十號風球山竹

朝早起身仲係8號風球，仲可以搭輕鐵番工，但07：45就轉9號波,09:40就轉10號波。自己係工作崗位忙,台灣女生亦係屋企忙。公家路去水渠位被上游既樹枝樹葉同垃圾諸塞,人家要冒險出去以地拖刷清走堵塞物,幸好有鄰居男丁幫手。

P更同事冒住十號颱風番工，有啲坐公司定點接送車，有啲坐私家車。早更同事一心趕搭公司車番屋企，但由於太多蹋樹，路面情況欠佳，大家都滯留係公司……

坐咗個幾鐘，阿Jim老豆開車黎接佢走，我同Jason 都有順風車係輕鐵站附近落車(多謝占世伯)。路面除咗蹋樹，仲有唔少被颱風吹倒既雜物，包括鐵皮屋頂。

蹋樹除咗折斷，仲有連根拔。路上無行人又無車行走，到處都有破壞痕迹，有點似人類文明走到盡頭(walking dead或北斗之拳情節)…呢個颱風既破壞力，可以話係近乎天災。

唔通輕鐵站附近既屋頂，係咪由左邊既屋飛越行人路兼四條行車線呢？

比平日用多咗時間行番屋企，除咗不時要停低休息以暫避疾風，更要留意前方有無潛在被吹倒既物件。荒廢既鐵皮貨倉，鐵皮圍板被吹倒並堵塞行人路，幸好仲有一條小路可以兜，接替保衛家園。

PS:番到屋企時見愛駒安好，頓時覺得鎖大架功能好偉大～沖完涼攤係床，先感覺到腹部，大腿兼小腿好寃痛(逆風而行)。