愛情小品

今晚同台灣女生一齊係屋企睇呢齣戲,近黎都無咩點租碟一齊睇.本人幾鍾意新海誠既動畫作品,雖然今次佢只係擔當監督,但都係充滿希冀~

男主角(遠野貴樹)同女主角(篠原明里)係小學年代相識,係班中公認既一對.升中後各自升學,由於跟隨家人搬屋,大家只能以書信保持絡.十三歲時男主角冒住風雪,放學搭火車前住女主角家附近既火車站見面.可惜天意弄人,原本三個多鐘既車程,被風雪既延誤,變成七個鐘,但女主角仲係車站等候(原定七點,但十一點十五分相會).一對小情人,溫馨咁係車站對住火爐,一齊食女主角準備既便當.男主角決定大過咗要用盡自己既力量去保護女主角.大家彼此相信會有機會,再一次一齊欣賞櫻花.(男女主角小學時代分別時最後經驗既情景)

長大後,最後女主角結婚既對象唔係男主角.女主角係準備為結婚搬家時,見到舊既信件時,至記起男主角呢個小時候既朋友.其實時代進步咗,手提電話既出現,應該可以拉近彼此既距離,但實際地理上既差距,令女角逐漸遺望男主角.

相反,男主角中學時有打短訊俾女角既習慣,但原來係一直都無發出,可能男主角一早就知道女角已將佢忘記.....男主角心目中只有女主角,雖然長大後有交往三年既女孩,但女孩既短訊話"即使我們通訊了1000千次,恐怕我們心裡的距離也只接近了一厘米".

童年既誓言,青春既約定,你我又記起同逹成幾多呢?

ps:花瓣落降地面既速度係"秒速五厘米"

家中養病,投入奧運

崇尚自然療法既我,好辛苦咁挨過夜班,都要準時食藥,全日留守家中.食藥同訓覺,好在有台灣女生照顧伙食....

頭重重,鼻塞,流鼻水,全身乏力,唯一可以做既就係坐定定打機.咁多年黎,我都係慣咗養病時係屋企打機,一黎解悶,二黎分散吓唔舒服既感覺.

今次仲分別係體操同跳高項目攞得金牌,不過抺羊打腊同格價執平貨呢兩個項目就被迫要棄權.....希望快啲好番,可以打理吓愛羊,同管理吓散亂既物資.

家中玩樂日

今日安在家中,玩吓尋日買既Wii game.隻MARIO & SONIC奧運遊戲都幾難玩,幾經艱辛至可以係槍擊項目攞到個銀牌,其他游水同跑步都包尾.........

BIOHARZAD隻GAME無想像中咁好玩,因為唔係好似RED STEEL咁可以自己行,而係跟住個故事流程自己會行,只係埋位就瞄準射擊同攞野,無得自己走位,無咗逃跑既重要元素,感覺比PS2年代個隻BIOHAZARD射擊還要差.

呢架就係之前買既電單車變形金剛玩具,外型係一部大包圍,顏色都幾SHARP~

老問題就係電影版既造型都係較新穎同唔靚仔,你睇佢個樣都有啲唔太順超...不過個身型線條都幾OK,起碼唔會好似JAZZ咁隻手由兩塊版加個拳頭組成.

本人幾欣賞坐位變成盾形弓炮,同埋尾輪一分為二既處理方法,整體睇落去都唔太單薄.

夜晚同台灣女生,外母及其好友一家食飯,六個人六餸一湯.原來明星啲水準高番啲,後生既係咁主攻芝士龍蝦伊麵底,最後大家都捧住個肚走~~~

法式"漢陽苑"

大家無睇錯,呢張係lafuma既櫈,而呢度就係位於旺角既lafuma outdoor cafe.其實我都唔係好明點解會有間賣戶外用品既公司開既食店,不過話係食法國菜,就即管試吓.

呢度用咗好多攀山同戶外冒險既相做陳設,感覺係現代化既雪山木屋咁~

我地八點左右到,但都係得兩枱人係度坐,再咁落去,睇黎都唔挨得幾耐......本來我同台灣女生諗住食煲仔飯,但途經呢間之前留意過既食店,人家望住個餐牌上既海鮮石上燒同烤芝士,就放慢腳步,好似好唔想離開咁,於是我地就上咗去食晚飯,我都鍾意食芝士嘛~~

由吧枱到飯枱,都係由呢位哥仔包辦,人流咁少,一個人都搞得掂丫~

我地用既唔係炭爐,而係電熱爐,上層係石板(應該係卦,話晒叫石燒嘛)而下層係金屬面板,用黎烤一片片既芝士同配料,情況同之前係荃灣食既烤芝士差唔多.

配料有火腿,鴨胸同青瓜,墊底個啲菜就唔知食唔食得,不過芝士就真係好似少咗啲....

至於石燒主菜海鮮就有帶子,魷魚圈,蝦,鱸魚,蛽,再以青黃椒,蕃茄,蘑菇,茄子作蔬菜類別.

肉類就有三種:牛肉,唔韌夠肉味;雞肉,好嫩滑,燒耐咗都唔會難咬;鴨胸,唔"穌"得黎又有口感,肥味.

人家食得好滋味,環境唔錯,又無咩人嘈,我地都食得幾舒服既~~~

由於要買水至有得飲,於是我地叫咗壺home made red wine($120).第一次飲熱既紅酒,裡面既材料蘋果,肉桂同唔知係檸檬定西柚,令酒味帶點酸,我就覺得麻麻,但人家就好buy,係咁飲,最後面都紅晒.

甜品係法式燉蛋,面頭個層焦糖好甜,下面既燉蛋就無元氣既咁滑口~雖然係貴啲,但感覺比係深井間大衛餐廳抵,起碼啲野食特別啲嘛.

ps:我地晏晝係旺角百老滙睇咗魔戰王:貝奧武夫,好細緻既電腦動畫電影.

故事簡單,主角為名譽同金錢,帶住出生入死既同伴越洋到丹麥除魔.

之後英雄難過美人關,即係男人玩女人玩出禍.(正所謂"紅顏禍水嘛")

最後老將(年老既主角)再度披甲,為自己既罪,為國家同愛人而戰(補鑊).

買定隻熱狗,邊睇邊食,省城真係唔通啲!!(其實元朗百老滙都應該有)

裡面除咗有茄汁,仲有芥醬同青瓜醬,好好味!!!

人生中第一件羽絨褸

今日晏晝同台灣女生出尖沙咀百利商場還頭飾,但店舖無人係度.人家打過電話俾姐仔,最後叫我地放係門外裝宣傳單張既籃仔.出開黎,人家話不如去羽絨城睇褸,因為我地黎緊一月會去北海道 補渡蜜月.

http://www.thenorthface.com/opencms/opencms/tnf/gear.jsp?site=AP&model=AD0A&language=en

呢件就係人家睇中既褸,本來人家話想要粉紅色,但我話怕易污糟,最後揀咗呢個軍綠色~~

http://www.thenorthface.com/opencms/opencms/tnf/gear.jsp?site=AP&model=ANH4

而我就揀咗呢款,本來想要啡色,但無中碼,唯有要黑色啦.人家話啲"啪"鈕好睇,我就覺得好似心口打十字咁

其實價錢都貴,所以我地先睇同問一次,跟住再去旺角上樓店睇啲要著兩件至夠暖既組合(擋風shell配保溫羽絨褸).個款就差啲,加上如果出入有暖氣既地方的話,除一件好似方便過除兩件咁.再加上人家個心早就係之前係羽絨城見個款,於是行多陣玩具店就搭地鐵番去買.人家咁怕凍,當買件好啲同暖啲囉,而且第時去北京都可以著丫~~

一如sale哥仔所講,番貨真係唔多,我就因為咁而要由啡色改買黑色,而人家個款就得番display個件....今日係我人生中第一次碌爆咭,哥仔試咗兩次都係"不接納",事源係我用咗黎找星期六餐飯局,所以耗盡個限額(唯有用另一張咭).

希望出年會有個美好既假期,順順利利,開開心心~

ps:今日係兆萬搵到隻之前睇中咗,但從未見過現貨既電單車變形金剛.雖然係係三隻組合裝既盒cut出黎賣(無獨立包裝),但我都買咗.無法子,電單車兼變形金剛,好難抗拒.

最後衝刺

朝早十一點幾就到九龍瑭法國婚紗攞衫,尋晚成三點至訓,好鬼攰....兩大箱衫,一人一箱,走番去又一城既super sandwiches食晏.呢排大家都係食無定時,今次卒之都可以係正常時間食正餐~~

我地兩個都係叫咗呢個海鮮龍蝦仔意粉,配蘆薈檸蜜,味道同價錢($48)都ok丫~自己上去玩具反斗城望過唔見有bioharzard隻game賣,就落番去餐廳會合人家搭地鐵,轉西鐵入元朗鴻運攞褂.搭的士番屋企,司機大佬竟然收我地兩箱衫行李費,洗唔洗咁認真呀?

二點半多啲番到屋企,趁未過吉時(13:00~15:00),嗱嗱林進行安床行動(換龍鳯被單同擺放一堆"老黎"物品)

由三點鐘執吓野至五點幾,我就同人家搭的士去天水圍攞房(太多野要帶去,人家一個人搞唔掂).之前明明同酒店過好咗要孖房,但竟然以其中一間房無退房,繼續租緊為理由.我咁早book定,就係為咗確保有孖房,你無理由appt前兩三日至開以留孖房ar?係都早啲打電話黎通知個客丫......問個姐仔有咩可以補償,姐仔問我想要啲咩,我話咁有無啲dinner coupon之類既野,但佢話做唔到.X,咁你又問?當初留房做唔到又無早通知,而家毫無誠意致歉.最後轉standard room至可以有孖房,仲要係嘈咗好耐至有呢個解決方案,真係好差既customer service!!!

安頓好人家同姊妹上房,我就搭輕鐵,再轉西鐵去市中心買多少少野同食埋個單身麥當勞餐,就坐percy順風車番屋企,繼續為準備聽日既大日子作最後衝刺,希望事事順利啦~~

忙裡偷閒

今日成日都係同人家繼續為大日子而準備,晏晝係市中心買咗啲"林嬸"野,再係置樂newtype攞埋個"雪風"布章(仲以為係金屬襟章....),就去外母屋企攞番啲安牀既"老黎"用品番屋企.

夜晚同人家一齊出市中心,我同契細佬係惠比壽食,人家就同中學同學係稻香食.我同契細佬叫既炸軟殼蟹手卷,個樣似係炸水曱甴手卷多啲.......

同契細佬邊食邊傾,突然有人敲打我地座位旁邊既玻璃,原來係師傅.師傅坐底傾咗陣,等到師母黎埋就坐番自己張枱.

係咁多野顧既時間,見吓朋友係有需要既,可以俾自己抖吓同埋聽吓人地既意見.不過點都好,只係怪我同人家當初太"memo"........

final fitting

晏晝同台灣女生去九龍塘法國婚紗做final fitting,新既大樓比之前近地鐵站,門面比之前靚咗好多,似番啲姊妹店蒙羅麗莎咁.

而家傾野同試衫就可以同隔離檔分開,有番啲私人空間,令客仔唔會同人比,或亙"目及"

.

呢個就係我地坐既攤位,枱面大之餘又坐得又舒服.

人家逐一試番之前楝"好既衫,只係睇吓有咩位同size要改,等套衫啱身啲.

其實啲衫早係年頭時我地同外母,以及人家既伴娘就揀咗,早啲hold定無咁驚,因為大日子係超好日,怕遲咗會無衫揀....

我就當然係幫人家影吓相黎留念吓,兼且方便人家陣間去揀頭飾時可以睇番啲相黎襯吓嘛~~

由於我地係元朗租咗套靚啲既褂,所以原身法國租既褂轉咗係呢套送客用既晚裝(代價係加$500).本來姐仔話呢套俾人hold,好在後黎又搵到~

呢排同人家都係兩點幾至訓,大家都又攰又殘,但仲係好似好多野未搞好咁.........搭車出出入入都無咗好多時間,想坐定定傾吓細節野都困難.....

各有各忙

朝早起身,騎羊去阿潘樓下,十點半就泊好羊仔同落布冚.兩條麻甩仔咁早去做咩?咪就係坐阿潘車入南生圍視察下星期六黎影外影會有咩景囉.

因為阿潘之前黎過拍外影結婚相,所以就搵佢黎帶路睇場,兼且評估吓如果帶羊仔黎有咩好拍.

行行吓,領隊阿潘話地下無埋由會有紅葉,細看之下,原來係假既.應該係之前黎拍外影既人撒啲假紅葉黎取景,但又清唔晒啲咁散既道具.

呢個view好似係olivia個blog度望過,我地都只係行咗一段仔,跟住就走人.大致上覺得羊仔都只係可以係長提邊影相同拍video,其他就係影人像.

坐阿潘車去番雞地附近搵德輝介紹既"輝記"盆菜,落埋個外賣order連飯($400+30),為星期六既晏晝準備(新郎,新娘,伴郎,伴娘,化妝,攝影同埋華b)

係茶餐廳食完晏後,阿潘車番我去會合羊仔,跟住我就騎羊入天水圍.大耐無兜入黎,搞到有少少行錯路,但總算唔係花咗好多時間黎搵路....

特意入黎,就係為咗黎酒店附近既酒樓,留定張枱等外母同兄弟姊妹係大日子既中段時間食飯.
留好枱,攞埋張咭片就騎羊去新墟,搵番相熟姐仔剪頭髮,再番屋企抖下,電單車真偉大~另一方面,台灣女生今日出咗去太子剪頭髮,再陪外母去金都試衫,之後落旺角落訂俾旅行社留位,最後出上環攞關島既相簿.夜晚同我係大排檔會合食雞煲.我同人家都覺得,放假好似仲忙過番工咁.......

plan B

本來諗住同台灣女生,外母係市中心美心飲茶,但由於太多人等位,所以我地移師到流金歲月.雖然選擇比較少,但人家喜愛既燒賣當然唔少等啦~

本人就鍾意呢度既流沙奶皇飽,由於有蛋黃做餡,所以都係少食多滋味.....

食飽飽,我地行去新墟既花店,搞埋星期六要用既花球,襟花,手花,車頭公仔.

跟住我地搭西鐵去元朗執行plan B,就係"鴻運"租過套褂,事源係前幾日係公司見到德輝帶番黎既結婚當日既相,見到阿嫂套褂好閃好靚.德輝話褂真係搵"鴻運"好,夠多線影出黎至夠靚~

靈機一觸,如果人家著起件搶眼啲既褂,咁咪可以分散注意,唔怕賓客太留意人家既金器不足囉~由於自己屋企既問題,未能讓人家領受奶奶既龍鳯鈪.此外,熱鬧既親戚場面亦都欠奉....唯有係其他地方獻出多一點心意.....試完套$9xx既褂,雖然係比法國緍紗個套好啲,但感覺都係較plain.

試埋呢套叫"柔情蜜意"既褂,哇,當堂搶晒眼,戰術成功~外母睇到都話掂,雖然價錢貴啲($2380),但一生人一次嘛,又有實際功效.時間咁趕都有得租,又啱size,又啱心水,都算係有緣丫~~

跟住外母去買餸,我同人家就行咗陣影碟店,買咗隻變型金剛dvd($176)黎珍藏.係小巴站等埋外母,一齊上車番屋企.落車時已經日落西山lu,咁又搞咗一日,聽日繼續努力~
ps:我能夠給你既不太多,請見諒.....