SHINKANLION E5 Mk II

三婆孫之前係日本旅行時買既新幹線戰士E5 Mk II卒之解封,因為今日電視正正播到E5 Mk II登場(我同台灣女生話要E5 Mk II出場至有得拆黎玩)。幸男努力地睇說明書,可惜都要向父親大人求助.......

新幹線會進化,“幸男笑”都係，唔再係見牙唔見眼。

自DX版起,新幹線戰士玩具既外型不再笨拙,Mk II就引入新變形及連成系統,不過依舊未能解決小腿外既車頭外殼之收納。

PS: “焦～砰砰砰！”,卡通裡既對白不時從幸男口中重覆。追問之下,原來Mk II 只係以新幹線形態出場,尚未變機械人…

臨時組隊家庭自助餐@普慶

上午同老豆入元朗做檢查,食午飯時夾過日子,得今日可以係父親節前出街食飯(正日我要番夜班)。打去逸東問今晩自助餐仲有無位,竟然可以容納我哋6大1小。無諗過係下一個巴士站,會撞見老豆老媽同笑姨上車。原本就啱班次時間,好讓台灣女生係市中心收工上車,變成三代同堂坐巴士出九龍。

訂咗七點半枱,早到既大隊先行入座,一心食住黎等市區放工既大佬同阿嫂。我哋張枱係正冷盤食品檔附近,向前轉彎就見到其他主食既攤檔,變相我哋張枱所屬既區域唔會太嘈同人多。

深知幸男喜好既人家,同幸男一齊出去揀嘢食,當然唔少得串燒雞翼。

話晒是次主題係父親節,幸男同父親²既爺爺合照。

網上介紹父親節期間,普慶有不少威士忌風味菜式。

甜品亦有唔少選擇,威士忌元素就有粟子同咖啡慕絲。

人家搵到鮮果班戟,開心享用。

老媽主攻生蠔,而且堅持先食生冷嘢,再食熟食既原則。

有生蠔既自助餐確實係回本既保證,但由於衛生問題,餐廳職員不時溫馨提示顧客盡快食用(怕客人食完肚痛嘛)。

餐廳用上懷舊地板,本人就覺得好切合油麻地佐敦呢個舊區特式。

我受命去搵負責我哋張枱既女侍應生"傻貓"幫我哋合照,大家都好欣賞呢位疑似暑期工既侍應生之服務熱誠。

人家提議之下,全家男仕一齊合照~

PS:笑媽以農曆生日壽星女身份參加是晚父親節自助餐,老媽少有地笑得開懷~

訓住食

經常夜訓既幸男,好多時邊訓邊醒咁食早餐,幼稚園至而家小三都係..........

過埋暑假就升讀小四,會唔會升到中一都仲係咁既樣食早餐??

陪診

番完夜更,收到台灣女生通知話老豆下午去覆診(因FNAC結果而提早),好趕咁起身梳洗,翻熱尋晚既飯餸。騎愛駒番公司,係咖啡店買杯凍榛子咖啡,趕上日間大樓七樓會合老豆,靜待叫名。聽過醫生既陳述,即場做埋TRUE CUT BIOPSY,幫老豆止好血,就分道揚鑣。

先係雅蘭落車,配番吸塵機爛咗既集塵箱($120),再行去星際睇相機嘢。行埋信和及ACTION ROBO,慢慢行去逸東既FOOD HALL食晚飯。沿途諗起好多童年回憶,因為週未經常出黎同阿婆阿公飲晏晝茶或食晚飯(係阿婆屋企食或出街食)。冬天時係阿婆屋企行去碧街既巴士站等車時,都會食住啡紙袋內既炒栗子,食到手指黐淋淋。

心情鬱悶,想食好少少黎氹吓自己。上次黎食晏,今次晚飯時段都熱鬧,但總叫做唔洗等位。

依舊點選西冷扒300g,今次有得揀UCC烏龍茶,可以避開汽水糖份~望向下層既普慶,諗起不如搵日一家人出黎食自助餐,等老豆開心吓。

根據KMB app話2份鐘後有車,結果係已經走咗...細雨中試影街景黎打發時間,直至2分鐘後既下一班車。

PS:係星際買咗天涯鏡同定焦鏡既FILTER,話晒都用咗四年多,店員都可能無諗過我呢個中佬會幫佢開單......

家庭日@星期六

晏晝台灣女生同幸男搭小巴出市中心去攞位食拉麵,我就騎愛駒去外母屋企攞幸男既書包同食物袋,但我無諗過會被倆母子野生捕獲都唔知......

另類父子合照,我仲係懵然不知,係烈日下保持緘默。

我就根據任務指令,先去外母屋企,幫幸男攞書包同番學用品。

到市中心會合倆母子,啱啱有位入座。每次都要提醒幸男唔好飲咁快,否則未食飽就見底......

人家帶幸男去踼波,我就臨散場時入替人家,騎愛駒接幸男番屋企。

人家準備晚餐,我就偷時間去球場跑步,好難得可以享受休閒時刻。唔知係咪聽漏提示聲,以為自己跑極都未夠5km,停步兼停錶時,先知已跑咗6km,自已嚇自己啫~

 收到幸男既來電,話15分鐘後就開飯。預啱時間,番到屋企就開餐。人家係西鐵站既社企買晚餐材料,總好過係一田買現成餸菜翻熱丫~

放工入元朗

捱完個早更,騎愛駒入元朗,係目的地附近搵咗間茶餐廳食晏。咁好陽光,當然要試吓NOKIA 9 PureView既攝力。

雞翼薯條下午茶,永遠係至愛,依然記得舊對白"我鍾意食雞翼薯條得唔得丫?"。味道同質感有啲似CANTEEN大家樂既炸雞翼,回味夾雜著回憶。

行去隔街既波衫舖,問可否代波衫印字。年輕店員叫我跟卡片上既負責人直接聯絡查詢,可惜結果係失望......

太陽猛烈,匿埋一邊遮蔭位,用智能電話上網SEARCH"元朗波衫印名",搵到間DIRECTSOCCER球衣專門店。該店之社交平台未見有聯絡電話,我又無臉書帳號作留言查詢,唯有騎愛駒去望吓。好在有開店兼有代客印名,"MESSI 10"盛惠$180。

順便去買跑步腰包,係大馬路搵唔到雄峯,原來不敵舖租,搬上樓上舖。用GOOGLE搵,街景只見萬寧,原來係萬寧隔離既唐樓樓梯入口........

結果揀咗mont bell既Cross Runner Pouch($200有找),試過可以收納6吋芒既Nokia 9 PureView,兼有個分間放一兩條鎖匙。

台灣女生放工係超市買材料,安在家中邊睇電視邊開餐,飯後重拾昔日追劇時光～

接考試生放學

同康楠,嘉耀睇完<哥斯拉II:王者巨獸>，就去接幸男放學。幸男話要食outback,雖然明知幸男食唔晒一個兒童餐，但我都係心軟入座…

飲完忌廉湯就將沙律交俾爸爸,等待主菜炸雞枊薯條。幸男食咗一半多啲,剩底既用外賣盒拎走,搵晚當宵夜食埋佢(蒸焗爐健康炸)。

其實我個藍芝士漢堡餐都係食唔晒,放棄底面麵包,並將薯條放入外賣盒。

送上婆婆屋企,順便將單車摺好,搭的士番屋企。下次出球場跑步,幸男就可以自己踩單車，唔駛追到氣咳～

PS:<哥斯拉II:王者巨獸>雖然唔算出色(只係將舊故事重新包裝),但都比NETFLIX既3部曲動畫好。忽發奇想,如果基多拉出玩具,可以3條頸上既頭,向上拉走而底部有一個新軟膠頭頂上補替,重現再生劇情就好了。

翻煲GUNDAM 00

之前趁Cheapy執笠前,買咗GUNDAM 00既dvd。畫面像數不足,唯有係電腦dvd rom播黎睇,仲要校細啲個畫面以防爆格。用genki藍牙5.0aptx駁DSR7BT耳機,效果好過齋出JBL Charge 3喇叭。

葛拉漢與主角F剎那既執著,以Union之Flag機體越級跳戰GN dive既Gundam Exia,非常熱血～期待往後Flag小隊既雄姿～

PS: 事隔十年，仍然最喜歡GUNDAM 00

NOKIA 9 PUREVIEW VS NOKIA 7 PLUS

唔怕貨比貨,最怕唔識貨,Nokia 9 PureView既攝力確實不容置疑,塵埃既細緻,膠面既凹凸感,令相片處理既時間變得合埋~

 番老家黐餐時,隨心用Nokia 9 PV與Nokia 7 Plus拍比較照。

驟眼睇,Nokia 7 Plus好似夜景較好,但肉眼所見,夜空無咁純黑,香港既光害理應存在.......

街燈夜景,對焦點為白色房車,Nokia 9 PV自動以ISO6400拍攝,無諗過可以直迫DC既ISO值。

Nokia 7 Plus自動以ISO1000作拍攝,成像則比較鬆散,樹冠既細節亦相對失色。

天橋街景人像夜照,較果相當出色~

Nokia 7 Plus卻失去了背景暗位細節之餘,前方受光主體既成像都略遜一籌(頭髮,衣服皺摺)。

總結：5鏡頭無5倍靚,但細節上絶對有優勢。5鏡疊影HDR下,夜空光害及厚雲亦會變得明顯～即使每張相要花6秒左右去呈現,我亦無悔揀選Nokia 9 PureView (往後軟體更新可縮短時間就更好) 。