One shall stand, One shall fall!

 

中午送過台灣女生番工,自己同羊仔一齊去市中心.搞完銀行野,繼續行去新壚凱都睇吓有無變形金剛飛賣,結果買咗九點五十分個場,啱晒人家放六點半,食埋個晚飯至去睇.

風和日麗,係新壚同市中心買完糧食同日用品,就騎羊番屋企執野去泳池游水.兩點七出發,本來十分鐘多啲既車程,變咗要成半個鐘.因為屯門公路近置樂過泳池既天橋臨時封閉,成班交通警欄住晒個入口,焗住要行到小欖路口cut出去,行青山公路經黃金三聖再去泳池.(如果唔熟路都唔知點算)

夜晚同人家係屋企食過唔太好食既住家晚飯(本人厨藝拙劣,加上俾街市阿姐呃),跟住就騎羊出發去戲院.雖然聽德輝講心愛既jazz會俾麥加登攔腰分屍,死於非命,但目睹慘案後,腦海都係不斷重覆住"爵士殉職咗....."算吧啦,反正佢係片中都唔係太多戲份,而且卡通裡,第一代博分派既角色都係會冚包散o架啦...

齣戲都幾好睇同緊湊,雖然博狂兩派角色唔多,但勝在有搞笑位,同夾雜美軍小隊既escort,無咩冷場,如果大皇蜂個頭可以睇啲就好lu.老柯(柯柏文)對老麥(麥加登)隻抽時,經典對白"one shall stand, one shall fall"型到震~~~(動畫劇場版時既經典對白).人家睇完都話好睇,仲問我遲啲會唔會買番隻DVD.唔知係咪真係會有繼集呢?

      

ps:Generation one時代既爵士同2007年電影版既外型都幾相似,當年都係鍾意佢夠靚仔,瀟灑~

泰鍾意=太難食

晏晝出咗去對面海global wedding交揀好入相簿既影像(自己燒咗隻dvd碟),由於成三點幾至食晏,所以搭車入番屯門至食晚飯.唔知食咩,諗起師傅提過一間新開既泰食店,於是係市中心行去置樂試吓.

一坐底見到間鋪有關義哥既神位,已覺得怪怪地,唔係通常都係四面佛 ,掛泰皇相既咩?

生蝦刺身:啲蝦唔新鮮,蝦身唔夠透明

燒生蠔:大量蒜蓉兼味精,食到個口好"涸",台灣女生食咗一隻就話頂唔住...

咖哩炒蟹伊麵底:唔中唔泰,啲蟹唔新鮮,咬落無一梳梳肉既感覺,仲偷聽到肥阿姐同老細講"十一號枱話啲蟹"梅".......

炸蝦餅:最正常,無驚無險

店內既雪櫃,一支泰啤都無,只有純生,藍妹,藍帶......始終香港人開既係差好多.......

$222找數,我同人家一致通過"以後無交易"

兄弟酒局

今晚約咗班兄弟出黎飲酒聚吓.聚腳地係雅仕堡,一個發生無數嘔吐事故既地方.平時去黃金都只會叫tetley"s飲,坐係戶外位齋talk,但係雅仕堡,一傾完心事,就會以骰盎玩樂黎助興.

五條友,飲咗打半細支佰威,加一打shooter.骰盎遊戲係計數題,我唔知"訂",叫單數,事後先知單數係最易計....話晒圍內兄弟都喜事近,出黎操吓酒都要丫,測試擋酒系統既效能~~

咁啱大家都有苦水,始終講咗出黎係好啲既,谷埋谷埋好偒身.多一點支持,即使面對難行既路,都會可以多行一步.Gentlemen, cheers!

Wii 高達

今日番完早更,放工去咗置樂食單身漢餐,再上相熟商場碰吓運氣,睇吓有無得賣高達game.皇天不負有心人,竟然俾我行第二轉時見到有得賣!

騎羊番到屋企即刻試吓,第一次load唔到,萬念俱灰下, 再試多次,又得喎~

雖然機體係少啲,但今次係以第一身模擬駕駛倉黎玩,不過子彈數量真係少咗啲,下下要執敵人遺下既武器黎駁火,有啲老套,好似迫你要同敵人隻劈咁.不過身為高達fans,點都會玩吓既,之前ps2既gundam作品,我都有玩,最滿意既當然係街機移稙個款高達game啦,又多機體,又富戰略性,火力又猛,炸到七彩,機師瘋狂狀態系統充分將機體同機師既能力連成一體,正~~

操作手册

平時唔多睇說明書既我,今晚都要咪吓書.因為我發覺最近玩Wii時,畫面會出現一啲好似係干擾既S形波紋,完美主義既我,當然係睇唔順眼啦.(直接影響打機心情嘛~)

其實呢本野早係兄弟們送部Wii俾我個排就買落黎,因為日版機,成個menu都係日文.呢本書"應用說明"正正就有日文menu選項既中文翻譯.唔睇都唔知部Wii係有progressive scan,單憑拼音真係一世都估唔到.

set過既畫面既選項,都係解決唔到問題,明明之前都無o架?突然醒起,為咗整理客廳既電線,我將主機既插頭轉咗係另一個拖板.當我駁番原先既拖板,畫面就再無干擾lu~~好在ps2駁咗去同Wii撞既拖板時,畫面無出現干擾情況,如果唔係就真係"順得哥情,失嫂意".

斬呀!射呀!殺呀~~~

今晚出街食飯前試玩呢隻game,真係幾好玩.扮演黑幫女婿,為救被幫中反骨仔所拹持既未婚妻而捲入追查同殺戮,大玩以一敵眾搏火同單挑亙劈.

簡單而又動態既操控,令投入度大增.間場既文戲,唔會讓玩家覺得只係機械化地完成一個又一個既任務.台灣女生坐係隔離當睇戲咁睇,一向對動作片有情義結既我當然玩得開心啦~(玩得肉緊之際,仲唔覺意係人家面前講"pk"添)

雖然畫面唔及ps3同Xbox360咁靚,但wii既獨特玩法同創意給人增添不少樂趣.本人就覺得好多時Xbox遊戲多制同複雜,加上好多時欠故事性(可能太歐美化),而且又有啲型式化咁.

好耐都無試過咁有動力想去完成一隻game,希望可以快啲殺出個結局啦~

由朝雞到晚

呢塊叫雞牌,細個跟過阿媽入街市買街就一定會見過.隻雞掛住兩塊牌,簡啱的話老細會俾其中一塊牌你,轉頭劏好之後,閣下就手上塊牌問老闆攞番當初簡中而又劏好既鮮雞.

今日我既生活,都同雞好有關係.朝早番工,早餐時時我叫咗個百搭早餐,煎雞蛋+牛扒+腸仔米粉配凍奶茶.由於放工半個鐘後要去聽書,於是係canteen叫咗外賣叉雞飯,趁飲水時間,入pantry用兩個字時間食晏.

聽書時"鐘"咗兩三個字眼訓,臨尾同一位男mo一齊俾同組唔相熟既同事"推舉"出去present.四點多啲鬆人,四點半就可以係泳池落水(辛苦你啦,skywave).

游完水好肚餓,係置樂買咗個雞蛋仔同罐裝蜂蜜雪梨茶,邊飲邊食咁黎相熟商場.騎羊去市中心,去屯門時計幫隻錶換電,盛惠$25.哥仔話錶底四口螺絲有一口已滑牙,最好唔好落水(話晒都帶咗八年,我都有心理準備佢隨時唔得,唯有游水唔帶,平時照帶出街番工).係市中心輕鐵站等老豆,俾過芒果乾小食後,老豆就上番車繼續回家.

七點幾仲係街度,係超級市場買多少少野,一條冷去食家鄉雞.去隔離華都商場既美心mx買飛,攞過一塊雞牌,等咗陣,就攞咗隻外賣鼓油皇雞脾走,等台灣女生放工有得食.騎羊番屋企放低啲野,再同羊仔去置樂買生菜魚肉(為早上既承諾),最後接人家放工....

總結,成日都雞咁腳係區內走動................

西日晚飯+德國電影

朝早起身好趕騎羊同台灣女生係建生麥當勞食早餐,十分鐘左右時間倒份早餐落肚,再好趕送人家番工,好在都無遲到唔洗九點就見到同事們~

自己騎羊番屋企,沖個身,就繼續訓,訓到三點至願起身,只係間中接聽過幾個電話.四點半接過人家既電話,換衫騎羊去接人家放工兼去買餸.

係吉之島超市逛,諗住煎牛扒食.見到呢包特色芝士腸,即刻試食吓,又幾好食,於是決定牛扒芝士腸飯.有個小妹好試食完,再問職攞試食,職員好無情咁話"啱就叫屋企人買番去食啦"小妹妹再三扭計,但職員只係答"小朋友唔可以咁樣o架"於是小妹妹大叫"媽媽......"

唔知最後小妹妹可唔可以如願以償呢?我地買埋魚生,特色雪糕同粟米,就去惠康買支之前睇中既紅酒,再加少少野,跟住就騎羊番屋企準備晚餐.

搞咗一輪,卒之都開餐啦.煮完出黎至覺得好似多得滯咁.今次牛扒煎得太熟,唯有當係就吓人家啦~自家制既牛油粟米又幾好食,但可惜食唔晒..芝士腸又真係好多芝士,一咬落去,啲液態既芝士就咇出黎,但又唔會俾出一種好"溜"既感覺.好耐都無試過兩個人飲一支regular size紅酒,對上個次都係聖誕.

人家飲到鐘眼訓,食飽就訓係梳化洽陣,我就執野洗野.人家醒咗就沖涼,再好精神咁食呢個係吉之島買既日本手制雪糕~~人家話好食,好似牛奶糖咁

呢支紅酒都幾物有所值,好過上次買mini size個款.成大支紅酒,當然係無咁快飲得晒啦.我同人家係客廳邊睇戲,邊飲紅酒,務求要今晚飲清佢,唔好嘥嘛~~~~

呢齣戲係講一個汽車雜誌記者因一次闖禍而失業.等錢交租同開飯既男主角,係咁見工,但都無份請佢.後黎有間女性雜誌請咗佢,但男主角要打扮作男同性戀者,趣事就因此而發生.點解要扮gay去融合公司裡真gay既男同事們同正常既女同事?因為老闆怕男同事會搞公司啲女同事,避免同自己爭女人(咁都得?).

keroro軍曹大電影2

由於晏晝用咗太多時間係羊仔身上(由頭抺到尾兼打腊),所以執得野黎,要近七點至出門去凱都買飛.去到戲院見好多人,睇真啲原來係等入場,其實係無人排隊買飛."九點半軍曹大電影2 兩張丫,唔該"

簡完位,姐姐仔遞上兩戲飛連同一包賣廣告既健力仕紙巾,好趕好趧咁行去同羊仔會合,再騎羊去接台灣女生放工.

遲咗近十分鐘至到,好在人家無嬲,理應七點半就到公司等人嘛...我地騎羊去和生食飯,今次個坑腩煲無咁好食,但串燒雞同牛柳就好好食,加埋條燒魚同海蜇手撕雞,兩個人食到飽,跟住就騎羊去戲院.

係戲院門口,我地又幫襯燒魷魚檔,$20三隻細魷魚.之後我地見到一個阿爸,買咗隻$30大魷魚俾個仔食,而家啲小朋友真係幸福....

呢一集無上一集咁好睇,一黎無咩點打,二黎太多時間放係夏美同兩位外星人身上,搞到軍曹佢地既戲份少咗好多.配音方面,只係keroro係電視原身個位,其他都轉晒人,投入度當然又打折扣啦.

個半月前的影像

一點左右訓醒,換衫搭輕鐵去接台灣女生放工,跟住就係烈日當空下行去紅橋金銘食晏,再搭960出對面海.今次既目的係去global wedding隻碟番屋企簡相.本來之前我地答應maggie姐要埋套餐外既二百張相(補多六舊水),但我地最終都因為懶同忙而無出都去交錢.估唔到maggie都照幫我地hold住啲相,話見我地住屯門,就吓我地,真不愧為同鄉~~

好在有要埋額外既相,因為有啲重要既相係原身無,好似掀頭紗咁.用佢地部mac機notebook望過啲相一次,最終都決定要多本相簿~

搭地鐵過番旺角,人家係女人街買韓劇,隨後我地就去game店換碟.經過冬甩店,見到有夏日鮮果系列,於是人家簡咗個菠蘿味,我就簡咗個桃味.

我地仲坐係門口兩個bar枱位,飲住對面七仔買既jolly shandy黎食,好似做生招牌咁,仲可以望到對面影碟鋪播戰狼300添.背脊感到涼快既冷氣,但前面就係30度有多既熱氣,唔怪得無人坐啦........

行咗陣兆萬,買咗個影月頭像,其實都望咗好多個月,但今次至捨得買.我地行番去朗豪坊既元氣排隊食晚飯,天氣熱,想食啲冷盤嘛~由於人多,我地同另外一pair情侣搭枱,見佢地有講有笑,嘻嘻哈哈,咩都笑一餐,好有puppy love既感覺,頓時覺得自己既心真的老了,可能經歷得太多不如意既事吧...我相信新既家庭會為我帶黎一番新景象!

上到車我地就係咁訓,因為人家番完早更,而我就番完夜更.番到屋企就急不及待將新買既頭像擺放出黎,世紀王SHADOW MOON~

十四歲的日記

呢本係我十三年前,讀中三時寫既日記.細個時巳經想記底自己既事,等第時大個咗可以睇番.一個人係唔同年紀睇同一本書會有唔同既感覺同體會,更何況係自己既日記?人大個咗諗既野會唔同咗,如果無記底,真係唔知自己變咗幾多,係變好定係變壞,至少可以知道自己以前既睇法同世界觀丫~~~

中學既字已經係唔太公整,細細粒咁.以前好在意人地話我啲字唔靚,但而家巳經不再放係心上.話說小學時中文老師見我渣筆姿勢唔好,於是叫我用矯正膠套住支筆黎寫字,兼每日寫多啲生字,但最終都係城效不大.到小五六時,英文老師見我啲字唔靚,要我每日都做多一樣功課,抄STORY BOOK,但經過一段時間,老師叫我唔洗抄.我以為係有進步,但點知老師話係因為無進步,所以唔好嘥我時間........

呢篇日記係1994年2月21日,十三年前既我想變得獨立,可以自己照顧自己,唔知而家既我合唔合格呢?

PLACEBO

番完晏,騎羊去盈記買糖水賣,番到屋企無耐,台灣女生同伯母就到埗.前幾日發生啲唔開心既事,所以特意叫伯母過黎坐吓,等兩母女可以聚吓.

伯母係客廳玩我預先準備好既老虎機玩具,跟住就由我帶住黎玩Wii,試玩釣魚,騎牛牛同ping pong波.

當人家沖完涼之後,就變成一場別開新面既母女激鬥~係釣魚項目,人家竟然連輸三個回合俾伯母,起初以為係氹伯母開心,睇多陣先發現係技不如人.係騎牛牛項目,全無方向感既伯母慘敗收場,但都玩都一額汗,話好緊張咁話喎~

打完機,兩母女食糖水,我就同兄弟講吓電話問吓意見咁.希望今晚既活動,可以令人家同伯母可以開心一點.見到人家兩母女,既覺有點羡慕又覺一點歉意...

底線

今朝收到老媽既電話,但係miss call.番晏時,三點左右得手啲,就打電話俾老媽,但飛留言.
五點半左右,老媽打番電話俾我,話唔滿意我既交代,又講到屋企唔愉快既事唔係佢引起既.我講番老豆有病既事,佢只係話"佢無病,你問佢啦,你問佢啦"但老豆既lab result明明確確寫住正常.跟住又一大堆歪理,又話你有你既幸福囉,你都會有仔女架,意思話會有報應諸如此類...

八點半左右,老豆打黎,話老媽問我有咩唔開心屋企,我話都講咗,只係佢唔接受.跟住大佬聽電話,話我係咪"呢"埋一世,係咪無腦,我火滾到破口大罵幾句,再"cup"線.我只係接受唔到一個充滿暴力,謊言既家庭,至所以選擇離開,點解仲可以調番轉話係我既問題?九點幾左右,老媽同大佬仲上台灣女生屋企,打搞伯母,講埋一大堆令人難受既說話同無禮既質問......

係老媽既思路,佢就係真理,道路,順我者生,逆我者亡.明明係佢錯,佢都會將所有責任罪名推到別人身上.屋企咁不和,都係佢太過霸道.我仲好記得年三十晚佢用電話"車"老豆隻耳,流晒血,我番到屋企時,佢仲好得戚咁話"拉我呀,報警拉我丫"之前幾次阻止佢打老豆時,佢都係話"點解我唔打得佢呀,我鐘意打就打"
個晚係急症,我好堅持報警,等佢知道咩叫過份,如果佢係需要見心理醫生或社工介入的話,就順便等報警一次過做埋,反正你叫佢去睇,佢一定話佢自己無問題,無需要外人插手.好可惜,懦弱既老豆唔想多事,而成日話我無腦既大佬話唔係咁樣黎處理件事,反對報警.

既然屋企裡面,個細仔唔認同阿媽既做事及對待老豆既手段,做老豆既每日都擔驚受怕俾老婆打,失去理性既電話粗言穢語疲勞轟炸,呢個家又點會開心,仲有咩資格去辦喜事?

做阿媽既都唔接受自己既行為令兒子討厭,為難,只係覺得做仔既要服從父母既安排同睇法,因為係佢心中,只係佢係最啱,佢就係世界既法則.

結婚係一對新人既事,如果主角都無主動同話事勸的話,咁豈不是番到以前古代父母作主,幫個仔搵老婆,安排宴會,各樣細節,一對身人只有肉隨砧板上咁,任人魚肉,任人擺佈?

有人會話結婚係要就老人家,但唔通要遷就到無底線,老人家話點搞就點搞,幾無理都要做,自己幾唔想都要跟?咁結婚儀式就只係滿足老人家既一場戲子,結緍唔係應該係度身訂造,給一對新人美好又珍貴既回憶嗎?

我絶對唔認到係現今年代,結婚係滿足老人家既玩意.如果呢個世界係咁既話,我寧願殉情,亦唔願意任人踐踏我既底線,以及控制我既自由思想,摧毀我既幸福,漠視我既尊嚴.之前我已作出好多既讓步,我覺得已經係做足本份.

我係一個獨立個體,我只係想以適合我既模式去生活,關心會尊重同重視我既人,而唔係為咗做別人既傀儡,以及違己交病既事情.

strong sun shine

夏天去沙灘,一班人去當然係開心啦,一對pair友去當然浪漫啦,但今日既組合係兩條仔去晒太陽.話說最初既組合係三條仔,後黎變咗有兩條仔+/-兩位女仕,最後既戰陣就係我同大力仔.

我地都係去咗黃金海岸沙灘,夠近嘛~人流唔係太多,但個太陽就真係好強勁,間住間住咁飲自攜既凍飲(啤酒,可樂,檸檬茶),先至頂得住(加上自己又係sleeping day,力不從心).三點多啲到埗,兩條友傾吓講吓飲吓,五點半至執野走人.

本來夜晚上朋友屋企食飯,但no reason地臨時取消,於是同大力仔係市中心早啲食晚飯,再去埋pccw攞免費電話至分道揚鑣.

番到屋企好鬼攰,但都勉強騎羊去接台灣女生放工.沖完涼個人仲攰,又頭痛,成個人軟晒,最後係人家既照顧下番房訓覺休息,唔知係咪中暑呢????

朝七晚三

朝早番完個早更,騎羊去泳池游水,人唔太多,可能暑假未正式開始卦.番完工,體力正係爭啲,加上年紀都有番咁上下,真係要勤啲操吓.話事話,游番水又真係少啲膝蓋痛.游完水,騎羊去新墟吉野家食晏.跟住就騎羊去市中心租碟,簡咗死亡筆記上下集,再係idc買小玩意俾台灣女生.

小玩意就係老虎機啦,咁啱做八折兼且係last一部.之前人家係澳門好似好鍾意玩咁,有咗呢部機,人家就可以安在家中拉過痛快~~

夜晚同andrew係大排檔食飯,都係食雞煲,飲吓啤酒咁啦....(愈黎愈似中年男子)番到屋企就動手吸塵拖地,搞到成點鐘至開始睇死亡筆記上集.雖然係好好睇,但睇到近三點頂唔順眼訓,晾埋洗衣機啲衫就訓,聽朝起身再繼續睇啦~

海景bbq

本來夜晚個餐,我同台灣女生諗住係元朗西鐵站附近既燒烤場食,因為以前同同事去過一次食海鮮餐,可以入房涼冷氣,有專人燒埋俾你食.騎羊去到目的地時,阿姐話而家巳經無做海鮮餐,要入房就要俾多$150,但都要自己燒野食.經過磋商,騎羊去黃金海岸,去幫親開既海景bbq,吹住海風黎燒野食.

雖然七點多啲至到達,但都仲有位攞,最正既角位都俾我地坐到,可以望正個海嘛~~呢個位可以望到海豚像,同埋龍珠島,黃金既游艇會當然都望到啦~

蟹仔比之前既差,無咁大隻之餘,又無咩膏同唔夠新鮮.其他野食都好似醃得重手咗啲,比較鹹.之後陸陸續續有客人入座,野食都有啲緊張.

雖然有海風,但真係幾熱吓.諗住坐開啲個爐,點知張櫈係濕既,搞到我"透心涼",要up住個蘿黎燒野食.....

望海景,bbq,天晴又多星星,我同人家都諗起上個月去關島註冊個日.食飽飽,同人家傾咗陣(多啲了解,係夫妻之道嘛),就騎羊番屋企lu.

零七下水禮

番完早更,騎羊去建生買洗頭水沖涼液旅裝,就向屯門泳池出發.落咗咁多日雨,卒之都可以游水.近來都少咗做運動,平時或番工都會膝頭哥痛,有時會感到無力,發軟,要坐一坐,所以無跑步.另外之前又要搞結婚既事宜,真係無咩時間.希望今個炎夏可以游多啲水,操番好個身子同膝蓋啦.

呢個泳池係我游水最多既地方,我又好少去沙灘,平時都係鍾意番完早更,就去游水.番晏前游的話,怕會番工時無氣無力,你知啦,番工好多野搞o架嘛.

游完水,騎羊去玉林苑食晏,再上相熟商場行吓,仲揀到個軍曹機師造型既電話繩俾台灣女生.之後騎羊番屋企放低啲野,再出去倚嶺山莊接人家,因為人家朋友係我地屋企坐完,就叫人家上佢度坐吓).跟住我地就去人家屋企同伯母食飯~

膽搏膽的一天

今朝起身騎羊送台灣女生番工,自己再騎羊去建生買麵包做早餐.係屋企食飽飽就換衫動身出門,因為約咗阿潘去元朗百老滙睇0950個場die hard 4.0.呢幾日天氣飄忽,天文台都話今日會有幾陣驟雨同狂風雷暴,加上戲完附近又無咩特別相熟泊車位,所以行出去搭輕鐵再轉西鐵去目的地.

係西鐵車廂裡,見到後生女玩手提話當然係常事,但隔離阿叔笠住個earphone,手持住部ipod黎"簡"歌聽就真係感覺到時代既轉變,而家真係要活到老,學到老,如果唔係邊有歌聽?(而家仲邊有人賣discman同walkman丫~)我一向都係一個電腦白痴,基本set up都唔係太暁,真係要的起心肝學吓.....

開場前兩三分鐘至到售票處,由於係早場$30張飛,無得用vip咭折扣,但有得儲分.企我後面有個兩位師奶,"嘩,die hard 4.0,九點十,睇唔睇?"跟住佢地就一個箭步走去隔離窗口買飛,好似係die hard既fans咁,一至三集都有睇,睇住主角由額高變到skin head.聽落去好似係咁啱行過見到上咗又啱時間,臨時買飛睇咁,佢地既熱情,真係比得上啲後生仔女~

同阿潘入場時發現,正話個兩位死硬派fans就坐係我地隔離,又會咁橋既?之前聽德輝講話好緊湊同好睇,睇落又真係幾掂.由開場起就絶無冷場,係咁爆炸,開鎗,逃命,災難,鬥智,反擊...開場後一個鐘,男主角布斯利韋士一幕高速跳車掛彩,之後空車剷上隧道收費亭飛炸隧道口低飛緊奸角直昇機,型到爆炸!!見男主角趴番起身時又爛衫又爆缸,就知道佢已進入"die hard模式",隨後應該會係更加狂妄既反擊~~~不出所料,後半場更精采,係麻甩仔或動作片迷既你真係要入場睇呀!

睇完戲,搭輕鐵番屋企.出門時好眼訓,睇戲時好精神,返家時再眼訓,於是係客廳訓梳化.訓到點幾鐘(一個鐘左右)就醒,見出面落住雨,又無雞脾既短訊,諗住今日下午既黃金海岸曬太陽計劃會取消.突然收到雞脾既來電,話主師德輝提意照去,因為見碼頭方向有一線曙光.雖然個陣兩係停咗,但都好厚雨雲.

難得就啱人腳,咪好似die hard4.0係電視既廣告話齋"膽搏膽,鬥命硬",豁出去啦~好趕咁"陸"個杯麵食,再執埋汽水同冰種入個冰袋,攞埋個袋,就騎羊番公司同大隊會合.德輝騎住佢阿妹既羊仔,我就載埋雞脾去黃金.

沙灘人流一般,但都無咩冷清既感覺.我地鋪好啱啱買個三張沙灘蓆,set好個陣就上油晒太陽.由於好厚雲,實際見陽光既時間得個半個鐘唔夠,中途落過細雨,我地開傘打住.後尾落大雨就捲蓆走人,係更衣室隔離既大亭避雨同輪流入去沖涼.等到停咗雨我地至去攞車走人.

回程時德輝係馬會天橋右轉落青山公路時,係馬路接駁住金屬片上失平衡,好在德輝救車成功,再次返回正常航道.係公司更衣室放低沙灘蓆,就一齊去西鐵站放低雞脾,我同德輝就係虎地廻旅處分手,各自歸家.

夜晚約咗台灣女生係市中心等,因為要去columbia攞番條短褲(買個陣無現貨,要等幾日).跟住就係大排檔食晚飯,人家仲大讚個雞煲好食~~~~

 

ps:好耐都無啲咁有血有肉既動作片o刺,而家係sell科幻,電腦特技,懸疑情節,靚仔靚女,好少係動作元素咁重同緊湊.令我咁深刻既動作片,對上一齣應該係"生死時速"~

另外而家咩都高科技,阿叔用ipod,片中既恐怖份子中坑都要用電腦set up,睇黎我都係唔會柀壞份子招攬同利用

懶羊羊

番完夜班,行去攞車時,離遠見到有兩架白色既綿羊係泊車位準備走人.行到埋去,見其中一架係A&E阿哥既07'skywave400,而另一個就係forza250(X版定係Z版就睇唔出)當我打開布冚後,坐forza既男子見到我既愛羊都係白色,就笑住咁話"咦?咁第時一齊出車都得喎!"本來我想話叫大家一齊擺好隻羊,同三隻羊仔影合照,但由於天色麻麻,落緊細雨,所以無講出口.同07'skywave行到去兆康迴旋相處就分道揚鑣.

訓吓醒吓,點幾鐘就正式起身,食咗個包就換衫騎羊去接台灣女生放工.係市中心行陣兼買餸,再騎羊去新墟交石油氣費.

熱到死,係附近七仔食魚蛋,買可樂飲.見係classic既玻璃樽,所以飲完都帶埋番屋企擺.番到镸企放低啲野,同人家一齊摘埋菜,我就出多次市中心去買隻不锈鋼蒸碟同tiramisu蛋糕俾人家.

人家食過之後話件tiramisu蛋糕無pacific coffee既咁好食,睇黎italian tomato都只係士多啤梨蛋糕比較留得住人家既心~

回歸

今日係回歸,番完早去市中心買餸,又係置樂行個轉兼買粉仔外賣.上小巴番屋企時見到玻璃窗貼上一張海報,原來係國內既"食物相克及葯物相克列表",覺得好搞笑.

但細心睇吓內容,又真係唔太知表上既配搭係唔可以既.不過呢張表真係好地道,因為入面有話狗肉唔可以同咩食品配搭,係看港就真係唔太適合啦~~