朝早兩大一小喼,行去JR站,趕搭08:20班次既新幹線E5隼號,呢款正正係幸男睇<新幹線変形ロボ シンカリオン >既主角機體。
領隊係月台既商店買入早餐及午餐便當,因為要12:22才到新函館北斗站。
幸男呢份早餐食得特别開心,因為係新幹線車廂内享用。
近中午時份,一家三口分咗個牛肉便當,因為落車仲要轉JR至可以到目的地搵食肆用餐。
雖然窗外有雪景,但點都唔及第一次親身接觸雪既好奇。
2015年一家三口去北海道過生日旅行,當時已有宣傳北海道新幹線即將通車,今日卒之都可以搭到喇~
落車先去商店八卦吓,幸男好容易就搵到心儀紀念品俾自己。
由於未夠時間上JR,大家都係車站內歎住暖氣黎等轉車。
幸男8歲就可以去旅行睇雪,我當年都係28歲人結婚旅行至第一次見到雪景...希望唔會寵壞幸男,一切得來太易吧。
自己都有點感觸,轉眼又10年,開始進入中年,身體有點跟不上小伙子的心..........
落車喇~大家一齊係風雪中既月台自拍(幸男咬唇既壞習慣被完全紀錄)~
車站擺放著聖誕裝飾,加上外邊既雪景,夠晒聖誕節氣氛。
JR車站對面就係我哋下塌既酒店,風雪下拖喼都唔係問題。職員為我哋upgrade房間,地方大咗,至少可以有張梳化,牆上掛著函館夜景之照片。
真係近到望住個函館站,房間內既暖氣與窗外既雪景成強烈對比,房內之玻璃窗框掛著溫差的水珠。
卒之都到放飯時間,其實已經兩點半,大人當然係食刺身啦~
幸男依舊迷戀拉麵,其實揀呢間食店都因為菜單上有拉麵。
十多年前結婚旅行時幫襯既食店仲有營業,仲記得當年享用即劏烏賊刺身。雖然好想再食多一次,但今次既主題係親子,即係小朋友先決......
真係好大風雪,影響到自動對焦功能,但真係無動力慢慢手動對焦~
幸男既耳罩,無幾耐就唔見咗,好在頂冷帽都頂得住。
是日第一個景點就係函館山,不過風雪太大,望上去白茫茫......
入到纜車中心,就聽到"排隊,排隊..."既普通話語調,原來係當地職員既呼籲(有點覺得難為情),確實在場佔一半都係國內同胞......遊客可以從屏幕即時望到現場既景觀,才決定是否購票上山。見咩都望唔到,唯有擱置計劃,但到訪既大陸團友就照購票。
無綠觀賞函館夜景,唯有出門口影張相作罷。
行番落斜坡,搵地方食下午茶,點知繼幸男跣倒之後,我亦都被硬滑既雪地跣低,領隊係後方見證住兩父子連環跌............
原本咖啡店內坐滿客人,咁啱有一對男女埋單,我哋至可以坐低。
領隊同幸男一樣,揀咗士多啤梨蛋糕。
我就只係叫咗杯咖啡,天寒地凍,最好都係飲熱飲黎暖身~~
店內擺放著各類書籍供客人享用,我哋發現有<VADER'S little princess>,其實之前我買過本<DARTH VADER and son>同幸男睇。
五點唔夠就入黑,領隊問幸男仲上唔上函館山,食飽既幸男竟然答話上,於是大家又再行上跣滑既斜路。
觀景台擠滿遊客,難得搵到個位無人兼有戶外燈照位,當然要幫幸男影番張世界第三大夜景。
十年後重遊舊地,唔知下次再黎,是否幸男已18歲,而我已係邊舉機邊與漸進鏡糾纏?
A7III既夜攝能力當然比當年既CANON IXUS儍瓜機好,crop出黎都可以扮係酒店房掛出黎果幅。
唔記得當年有無影相檔,今次我哋一家三口當然有乖乖課金.....十年前,旅遊區唔會有中文同韓文既標示,最多只會係英文,睇黎日本好著重旅遊產業既發展。
自己個腳架唔夠高,未能成功攝取沙漏型燈火作背景,而且要多次嚐試手動設定至有呢個效果。收費區有最佳位置,兼且大閃燈及黃金設定(自己地盤無人迫,開工前用幾多時間去試都得),真係無得輸。
十年後再係同一地方影合照,今次用腳架自拍兼多咗幸男入鏡。
搭纜車落山,再行廿分鐘去金森紅磚倉庫前,因為有大型聖誕樹作招徠~
現場有應節燈飾擺設,供遊人拍照留念,但我唔醒起要影埋倉庫既"森"字。
又凍又落雪,我專心set腳架兼度參數影合照,領隊就去排隊買時令西湯,俾大家暖身兼抵肚餓。學藝不精,慢閃人像配夜景,應該可以再試吓推盡相機本身既閃光補償,減少面燶。
雪場上有個聖誕老人,唔知係收錢同你一齊影相,定係幫你影合照,因為望極都無人幫襯。
平安夜晚餐係倉庫食肆內既西餐廳享用,雖然唔係咩高級食材,但可以一家人開開心心咁食就可以了。
幸男一入室內就話好攰同熱,其實幸男都算係病住黎去旅行。
一出番戶外,幸男又精神番,唔通真係會叉滿幸男口中既"雪能量"?
大雪天氣下,大褸活動唔太靈活,又要保護相機,以免沾濕,所以用多咗smartphone黎影snap shot(快快影完就算,用A7III就會欲罷不能)。
PS:晏晝放低行李時,見房間樓層正正係酒吧所在,仲諗住一心試櫃台介紹既當地手工啤,但可惜太夜番酒店。唯有係房內享用新幹線上買既牛舌乾配便利店買既大沼BEER,兩樣味道都唔錯喎。
