BBQ

雖然今日同台灣女生係番A/N,但我哋訓到七點唔夠就起身梳洗,騎羊去藍地,上JACKY屋企既會所燒嘢食~

雖然係無火煮食,但多得女仕們不怕油煙,為大家安排熟食~今晚有啲風,無預期中咁熱,大家都無話身水身汗,會所露天燒烤場夠大,又多枱橷,人多都唔覺迫.

今次JACKY請咗好多舊朋友,舊同事黎,包括Gloria同Ronnie~

好耐無見既福蛙都有黎,對上個次見佢都係幸男出世無耐個陣,可惜今次帶唔到幸男出黎見吓面.

一班朋友兼同事一齊飲飲食食,就係最好既減壓活動,不過我同人家食到八點半就先行告辭,騎羊番公司當夜更~

舊店

星期日,食開個間村口茶餐廳竟然無開,唯有去泥圍裡面間士多碰吓運氣,因為店舖主人巳半退休狀態,好多時都唔開檔做生意.
難得有開檔,不過只係賣啲輕手嘢,於是叫咗個餐蛋治加杯凍奶茶,望住愛羊黎食,食完就騎羊番晏晝更.
鍾意小店舖,因為感覺比較有人情味同親切感,.舊既建築結構及用具(真正既古物,非仿古),總是令人充滿回憶,及幻想..

家庭照

台灣女生話我哋好少合照,由於拍拖時代買既腳架唔太啱用,所以都少係屋企影合照.今日收到邦邦私人讓出既腳架,放工就騎羊番屋企影吓生活照.

平時又要番工,放工又要兼顧家務同湊小朋友,真係攰到無咩心機特意開個腳架黎影合照,只係用電話相機或者係神心啲用部無反機黎影吓SNAP SHOT.人家都講得啱既,幸男一日一日咁長大,唔影多啲相,真係會有啲可惜.係電腦芒睇番幸男出世到而家十個月既相,都覺得樣貌及成長階段有所轉變(不過脾氣依舊差同成日喊).

情義結

今日同台灣女生騎羊去置樂間"娘惹"食晏,見雅仕堡外圍晒木板,唔知係裝修定係執笠清舖.
以前住康景時,係房望落去就係雅仕堡,初中讀書時代唔明點解酒吧有咩好去,啲人夜嗎嗎唔去訓,嘈嘈閉.
預科過後既TRAINING時代,經常同兄弟們黎飲飲食食,細說心事.每次經過,都係充滿著回憶.
13年了,雖然大家聚會少咗,但我仍然記得舉杯時既對白,"gentlemen, all the best!"~

天倫樂

 

台灣女生未病好,所以今晚帶埋幸男出市中心海霸食飯.幸男臨落小巴開始"鍾"眼訓,入到酒樓就訓到側晒頸.

 

叫咗三餸一湯,蒜香蒸蟶子皇兩隻,豉汁蒸帶子四隻,固嚕石班塊,同一盅佛跳牆. 味道一般,埋單$240有找,都可以話合理. 幸男訓醒時,其實都差唔多食完,準備餵幸男食糊仔時,幸男同啤酒推廣員笑,可惜攞唔到咩著數~

食完飯,同人家去咗眼鏡88配眼鏡,揀完鏡框,等人家驗眼,幸男四圍望,又用手抺玻璃櫃,又企係櫈度流口水....