COMPUTER LOCK OFF

今晚卒之初試GOOODSMILE超獸機神合體，步驟與合金魂相若，只需重點係說明書了解強化既細項。

比例太正，力壓BANDAI，千值練，以及THREE ZERO。以往常被忽視既鷹戰機，今次係三個形態都好出色。實體望合體時既頭像，比CG圖靚得多，頓時重燃買多架既念頭，咁就可以玩到爛都可以有後備機體~

PS:忍唔住要係電腦開番DANCOUGA既片黎邊睇邊玩。

玩具日

上年8月訂落既GOODSMILE DANCOUGA已經到貨，今日sleeping day都出去熊貓玩具俾埋尾數交收。雖然網上已有不少開箱片，但親自開箱睇實物係多一份質感同自主。

拆盒後既真身，各機既人形模式都好出色，細節既強化唔會太過火，比例不再"不似人形"。心急既我，竟然未將象戰車既腳趾完全翻出(現只係象形態既腳趾)就影相，有辱死忠之名。今晚擺住人形模式既小隊先，聽晚再試合體~

田今日另一個驚喜就係呢隻NEW AGE第三廠既變形金剛POWERGLIDE，三舊水有找。

的骰得黎，細節又唔差，機械人完全同動畫無異，只係腳掌內外都有鉸位外露。

飛機形態亦相當討好，塗色非常均勻，手臂既收納成功隱藏拳頭，比正廠及其他第三廠既設定出色。

雖然盒背有故事出現既女角，但其實係唔包既。其實早幾日放低吸拖機維繫時，上去熊貓玩具都見到呢盒POWERGLIDE。番屋企上網做功課，睇均都係NEW AGE既出品較可取，所以今日見仲有現貨就即課金。

說明書有點簡陋，根本無可能跟到，結果我係YouTube搵片跟住黎變。

PS:原本帶咗個大袋出去拎斷空我，結果都係唔夠，要用店舖提供既大膠袋至得。

一人電影@戲院

 一心今日去英皇睇《命案》，點知記錯時間係11:40，結果開場前10分鐘至騎愛駒出門。泊好車就跑上戲院，急買飛再衝入場，竟然仲趕得切睇戲院禮儀短片。

仲以為頭段通常無咁重要，遲入場少少都應該OK，原來一開頭既妓女假死避劫就已經係貫穿全戲既引子開端。

Lokman所飾演既茶餐廳少東，因為送外賣而意外目睹連環妓女兇殺案既現場，繼而重燃內心深處既殺生天性。林家楝所飾演既玄學命理大師-許陽燊，亦因為呢個兇殺案而遇上Lokman，並算出Lokman將會因殺人而受牢獄之災。

許陽燊不忍再有無辜受害者,於是用盡畢身所學，為少東避劫。當中包括放生(鴿)，住有牢獄格局既住所以應劫(如洗牙應血光之災)，再傳受經文以靜心，配上風水擺設。

只惜天意難逆，少東意外拾取連環殺手之凶器，更為之著迷，一切方法始乎都無助少東之殺意。正當為男主角們心灰之際，許陽燊以鬼上身之方法，去令少東之凶性被善良命格既亡靈所取締。編劇既奇想令觀眾再有驚喜，竟然陰差陽錯地誤將存放於同一殮房之兇手召到少東體內!!

PS:繼《毒舌大狀》之後，再一次睇咁地道既港生產片，無合拍片既突兀，街景，對白，演員都係100%港式。以前我覺得一個人入戲院睇戲係孤獨，而家中年既我反而覺得係難得既me time(8/10)。

仲會為幸男買車車

早更收工趕番屋企拎壞咗既吸塵拖地機出旺角，交俾代理作維修跟主進。順路上玩具熊貓睇下有無得攞預訂既超獸機神-斷空我，可惜要等多一兩日至到貨。櫥窗見到Ferrari既玩具車，即刻影低並send去一家三口群組問幸男啱唔啱，結果買咗之前玩switch asphalt 9用過既FXXK。可惜Ferrari 488GTB，唔係猛龍特警版本(開蓬Spider兼啡皮內籠)。

校啱時間落樓去對面馬路既巴士站等車，撞正放工時間，但唔算太塞車，八點多啲就番到屋企開飯。

有別TOMICA，Bburago車既SIZE較大，造工亦比較細緻。忍唔住要用A7iii配TAMRON 28-200，幫FXXK影番張相~

PS:記得幸男細個時向林村許願樹，寫下"好多車車"既願望。

中式早餐

連續兩日番早更，為咗唔想連食兩日麥當勞，我都會係第二日帶麵包做早餐。今日心血來潮，不如好似康楠以前番救生員咁，係藍地點心外賣丫~

"唔該，有無潮州粉果?"

"有"，立即掀蒸籠兼夾入發泡膠外賣盒，再包膠袋。

"幾錢?"

"廿蚊"

以前係canteen(大家樂年代)會食點心拼盤早餐(餐飲為凍奶茶)，今日有少少"那些年"既感覺。

PS:味道唔差，SIZE唔算細，下次孖A都會考慮呢個"那些年"早餐。

初嘗竹鶴17，再嘗柔細和風

之前錯過咗相熟網店既$3480優惠，失意次下上PRICE.COM搵，意外搵到一間賣$2700，仲要可以係兆康站交收。收工騎愛駒去西鐵站等交收，撞見唔少公司同事(少尷尬)。最後交收平多一舊，因為店員話唔要禮盒可以平啲。

番到屋企，沖完涼就開樽試酒。台灣女生見樽蓋封口錫紙有啲橙色痕（花痕？），擔心係假酒，我答“如果有乜事，就幫我提字-貪少便宜”。

香氣:柔和, 果香濃郁的口感加上辛辣的丁香搭配櫻桃薄荷

口感:有著豐富的水果味芳香加上宮城峽威仕忌華麗而多變的滋味

尾韻:如同柚般的尾韻領人回味無窮

網評既描述大致符合，但點解香氣會有口感陳述?與響17相比，我會較喜歡響既荔枝香味，但可以再嘗柔細和風，已心滿意足~

MAX FACTORY

係相熟玩具網站見到熟口熟面既裝甲FIGURE，咦?超音戰士既ALICE嚟喎!細節上同TV版有啲唔同，原來係MAX FACTORY既出品。

幾年前已經有ACTION TOYS既DIE CAST ACTION FIGURE系列既灰模，本人幾鍾意佢既原作風格。事隔多年都無聲無影，唯有繼續守望3位主角兼"山達"(電單車).......

反而電腦警察CYBERCOP既灰模令我期待，因為咁多年來都無玩具廠以新技術，去復活呢套作品。MAXFACTORY既取向有別於線條過於簡單既TV設定，細節強化既力度恰好，唔會蓋過原作既基礎元素。

數學應用題

用咗太陽能版叉流動電池一陣子，計過一度電先個1蚊的話，咁我舊256Wh電池(0.256度電)即係慳0.256蚊，好似CP值好低咁(好難回本)，但用碳排放黎計呢?上網搵到碳排放計算機，特以用大啲既電量黎計吓一度電既平均碳排放值。

43÷60×0.256=0.183千克CO2，即係183克二氧化碳。每叉滿一次電，就為地球減少183g二氧化碳，感覺好似多啲正面動力。

STANDING BY

網絡上見到幪面超人FAIZ既20週年作宣傳，覺得非常雀躍同感動，因為BLACK同RX之後，我鍾意既拉打就係KUGA同FAIZ。驟眼睇，AUTO VAJIN外觀依舊，只係FAIZ本尊有別過往。

唔知係咪2020年出既SIC FAIZ試水溫作，促使今次既20週年作~

外觀上有不少進化，心口既胸肌甲變成一個大FAIZ形護心鏡，腰帶既FEATURE PHONE亦變成智能化。好期待新絶技既演繹，唔知PHONE BLASTER仲有無得保留呢?

PS:仲記得當年睇GAME NEXT有介紹來季新RIDER-FAIZ

發脾四兜風

學車時代，每逢心情差既時候，都會話"如果我有部電單車，今晚一定會出去兜風"，今晚我正正係呢個心情。晚飯都無食，約咗阿基係青山公路一避車處集合，一齊上公路兜風。

上次日光日白出去青衣碼頭行錯路，今晚反而一TAKE過到達。少打Blog，除咗忙工作同調教幸男之外，電話相機既不濟亦係主因(呢張夜景就係實例)。

自備凍飲，望海闊談，參考多一個人既意見，總比獨自鑽牛角尖好。

11點多啲回程，由於未食晩飯，回程去紅橋金銘食宵夜。點都係新興好食，但苦奈何得金銘未閂，唯有志在裹腹...….

PS:每次帶住阿基架車行，都覺得佢盞大燈係著住高燈，永遠有道白光照住我車前，好似有UFO追住我咁。

低效能環保

朝早收到ECOFLOW戶外電源，衫都唔晾住，立即試駁太陽能充電。十一點左右下既陽光，見到輸入有25W，舊電本身有28%電量。

跟據說明書既示意，將太陽能板(配合攜便袋)以橫向架起，並盡量90度朝向太陽。

中午過後，太陽位置變更，忽發奇想，用木梯同戶外桶撘起滑梯陣式。太陽要猛到人覺得皮膚熱感，先至可以有電量輸入，最高W數見係三十幾左右，唔知盛夏會否可以突破40W呢?原本無計回本期，只求為環保出分力，但計落叉滿舊電都係2毫半幾字，要賺番塊太陽能板的話要叉成7千幾次......都係一片心當係方便叉電話，尿袋同吸拖機就好了，至少停電可以插風扇頂幾個鐘丫~

PS:反而尋日台灣女生係順豐站抬番黎既洗碗碟機內架有驚喜，今次最入個行V型架(深灰色)可以平放，咁洗煲同鑊就方便擺位及淨好多。

失意的孩子

霓虹亮透晚上 把城內也照亮

猶豫在馬路上 只求在這午夜
找一個 新方向
皇后像公園裡 光芒密佈積聚
遙遙望向對岸 海旁萬點燈光
多淒美 的境況
唯願到處去看 這黑夜 願去闖蕩
隨著路燈牽引 她朝著我靠近
名字沒有去問 只求共我放任
星光裡 飛車去
期望我倆佔有 這黑夜
踏上這架快車
燈光裡飛馳 失意的孩子
請看一眼這個光輝都市
再奔馳 心裡猜疑
恐怕這個璀璨都市 光輝到此

紅黃綠燈驅散 心靈盡處界限
無懼夜風冰冷 車從沒有變慢
多荒誕 的今晚
城內到處去看 這黑夜
沒有終站
沉悶極這一晚 星辰劃破黯淡
華麗夜市燦爛 晶瑩亮透熾熱
的雙眼 驅不散
期望我倆撲向 這光亮
墜進這晚臂彎
燈光裡飛馳 失意的孩子
請看一眼這個光輝都市
再奔馳 心裡猜疑
恐怕這個璀璨都市 光輝到此
燈光裡飛馳 失意的孩子
請看一眼這個光輝都市
再奔馳 心裡猜疑
恐怕這個璀璨都市 光輝到此

PS:每次聽呢首舊歌，都覺得好似係時光旅行者既作品

採購，集資，送貨

之前已睇中呢款40週年版宇宙邢事超合金，作為大佬既生日禮物。SIZE唔掗位，除咗超合金閃呤呤，仲有埋架車，腳掌同車面有磁貼機關，原來仲有播歌聲效。由於發行日期係四月尾，所以變咗係補送既禮物。尋晚收工去咗何褔堂搵老闆娘交收($1050)，老闆娘話無諗過會有生客去鋪頭問，好在我whatsapp問咗先(得兩盒)。

今次搵幸男夾份送禮物(報上價值)，我問幸男夾幾多，佢問番我轉頭俾幾多。"你夾幾多，剩底既都係我俾0格"。結果幸男夾$250，寫好紙條，就由我用愛駒送遞到伯伯樓下交收。

PS:希望幸男可以懂得去愛人，而唔係純接受親人及朋友既愛.....

GOOD SMILE EAGLE FIGHTER

今日係YouTube相熟玩具Channel，見到有關good smile超獸機神斷空我既最新消息(明明之前已有一個最終調整既介紹)，原來今次係鷹戰機既專題。將原本捲摺於底部既雙臂向下翻，可以完美呈現BEAST MODE既英姿!

其實劇場版"GOD BLESS DANCOUGA"裏，打最後大佬前既合體準備時，鷹戰機都係雙手下放，婉如獵鷹撲殺之勢。期待五月份既派貨，到時再考慮會否買多隻作珍藏。

兜風+買鞋

放假兼好天，一於食完晏出車去東涌睇吓有無夏季鞋啱心水。半個鐘左右就到，飲完自備既凍飲就入商場，人流比之前多咗，唔少拉喼客。

先去ROCKPORT睇，款色同冬天時無咩大分別，於是去2樓GEOX望吓。今次見多款咗，仲多過最近係銅鑼灣SOGO專櫃。唔知係咪尖沙咀SOGO既貨被調黎呢度呢?睇中咗黃色同白色，黃色用黎騎羊粗著，白色就可以平時行街襯衫著。

其實之前都有見過GEOX既SPHERICA鞋底系列，但怕個底會濕地跣腳兼快蝕。今次買兩對有8折，狠下決定睇吓呢個系列啱唔啱日常番工渣車用。

回程順便去泳池搵康楠攞嘉輝代買既高達GAME，希望可以夾到一日一齊黎玩~

幸男新TWS藍牙耳機

今日番晏之前，騎愛駒趕去食燊光食晏，再撲去市中心栢麗既YAMAHA攞尋晚網購既TWS藍芽耳機。

上次睇超級瑪莉奧兄弟電影時，幸男散場後至發現跌咗個TWS藍牙耳機(我過俾幸男既MAVIN AIR-X)，之後入番戲院成功係地面尋回。早兩日幸男話個耳機叉唔到電，細望之下發現充電盒已經被跌爛，所以無法為耳機叉電。

當初同幸男講係佢要自己出錢以承擔責任，我只係幫佢代為上網訂購。計落我好似無送兒童節及12歲半生日禮物過幸男，所以當半心軟半補送，放工番到屋企搵朱古力既絲帶包裝黎為小禮品裝飾。原本幸男揀咗款DEFUNC True Audio耳機($599)，但我望過個spec一般(無APTX)。上網做完功課就揀咗YAMAHA TW-E3C，$698有APTX Adaptive，無得輸。電話send條介紹link俾幸男過目話ok，黑紅藍灰米綠，幸男揀咗藍色~

懵盛盛既幸男話耳機無電要叉下先，諗落無理由一滴電都無丫，結果發現耳機既充電金屬位被膠紙封住，故打開充電盒都無被"嗌醒".........幸男邊睇波邊試耳機，評價係好過用開既MAVIN AIR-X，希望幸男會好好愛惜。