今日見好太陽,拆咗幸男房同客廳既窗簾布出黎洗,幸男見我係花園忙,又走埋出黎趁高興.食完晏晝飯既幸男,成個胃腩突晒出黎.
晏晝個餐係村口花炮會食中式牛柳飯(少飯),而家茶餐廳都少有得叫黎食,公司CANTEEN直頭係無.以前公司CANTEEN仲係大家樂嗰陣,我好多時晚飯食呢味.
食完飯,番到屋企都係忙住晾窗簾布,務求夜晚可以掛番上架嘛~
夜晚老豆話無飯開,於是用BB車帶幸男搭輕鐵去市中心明星同老豆食飯,咁啱台灣女生係九龍上完堂搭巴士番入屯門,結果叫定餸,等埋一齊食.老豆有得睇孫仔,兼有家嫂陪一齊食飯,當然開心.埋單後,一齊搭的士,老豆先落車攞番架單車番屋企.
PS:係中央圖書館行去柏麗商場既明星,唔記得要上樓梯至入到商場,唯有抬住部載有幸男既BB車上樓梯(如果唔係就要係大會堂搭電梯落地面,行去柏麗)見到有個滿頭白髮既六十多歲既伯伯都係要抬BB車,於是我一口氣抬咗我個架上去先,再去樓梯中間幫個位爺爺定公公抬載有孫仔既BB車.雖然圖書館對開都有人來來回回,但都無人伸出援手,香港地確實有點冷漠.......
