朝早起身就趕上去火車站,因為台灣女生check過呢個時間會有齊幸男心儀既新幹線埋站.
去完一個月台,再落樓梯行去第二個月台,為既就係讓幸男可以目睹實物兼影相.
我哋今日搭既係雙層新幹線,目的地係上毛高原站,車程約要一個鐘有多。臨埋站前，落定去月台車門層。原本諗住影張相，但相機未能對焦。(其實尋晚已開始偶爾發生)
落車再要搭50分鐘既巴士，先至去到玉原高原，亦即係玉原薰衣草公園之所在。
第一件事就係食飯，我揀咗鐵板牛舌餐(雖然有啲肚痛,但都要食好啲)。
有咖喱既兒童餐，幸男欣然接受～
領隊原本想食既烤上州牛肉冷烏冬，可惜今日不作供應…唯有叫咗個冷蕎麥麵，再分我果份餐既豚肉俾太座。
食埋甜品至出發，呢度有薰衣草版，但燒皮餅版係頂部撒咗啲紫色既粉上面，普通威化筒版至有紫色軟雪糕。
幸男每次食軟雪糕都係“論盡”…
其實呢度係滑雪渡假村,夏天時份就變成以花草為主題既公園,讓遊人到來散步,仲可以放狗(但要自己開車上黎至得,公共交通應該唔俾動物上車).
遊客可以自行行上高處,我當然向領隊申請俾錢坐吊車.
天涯鏡時得時唔得,呢張係佢今日最後一張工作照.我座係後方,叫兩母子回頭望過黎.幸男捉住媽媽隻手,唔知係溫馨定係膽小呢?
海拔1350米既展望台,可惜太猛太陽,領隊眼都瞪唔大.
下山段落,唯有用定焦鏡,背光情況下,試咗好幾個設定至影到呢個脆地彎腰相.
坐吊車時已發覺自己被音樂包圍住,以為只係場地既廣播系統播放住輕悠音樂,讓遊人多一點詩意浪漫,無諗過係有真人演奏!!
現場環境有啲似生辣哩咁,領隊話我唔得投入去影相.
同官網既相片有一大段距離......
幫幸男係動物主題既花圃影吓相都無咁嬲.
領隊話要好似後面既女生咁,係薰衣草叢中影相,但真係遮唔到半身.
官網啲相,薰衣草都係大串啲長身啲,唔會好似眼見既得果兩節長度囉.......入場門票價錢由800~1200円,視乎花卉既盛開度,今日都要1100円,呃錢.
臨走前,係入口既花圃畫框影合照.原本諗住俾錢,但攝影組已無人駐守,於是自己搭腳架黎影.定焦鏡,兼要迴避相片左邊既遊人群,只可得出呢個結論.
無畫框既版本就易就位得多,總叫做慳咗一舊水丫~~
又搭番巴士駁新幹線,夜晚係東京車站附近搵地方食飯.東京車站係歷史建築物,足足有一個世紀.外觀保存得好好,現代化既特徵只是從出入口滲漏出來.與背後既環景建築有時差,但又沒有一點違和感.
由於太夜,好多食店已坐滿人客,唯有去一間唔洗點等位既咖啡店食飯.
我其實就睇中一間食BURGER既食店,但幸男又話唔好,於是揀咗呢間得輕食既咖啡店.可惜係湊仔之旅,如果倆口子係度慢慢坐,上吓網兼閒聊都唔錯.
PS:番酒店經過地鐵站時,呢個馬賽克藝術式燈飾,係背光燈下既顏色比平日份外鮮明!
