朝早起身，搞咗好耐都遷就唔到閃火既反照，唯有呢張幸男搗蛋照(頭頂Sky Tree),順利遮當光位~可惜幸男失控,係床與床之間跳,結果落點不穩,撞向床邊既牆壁,捱罵收場........
之前旅行係酒店都會見到有cake set,可惜每次番到酒店都一係太飽,一係就已收檔。今日出門前,領隊忽發奇想,不如當食早餐丫?我揀咗牛角包餐,配熱咖啡,因為天氣凍嘛~中途有職員問我要否添飲,當然係要啦,抵!
尋晚領隊已睇中告示牌既pan cake照,卒之得償所望~
幸男揀咗聖誕節主題既蛋糕餐,咗朱古力木條卷,士多啤梨蛋糕同水果杯都食晒。
行去車站時,見到有個當地鐵騎爸爸(土炮手套與台灣及大陸無異),以環抱式載住女孩騎羊。
地鐵轉JR,第一個景點係鎌倉。
落雨天,得一把摺遮,於是係商店街買咗把大直遮,我就以外褸遮掩相機,方便隨時擧機。
Google map兼跟住人群行咗近十五分鐘,卒之都到鶴岡八幡宫。
御守作紀念品,每年旅行我都會買番個交通安全，但呢度就睇唔啱，只係買咗個顔色好似利是封既學業御守俾幸男。
沿路行番去商店街,口痕既領隊話要食蒸燒賣(500円3大粒),幸男當然要分一杯羮。
行番JR站,因為我哋要行去後方既月台搭江之島電鐵。
天氣凍,特別肚餓,加上我哋無食正式既午餐,唯有密食當正餐。其實我哋上車前係一間小食店買咗迷你鯛魚燒(吉士,士多啤梨,芝士味),味道一流,但可惜買得8粒裝太少兼無影相....
單線相行既路段,我哋要係中途站"鎌倉高校前駅"落車。
因為遊客們都係為咗呢個沿海鐵路兼平行護欄而打卡,一嚐融入Slam Dunk片頭曲既情景~
落兩兼能見度低,未能望到富士山,只可隱約見到江之島。
廿幾卅個遊客,於路口等待電鐵經過一刻,為呈現心愛動畫既實景,我當然無位迫埋一份(天無好都可能考慮吓)。
反而令我雀躍既,反係遇到湘南暴走族。平時係動漫就見得多,原來真係仲有中堅份子。
兩母子 落咗去沙灘,天涯鏡拉到矇鬆散。等到浪潮到時,又唔係一齊望過黎,有電話直接溝通就好啲.....
離遠都望到今晚既景點-江之島。領隊話好天時份,可以望到富士山。
行番上車站,等搭單線雙程既鐵路,上車前真係要望清方向及終點顯示。
終站落車後,就要徒步行20分鐘過大橋,前往江之島。天色漸黑,幸男好怕進退於碼頭邊既潮水,驚會被拉落海?
夜幕降臨，但江之島卻充滿遊客，熱鬧得似年宵。
領隊喜愛既日劇<有喜歡的人>,2男1女主角結伴同遊江之島,經過瑞心門,去江島神社,但我地就一家三口親子遊(都係2男1女丫)。
沿山行上樓梯時,忍唔住要駐足,舉機拍下沿海夜景。
期間限定既燈飾,令我哋一家三口有大型聖誕燈飾之氣氛。
其中充滿浪漫意境既紫色主調燈飾,確實考起A7III既自動白平衡,結果我要反覆試手動白平衡之K數及偏色,至可以影到張近似既色系。
展望台既輪候時間為一小時,所以我地係樓下影相留念就算。
四圍都係遊人,難得搵到個無咁多人流既地方,當然要set腳架影番張家庭照喇(其實係經過近十次既校對)~~
一個鐘前,我哋與其他遊客一齊排隊係呢個陣行大運,七點唔夠就人去樓空,好在我哋買咗御守先啫~
行到商店街時已好肚餓,買咗個燒章魚仙貝，幸男當然係主力軍。
當地盛產吻魚仔，領隊睇中吻魚肉丸湯，幸男試過都有追食。
晚餐係沿岸既一間兩層高食肆享用，叫咗當地海産燒。
領隊揀吻魚丼,貪夠地道及啱口味。
幸男揀咗咖喱飯,加燒粟米,可惜眼闊肚窄,最終食唔落粟米……
心儀既時令海鮮欠奉,唯有叫個天婦羅定食,可惜炸粉唔夠脆口。
當地出品啤酒,味道濃厚~
回程搭高架單軌列車,順便當市内觀光～
無乜人等上車,亦都無乜人上車,有點奇怪。原來呢班車只係去到中間就會調頭，我地要落車等下一班去到JR 站既班次。
今日除咗早段鎌倉有細雨,其他時間都無再受天氣影晌,聽日就向北海道進發~
