酒店樓下就係Family Mart，可以買完就係户外座位享用。地方大係唔同啲，香港頂多行去公園食，即使有户外位都可能攞黎俾美食車停泊.
每次親子旅行都有既行程,就係火車博物館.日本人好識做生意,車站出口已擺定啲扭蛋機,等小朋友自投羅網.
大大個生招牌係場館外，打咭就係咁簡單。
第四次參觀火車博物館，但無損小朋友既興緻，依舊要上齊所有火車。
好幾款火車都有見過，唯獨係呢架好似第一次見.
控制室内空間狹小，我要係近入口位置至影到幸男呢個認真樣。
館內餐廳只有即制食品,櫥櫃內既火車主題便當只作陳例.行番去另一端既便當店,幸男係兩款火車便當(E5E6)之間掙扎.E5係就係靚啲,但E6啲餸又啱食啲,幸男苦惱都喊,唯有先買大人既便當先.
行番入館內冷氣場所,幸男冷靜完,決定揀啱餸既E6,再行番出去買,之後上樓上既用餐區望住火車黎食晏.
餐枱以火車設計藍圖作裝飾,幸男卒之可以安心用餐.
放低行裝,我再上多一層搵汽水機買嘢飲,先至可以用餐.領隊揀咗蟹肉三文魚子便當,而我就試海膽三文魚子便當.冷藏便當,海膽係乾身,味道雖然唔及新鮮水潤既海膽,但都叫做係海鮮便當兼第一次見.
食完晏,繼續係火車之間穿插,我就繼續同支天涯鏡搏鬥,一時對唔到焦,一時用唔到所屬焦距之最大光圈值.....
拆下又裝上,zoom前又zoom後,為求可以為幸男與心愛既火車合照.
弁慶號蒸氣火車,北海道最早既蒸氣火車,點解唔係放係北海道呢??
一号機關車,係日本第一架由英國進口既蒸氣火車.
行到攰,去咗戶外既車卡休息室,咁啱有架火車係外邊經過.
我哋坐迷你新幹線列車,去兒童圖書館.車箱好簡陋,得把風扇...
呢張相就可以知道架車有幾迷你~
圖書館旁邊有個積木區,幸男急急除鞋入去玩.
兒童餐廳有玩具區,玩具主題當然係火車,有點似試玩專區,啱心水就去紀念品店購買.
我死守餐廳看管行裝,領隊拎住我部電話輕裝上陣陪幸男玩迷你電車,賣點係小朋友可控制速度,感受車長之角色~
影咗成日相,真係幾攰,唯有靠領隊接力,最後去番主館既紀念品商店作最後衝刺-!!
夜晚係蟹本家新宿分店食飯,兒童餐既碟貫徹食店既主題.
雖然領隊訂咗7點枱,但我哋早到都可以入座.
除咗一份餐之外,我地再散叫咗幾款.
蟹腳刺身,啖啖鮮味,大少剛好覆蓋舌頭之上.
呢款蟹棒夠晒長~
難得地方夠闊落,委託職員代為我哋一家三口影家庭照.
樣樣都係有蟹既食材,啱晒我口味!
牛油燒蟹腳,牛油燒熔咗先至無咗份罪惡感.
蟹肉壽司,蟹肉大塊到好以三文魚咁,大滿足~~
臨走前,係電梯外既招牌影相,每次黎食都係咁開心.由於唔方便開閃燈,要用盡大光圈至得.
PS:由於食店鄰近商場，領隊去睇衫，我就看管幸男。見有相熟雪條檔，於是買俾幸男邊食邊等媽媽。
