新春盤菜

今晚坐Andy順風車去振興新村食盤菜，由於等到近七點都仲係落大雨，所以村友要拎走自己個盤，各自搵室內地方食。好在麥生有計，成功安置3枱鄉親好友，安安樂樂開餐。

八點左右先至停雨，可惜無得睇舞獅，係村會所睇咗陣抽獎就動身走人。

多謝大姐同麥生既邀請，多謝Andy同Emily既接送，被關照同愛鍚既感覺係幸福的~

祝願大家新一年，身體健康，心想事成!

中佬聚一聚

趁阿輝短暫返港，約埋阿基一齊去鋒哥廚房，邊食邊傾邊啤。

兩個半鐘放題，刺身，燒物，雞煲，火鍋......細嚐港式味道，道盡中佬辛酸。

埋單後，送埋阿輝去搭巴士，再分道揚鑣歸家。無論大家住得幾遠，線上聯繫會促成面對面相會。

PS:人家話睇得出我係真笑，唔係平時家庭合照既假笑......

J CRUISE 3 WHIZZY

捱完個夜更，遲番到屋企，訓兩個鐘唔夠就起身食晏。晾埋衫就騎愛駒出去車迷城，交收月頭訂購既J CRUISE 3 WHIZZY拉花。

骨位全滿，唯有跟人哋係路邊短泊，望落我好似同一伙出車嚟睇嘢咁。紙盒無帶走，新頭盔放係seat位下。今次無追錯牌，順利經中九龍繞道回程。

其實好想揀啲搶眼啲既色系同花紋，等咗一年既最新拉花ACCONIC都唔啱心水。舊頭盔既內綿已捱唔到下一次清洗既壓力，唯有揀住呢款先。

前方同頂部都唔錯既，係側面同正後方既幾何圖案有啲失色，缺少連貫性。

訂頭盔時，店員話SHOEI既存貨唔多，因為怕顧客介意製造日同購買日相差太遠。

PS:先係老院附近停車，買個下午茶俾老豆，因為11點幾收到短訊，“猷哥好耐冇食下午茶”。

年初三食好啲

是日赤口，本身都無人家訪，台灣女生帶我哋去黃埔食爐端燒。

前同同事嚟食過，人家話一定要試下燒河豚肉。

今年幸男無話去AIA嘉年華會，出嚟食餐飯，擺脫連日既糕點陰霾……

剌身就得一份，其他燒物就任嗌，當然睇下閣下揀既係乜餐。

無以前咁食得，好在呢度既質絕對補償得到。

惠比壽生啤，前後飲咗2杯(套餐唔包)。

擺拍幸男枱上有啤酒杯，其實兩母子飲套餐包既特飲已爾。

最有戰鬥力既係人家，臨尾嗌咗份炸年糕。

人家揀咗甜品-菠蘿雪葩，幸男見賣相唔錯，結果自己都嗌一個。

年初二

自幸男出世，每年新正頭都會影番張家庭合照，今年已經係第十五張了。

番輪班既我對節日確實愈嚟愈魯鈍，尤其係幸男已大個，唔似得以前會為小朋友安排節目或主題，為搏童真一笑。

年初一

年初一要番工，雖然唔係悠閒，但總算唔係忙到甩轆。

夜晚番老家食飯，無諗過阿嫂叫大佬帶副啤牌嚟玩。飯後收好碗碟，先玩潛烏龜 ，再玩鋤大Dee，重拾兒時一家人既回憶。

陰霾下的球場

幸男訓到晏一晏，但又要跨區踢波，於是急急騎愛駒落藍地食個壓線早餐。

十月兜過嚟一次，順利跑快圈咁，半個鐘到埗。

原來球場係望正宏福苑，係迴轉處時已經近望過一次災後建築，感覺既無奈又傷感。

PS:新香港之下，質詢與交代均不再存在。

情人節外出實惠用膳

原本係等幸男踢完波，係屋企打邊爐過情人節晚上。無端端尋晚俾台灣女生online book到dalloyau既餐廳，結果個仔約老best食，父母出去太古廣場食情侶套餐。

Pan-seared Scallop，頭盤已為4道菜既menu開個靚頭。中間既調汁開胃之外，帶子間既三文魚及火腿增加層次。

Lobster Bisque，顏色比平時既淺色，味道比平常輕身，但多一份甜香。

Australian M4 Wagyu Beef Striploin，但食唔出和牛既油香，感覺有點失色，早知揀Barbarie Duck Breast。

Pan-fried Lobster，人家既精明之選，調味下既效果完勝牛扒。

Crêpes Suzette，仲以為會唔夠飽，點知連個甜品都食唔晒(潛意式既自我抑制？)。

臨尾埋單至得知，DALLOYAU全線BISTRO於月底結業，只會得番賣朱古力，蛋糕同MACARON既服務。呢杯咖啡將會變成絶響，由於飲咗兩杯香檳，結果呢杯咖啡飲剩一半......

PS:第一次飲dalloyau凍咖啡viennois，係同幸男去動植物公園前既茶點時段。

小品電影

夜晚一家三口係Ruby Tuesday食飯，之後我就台灣女生去英皇睇東京的士：回憶里程。

入場前本著溫情小品既預期，無諗到原來順道了解舊日本時代既大事及社會文化。

希望我老咗之後，都可以同女主角高野菫一樣，優雅地老去，對細味生活堅持到最後，並遇上願意久違既溫柔與遷就。

區內交收figma 651

係CAROUSELL搵到個區內賣家，可以係兆康西鐵站交收，太方便了。

今次figma版既綾瀨桃，上身係冷衫，下身係布摺裙，充份表現出動畫既設定。相比之下，SHF版既釘崎野薔薇條布裙顯得同上身無咁一致。唯一扣分既位係綾瀨桃既上身比例，無動畫咁突出……

小插曲：幫小桃擺pose時，唔小心整甩手踭關節位。由於前臂近手腕位係黐實冷衫袖位，所以要靠手感，隔住件衫嚟卡番好個關節位(closed reduction )。

砌詞兜風

幸男去比賽傍晚至番，台灣女生晏晝要上堂，於是我提議晚餐食vision 8既外賣。最近油耗大咗，係時候run吓車，俾愛駒伸展吓。

放工時段，回程近市中心段已開始塞車，過咗仁愛堂至唔塞。

PS:希望菜餐會多啲新選擇～

It's a SONY不再

沉澱咗幾日，睇咗YouTube及網絡報導，對SONY計劃將電視及家庭音響業務分拆俾TCL，始終難掩不捨。

總括如下:

大圍環境-各國仍為COVID-19所預支既經濟作還債，大眾以性價比為主要考量，反而削弱對品質進步既追求。

入門用戶層-電視不再為必需品，智能電話及平板電腦已可於網絡支援下，提供影視娛樂，尤其係蝸居環境。

中階用戶層-受制於非自家出產既panel，價格被失去競爭力。即使自家影像處理器較優，亦難以追回可負擔既奢侈。

高階客戶層-成本價格失利於大吋數電視上，進一步擴張。同一個預算下，客戶選擇買個大吋數啲既另一品牌電視......

擔憂:

51%:49%控權之下，SONY失去話語權，影響品質控制。

法律上既爭議，過往品牌都未能於中式法制下，得到預期既結果。

隨著家庭電器(例如冷氣機)不再係高端產品，性價比將進一步衝擊傳統品牌。用家面對既係易入手，但唔耐用既產品。

個人體驗：

本人用過電動吸拖機，兩次都係捱唔過保養就開始走下坡，要特意拎去維修或買過部。

PS：現時家中既SONY產品:電視，智能電話，遊戲機，相機，穿戴式冷暖調溫裝置。

兜風x試頭盔

J CRUISE既內綿已殘破不堪，又無得再配，唯有扚起心肝去兜去車迷城試J CRUISE既SIZE。明明電話問過有M同L碼可以試，但去到就話無晒。反正出咗嚟，開高德app望吓兜去頭盔王要幾耐。見廿分鐘就到，於是打去問有無size可以試。

亞皆老街勁塞車，結果用咗21分鐘到達。

最新既拉花ACCONIC唔啱心水，唯有退而求其次既紅WHIZZY(左上角)。女店員話得XL同M可以試，兩個都試晒，XL鬆過用緊既舊J CRUISE(我帶埋入去作比較)，M碼直情塞唔入。其間男店員行埋嚟話"真係半個鐘就到喎，都快丫"，應該係佢聽我既電話。農曆新年前後會番WHIZZY既大碼，唯在留意住佢哋既FB更新。

原本想係車迷城訂淨色BESALT，貪佢好似偏淺色。

車迷城send俾我睇既實物相比官圖沉色得多，太近似路面顏色，所以至轉諗WHIZZY......

PS:每次都會係舊居樓下影吓相兼企陣，總係想多一點兒時回憶既增值。

黐露營晚餐

早更補一個鐘走人，因為今晚要去黐A7露營晚餐。騎愛駒去到大江埔問阿基營地位置，原來係12分鐘車程外既摘星山脈至真。跟住高德app去到呢個位，點睇都似係鐵倉多啲。打電話問阿基，話無大閘阻隔0架喎。兜出去試其他支線，結果都係話呢度。再打電話問阿基，阿基同Brian用電筒探黑行出嚟搵我，結果佢哋係閘既另一邊出現。

阿基同Brian用電筒示意兼開大閘，慢行過一段沙石路至去到較平坦既泊車位。行上草地營地，見大家已開緊餐，我即刻開紅酒兼插上電子醒酒器為大家斟酒。

以前同愛霞一齊番工食night food就多，無諗到有一日會同佢係露營環境開餐。

嘢食夠晒多元化，連暖身湯都有!可惜唔過夜兼要揸車走，後段只可以飲KIRIN ZERO LARGER。

營地夠晒黑，抬頭好容易就望到星空。愈夜愈凍，臨走果陣(十點鬆啲)天文台APP話得9度，要開著e HEAT嚟暖身。

回程騎羊順便兜埋住藍地既同事，好在換咗車胎，否則無信心行沙石路段。

PS:投資係motoCamping好似有啲唔化算，畢境香港唔熱兼少落雨既月份得兩個月多啲既時間。

2025完

2025年最後一日，正好清埋支舊版響17，bottom up~

2025年既抱憾:

-Blog依舊脫期

-撥唔到時間去做運動，只能堅持每天既小拉筋兼core training

-SHOEI J CRUISE 3啱心水既拉花，期待落空

-ACE COMBAT 7尚未重啓

-未能於聖誕節假期，重操電單車手波作業