親子聖誕旅行Day 1

以往既親子旅行都係夏季主題,但今年屋企裝修工程已佔用了暑期之大假,結果順理成章變成全家首個白色聖誕旅行。

JAL櫃台check in兼寄存行李後,幸男仲寫咗張聖誕咭,寄去芬蘭既聖誕村。

幸男有幾期待坐新幹線?見佢畫咩就知。

幸男每次搭飛機都係唔願訓,臨落機既時候至會洽著覺......

廉航無既,除咗電視娛樂,當然係餐飲啦~雖然午餐只得一款,但總叫做有晏食兼唔難食,有啤酒又有雪糕。酒精效應下，邊訓邊睇咗兩齣戲(equalizer 2，銀魂2)，輕鬆渡過四個幾鐘既航程 。

落機過關口，拎齊行李就趕去搞JR Pass, 我當然係負責看管物資…

堅多人，打蛇餅排隊，仲要係陸續有落機既游客填補隊尾。

原本諗住搭鐵路去酒店，點知排到五點幾班巴士既時間，於是一片心買車飛，坐2個鐘到酒店門口。上車前有啲肚餓，係機場小cafe店見有熱狗賣，點知售罄，只得幸男係便利店睇中盒百力滋……幸男出發前2日仲發緊燒,慶幸今日可以平安上機。

領隊安排既東武酒店,房間可以直望SKY TREE~全賴A7 III既5軸防震兼背照式感光件,無腳架支撐,都可以拍下傍晚時份(七點幾)既SKY TREE街景。

繼上次東京之旅既啟發,爭取時間休息,今晚我哋都係酒店食晚飯~餐廳設係酒店24樓高層,玻璃窗位可以遠望SKY TREE(男廁尿兜位都望到),顯得今次既酒店晚餐特別值得回憶~唔知3年前係SKY TREE頂層既餐廳,係咪望番呢一邊呢?

酒店餐廳既晚餐份外精緻,唔單至係外觀,連味道都係細膩~

Set Dinner既奧妙就係咩都有,兼且會安排得宜,忠誠地演繹廚師既最佳組合。

我同領隊一齊分食對方既set dinner,務求可以試到最多既菜式。

除咗食材,餐具既唯美,亦係日式料理既特式,治癒嚮往慢活既我。

兒童餐一上枱,幸男就由苦瓜乾樣變成開心果樣,睇黎佢真係好滿意咁噃~~

餐飲方面,當然係High Ball,只可惜我坐個位未能以Sky Tree作背景。

平日唔食鵝肝既我,見夠細塊先至放入口兼吞落肚......

和牛真係無得輸,再多幾碟都食得落!

侍應哥哥用領隊既手機為我哋一家三口影合照,仲好有心咁影多幾張兼高低位都有(低光下相機既優勢,高下立見)。

明明幸男話好飽,但甜品時間就好似啟動第二個胃咁,仲要一臉陶醉樣子。

食飽飯,落去酒店對面街既便利店逛吓,未見相熟喉糖......

幸男好開心,一家三口可以一齊係日本過聖誕節嘛~

酒店附近有間酒吧,其實每次去旅行都好想去酒吧飲番杯,感受吓當地酒風~

PS:便利店無咩收穫,只得呢罐SUNTORY既時令啤酒。飲落又唔太特別,唔通我俾手工啤寵壞了?

冒失的爸爸

一心騎羊去置樂買熱既雞蛋仔作貢品,接幸男放學,點知等極都唔見。望番台灣女生既短訊,原來係15:35放學,而唔係15:00.....

唯有係公園望住小學時代既舊居,用電話黎補打BLOG。面前係廿多年前既回憶,椅背後係幸男既現在,感覺蠻有趣。

幸男一心以為婆婆接放學,見門口無對應既面孔(無留意企係遠方既我),就去校務處打電話俾婆婆。幸男無介意攤涼咗既雞蛋仔,邊食邊聽我講舊居既軼事,"咁近,咁你幾點出門番學?"。

幸男輕輕鬆鬆唔洗孭書包,全因騎坐爸爸愛駒~

PS:放低幸男係功課班姨姨屋企,兜入元朗買電單車美容品。除咗追買謝邦介紹既膠邊保護噴劑,仲係石崗搵到呢款黑色專用車腊。平日放工都散晒,唔知幾時至有閒情去為愛駒做SPA~

可以笑的話，不會哭～

騎著愛駒入花園，就聽到幸男既喊聲，明明已過考試兼是日星期五，無理由會俾媽媽責罰丫？唔通係……果然估中火棒mark 2斷肢，台灣女生報稱幸男已喊咗10分鐘。

頭盔都唔除就拎住Nokia 7 plus影video, 迅速啟動應變計劃，呈上日版火棒。無帶眼鏡既幸男，要望真啲同望耐啲，個樣似但啲色又有啲唔同既？

台灣女生拎出斷肢既美版mark 2合照，與mark 1 一樣斷左髋關節波頭。

喊前喊後兩個樣，原定日版用黎自己收藏兼作保險，結果都係做貢品……

日版既説明書後有漫画故事(好似細個砌SD高達咁)，仲有少少甜料，夠晒和風～我同幸男講：“真係最後一架0架喇”，希望幸男可以再鍚住黎玩。

PS:晏晝係mos burger食時令漢堡。

味道唔錯，可以再食，只係宣傳海報造型太完美…

今日卒之的起心肝，為大架同側架補油。無諗過封存十三年，德輝送俾我既死氣喉噴油仲用得～

跨代團隊賀湘湘新婚～

今晚係湘湘既大好日子,一眾舊同事一齊到賀。相熟既地點(先後出席過Gordon及豹哥之婚宴),重現昔日夥拍之同事組合。

新郎新娘以幸福既笑容,去回應親友們既祝福~

唔少舊拍檔已經成家立室,兼且為人父母。我同Jacky及Ivan都有帶埋少朋友黎襯高興~每次出席婚宴,我都會帶相機,即時將相片發俾相熟賓客們,讓大家可以即時分享喜悅(另一原因係我無社交帳號)。

PS:幸男於禮封內,畫上熊本熊作賀詞,希望湘姐姐幸福美滿~

屯宿之男20週年聚會

上個月既5號,就係入行20週年,約咗成月至可以今晚齊人食餐聚舊飯~

宿舍時代,除咗茶餐廳同大排檔,經常幫襯既就係打邊爐。那些年,晚飯過後,再去酒吧,無數既嘔吐或宿醉故事(最記得雅仕堡邊飲邊搖骰計數)....

大合照,廿歲小伙子們,一齊走向壯年。

老手也失手

今日補鐘早收工,騎羊去友愛買大雞大,點知落側架泊車時,側架觸地回彈並失去支撐,頓成跌車.......第三次嘗試至成功扶起愛駒,番到屋企細心檢視:左邊底有花痕,平時應該唔大覺眼,似石仔打花既位。另外側架同大架都有少少花痕,應該可以用噴油處理。

2007年零速跌車,係大架回後兼跌右邊.由於無側架同大架作墊托,右側包圍花位較高,要成塊換。另外右邊軚及死氣喉金屬部件都有花痕....

其實十月放大假時,已有一次係藍地攞外賣時,錯判地面斜位,差點連人帶車向左跌。正當臨失平衡之際,腎上腺素將劣勢攤平,但已動彈不得,好在附近有位大叔被我既誠意打動("師兄,可唔可以幫幫手?"),幫我扶住愛駒車尾,好讓我重操平衡點作人肉倒車。

PS: TMAX與凰呀一樣,咁消耗體力,睇黎仲要多點時間去同TMAX磨合,至可以安心啟動Sport Mode........

彼此包容了11年

結婚11週年,簡簡單單咁係屋企食西式晚餐,但都有支靚紅酒作慶祝。

原定入元朗小樽買生蠔,但因特發事宜,變咗係市中心吉之島買。相熟法國蠔White Pearl及Gillardeau當然無令人失望,初試Divine有驚喜~

其實今日係家長日,朝早要去學校一趟。見完班主任,再係雨天操場睇書展,幸男都揀到心頭好(雖然<足球>無貨)。

夾集黑色瀝青接縫既灰色球場,已經被新規格取代。只有籃球架依舊屹立,童心未泯地陪伴小朋友渡過每個學年。

台灣女生帶幸男去市中心買定牛扒同沙律,再上婆婆屋企,我就以入特價電油為名,番屋企騎愛駒出門。終極目的,當然係去相熟花店攞花球~雖然花店已搬,但無阻鐵騎熟客既行動。

計埋接新娘當日果個花球,呢個已經係第12個送俾人家既花球~

當初諗住晏晝係屋企攤抖吓,點知上網登記才發現:送俾人家既結婚禮物回贈既$500超市禮劵係數量有限(500張)!!個優惠係我尋日買至開始,立即計數,500(張)/18(區)/12(鐘)=2.3,咁即係如果每區裡有一間sun mobile係每個鐘賣出2部XPERIA XZ3就會啱啱好無晒500個額!!!!雖然已登記並攞到換領代碼,但為免先到先得既變數,急急check巴士app趕巴士出去換禮劵。

帶齊正單,成功換取$500超市禮劵~好在自己親身出黎,原來要買方出示身分證(怕有人會買好多部??)。

處理完突發事故,搭番巴士入屯門已經八點鐘,係吉之島買埋生蠔兼cocktail sauce,搭的士番屋企。

PS:雖然XZ3係貴咗少少,但實用要緊,況且無理由買部比XZS差既型號丫~

貝爾特X麥子IPA

今晚台灣女生去同事婚宴，不甘寂寞既我約咗馬Sir一齊去貝爾特食晚飯。之前聽人家講過貝爾特有本地手工啤飲，無諗過自己今晚就會試飲。

吧枱放上啤酒樽作招來，識飲既我當然係揀生啤～

餐牌加上新小食款色，以配合手工啤推廣。雖然麥子既IPA帶有香茅味，但我覺得少爺啤既IPA比較出色。

原隻龍蝦意大利飯,雖然唔係大隻,但至少都係一整隻,對食量不大既我就啱啱好。

甜品方面,我揀咗新款式Tiramisu,馬Sir就揀咗朱古力蛋糕。價錢相若，但環境及選擇就比outback好得多，尤其係夠靜可以傾計而唔係“嗌”住黎傾。

夜多少少,勇敢地跟隨語音導航，與愛駒一齊入上水雙魚河鄉村會所，接人家番屋企。順順利利，一take過去到目的地，來回50公里,油錢都平過台灣女生搭的士出上水再轉小巴丫~

PS: 如果齋睇地圖預習去陌生地方，一定會兜錯路兼用多咗時間…

德國口味，但香港制造

之前上網訂既本地手工啤，今日卒之送到黎啦～$500一箱，平均$20.8一支，平過散買$29。

拆開箱至發現啤酒係雪凍咗至送去客人地址，可惜要番工，未能即時試飲～放咗幾支入背包，放工時份俾同事及朋友淺嚐。

同馬Sir既品評一樣，典型德國生啤口味，無注入其他獨特口味。相比普通啤酒，手工啤既麥香係較特出，可以細味，與打邊爐或消暑式飲法不同。

PS: 平時鍾情少爺啤既PALE ALE 及IPA 1842

不許你註定一人

早更收工，騎羊番屋企放低背囊兼換上輕裝，兜去睇幸男踢波。幫台灣女生將污糟波衫放落愛騎，再係安定會合買餸，兼運載食材番屋企。

今日係特選星期六，去入特價電油前先去藍地九記買盤啤酒番老家進貢。

時間啱啱好，無撞見老媽，將貢品放係門外，放張相去家庭群組作通知，就兜去油站入油。

雖然唔係咩貴價食材，但係屋企舒舒服服咁食就足夠了。幸男食飽可以睇吓電視或玩機械人，兩口子就繼續慢慢食～

PS:平日的獨活及配合，卒之得到了回饋。