每次到札幌站,都好有親切感,總會諗起結婚旅行既時光。
車站無咩大變動,傳統既掛牌依舊提示乘客上車位置,列車型號亦一如已往。
第六年同幸男一齊去旅行,唔知幸男第幾年開始嫌棄家庭旅行?
原本諗住去北海道千歲北方雪上樂園玩雪,點知降雪量不足,好多活動都無得玩,結果搭番架shuttle bus去機場附近既outlet購物。
一落車就先去搵地方食晏，係數間拉麵店中，幸男揀咗間最少人幫襯既，好在味道唔差啫。
開心發現一對日本制皮boot,啱款啱size,當然乖乖課金~另外,我都買到件羊毛線衫。
購物團的確唔係人人啱心水，幸男一到露天區就食雪解悶。
行到攰,係food court食下午茶,領隊食士多啤梨pancake ，幸男成功自己去買芒果忌廉pancake。
幸男食得好滋味,所有悶氣同攰意都被甜咪淹蓋~
同樣都係edwin買衫俾幸男,但已係相隔3年,K3生變P3生~臨走前係kispy kreme買冬甩外賣,搭番shuttle bus走。
JR轉地鐵,先番酒店放低戰利品,再行去酒店附近搵地方食晚飯。之前行離遠見到既不知名舊建築物,原來係船型既餐廳，可惜全店滿座，無緣食海鮮燒。
繼續係大街上行，行人路上不時有硬雪隱藏於新雪之下,一不小心就會跣倒。
一心去食蟹本家,可惜"滿席",真係咁好生意?
行過一兩間啱心水既食店,一係多人等,一係就滿座唔俾你等,結果係呢間串燒店等位。等候區得兩張櫈,唯有讓幸男及領隊坐, 而我就係玄關無暖氣之下等候.........
等咗半個鐘,卒之可以入座。對香港人黎講係小事,但日本食店唔會催客交枱,故未能話你知要等幾耐,只會話滿座作回覆。
一枱都係串燒,主角當然係燒雞翼。
大根沙律,幸男睇MENU相話係芽菜,結果都係蘿蔔絲。
食飽飽,行去中島公園,一齊砌雪人。先係公園內搵到一個雪球,再搵另一個疊上去。以枯葉作雙眼,枯枝作雙臂及嘴,最後以相熟highball吉罐作頸飾。
我同幸男講,呢個雪人就叫"highball",都好貼題丫~雖然唔係親自制作兩個雪球,但過程都好開心。人生第二次砌雪人,結婚旅行時果個只係手掌咁大咋。幸男有得係雪上跑及扔雪球,已經開心過千里迢迢去雪上樂園。戶外環境留得耐,我都要著埋件UNIQLO羽絨背心打底。
去中島公園前,係酒店附近既老餅舖買咗蛋糕作宵夜。其實我哋好想係店內影相,但怕阻人收舖兼師傅唔鍾意。天氣咁凍,就咗將西餅放係戶外,砌完雪人至番酒店都唔怕變壞~
PS:電視播既音樂節目有TRF,無諗過仲會湊得齊人腳,畢竟已不再活躍。
