雖然今日係星期一,但對日本人黎講,係"海洋節"公眾假期.九點左右,一家三口由酒店出發,發現酒店附近有一間好細既神舍.
休閑既街道上，見到經典 Suzuki KATANA，好感動～
無去原定既商場大樓，係途經既一間餐廳(附有户外座位)用餐，因為見不少餐廳既早餐時間係截至九點半,至少呢間可以坐到十點半嘛~
呢位小朋友晨早就食薯條漢堡包，點會唔開心？
我果份Daily Market Salad夠晒田園風味～
領隊揀咗Bread Pudding,唔知上層既係咪芝士味呢?
搭咗二十分鐘地鐵去辰巳站，google map話行11分鐘就到目標電單車用品專門店。烈日當空下，一家三口擔住遮黎行，結果要二十分鐘至到……
原本安置幸男坐係店內既櫈上兼看管手提袋,但幸男等咗好耐都未見我地番去搵佢,於是手挽住手提袋(手指皮都損咗少少),於店內游走黎搵我哋.幸男見到領隊時忍唔住邊喊邊嗌"媽媽".原來佢行第二轉至見到我哋,第一次都未驚,但要行第二次就開始不安了.原本諗住買車冚，但無綿羊既size (得街車同啡呤車),意大利電單車牛仔褲又貴($3000).打定輸數空手而回,結果俾領隊搵到條Edwin既電單車褲,日本製造,約一千大元.
搭鐵路去新宿,目標拉麵店好多人排隊,於是行咗去另一間北海道拉麵店食晏.
雖然係繁忙地區,但都無香港市區既人貼人咁迫,第一站係去Bic Camera.
搵目標玩具店時,行到熱同攰,係Starbucks搵到個位座歇腳(原本得戶外枱有位).領隊去洗手間期間,為幸男影咗呢張偽文青照.之後,再係附近行吓,卒之都搵到該玩具店,但無想像中咁多嘢睇(Bic Camera仲多).
搭地鐵去座落係商場之間既Aqua Park,主題係海豚表演及海洋館。
海洋主題既廻旋木馬，盛惠每位500円，大小同價。知慳識儉既我，當然係負責影相同拍短片。
金魚理應係水中游動，但水缸裡放入風鈴，令人有金魚半空漫舞既錯覺。
幸男話水母似怪物，所以好驚咁走過，沒有直視…
原先一入場就趕去睇海豚表現，但可惜已開場兼無位，所以落番去睇金魚先。預鬆時間黎霸位，務求要揀個好位。
呢個海豚表現特色係配合燈光,營造出煙花背景.由於環境較暗,故只係以定焦鏡作短片拍攝.
散場後,行埋剩餘既水族館,呢隻海豹攤係店訓覺,仲不時打喊路,吸引不少訪客既手機及相機.
台灣女生不時同幸男合影相,仲係大型水族隧道內一齊自拍.
臨近夏祭,偶而見當地女生穿著住浴衣黎入場,智能電話拍照及打咭當然唔少得.
晚餐係Aqua Park附近商場內既一間燒肉店享用,見餐牌上有Frozen Beer,當然要飲番杯.
九點半入席,得番一個鐘頭時間點餐及食用,對生活節奏急速既香港人黎講,係以接受的.食開日式燒肉的話,一定會要番碟牛肋肉~
海鮮拼盤,龍蝦,海蝦,扇貝,蚌肉(象拔蚌?),夠晒豐富~
親子團既膳食,重點係要填飽幸男既肚,冷麵係不二之選.
厚切牛排,味道都唔錯,仲有乾蒜片俾客人夾埋黎食~
幸男都有食少少牛舌,其餘既都係由我包辦.
臨尾叫多咗一份牛扒,因為性價比高,結果都趕得切last order.繼尋晚既懷石料理,今餐晚飯我都食得好開心.
係酒店附近既JR店落車,無諗領隊話呢個月台望落去既小廣場,其實都係景點.
經地下街網絡行番酒店,發現新幹線週年宣傳,領隊教幸男以SUICA卡黎扮新幹線車飛.
PS:晏晝時份,我同幸男等領隊搞JR車票預約時,無聊地睇吓日本人眼中既香港有咩旅遊景點.打開行程介紹黎睇,得黃大仙廟,華舫海鮮,旺角夜市,淺水灣,以及晚間觀光巴士(香港真係幾悶吓).
