親子聖誕旅行Day 5

藍天白雲加海景,陽光透過玻璃窗照耀住份自選早餐,感受到冬日既溫暖。

晨曦休閑感觸好快就消失,因為食客陸陸擠入餐廳。幸男忙於食包裝紫菜作前菜, pancake為主要食糧。

早餐過後,番上房間享受多一次溫泉浸浴~日光時間,可以望到渡頭及沙灘岸邊,露台另一邊可以遠眺函館山。

幸男邊打呵欠邊浸溫泉,邊掛住條鼻水,好搞笑~

搭巴士去番函館JR站,幸男呢張相好似係幫北海道新幹線賣廣告咁。

往札榥列車上坐滿乘客,連擺行李既架都全满,我哋要去下一個車卡至搵到個無咁滿既架,再將行李喼叠高。

早起身既幸男,要係列車上補眠,要領隊叫醒食午時弁當。

隔離坐住陌生人既我,隔著背接過領隊發放既物資,獨個兒享受精美午餐。

到札幌站落車,月台竟然無電梯.....唯有叫領隊先拎住個細喼落樓梯,再叫幸男行落去會合媽媽,我就一口氣左右手各抽住一個喼落樓梯!!

十年前蜜月旅行時,經常係呢間快餐店買外賣早餐上JR食,好懷念~當年有啤酒及小食既食店已不復再,有點可惜...

轉地鐵去中島公園站,行一條直路就到Ibis Styles Sapporo,房間是次旅行之中最大既一間(函館果間Sheraton仲話upgrade咗,但無得校室內溫度,結果我成晚熱到訓唔好)~

行去酒店時,經過一個路口,見到一楝舊建築物,唔知係咩黎呢??

中島公園外,有木搭建既小店出售過年飾物。

為照顧訪日既華籍旅客,包裝上都印上中文簡體字。如果唔係怕個喼無位擺,買個番屋企都唔錯。

公園地上舖滿軟綿綿既白雪,幸男於雪地上跑向各遊樂設施。

領隊為幸男跑障礙賽作錄影,但幸男爬呢個扭曲既攀梯,落地時左手連同大褸被卡著。邊叫幫手"後面幫我接住吖,唔該~"(咁似我騎TMAX求救果幕既?),一邊自己試圖扭出左手,最後都成功逃脫。

今日既主題係購物,跟領隊搭地鐵去Ricoland Cube Sapporo,買預訂既TAICHI e Heat inner jacket,順便買多咗條舊年買過既電單車牛仔褲(咁啱有唔同色)。即使香港跌到8度都，唔會怕騎羊，著住e heat電單褸同手套，再坐住電熱座位嘛～

Richland行去附近既TSUTAYA逛下,途經一架流動串燒檔,大家一齊八掛有咩可以頂肚。

幸男:雞皮,牛肉。領隊:雞肉,牛肉。團友:牛舌,雞肉。

領隊同幸男行超市,我就行TUSTAYA。羡慕日本有店舖做租賃CD,DVD及BD,可以選擇自己需要既質素。香港始終土地不足,兼太講求效率(商家及用家都係),上網方便下載就好了,但犠牲了多元化及小眾既偏愛。香港只係得番節拍有影碟租賃,但近來都開始愈黎愈少碟(舊碟平賣,新碟又唔係套套有).........

搭番地鐵去札幌既Big Camera（商場内好熱，除哂外套都出汗）,幸男卒之搵到心儀既聖誕節禮物~原本想試吓幸男既反應"爸爸一定會買0架咩?",點知幸男答"你應承咗0架".....咁我的確係香港奇趣天地買唔到Dr.Yellow作生日禮物，一心去日本旅行買既。

賢仔托我買點數卡,我即刻諗係咪騙宗,特意係whatsapp問多幾句作核實身份。

晚餐係車站附近既商場燒肉食店享用,呢度鼓勵大人帶小朋友黎與朋友聚會,以小朋友任飲果汁作招徠。

每逢列車經過,我哋就聽到"隆隆"聲,及感受到輕微震動,好有趣。店內有食客吸煙,但好在日本煙唔太濃味。

眼濶肚窄既幸男話要食刨冰,無諗過會咁高大，結果當然係食唔晒……

番到酒店,幸男急不及待就拆聖誕禮物(今日又真係boxing day喎),跟住說明書黎為新幹線戰士Dr.Yellow變形。粗心大意既幸男，未能完美演譯説明書，不時被看不過眼既爸爸提水。

PS:天涯鏡既蓋經常脱落，細看發現回彈機關已斷，所以順便係big camera 買個全新既～

親子聖誕旅行Day 4

朝早去函館站既巴士站等車去"湯の川",因為我哋今晚要係湯泉旅館過夜。落車就望到十年前惠顧既溫泉旅館,試圖捕捉異時同空既光影。

相隔一條馬路,呢間就係是晚下塌既旅館。由於時間尚早,未能交房,我哋完成CHECK IN就將行李暫存大堂,再係附近既便利店望吓有咩買。

我哋行咗去一間舊式既日式食店,沒有半點殘破感,反而有老家既親切感。

見到有燒鰻魚定食,雖然貴點(29xx円，店員回覆一次價錢作確認),但都照落柯打。幸男食天婦羅冷蕎麥麵，領隊就叫咗份牛肉鍋。

今飽出門口至望到,該店係自1927年就開業, 應該照顧了當地3代既家庭。

食飽就去搭市電,落車徒步去五稜郭公園。雖然無落雪,但不時有寒風來襲~

人流唔多,我哋好容易就可以排隊買飛上觀光塔,護城河與土壘勾勒出既星形非常有趣。如果唔係睇過相關歷史,好難相信原裝設計為軍事要塞,而非消閑休嬉公園。

遊客唔多,用閃燈都唔怕影響力到其他人。悉心遷就閃光燈反照位為照片右邊,裁走L型邊位就大功告成~

觀光塔上有紙相框供遊人拍照用,商品部有環繞真選組主題既紀念品,但我哋不大感興趣。

反而免費既印仔,更加吸引幸男。

銀魂既土方十四郎同土方歲三既雕像,外觀上有一段距離......

大堂擺放著炮台,相信係複製品作裝飾用。

下午茶時間又到啦,領隊揀咗當地鮮牛奶。

幸男揀咗熱呼呼既粟米湯~

尋晚至試過罐裝既大沼啤酒,今日竟然有機會試生啤版~~

雖然有三小杯set,但我怕飲唔晒,所以試黑啤就算。

入黑前,我哋係公園範圍內行吓,護城河已結冰,唔知夏天時會否流動?
望落去好似去咗古代, 但園內有不少大型工程機械,相信係用作復修之用。

領隊介紹園內有櫻花樹,公園於春天時份會變成賞櫻熱點~

登上土壘既樓梯唔係全部都係水泥,有啲係木條篏入斜坡,上落都要分外留神。

五稜郭奉行所,要俾錢至可以入去參觀。由於臨近閉館,所我哋只係門外影相作紀錄。

係香港較難影到一片夜幕,去襯托建築物....

其實行去五稜郭公園時,已經過mister donuts,並計劃回程時入店享用。

幸男大口咬落聖誕版既士多啤梨味冬甩~

旅館附近有一家類似超市既商店,酒品區放滿各式烈酒,有少少心動想買支水楢木芝華士(平過香港嘛)。

尚未夠鐘食飯,幸男靜靜地睇卡通,領隊就收外套及準備浴室用品。

房間既賣店,就有露台有個望海既溫泉缸,享受私人風呂。

是晚既膳食,以自助餐形式提供。領隊話呢間溫泉旅館同5年前洞爺湖果間,同屬一個集團(一齊訂食材及其他消耗品無疑減低成本)。

選擇多,好似去咗酒店食自助餐咁。客源過半係外地遊客，中台港都有，反而日本遊客唔多。

食飽番上房浸溫泉,但水溫不似預期,兩母子急急上水.....幸男話得第一下落水覺得暖,之後就覺得凍。我同幸男落去大浴場浸浴,領隊就係女湯享受一個人既放空。兩父子番入房時,領隊已搵職員上房調控水溫,好讓大家輪流係露台享受半戶外風呂。

影完合照,食埋個杯麵,幸男就呼呼入睡。我同領隊寫好香港帶黎既音樂聖誕咭,再放係幸男枕邊,為白色聖誕旅行作點綴。

PS:卒之係湯の川既便利店搵到社交平台大熱既海膽杯麵(香港無得買),味道唔錯,但都唔及大沼ビール咁出色~