西部野牛王+手裡劍神=帝王手裡劍神

旅行前,幸男已經同台灣女生講話想要牛仔戰丸,可能係太沉迷電視播緊既<手裡劍戰隊>.今晚幸男係屋企過夜,於是呈上兩日前買落既西部野牛王.

牛仔戰丸+手裡劍神=帝王手裡劍神,幸男好開心有一個大型機械人玩具,比例當然唔及特攝片中既造型啦~

唔係講假0架,至少頭頂無咁超比例丫.

牛仔戰丸變身前係騎住野牛王越野戰車,車尾既手裡劍亦會發聲,十足電視出場聲效.變身成西部野牛王,以及帝王手裡劍神時,聲效亦對應劇情.

同手裡劍神一樣,都係元朗既榮興買.西部野牛王顏色造工與手裡劍神DX版完美接軌,慶幸當初無買基本版.

東京親子旅行 Day 8

朝早起身時天陰有雨,但隱約見到東京鐵塔後既富士山.

今日就要離開呢間第二次光顧既酒店,8日既旅程,好快就渡過咗.

酒店以藝術品味作主題,到處都可以望到作品(呢張以前好似係放係地下街電梯入口).

Check out過後,行李暫存係lobby,我哋係附近既商場行吓,呢個係車站旁既哈爾移動城堡鐘.

搭地鐵去銀座既TOKYU PLAZA GINZA 行吓，買完家品嘢就去食晏。時間有點趕，於是揀咗呢間唔洗等位既快餐Soup Stock Tokyo。咖哩好味但稍嫌肉量較少,海老湯夠晒濃味~

臨走前經過一間蘋果批店,領隊買咗盒雜錦蘋果批,一心帶番香港食.

番到酒店地面出入口等機場巴士,見到有酒店西餐主廚既介紹.呢位TY先生個樣,有點似林雪.

其實入住當晚,我哋收到酒店既歡迎禮物(因為我哋係第二次惠顧?),應該都係主廚麾下既手工朱古力.

係機場見到有個磅,於是將1機2鏡閃燈2尿袋及其代雜項既背包放上去,驚見6.14公斤~~~原來每天都係孭住6公斤四圍行........

未係機場買手信,已經一大袋hand carry.

買完食品手信,係時候買嘢俾自己.痴心忘想可以買到響17,但結果只得響30(要成100,000円)......唯有買支芝華仕18既特別版,而且仲有個袋送添.

上到飛機,小食時間已叫咗罐啤酒黎放鬆一吓.

幸男依舊食兒童餐,今次睇既係米奇卡通,但都有翻睇"烏龍派出所".

雖然味道唔差,但真係飽到食唔落個冷麵~

今次係飛機上番睇咗齣舊電影(2004年既After the Sunset,我應該係租碟睇),神偷主題電影兼十多年前既零碎記憶,令我輕鬆又投入地打發了個半鐘~今次帶咗個輕巧耳機，無BEATS咁“亜位”。

幸男每次都係臨落車或落機前先黎訓,攞齊手提行李,幸男都未醒......攞埋行李,搭的士番屋企,抺下喼,執吓嘢,都近兩點至訓.

幸男就快足7歲了,今次亦係我哋連續第5次年度家庭旅行,差點就因為大假唔夾而斷纜.幸男已不再好似頭3次旅行咁,喊住話唔捨得番香港.美中不足係天涯鏡出現故障,未能好好咁影相....領隊之智能電話不敵水浸,幸好無影響行程.雖然係熱啲,但至少無風雨雷暴.

PS:尋日香港掛8號風球,我好擔心花園情況,因為根本無收好太陽傘同收拾晾衫架.番到屋企,見花園只係多樹葉,太陽傘安好,先放吓心頭大石,好切合日比谷神社既"奇蹟之御守".

東京親子旅行 Day 7

朝早起身,為咗呢張窗外景家庭照,試咗好耐,連閃燈都過熱(因為要迴避玻璃窗之反光,以及酒店床位置).影到呢個效果,我已投降收貨.

搭一個站地鐵就去到築地,真係好多香港人及同胞到訪.今日又曬又熱,大家都好難瞪開眼望鏡頭.

第一輪係小食時間,見到有即制凍果肉,叫咗一串士多啤利俾幸男.老闆好大方地叫我地影吓相,咁我當然却之不恭.

大熱天時,冰凍鮮果肉,幸男個樣好似美食主題卡通片(伙頭智多星,伙頭仔昆布),可惜天涯鏡唔生性,有點走焦......

領隊都忍唔住要買串提子黎食。

再買多串燒魷魚鬚，十足旺角掃街。

揀咗間有三文魚子丼既店舖,因為幸男啱食.翻開餐版,幸男話要飲埋個紫菜湯添.

三文魚子丼,夠晒新鮮同數量,結果幸男都係食唔晒,要家長襄助.

領隊點既吞拿魚丼,包含三款吞拿魚刺身,夠晒豐富~

我揀咗吞拿魚海膽丼,散叫既吞拿魚腩刺身就同領隊一齊分黎食.

繁忙既海鮮集散兼食店之中,竟然有間古色古香既寺院,可惜無暇內進參觀.

領隊睇中咗個日本鮮桃汁,燈膽外型,配以閃燈扣.

我係搵到個啤酒檔,買杯大啤黎消暑~原本諗住直接去煙火場地,但我突然肚痛,要番酒店食葯兼訓陣貓仔覺.領隊帶住幸男去附近既神社買御守,因為我上網睇過有"奇蹟之御守"賣.

結果到達足立花火會既場地時已經係四點幾,唔少當地人身穿日式浴衣黎參予夏祭活動.

我哋都係有利位置霸位,用腳架影低張家庭照先~

屬性為路痴既我,被委派去買小食,期間經過大會總部,見到有消防戒備.

行咗十幾分鐘至到達最近既小食檔,趁未買嘢,以掛頸之相機影相作記錄.由於未有幫襯,故俾小食店檔主示意"唔好影".

買咗燒牛舌,牛肉串,魷魚及章魚燒,仲有罐裝HIGH BALL及啤酒(短褲側袋各一罐),有驚無險咁成功搵得黎本陣.吉列豬扒三文治係車站內既小店買,而溫泉蛋就係箱根既溫泉resort買(尋日食剩三粒).

黃昏時份,大家一齊食飽個肚就等睇煙花!!

河邊已經坐滿觀眾,由於平地多,感覺比舊年名古屋個次無咁迫.

七點半至開波,我哋仲玩咗陣UNO黎打發時間.入黑時份,領隊幸男去流動厠所,都係靠掛係腳架既螢光棒(大會向觀眾派發)黎導航至搵得番本陣所在.

天涯鏡好多失誤,於是中途換咗支定焦鏡接力,但都唔係好多成工作品,呢張係其中一張,勝在顏色多.

紅塵暴既效果都幾特別.

乍看來,似係光影塗鴉既感覺.

呢一幕我好鍾意,好似兩棵煙花樹(又或者係西蘭花)~

平日聽演唱會時常見既爆放彩帶,今晚由虛幻燿目既煙花所代替(Gunbuster既Homing Laser?).

壓軸既連環爆放,迫力十足~~

完結時份既呢一刻,令我諗起夜空既銀河.

散場時,由於人數眾多,警察及保安人員以人潮管制黎確保安全,我哋要大半個鐘至行到去車站.上到地鐵都已經好迫,點知下一個站都有相當數量既乘客迫上車,我哋一家三口被推入三個身位.幸好幸男拎住電風扇作通風,否則真係怕幸男係高聳人群中被焗親.

人潮相繼落車後,大家都可以坐低抖番吓.

幸男話肚餓,於是番酒店前係便利店買杯麵作宵夜.

PS:呢張係領隊用我部電話影既相,左下方就係我部A7.領隊見我不停試影硬照,於是忍唔住影咗唔少相片及短片.