東京親子旅行 Day 3

一家三口係月台等車時偷時間,食便利店買既早餐,可想而知我哋有失預算.

晏食晚飯,晏番酒店,晏有得訓,骨牌效應下,幸男上車無耐就倒下來.....

搭咗程800円既地鐵,再轉巴士,合共個半鐘時間去到目的地.齋睇個站就知附近係幾遠離城市.

原來巴士站轉個彎就見到安徒生公園既入口,起初仲擔心點解車站名係公園名,但唔見公園大門口,反而係船橋市立豊富中学校閘口.

穿過樹蔭通道,走過噴水池,第一個區域係攀爬,繩網兼滑梯.呢個火熱滾輪滑梯(曬到熱),幸男要媽媽陪同至敢玩.

呢個集攀爬及水管滑梯於一身既大型設施，幸男玩咗好幾次。第一次sir果陣，幸男要鼓勵至有勇氣，我自己都尾隨sir 埋一份，但手踭位被燙熱既管壁磨到甩皮(臨尾想起身時雙手雅開)，幸男都有少少。

平時總有俾小朋友彈跳既充氣山坡，但無諗過呢個公園會以大小不一既fit ball 組合而成彈跳區。

接住落黎既係嬉水區，幸男上咗去玩呢個水車。幸男落番地面時話"媽媽,你個電話跌咗落水",我同人家至發覺智能電話係水池底.我立即徒手執番上黎,拆除機套,以紙巾將電話抺乾.

原本以為無為事,點知電話屏幕開始閃爍,於是領隊急急將行程資料screen cap並傳去我部電話,更以email將行程傳送到我電郵地址.生活防水不敵水深40cm(前臂浸晒落水)兼五分鐘時間,最後手機電量急跌至不足30%,唯有將手機既wifi關除並關閉電源.

天氣太熱,係商店買咗果汁冰棒黎消暑(左至右:提子,橙,梨),好難得我會話自拍0架~商店有小童泳裝及沙灘蓆出售，方便家長即興帶小朋友落水玩。

小型火車(300円兩個圈),客源不足,得幸男一位乘客都照開車.

過咗呢條太陽之橋(橋名因為係無瓦遮頭？),就可以去到餐廳食晏.其實橋下係一個小湖畔,不過就唔見有艇出租.

餐廳既內飾取向歐洲小屋風格,以醜小鴨卡通海報帶出童話主題.拆開手機SIM卡糟,發現有水滲出,於是先抺乾sim卡同sd卡,再以紙巾索走滲水.手機已不能再啟動,只係不停地震動........

兒童餐，食材夠晒多：飯，意粉，漢堡扒，炸雞，炸薯條，布甸同生果。

丹麥式午餐，份量都唔少，我一個人都食唔晒。

其實餐廳有BBQ餐，不過就要係户外露天位自己燒，應該秋冬至會多人揀。

童話故事，花草樹木自然元素不可或缺，公園内周圍都見到花圃。

風車下有張國皇石椅，應該係訪客拍照留念位置。

呢個景觀真係令人以為去咗歐洲，紅屋係紀念品商店，當然順便賣吓凍飲雪糕。

由於趕追巴士，只係安徒生館外照相，無入去望吓。小朋友聽故事時，可以靠近親人之餘，又可以學字睇插圖兼人生道理，但現今電子娛樂盛行，有幾多個家長可以堅持到呢？

臨走前買咗個雪糕筒俾幸男，撞見差唔多時間入場既小學生旅行團，大家都係臨走食雪糕～

搭地鐵去新日本橋站，中途係飯滿山站聽到廣播，話有前方有故障。原本諗住跟車站職員指示，搭相反方向既列車去轉搭JR, 但等咗一段時間都唔見有車。有當地人揀番上原本既車箱等，於是我哋都照跟大隊。滯留咗一個鐘後，列車再次開動，行多幾個站就跟大隊齊齊落車，轉搭另一條線。幾經波折，卒之去到目的地，見仲見到"給"印仔既站台。

原定係去睇夏祭金魚檔，順便去埋隔離既德島神社。

可惜過咗營業時間，啲御守都幾靚吓。

神社係正鬧市商店附近，四周都掛滿金魚燈籠～

金魚檔無真金魚撈，只係以充氣魚仔代替。唔好以為難度會降低，因為你只可以用紙繩綁住既金屬鈎，係水盆內勾中橡筋圈。稍一不慎，勾中綁住水球既橡筋圈就會因重力而拉斷紙繩！

買多少少金魚主題精品，就係附近和菓子店逛吓，再去江户年代開業既三越總店既超市買手信。

晚飯係就近既商業大樓食，一家三口商議過後，係ざくろ 室町店(涮牛肉店)享用。

前菜沙律非常精緻，幸男果個沙律有少少酸，於是同家長既交換。

 戰術係一個貴套餐配一個平價餐，再一家三口分黎食。
天婦羅幾有水準，紙上既油印唔多，炸粉亦唔會太厚。

一睇就知呢個係貴餐既牛肉，有兩款醬汁俾客人蘸，多一點變化。

我哋張枱對住廚房出入口，但有座地掛布分隔，唔通考慮到店員既出入會打擾到客人？

平時都鍾意食燒銀鱈魚，今次就可以係日本食到啦。

臨尾店員幫我哋“畢”走鍋湯面層既油，再放麵條落鍋。加上葱花，就以呢碗牛肉兼野菜湯味既齋麵作結尾～餐後甜品方面,幸男就食柚子味雪芭,我就揀咗芝士蛋糕.

 咁啱見到之前經常係市中心幫襯既金舌,日本店係靚好多.

PS:番到酒店時手機仲係停地震動,唯有用毛巾墊住無咁嘈,水氣已佈滿前置鏡頭.