住家燒肉

今晚台灣女生約人出街食飯，我同幸男兩父子留守家中，清埋尋日有剩既食材。諗住七點開餐，點知透爐耐咗，3粒炭精都用晒.....第一輪都未燒完，人家已經番到屋企。

幸男堅係死守家中，係客廳等柯打上枱，好似掃QR code食放題咁(可惜無時間幫佢影相)。

雖然屋企無生啤飲，但勝在可以自選紅酒。優雅輕食，邊聽人家閒聊短線考察。

ICE與EV聚餐

原定既陪大江豪爵叉電，變成即興BBQ聚餐。雨季兼潮濕日子不再，呢個星期確實係戶外用餐既好時機。

以護送大江豪爵復出叉電兼熱身為題，今日補鐘早走，去藍地會合大隊就出發去"屯赤"。無諗到原來只係去屯赤前既浩和街，我儍更更係廻旋處行中線，脫離大隊既左線……

出屯赤過埋機場，就係廻旋處折返。近何式南小學既內街停車，打電話傾晚餐安排，就動身直揮本部~

我先番屋企set好張燒烤台同戶外枱櫈，嘢食由康楠同嘉耀係市中心DONKI及AEON買，再經康楠架大江豪爵送上我門口。

一睇就知食唔晒，扣定啲食材入雪櫃，魚類就當然係即晚處理。

幸男去完科大open day，約同學食埋飯至番，但見到香口蛋白質，忍唔住話可以食少少牛扒(邊睇曼聯對車路士)。

生日月份7折優惠@千両

台灣女生番工不時晏走，故通常外出用餐。今日就揀咗去V city既千両，目標係享用生日月份7折優惠。難得有高級食材-喜之次，咁耐無食過，當然要嗌番條。

經常都無既大阪直送魚鮮，今日竟然出現，仲要有埋伊勢海老。

是日星期五，商場餐廳都多人入座。唔知北上消費既熱潮退却，定係大家擔心多咗食物安全?

市道唔好，外出食飯既中價選擇無以前咁多，定係愈嚟愈似外國既模式呢?

龍蝦頭拎咗去整蔬菜鍋吊味，幸男食得多嘢咗，自己隊晒一碗牛肉烏冬，同火炙左口魚三文魚籽壽司。

𡃶自己多啲

是日番工唔如意，約台灣女生去元朗食飯，人家係王子私房菜有有閘蟹餐，send張相俾我過目。不被愛都要自愛，一於對自己好啲~

餐牌上伊比亞黑毛豬叉燒常在，所以無影相。套餐與滬江相若，蟹粉燴官燕取代魚翅，金牌焗蟹蓋取代小籠包。唔知係咪蟹源唔同，蟹粉無滬江咁偏橙色。

金牌焗蟹夠晒飽滯，唯有打包薑米蛋白松子飯炒飯。雖然唔及滬江咁出色，但區內嚟計都算唔錯~

住家快食西餐

考試週期最後一天，台灣女生放工買牛扒快煮，好讓幸男閉關自修。

星期日的慢活

幸男唔出街留家溫書，我提議同台灣女生去置樂既吉氏食晚飯，番嚟至翻熱雪櫃廚餘俾埋男。晏晝打去留枱，傍晚拎埋支細紅酒出發，計埋我哋有四枱客。

每人兩隻法國生蠔，人家話自從AEON無生蠔賣就少食咗。

堂食當然係揀外賣唔到既菜式，他他牛絶對係代表。

主菜揀西班牙烤乳豬，連鎖西餐廳無既菜式，吉氏有。

薯仔麵團配黑松露野菌忌廉汁，當係PASTA類~

原本想嗌TIRAMISU，但賣晒。好在個檸檬撻都唔錯，人家話伴碟既脆脆，似以前興過既天使蛋糕。佢唔講我都唔記起天使蛋糕係咩樣，時代既眼淚.....

人家一早就柯打定梳乎利甜品，方便臨尾上菜。

PS:傍晚騎愛駒去綠在屯門做回收，再兜去嘉耀屋企樓下交收。有借口可以出車，為無動力既我添加腎上腺素。

幸男生日飯@滬江

自從幸男鍾意食蟹起，每年生日都係去食大閘蟹餐，今年就有婆婆嚟一齊食添。

一人一餐，但散叫香炸臭豆腐同生煎包作前菜。

蟹粉魚翅，外母都啱食~

壽星仔同大閘蟹合照，呢個儀式感與生日蛋糕無異~

夠晒多膏，婆婆送俾咗半隻幸男食。

由於加咗前菜，所以無額外加蟹粉小籠包。

蟹粉籠仔栥飯同清炒豆苗，食埋個薑茶湯丸，就一齊去搭260X。

台灣女生係晚飯前，去Dalloyau拎取預訂既生日蛋糕，借滬江既雪櫃代存。幸福男孩16歲喇，要學會童真地成熟~

PS:仲有兩年就可以一家人一齊飲紅酒了

生日料理@利寶

台灣女生一早約我生日正日，去食區內OMAKASE，所以搵定支十四代清酒嚟賀一賀佢。

我同幸男先到利寶，搵FC27，當係幸男既生日禮物。第一間搵既Game舖賣$398，平過網上下載版($500)，於是無再格價即買。

台灣女生收工直接去置樂會合大隊，今次Flip 7自拍交俾幸男。同師傅邊食邊傾，兩個鐘好快就過咗。

幸男除咗平時食開既三文魚籽，新開發既生食材就係海膽~師傅見年青人唔係太食生嘢，用火炙既方法，順利令幸男食到左口魚壽司。

壓軸既蟹鍋飯實在太大鍋，叫埋師傅幫手食都無法見煲底。平時我同人家講生日係屋企簡單食就好了，點知上年人家係呢度預訂外賣，食到我反艇。今年就為咗遷就幸男可能聽日要去踢波，所以將外出晚飯既配額提早一日用。

番到屋企，用新買既TONALITE聽吓歌自娛，當係給自己既生日禮物。

3rd final wireless earphone

開學兩個禮拜，幸男就跌咗邊耳機(我過俾佢既ZE3000)。原本叫佢上網睇吓邊款好，兼自己出錢買，但懶人遲遲未有行動。日日都係"單邊主義"，又怕佢會又唔見，所以決定將我用緊既ZE 3000SV過俾幸男，自己升級final tonalite。

其實年頭推出時已有興趣，但因定價($2680)及大細不便當電單車導航而却步。幸男跌耳機事件，將埋藏多時既糾結再度浮面。睇完多條YouTube做評估，用AA電貼住耳嚟試戴頭盔，又夠位喎!包送貨既HKTVmall又咁啱有平啲啲($2546)，反正price.com既$2380都係"查詢"狀態。

旗艦級別賣點係Digital Twin Audio Simulation 

，專用app以智能電話既前置鏡頭去掃瞄耳朵，頭形及上半身比例，去模擬最接近原音既調音。

對住螢幕記號嚟度面形，昂高dup低都還可以，但90度擰頭度耳影相堅難。失敗幾次後，要搵台灣女生幫手埋尾......

PS:網上評價tonalite可以呈現HiFi自然音色，媲美有線機，聽日搵啲無損格式歌嚟試真啲先~

預祝中秋

難得我星期六放假，台灣女生帶我去食海景午餐。搵極都唔見所謂既直上餐廳既地面𨋢位，結果經商場行問職員行較轉折既路。

前菜人家揀野菌忌廉湯(三道)，我就揀泰式醃三文魚他他(兩道)。

無諗到三文魚份量係填滿粟米片底，好在揀咗2道菜。點餐時問少爺啤喺咪生啤，侍應生只係答斟出嚟……支裝同生啤都係斟落杯㗎啦，結果係支裝囉。

和牛芝士漢堡，夠晒立體挺身，唔會好似老麥咁扁。無入鏡既自家製樽裝茄醬，以茄鮮為主，唔係死甜。

人家揀既海鮮叻沙都好足料，帶子大大粒~

餐飲叫咗Iced Cappuccino，無諗到凍飲既咖啡味都可以咁濃郁。甜品椰子奶凍，配上芒果，西米珍珠及柚子，變相crossover楊枝金露？

臨入𨋢落樓前，係玻璃窗邊以太空館文化中心為背景，嚟張維港自拍。落到地面，行到天星碼頭，又再近距同維港合照。經海運大厦行去海威商場既Dalloyau，拎取訂購既中秋禮食。

夜晚番老家做中秋，老媽依舊順便同我哋預祝生日。希望全家人身體健康，開心迎接下一個年度。

PS：中秋正日要番夜班，所以夾日子提前食。