曾朱聯婚

活動:曾朱聯婚

地點:旺角雅蘭中心三樓迎囍大酒樓

特項:即場見證儀式

氣氛:熱鬧

衣著:華麗

餸菜:有水準

感想:祝 白頭到老,永結同心

ps:部份賓客會係一星期後再會,因為係德輝先生既大好日子~

現代東廠

於明朝,當權既皇上為咗鞏固自己既勢力,建立東廠黎執行偵緝異,但估唔到係六百幾年後,屋企都係行緊呢個機構.

今日老豆話老媽要去按摩,叫老豆自己食飯,於是老豆就約我係公司一齊食飯,順便俾埋個提早咗既覆診期佢.七點半,canteen等,但我就要搭八至到canteen,忙嘛~

老豆食飯時,吐咗唔少苦水,係屋企根本無咩尊重,大佬都係當佢透明,好似寄人籬下咁.同老豆講過total knee手術既套餐(排幾耐期,OT後幾時落地,用學行架用幾耐,幾時轉用stick,同幾時自己獨立行),等佢老人家心裡有個預算,唔洗咩都靠估,可以驚少啲,擔心少啲.

食完飯,雖然夠鐘番上工作間,但我都特意同老豆行去搭電梯落地下個層,順便目弟吓佢行成點.一步一拐,面容繃緊,流露出苦痛既表情.係老豆面前,我只有以正面既態度黎陪佢同開解佢.不快既心情,都係暫時起.

放工後,老豆打俾我話老媽發晒癲話打電話俾佢唔到,又話無飛去留言信箱,唔知去咗邊度搵女人.大佬又打去俾老豆,話搵唔到老豆,又話"搵又搵唔到,驚你有咩事".老豆同我講話大佬邊有咁好死,說穿了只係奉老媽之命打電話黎刮老豆,check佢係邊同俾說話佢聽.

電話網路不通,出入電梯都可以收唔到電話啦,唔通要24小時係身邊咩?就算真係辭工,每日24小時跟出跟入,證明清白後,老媽唔通會認錯嗎?老豆係人,唔係一個奴隸,無尊嚴,無人權...
皇上一有疑心,東廠就出手偵緝,口頭警戒一番.東廠唔會理會是非曲直,平時漠不關心世情,只顧孤芳自賞.一旦皇上話可疑,就會出勤,連同皇上將目標人物精神蹂躪一番....
ps:http://hk.knowledge.yahoo.com/question/?qid=7006031200067

撲水

番完早更,一心諗住去游水,騎羊去相熟泳池.落晒大架同布冚,行到門口見到"清洗日"字牌...............萬念俱灰之際,腦海不停搜查曾經去過或者係可以一試既泳池,突然想起小歌仔屋企附近既泳池,反正要出太子一趙,咪先去深水埗,再去太子囉,順路丫~~

度好個行程,就騎羊去新墟,走去食吉野家下午茶.份量唔太多,但又飽肚,加埋近一個鐘既車程黎消化,應該唔會影響游水既能力.

跟住就急急腳係市中心放低羊仔,落好布冚.係巴士站等咗唔夠兩個字既時間,就有車上.

幾經艱辛,卒之都去到目的地,可以游水操練吓身子~~~番完早更,體力真係差啲,只係游咗八次來回,就上水走人.

沖完涼,行番去搭地鐵去太子,係金都既"幸福宣言"補番啲相.之後行番去旺角搭巴士番屯門.係市中心買多少少屋企野,就騎羊番屋企.放低啲野,就再搭小巴出市中心同楝哥,師傅師母一齊係惠比壽食晚飯~

十一點再去大排檔會合andrew,飲吓啤酒同食少少野添.楝哥因為第二日要番工,所以十二點幾就走先.今日真係好攰,較多要達標既項目~

街頭騙案

今日晏晝同台灣女生去完金都交相同歌黎整擺酒當晚既video後,人家自投羅網,話想去朗豪坊借洗手間.其實我諗住聽日放工出金都補番啲相時至自己出黎揀款,但竟然有人送上門,哈哈

.我借啲依話去番isabella睇吓有無之前睇中個條頸飾(攞酒當晚用),於是天真既白兔仔就墮入我既圈套...

我地係厨窗見到一款display出黎既另一款頸飾,都幾elegant吓,於是叫姐仔攞出黎睇吓.人家試帶過都話靚,跟住我問姐仔有無耳環襯埋一set.姐仔隨即攞出對同系列既耳環.

人家試戴過都話好襯同靚,sale姐仔話其實呢個系列仲有一條手鍊,問我地會唔會睇埋.人家好似覺得唔需要,但我就話"咪睇埋囉,試吓之嘛".正當人家試戴手鍊時,先至發覺有問題.無錯,呢份就係我即刻會送俾人家既生日禮物~

結果人家俾我由睇吓有無頸飾買,昆到收咗我一套新娘飾物,咁就成為咗一宗好溫馨既街頭騙案,事主並損失,咁我咪即係變咗"笨賊"?

預祝台灣女生(周太)生日快樂~~

ps:真係比之前係法國婚紗買個啲朱義盛靚好多

做節@裕滿人家+賞月@色戒

中秋正日,我同台灣女生都係番完夜更,可以同伯母再食過餐似樣啲既飯過節.傍晚六點幾係裕滿人家問有無位,竟然話有位.於是行番去凱都附近會合羊仔(啱啱去買完飛),再兜去酒樓附近行人路,落大架同布冚,衝番入酒數攞位等人家兩母女落黎食飯~

呢晚既餸就似樣得多,無上鏡既餸包括蒜茸蒸鮑魚仔(唔多夠味,韌咗啲),同埋炸大腸(上枱時唔太熱..).今次大家真係可以一齊食龍蝦,啖啖肉,同食啲啱口味啲既中式菜~由於要開電單車,所以咁好餸都無叫啤酒飲(安全第一嘛)~人家同伯母都覺得呢餐飯比上次係囍囍食,有水準好多~

食完飯,上人家屋企坐咗陣,跟住就落樓騎羊去凱都睇"色戒".六點幾買飛個陣重有一半位剩,但入場見都好似幾滿吓,只係吉咗啲單丁位.

故事雖然簡單同弱咗少少,但係描繪人迷失於慾海,受情慾所影响自己原有既角色同底線,就非常出色~~片中有兩三場男女主角既床上戲,用咗不少角度同時間去表達高漲既情慾.女角火辣全裸(只係無重要地方既大特寫),配以男角大膽露股,皮袋兼體毛,確實比一般輕描淡寫既就位手法振撼得多.再加上男女角超凡既演技,多變既體位,令人不禁以為真係偷窺緊別人幹活~

即使唔太好色既朋友,都可以入場睇吓,因為呢齣戲某程度都係文藝片~~

ps:晏晝五點幾係市中心samrtone同老豆出部零機價手提時,得知老豆個膝蓋又痛多咗,心裡很不是味兒.係屋企,佢得唔到同住家人既關懷同尊重,見佢重有生命表徵就算.一個老人家只可以從另外住開既仔得到關心同支持,實在難委.

囍囍

今晚同台灣女生,伯母去咗囍囍食晚飯,當係提早做節.環境又真係幾靚,不過間格就真係爭啲.因為擺酒既位置,係開放式, 無間板,而好似係無個枱,只係得塊backdrop布.....至於食小菜既區域就有卡位同圓枱,佈置都ok~

講番餐飯,頭盤係叉燒拼五層燒腩.叉燒係"林",但燒腩就鹹咗啲....

跟住既豉汁蒸帶子豆腐,都係比較鹹口,但配搭都唔錯既.

平時出街食飯既雞煲通常都幾大兜吓,但係囍囍既香葱滑雞煲又真係細咗啲....兩個人分黎食都無咩肉食,更何況係三個人呢?

等咗好耐(成大半個鐘)至出現既法國鹹芝士焗龍蝦,真係細得可憐.....舊幾水,雖然諗住都唔太大隻,但都無諗過只係大過隻老虎蝦少少.........

可能係今晚有人擺酒,所以厨房太忙,搞到我地啲食小菜既客仔要得好耐至有餸上.我地見隔離枱都因為等得太耐而取消order黎埋單,整體呢間酒樓俾我地既感覺都係麻麻,下次無交易.

食唔飽,人家同伯母番屋企食我地送俾伯母做過年禮既榴槤月餅,我當然係無食啦~有次係市中心見到有得賣,人家試食過,話好好食,加上同事既力讚,人家其實好想買,但只係嫌有啲貴($19x).適逄做節,我就買咗盒d24榴槤月餅俾伯母,咁佢地兩母女就可以分甘同味啦~~~

據講呢款月餅,係新加坡 公司出品,隻榴槤得兩個拳頭咁大(原產地:馬來西亞),平時唔外銷,只係中秋以月餅型式外銷~

佢地食得好滋味,但我就要餓住肚仔,等番屋企食人家煮既CP雲吞~~

時間啱啱好

放工騎羊去市中心買蛋糕俾人家食,再還碟同租碟(係莎莎附近撞到猛將夫婦同阿jay).番到屋企見個洗衣機顯示仲有一分鐘就洗完衫,真係啱啱好~

今日番晏前係屋企set定部洗衣機7個鐘後開始洗衫,番到黎就可以晾衫,唔洗等啲衫up住係部機幾個鐘至有人攞出黎洗

.本人都幾鍾意呢個功能,你知啦,啲衫fing完都係濕o架嘛,up得耐會一陣味.

先收衫,再晾衫,跟住係客廳打住戰國無双katana黎等人家打電話黎,再騎羊出市中心接人家番屋企.今晚人家同大學書友食飯兼傾野,應該食得落我買既蛋糕卦.

住家飯

今日同台灣女生行超市買餸,今次黎個突破,就係整蟹

.係百佳阿姐既提點下,人家好成功咁煮咗碟薑葱炒蟹出黎(我都有幫手兜幾兜).$40斤,三隻要$54.6,但又真係幾多肉地,點都平過出街食丫~~~

加埋人家既一口吃蒜香牛扒粒,同沙嗲炒菜,一餐住家飯就完成啦~

其實自己都幾想係屋企食飯(唔知係咪年紀大既關係),因為可以唔洗等位,又可以慢慢食同傾吓自己嘢.

安全渡過十二點,無疴無嘔,通過衞生驗定(禁斷之人體試練)~

諳

今晚同崇真書友一齊去聽夏韶聲既"諳"演唱會,估唔到會爆場,可能係有兩邊封住唔坐人既關係卦.咁既擺位好在係觀眾可以望個台望得舒服啲,都幾好既,不過中間台上既大screen有個大"D"字框住就真係有啲hard sell.

發起今次聽concert既就係今期準新郎哥david(相中左手邊),隔離既就係音樂人孖仔oscar同thomas(中間同右邊),當年呢對孖仔都花咗我唔少時間去分辨佢地.

一開場,夏韶聲就一身宗教大師裝束上台,獻唱佛計歌....喜多郎上身?一開聲就知夏先生把聲失準,好沙啞,去到中後期先至好啲.

中場有劉以達黎做嘉賓,佢真係好搞笑,令場面生色不少,"我地夾band既比起啲獨立歌手真係辛苦啲,又要彈,又要唱,打鼓仲要踢埋腳"

舊歌一首一首接住落,其中有首係以前時間廊廣告播既歌"永遠向前,永不停步,時間第一..."真係唔聽番都唔記得有呢首歌仔.翻唱人地既歌中,有係向已故既羅文,梅艷芳,黃家駒致敬.

當唱到自己既一首舊歌"童年"時,screen播上夏先生細個既相幾張,感覺好似去姞婚飲宴睇video咁,哈哈.演唱會長達三小時,真係少有~

害群之馬@鈴木科硏維修部

今日番完早更,飯都未食就騎羊出觀瑭鈴木科研配頭燈胆,因為其中一盞燒咗(用咗年半).

咁遠路程番代理公司,都係為咗買真正啱自己款車型號既零件,唔想係其他細車行買唔啱既不良產品啫,於是買咗原廠每隻$180既燈胆.

由於唔知點裝,於是問維修部既技師可否代勞.點知該名技師一句話"唔得閒喎,得陣啦"跟住又向本人話自己裝都得啦.我忍住唔出聲,自己裝咪自己裝囉,再講明坐駕既型號,詢問安裝方法.

該名技師話要拆個"豬頭"(即係車頭前面之外殼)出黎至可以換頭燈胆.我出去門外查看自己既坐駕,見只係係風擋後有兩粒縲絲可以拎出,於是又入番去問係咪鬆個兩粒.

在場另一位老師傅聽到就話有兩款架喎,再問我多一次型號,而該技師就一句"你個架唔係150黎咩?"連個客架車係咩型號都未聽得入耳,就胡亂叫個客點樣拆部件安裝,實在離譜!

該名技師即刻改口,話唔洗拆"豬頭",只需伸手入頭燈後就可拆除,最後都係叫我自己試吓,無出黎望吓架車,又無詳細說明點拆.

我出去門外嘗試,但只係摸到又望唔到,又無概念要拆啲咩先至係啱.入番去店內,問老師傅"唔好意思,我試過,但都係唔知點搞"於是老師傅出去門外,叫我落好大架,親自示範更換一盞俾我睇,再睇住我換埋另外一盞,從旁指點,好感動

~~(感受到老師傅對維修,電單車以及工作既熱誠仲有體貼既關照)

本人真係好唔滿意該位技師,完全唔專業.一間大行既技師,售後服務竟然比細行還要差?如果要收手工當作consultation fee的話,該技師大可開門見山,不需好似被迫做"蝕底"野咁.

部車係係該行購買既,並非別廠型號或水貨產品,本人覺得車行絶對有責任為顧客提供售後服務及查詢.唔通一本操作menu會圖文並茂詳細講明點樣更換各種消耗品及部件嗎?部車賣出咗就貴客自理?行規係無俾錢的話,所有查詢都係商業秘密?

該名技師好應尊重自己既工作,學會尊重別人.維修技師不等如低下藍領,而係一門專業技能,讓駕駛者可以安心及安全駕駛既保障.

brandy

今日番完晏,騎羊去市中心吉之島買特價百蘭地,擺酒用嘛~

一如上次酒行既姐姐所料,中秋時節啲酒真係平好多,由平時三百幾減到二百幾,仲要有禮品送(我揀咗$20美心coupon).

呢次係我第一次買百蘭地,睇真啲原來同芝華士一樣係40%,但本人覺得芝華士好似好飲啲~本來諗住飲多支,但見女家又無咩人會飲,倒不如留番啲錢黎買支芝華士,等賓客有多個選擇嘛~

東風螺

今日同台灣女生街買餸,先係吉之島買咗盒魚生,再係百佳海鮮檔見到有東風螺賣,平時係街市都唔係時時見到,於是就上前問吓阿姐.檔口阿姐話白灼再醮啲醬汁(海鮮醬)就已經好好食,之前同andrew係大排檔食過又真係幾好味,於是買咗一斤.再係超市買多少少菜,青椒同魚肉.

經過人家既處理,餐枱上就擺滿餸菜~東風螺口感唔錯,夠鮮味!我同人家一致認為下次都係買東風螺好過買蛽黎煮,起碼啖啖肉又無沙嘛~~

飯後我地係客廳睇租番黎既"誘心人",可能係飲得太多紅酒,睇咗無幾耐就洽著咗,得人家一個繼續睇.到我醒番時,已經出完場字幕.....人家番房訓,我就晾埋啲衫同飲埋啲紅酒,點知係廳張梳化上體力不支,訓到朝早六點先至醒......唯有番入房再繼續訓啦~

豐富既餐晚飯,適量既紅酒,的確令人易於入睡~~

阿伊達

今日番完早更, 係市中心食過晏,行去大會堂買"阿伊達"既歌劇飛,.事源有一次落車係巴士站見到到呢齣表演既宣傳燈箱,台灣女生鍾意歌劇,我又覺得埃及theme又好似幾吸引,所以就提議一齊睇.

平時無咩人排隊既大會堂售票處,今日都有七八個人排,有啲買楊千華,黎小田,汪阿姐...當輪到我時,"唔該十月13號(特別日子)既阿伊達有咩飛?"阿姐話"賣晒".問埋其他日子都係無咩位剰,打電話俾人家,夾過日子,都係睇唔成,因為人家一係就要返夜,一係就要去上堂.....

無功而回,騎羊番屋企,正準備沖涼訓覺時,人家就打黎話可以15號去睇(掉night).於是我又騎羊出市中心再買飛,今次排我前面既係公司既雄哥.

排排吓,有啲公司既阿姐走埋黎,問雄哥諗住睇咩,雄哥好似有啲唔好意思咁講"泰拳".跟住阿姐們就問我"mug你都啱o架,阿蛇?"我答"唔係,我睇其他表演"阿姐再問有咩好睇,我唯有答"我見有啲人買黎小田,汪阿姐..."阿姐們聽到之後,又係隊尾排埋一份.最後我都買得成飛,但就搞到成五點半至可以訓覺,希望今晚唔好太忙啦....

採購物資團

今日同台灣生出金都睇請諫既樣版,咁啱對面鋪就係上次係會展婚紗展個紅酒檔.個店名有一個字唔通,正當我地以為搞錯時,店內姐仔見我地手拎住上次張單張,就話其實係同一間公司,於是我地就入去再試多次隻紅酒.從姐仔口中得知中秋期間,吉之島會做馬爹利既promotion,平好多,叫我地留意吓,好過係行度訂~

繼續係商場行,撞到會考同班女同學alice,原來咁啱佢係同我同一日大日子,只係佢係雅蘭擺酒.大家亙相介紹俾對方既另一半,跟住就分道揚鑣.

除咗買咗啲假花瓣外,我地仲買咗啲利是封添~~係花車佈置店舖,見到有款係用barbieb同ken既公仔,係就係幾靚,不過造價就貴啲,要成五舊幾水.

我地靈機一觸,搭地鐵去尖沙咀既玩具反斗城搵barbie同ken既結緍公仔,果然平啲(加埋都只係兩舊水有找),有咗主角,再搵花店搞都唔洗補咁多錢丫~~

人家仲為barbie買多套衫添,不過聽日就係拍拖週月日,當係禮物黎氹吓人家都應該丫~~

我地仲諗住大日子當晚將barbie同ken放係reception枱頭做gimmick添.

ps:有私心既我,諗住可以順便買心儀既電影版變形金剛玩具,但可惜同吉之島一樣,賣晒無貨.........

潘朱聯婚

點解會著成咁?因為今日做兄弟,為潘哥既大喜日子幫手嘛~

朝早係新墟巴倫紐荷對面既茶餐廳會合華b同阿禮一齊食早餐,再去老麥買個早餐外賣俾新郎哥.坐阿禮車去元朗采葉樓下會合阿潘同阿飛,三架車浩浩蕩蕩咁上公路入馬鞍山接新娘.

姊妹們都唔算為難,我都只係要做吓掌上壓同行吓石春路,執番身彩~其實今日我都唔係太幫得手,大多數工作都係由新郎哥義工組既兄弟代勞.佢地真係好認真同落力o架,可能係搞開活動既關係卦.

成日既流程都好順利,接新娘,攞外賣野食,去伊甸園觀禮,酒店場地佈置,操作煙機(新人進場).不過夏天著老西真係幾熱吓,我本身又大汗呢~

臨尾新郎哥同我地一班出席宴會既pdn3男同學(jay,彪,percy,華b,禮同我)一齊舉杯飲白蘭地(我第一次飲咋),黎接受我地對佢同阿嫂既祝福.

潘哥,再一次祝你同阿嫂永結同心~好開心可以係你既大日子盡一分力~~~

ps:唔該阿飛載我同人家番屋企,同幫我傳啲寄存物資入我屋企~

友人去峇里旅行結婚

今晚同崇真既書友出黎pizza hut食野兼聚吓,因為我地其中一位兄弟david會係十八號同佢女人一齊飛去峇里影婚紗相兼旅行結婚~

david仲派咗呢張咁特別既帖黎公佈天下,一黎紀念,二黎向老人家交代,咁都俾佢地搵到,勁,有心機~

講番pizza,今日唔係紅日,但都等野食等到忟,漏單,枱枱都有pizza食,係我地個枱無!!!

等野食期間,楝哥見到阿錦係門外等緊位,打過招呼.

遲啲我地會係david出發前一齊睇夏紹聲既concert,準新郎話想睇嘛,我地當然係出黎襯吓咁啦.

"阿嫂,david,祝你地永結同心,白頭到老"

ps:人愈黎愈大,身邊朋友同自己都多咗病痛,希望大家都可以做個健康都市人啦~

五星級大鼠&skywarp(後記)

睇完戲五點多啲,一心諗住同人家係大戶人家打邊爐當晚飯,於是行去置樂相熟商場逛吓.係反斗玩具店見到變形金剛master piece第六彈,仲要係我最鍾意既黑紫配搭配!上前問店長價錢,盛惠$590.由於身上無咁多現金,於是就問店長"你地未栅門架可?".店長話仲未,我就同人家急急落去"禁"錢,點知櫃員機無錢......唯有帶人家去置樂花園內既滙豐提款,好在多得人家相助,至可以帶走心頭愛~

番到屋企,就拆盒幫skywarp變形兼檢查有無問題(之前既star scream背脊部件少咗粒縲絲).由於佢係同之前既star scream同一型號,只係顏色唔同,所以唔洗睇說明書都可以順利由戰機形態變成機械人模式,真係型到爆~~~

ps:特別鳴謝台灣女生既即時免批核借貸

試菜

今晚同台灣女生同以及伯母去咗熊貓酒店既敫悅試菜,雖然唔係擺酒當晚既菜式,但目的係試吓個厨既手藝.

先去reception攞番分spare帖,跟住就搭lift直上三十樓既"敫悅".宴會部幫我地訂咗七點鐘枱,但我地七點三至到逹,遲咗少少

.一坐底,開埋茶,服務員就問我"x生,啲菜係咪上得o架啦?"咁大個仔都未試過有食店為自己點定餸,感覺好以上賓咁

~~平頂多都係自己向食店預約枱時,順便留定一啲特別既菜式咋嘛.

地方都幾舒服,樓底又高,不過境觀就差啲,因為全部都係樓同工廠區.話事話,都幾多人係呢間酒店既中菜廳食野,吉枱唔多於50%.

首先上既係燒味拼盤:叉燒蜜汁味重;海蜇爽口;乳豬皮脆又唔太肥;油雞夠味得黎又唔太鹹.

跟住上既係帶子,大粒帶子上有蝦膠,口感一般,但仍食到帶子鮮味,只係份量太少.

第三道菜炒班塊,好好食,大大塊,啖啖肉,見到紅白斑交錯既魚皮,賣相頗吸引.

第四道菜係蛋白炒壆斗,簡簡單單,無咩特別驚喜.

最後係炒飯,白米夾雜住糙米,由於本人唔好糙米,所以不作評論.

甜品係蘆薈椰皇燉鮮奶,由於本人唔好牛奶,所以引用人家兩母女既食後感"夠滑口,但香味略嫌不足"

由於唔知最後會上炒飯,所以食到中途叫咗三個白飯,最後上演一幕白飯與炒飯既尷尬場面,一枱飯桶......食唔晒,仲打包走添.

埋單時,諗住都要俾茶介錢同另外叫既三個白飯錢(十蚊一個),點知哥仔話宴會部個邊已搞掂條數,可以就咁走人.結果不用分文,就享用咗近兩個鐘既華麗晚飯(我都係第一次係酒店食中式晚飯咋).