朝早起身食過早餐,番入房再一次享受戶外風呂,畢竟日間既雪景係分外淒美。
等穿梭巴士時,不忘四處影相,尋晚都睇唔到有個屋型冰雕係駐車場(幸男好唔訓咁既樣)。
聽日就要番香港喇,下次再見雪景可能又要幾年之後.......
廿分鐘左右,我哋就到達旭山動物園,剛好有一車同胞旅行團抵埗,要等人潮散去,先至可以到母子合照。
是日-4度,相比當年度蜜月旅行既-9.8度,理應可以輕鬆應對。
領隊帶住我同幸男急步趕往企鵝巡遊既路段,但路線兩旁已企滿遊客,好在領隊同幸男攝到個第二排既位置,前方既日籍女仕示意開始巡遊時會踎底少少。
企鵝出場喇,幸男用心觀賞時,我就從人隙中舉機相作紀錄,只想為一家人留下多點回憶。
相隔十年,,唔知佢哋仲係唔係當年我同人家見既隊員呢?
點解風雪中會有隻長頸鹿,原籍非洲既長頸鹿會唔會凍親0架?
領隊拉住破冰喼,帶我哋去出近出口位置既locker放低個喼。
公園招牌打卡,先稱得上"到此一遊"。
雖然企鵝巡遊路線企滿遊客,但之後係公園裡唔見人迫人既情況。
見遊客於-4度之下食雪糕,"係喎,雪糕咪唔會咁快溶囉",於是行去小食店買蘋果芝士雪糕俾自己,領隊同幸男就分雲呢拿味~
咁難得既體驗,當然要同著住夏天衫既同公仔合照。幸男食到一半就投降,要媽媽接力,我就食晒一個軟雪糕連脆筒。
小食店隔離就係餐廳,順便去食晏。幸男食叉燒拉麵,但我就係叫咗成吉思汗飯,無端端食咗羊肉..........
係鵝館俾呢隻企鵝嚇親,因為望落好似無頸咁,但其實係頸向後屈(搲痕?).......
北極熊唔太活躍,唔通-4度對佢黎講有啲熱?
落雪天令我舉機為艱,因為手凍之餘,又要用大褸保護相機。
突然刮起風雪,喜愛"雪能量"既幸男都忍唔住要合埋眼。
狼館有一個好窄同矮既隧道,可以俾遊客係雪地上既半球型玻璃窗窺望狼群,不過視野及清晰度都唔及係戶外用天涯鏡拉近。
大熊就被玻璃所遮擋,未能取得較清晰既影像.........
落雪天時,領隊部防水手機的確大派用場。另一方面,我就要每次於舉機後盡快清除雪花,免得溶成水點。
曾經有諗過為幸男係世界野生動物基金會助養老虎(幸男之生肖),但最後好似係擱置咗。
臨走前,趕番去企鵝館附近既精品店,因為幸男睇中企鵝毛公仔,用黎攬住訓~
咁啱再見到長頸鹿,睇黎佢好想入番室內咁喎。
對北海道係充滿情義結,蜜月旅行既回憶,青春既時光,之後好幾年都無去旅行,儲錢至到幸男2歲半至再搭飛機遠行。
幸男既車長造型,有啲似軍曹既人型suit~
晚餐係札幌車站附近既商場享用鐵板漢堡,記得之前係幫襯過。
餐廳內,大多數係當地人,我哋可以靜靜地融入當地民眾生活~
我揀咗個和式定食,夠晒豐富~
搭車番中島公園站前,係戶外廣場補影吓聖誕燈飾。
見有玻璃窗上既積雪有劃字痕跡,於是叫幸男用手指試吓。
幸男邊寫邊叫"手指好凍呀~",成功寫上自己既名字黎影相留念~
搭3個站既距離,換黎平啲既酒店,都算划算,而且仲有個公園可以玩雪添~
最後一晚,我哋去多次公園砌迷你雪人。
幸男幫手渣機影相,不過不失。
領隊帶幸男番上房,我就直接去地下既酒吧淺嚐。吧枱上人客唔多,只係有兩位飲啤酒既男仕,以及兩上位享用特飲既女仕。
經過簡單日語及英語既溝通,呢杯係酒保既精選,略帶酸味,但酒身較重。
意猶未盡,試埋杯MIXED IN JAPAN既Long Island Ice Tea,酒保將所有既材料,放係閣下之面前供參考。
最後我問酒保可否調一杯日本風味既cocktail,例如清酒,酒保就調出呢杯以柚子皮搭配既Samurai。柚子同清酒既味道非之夾,呢杯係我全個旅程最滿意既飲品(僅次於大沼啤),我不怕羞地向酒保講"素晴らしい"以及“大すき”。
PS:一直都好想去旅行時落酒吧，今次卒之成事。簡單日語及英文與酒保及其朋友交流,以手機BLOG示意2008年到北海道度蜜月旅行。
