有理說不清

 今日騎羊送台灣女生去外母樓下接幸男去同事既聖誕PARTY,玩完就送番黎交收,因為做冬食飯鬧翻後,關係持續疆化.長輩係要尊重,但當持老賣老時,就另當別論.加上早幾日外母拖住幸男係樓下迎面見到我哋正準備去攞車番晏時,視而不見,一直拖住幸男向前走,確實令人感到咩叫"長輩大晒,就算係錯都唔應該出口話"既歪理. 

"退一步,海濶天空",但有時真係退無可退,做人唔可以無底線吧!平時既忍讓與遷就,已變成應份,表示不滿反而係不敬,因老人家仆心仆命將佢覺得"最好既方法"黎湊孫.前輩大VICKY曾經講過,兩口子生活好簡單,有咗小朋友就多磨擦,但我無諗過磨擦唔單只兩公婆之間,更有周遭既因素.

有小朋友應該係一件開心既事,但而家好似係俾人扼住喉嚨咁牵制著,一句"我俾番鎖匙你,以後都唔上你哋屋企",難度要番早更前天未光就係輕鐵站交收個兩歲未訓夠既小朋友?一句"你自己安排吧",就可以抵擋住所謂"最鍚個孫"既空談?當年計劃生育時,一句"得喇,我會配合你哋,你哋話點未點囉,我以前就無人幫啫,而家你哋有我嘛~",為何會"配合"變質成"主導"?

放聖誕假既幸男,理應安在家中,外婆上門探望同照顧,而剛番完早班既人家就幫幸男換衫準備出門,而派對後幸男直接番屋企休息.事實係由剛挨完夜班既我,載住人家前來接幸男,人家因翌日要番早番夜而漏夜趕番黎交收幸男俾外婆.

BOXING DAY買禮物

今日同台灣女生帶幸男出市中心食MOS BURGER後,就帶幸男去玩具反斗城揀聖誕禮物,可惜無巴斯光年賣,唔知係咪聖誕旺季俾家長買晒.....

跟住我哋一家搭輕鐵去元朗舊玩具店,係對正小巴站個間(之前買過THOMAS火車路軌)為幸男揀咗個THOMAS碼頭套裝,火車會上船行過透明藍既海洋路軌,好特別.

我哋再去埋近郵局個間玩具店,搵到巴斯光年賣,但一款係有槍,一款係無槍.正當諗緊買邊個好時,後方傳黎一把低沉既聲線,話無槍個款係跟足電影裡既包裝,紙盒係太空船,兼有證書.我同人家回頭一望,原來係店員為我哋講解,而唔係其他客人搭訕.我問幸男鍾唔鍾意巴斯,幸男答"好貴哦",應該係之前人家係市中心玩具反斗城時同幸男咁講過,所以記得.我哋再問幸男,幸男話要火車,可能係以為只可二揀一,結果我地要解釋話火車已買,要多個巴斯好唔好.我當年都無錢買隻巴斯光年俾自己,無諗過幸男兩歲人仔就有...見幸男一袋二袋,於是叫幸男係玩具店門外笑住黎影相留念,樣子真係好得意. 

一人買一份禮物俾幸男,任務完成,有啲肚餓,去咗勝利牛丸食嘢坐吓,無諗過人家係食牛丸既........對上一次黎都係中五暑假同初戀情人黎食嘢,當時已係高消費活動.

幸男唔啱牛丸,於是又開番個星星餅黎享用,話晒都過晒平時既下午茶時間兼午睡時間嘛~

上咗輕鐵無耐,幸男就訓著,落車時都未醒,辛苦人家要抱住幸男行番屋企(諗起自己細個都會係巴士裡,趴係老豆大髀上訓).

將新買既禮物放係聖誕樹下,連同學校送個份,好似好大陣容咁,其實只係棵樹細啫.今年無時間帶幸男出去尖沙咀睇燈飾同商場大型聖誕陳設,希望幸男喜歡呢個聖誕.

住家聖誕節

 今日補鐘番屋企過聖誕,因為台灣女生買咗個聖誕蛋糕俾幸男.幸男見到蛋糕當然開心,人家點爉燭時,幸男好似想許願咁. 

以前就鍾意出去食聖誕餐,人大咗就想係屋企食,就算係平日既住家西餐,都覺得係舒服啲同唔洗同人迫(另一個原因係平時少留係屋企攤抖). 

美中不足係無紅酒,反而較早前傳聞中既世界未日前買咗支黎飲.雖然無一家人出去食大餐,無去旅行,但簡簡單單都可以好開心.辛苦人家準備晚餐,希望人家喜歡我無特別包裝既聖誕禮物-TEMPUR腰墊.

平安夜晚餐@嘉爵

 今晚台灣女生番夜,晚飯係藍地既嘉爵食,貪佢夠就腳,人家搭一個站輕鐵,我就踩單車去. 

叫咗個上次話賣晒既胡椒豬肚布袋雞,以為係醉雞窩個種,點知係一大煲湯,可分十個碗仔,唔怪得個待仔寫咗我地四個茶位,仲係咁問我地真係上得?

楜椒湯夠晒味,辣味令我飲一啖就打一次嗝,個身都暖晒.湯料足,雞肉好腍,好似罐頭紅繞排骨個種質地,一大塊既豬肚,由侍仔剪開一塊塊.

飲湯都夠滯,點知個魚香茄子煲都大個,一湯一餸兩白飯已令我哋投降.......................

結果我飲咗三碗湯,人家飲咗四碗,有剩既用外賣兜裝走.魚香茄子煲就食得三分之一,命運都係包走.

入咗盒都好似茶餐廳叫既外賣飯盒,但餸既份量更多.埋單都係$277,真係超抵食,聽日番工前既午餐又有著落.埋單前,人家仲可以食得落個糖水,我就讓埋我個碗出黎....

車手

今日卒之都租到藍光碟既<車手>,其實之前想係戲院睇,但都係老問題"湊仔無時間"....老差骨同新仔之間既態度,相影成趣,另外片內無咩特別電腦特技,真實感較強.以往既飛車片事故都係比較單薄,<車手>則以警隊隱影戰車小隊為本,以傳說車神通緝犯重現犯案為主綫,令飛車場面合理地頻密出現.

音效方面都唔錯,余文樂將架車圍住大S甩尾個幕,清楚聽到呔聲由右後方轉向左後方,唔知係我聽力唔夠好(聽唔切)定係後置既聲效唔多?

劇情緊湊,尤其係車神通緝犯,BURN呔時既白煙加埋窄巷既環境,再以慢車跣呔過90度彎離去,有點玩魔術既感覺.我都有諗過雖然落唔到車,但都可以用槍射穿車頭玻璃,再射前車咪可以KO個車神通緝犯,不過就唔可以活擒.

秋生加余文樂,望落去有啲似<頭文字D>既縮影,但其實故事背景唔同,只係<頭>令大家印象太深刻至無時無刻都想起.正如當然周潤發做<賭神>一樣,一著老西兼GEL頭就係高進.<頭文車D>係雙方係特定既路線比併速度同技術,但<車手>係雙方於街道上既追逐,而且唔係純粹鬥快,而係各自用車黎逹到目的(一個逃離警方追捕,一個係活擒罪犯),其間以車技黎交手.睇過<車手>後,大家可能會記起秋生係<車手>裡既對白"八千轉,兩米車","唔好俾人帶住走,行自己要行既路","車冧咗都可以整,人冧咗嘜都無",多過<頭文字D>.

聖誕氣氛

好耐無買聖誕節咭,今日都係吉之島揀咗張俾幸男,另一張就係幸男送俾同學仔既.由於幸男未識寫字,所以由台灣女生捉住幸男隻手黎寫,幸男都好似好認真咁回咭.

吉之島擺滿多種聖誕糖果小食,我就揀咗熊仔形狀既蘇格蘭牛油酥俾幸男,個樣夠得意,味道都唔錯丫.幸男食得知味,但不時望住塊餅,唔知係咪有啲唔捨得食咗隻啤啤熊呢?

罐面係巴士公仔,已經啱晒巴士迷幸男,罐邊既熊仔餅相,確實令我有信心幸男會喜歡呢份聖誕小食,因為幸男好鍾意啤啤熊,訓覺都攬住0架~

搖滾大廚"HUNGRY"

今晚同台灣女生睇埋最後一集搖滾大廚(hungry),結局係男主角為咗兄弟,放棄隻身赴法國學廚.理由係想幫助身邊既朋友有份工做,想令每一個肚餓既客人都可以從食物中感動幸褔,豐儉由人.感情線就維持原判,與女朋友繼續交往,而女主角則繼續為自己既單戀去努力.

客觀黎睇,可以赴法學廚,學成歸來,當一級大廚,理應係好合情合理既事,但如果連自己個關都過不了,強行去迫自己改變又未必係好事.肚子餓,食飽了,就滿足.人既心係無止境,要學會珍惜同自足,至可以活得自在.

係人生中搵到合適自己既位置同生活模式,實在係一個大課題,因為根本無人可以話到俾你聽點為至最好.即使從長輩或朋友經驗得到提議,都要自己親身試過至知是否合適自己既路.單係搵多啲錢同陪多啲屋企人,已經有排諗,仲有進修,升遷,結婚,

人家好鍾意睇"HUNGRY"除咗笑料多,題材特別之外,就,因為男主角-向井 理既關係.第一次係電視見到佢係睇螢之光2,當時睇落較為細個,而家就啱啱好.

Placement

今日係我番R9A既最後一日,特意早少少出市中心買咗啲西餅黎多謝新同事們既包涵及教導.平日做細佬,今日就入TEAM,好在星期日無咩突發嘢搞.只係有個DNR既case,一向做慣做熟,所以都順利.

下半場就榮升IC,好在CARMEN幫手,至可以安然渡過.三個星期既考察咁就完了,除咗了解REHAB既運作,仲結識到新同事新朋友.另外無諗過唔少人認得我,"咦,點解你係度既??",每次我都係答"黎考察吓啫~"

當地既設計唔錯,更加切合實際需要,唔會太少空間,另外每個客仔都可以有獨立一組既設施,唔會話三個share兩set嘢.可惜只係拍到德輝一日,黎緊新年再去探吓大家,願各位工作順利,身體健康.

睇那星

今晩同台灣女生帶幸男番老家食飯見爺爺嫲嫲,回程時我望見天上星星,有三粒特別光,我問人家係咪北斗七星,人答係.睇真係又睇唔出係拳四郎心口七星痕,於是用電話GOOLE  SKY MAP影低.

番到屋企上網查番,原來係獵戶座,腰帶位置個三粒星.諗番細個都聽過,獵戶座個三粒星好光好易認,唔知係咪太空館既殘留記憶.時代進步,就算唔識星座,智能電話既出現,可以令大家輕鬆咁搵出自己所見既星座,為煩囂既都市生活,帶來一點浪漫.

PS:科技同傳統並非一定有衝突

補祝褔娃生日BBQ會

 今日眾姐姐(非姐姐組別有MING MING同群女)一齊黎寒舍為"大眾契仔"褔娃搞個BBQ生日會,雖然正日過咗,但相信男事主係唔係計校.可以一齊飲飲食食,已夠晒高興.

食物由姐姐負責,我就出場地,餐飲服務,炭同爐火.其實早幾日幸男無端端話想燒嘢食(對上一次係中秋爺爺嫲嫲伯伯伯娘黎),今次幸男係台灣女生監管下自己拎叉燒蝦,好開心咁講"燒".

幸男今晚好乖,係人都跟,講到佢最鍾意既就係MING MING,佢眼甘甘咁望住MING MING,好似咸濕大老爺睇中妹仔咁......

幸男知道今晚有生日蛋糕,臨近尾聲時(十一點)同人家講"食蛋糕哦".當蛋糕出場時,褔娃抱住幸男一齊吹爉燭.分蛋糕時,人家話我地三個分一個都可以,點知幸男話"要三個"....

雖然搞BBQ多嘢準備,但今次嘢食係姐姐責負,已經好好多.有咗幸男,好多時間都係留俾小朋友,其實可以大夥兒一齊邊食邊傾,我自己都好開心.祝褔娃身體健康,生日快樂!

傳說中既"3紅"

今日諗住打ACE COMBAT,點知LOAD緊頭片頭時,特然無畫面,機身著起紅燈.一,二,三,傳說中既X BOX360 3紅惡耗!熄機再開都係唔得,CERTIFIED.......

前日先的起心肝將滔滔轉送既上一代X BOX360駁好,只係玩咗個零鐘,完成序章.開埋個PHILIPS SOUNDBAR黎打空戰,真係好好FEEL,可惜一切已成泡影.........操控同以往PS2年代無咩大分別,只係地圖放大時會佔多咗畫面部份,以前只會係個地圖框內放大附近敵機既位置同方向..

故事以機師妻子身份黎描繪戰爭對大眾既苦痛,可惜我未能了解更多........片頭TRAILER一句"All wings, we're goiong to take back Gracemeria toay!"夠晒萬丈雄心!

PS:考PRCC試前,我話要買X-BOX360打ACE COMBAT 6黎惠勞自己, 滔滔聽到就話將佢屋企部舊機俾我,因己轉打PS3新機,而家楠又話有ACE COMBAT 6隻碟,但唔啱玩,於是我無端端有機又有GAME碟,點知而家得番隻碟....."本來無一物,何處惹塵埃"　

陪幸男揀花仔衫

今日同台灣女生帶幸男出尖沙咀既CHARILE BROWN CAFE會合OSCAR同阿嫂,兼諄諄兩母女一齊食tea,因為要同花女一齊去百利揀花仔花女衫,兼且培養定友好關係.幸男見到蛋糕就開心,一個人食晒一件蛋糕~

行去隔百利行咗一個鐘左右就揀好咗白色花仔禮服,花女諄諄都揀好一條白色裙.本來想俾幸男著黑色禮服(扮禮服幪面俠??),但併落去好似白色襯幸男多啲.背心就未有貨,要遲啲攞,但煲呔就揀唔啱,結果同大隊分道揚鏕後,去咗附近間ice fire睇.幸男都有落手揀,有相為証~

起初覺得呢個煲呔麻麻地,有啲似髮型屋外既燈,但攞幸男套衫出黎併吓,又OK喎~雖然係大人SIZE,但都可以調校到啱幸男既頸圈,大少少睇落仲得意啲啦~

求其係尖沙咀搵間日本嘢食,因為要餵幸男食飯仔,搭西鐵番屋企,係兆康站轉車時撞見趕番夜既惠嫦.幸男無反抗吓跟咗惠嫦行咗一段路,遠離我同人家都無喊,臨尾仲可以抱住影合照,非常熱情,氹得惠嫦開開心心.

PS:揀衫時幸男同諄諄都玩得埋,相信當日都唔會有問題,最好就搵多次花仔花女見面,熟落啲嘛~

TOY STORY

由前日起, 幸男已一連三日睇TOY STORY藍光碟三集.原本只係見上星期明珠台播TOY STORY3,錄低俾幸男睇,點知播出黎開場個段都好爆格吓,尤其係成個畫面係紅色馬騮暴走個幕.....由於太不堪入目,於是走去市中心間精美買一套三集既TOY STORY藍光碟BOX SET,盛惠$598大元.

3隻我係戲院睇過,因為人家無睇過第1,2集,所以同人家係第3集上之前既造勢電影重播3D版時係屯門UA溫書,第3集就一齊第一次係戲院睇.雖然係陪幸男睇兼解說,但原來劇情細節已遺忘,例如第1集裡壞人小朋友阿薜幫玩具動手術改頭接肢時,巴斯光年話佢咁細個無埋由讀過醫科....

幸男睇得開心,最鍾意巴斯光年(我都係),一有巴斯出場就坐定定睇,無巴斯就當文戲.我哋趁第三集既故事,教幸男要愛惜玩具同分享玩具.自己買嘢都左諗右諗,但買俾幸男就無計咁盡,$200一隻藍碟都係咁上下.計落條數一家大細出市區戲院睇戲都要近二百蚊(一隻藍光碟價錢),感覺一連三晚都一家大細出街睇戲咁,有少少奢侈.......但見幸男咁開心,都無所謂啦,家庭樂嘛~

PS:幸男識講"巴斯光年,一飛衝天"

007

今日約咗老豆睇戲,一心諗住睇三點場,點知去到至知無咗三點個場,變咗係五點場((明明賢仔早兩日行過巴倫紐見個時間表有三點).....等我仲係番工時間叫同事一齊叫盈豐外賣晏晝,用tea時間入去食晏,方便趕去新墟添.......老豆番屋企坐吓先,我同台灣女生就係老麥飲咖啡,我仲洽咗三四個字貓仔覺,四點左右至去買飛同去接幸男放學,不過我哋只係接個吓,但幸男由外母帶番大興湊住先,我哋行番去戲院會合老豆睇戲. 

無諗過主題"sky fall"係指占士邦既家鄉......故事比第二集"量子殺機"好,雖然主力講長江後浪推前浪,但老經驗總比高科技花靚實用,尤其係作出即時決策時,經驗係好重要.今集不再有花樣百出既道具武器,只有一把掌紋確認槍同迷你發訊機,其餘都係靠埋身肉搏同老把戲.

雖然老娘子M由開場帶到尾,但我絶對唔會認同佢係今集既邦女郎,最多都係呢位出場唔夠廿分鐘就死既奸角情人係邦女郎.蠻滿意呢齣戲,只係臨尾係家鄉祖屋度打大佬時有啲老土....老豆當然睇得開心,散場人家搭的士入元朗同中學同學食飯,我就同老豆行去輕鐵站時話"以前你同我係電視睇鐵金剛,都無諗過之後我大個咗會同你入戲院睇鐵金剛,兼且仲有多個家嫂一齊".總覺得同老豆一齊入戲院睇戲,比起買隻DVD俾佢自己睇,點都係開心啲,反正我都鍾意睇戲嘛~

我上外母屋企接幸男搭的士番老家食飯,車上問幸男大個咗會否同我入戲院睇戲,幸男答會,但我答到時都唔知仲有無鐵金剛做....如果幸男大個咗真係同我入戲院睇戲的話,相信我會好安慰~

PS:戲中占士邦老一輩既忠誠及重情,係現今社會已被視為無大志同野心,兼埋不識時務.....

HERO

九月尾有TIGER & BUNNY既電影版上映,只係得市區幾間戲院上,仲要係得兩日,我就番P同A/N所以無得睇.今日就睇錄底既J2 TV版大結局,總算係HAPPY ENDING,但其實都埋晒伏線有第二季度,但超能力衰退至一分鐘既WILD  TIGER變咗二線英雄就有點美中不足.其實故事內容豐富,初段講TIGER同BUNNY搭檔既摩合,中段講英雄們既工作及各別生活難處,後段交代BUNNY既復仇及幕後黑手.....

可以的話,我都想當劇中"英雄"職業,係城市裡保護市民,又以偶像形式擔當廣告代言人,總比純商業或專業共公服務來得自然.自由度較大,不需跟隨刻板既工序指引,各人以拯救市民表現為競爭基準,以人氣度黎增加廣告商支持及商品發展,當一個有血有肉既職業英雄(類似奬金獵人)!

買禮物

尋日偶然見到"他"的銀包蠻破舊,想起這是我數年前送給他的生日禮物.....人大了,唔會為買禮物而亂買,反而會買實用或肯定對方喜歡的物品,不然就食一餐開心飯聚舊.

本來係網上見到有FRED PERRY既淺啡色銀包,但騎羊去到市中心睇,SALES哥仔話全線售罄無貨(係咪真係咁好眼光呀??)....無晒心機咁行出店外,發現附近有間新開既CALVIN KELIN JEANS,於是行去睇吓有無銀包賣.經過一輪挑選,揀咗個黑色大路款既銀包,無想像中咁貴,仲要有折添.

台灣女生放工番黎都話個銀包款OK,仲笑我好似買禮物俾男朋友咁緊張.雖然正日送唔到俾壽星仔,但已約聽晚放工騎羊去佢樓下交收.

預祝馬SIR生日

今日馬SIR上門幫手UPGRADE電腦(馬SIR推介SSD黎行OS,效果媲美換底板連CPU),128GB款$990,裝咗真係快咗好多,LOAD相都快咗,唔會LAG.棟哥代買料上門整,仲要因為無SATA線而要番山景攞,真係麻煩晒.好在台灣女生為馬SIR準備家常便飯,兼生日蛋糕,當然唔少得幸男擔司儀搞氣氛. 

幸男見到個蛋糕就話"男男生日哦~",睇黎係一心謀住個生日蛋糕.係提示之下,幸男總算唱咗首生日歌"happy birthday..... to馬sir~",仲鍚馬sir添,最攞命佢哋倆個一齊吹蠟燭....

雖然後日至係正日,希望馬sir唔好介意預祝,我同人家番工難就時間嘛~幸男同馬sir都鍾意食個蛋糕,希望大家都開開心心~

心力

今日同台灣女生睇租番黎既"IN TIME",故事講未來世界人類經基因改造,由BB長大至25歲就會停企生長及老化,但手上會顯示剩下既一年生命時間倒數.為咗續命,大家都會打工賺取時間,因為交租,買嘢,搭車都係扣自己既時間.出身貧民區既男主角,因生活迫人而去母親,但於酒吧偶遇一位有錢人(時間).該富戶被男主角相救後,以自己一百年既間作報答,自己卻望著手上既倒數而迎接死亡命(心臟停頓).男主角以得來既一百年時間,去富豪區打破富豪搾取貧民區市民時間之不公平局面.

厭世既富豪對男主角一番說話確實發人深省,"即使你尚有過百年既精力,但心力已耗剩多少?"親友既離去,不如意既事,確實令一個人既心老化.未夠三十歲,我經歷我人生第一次我重視既朋友之喪禮,很大打擊...舊年阿公病逝,我失去第一個重視既親人.面對生活及工作環境上既不公或黑暗,都令人喘不過氣來.事事順境兼有權貴既人當然唔會有咁深切既體會.往往憑良心去做事及生活的人,都係被剝削及欺壓的...我自己既心力還剩下多少呢?