預祝母親節

台灣女生叫我同幸男準備(煮)母親節晚食飯，我同幸男都係話出街食就算啦，結果揀咗光仔番工既Bistro Bon。

是日餐湯有蘑菇湯，啱晒幸男心水～

厨師精選既貴妃蚌，真係超好味，下次都要追食。

黑松露意雜菌意粉,原來黃光下意粉顏色好難忠實呈現......

牛腹肉同肉眼扒雙拼,下次都係揀牛腹肉好啲,又嫰又滑~

食到尾聲,係相機背囊拎出錦旗,並託幸男作頒奬嘉賓。人家非常好奇邊度有得買,我當然無講出秘密~

託光仔個兄弟幫手影家庭照,簡簡單單,咁就當係母親節慶祝活動。

PS:搭63X出到太子再轉的士都方便，但回程就要行番去九龍塘地鐵站。

下午茶&購物

台灣女生放假,為應對陪老公買鞋兼接幸男放學,索性捉埋老公去接放學,一齊出K11食甜品下午茶兼買鞋。

胃口一般既我,只係叫咗杯凍cappuccino陪坐。

之前因為太多人排隊而無緣入座既兩母子,今日卒之如願以償。

從呢個角度,就知兩母子係邊度食兼有幾多忌廉~

香港既ROCKPORT網站無呢個色,點知門市竟然有呢個心儀既黑白色,順便仲買咗對番工皮鞋。

PS:地下中庭有健力士黑啤推廣,望落去應該有生啤飲。暫見係私人活動(傳媒影相採訪?),搵日同老豆一齊黎飲個下午啤先~

2018年Cyber Formula襟章

年紀大了，步姐都變步嬸，舊襟章之背托亦破爛。睇均屋企既收藏，都係呢個最夾颜色及心情，希望勉勵一下自己。

PS:Cyber Formula Zero裡，風見隼人以Sugo Winners於車隊之車手，於世界賽程中途復出。為克復zero領域之心魔，亦以行動教曉後輩安廸，真正車手既風範。

高風擋模式啟動～

三點左右,係太子放低愛駒作第三次保養,再行番去花墟嘉利物流,為幸男專用頭盔配茶色風鏡。

行番去始創中心商場,見星巴克無位,唯有兜咗個轉睇吓嘢先,好在第二次搵位順利入座。雖然J.O既風鏡較細,但都要$3XX。夏天太陽猛烈,唔想曬壞幸男對眼,所以趁今日順路買埋。

邊坐邊補打Blog,平日番工忙,放工個腦都實晒,又要兼顧家務,無以前咁快追進度。

維修單上既車款,應該係上一代既TMAX,唔知呢張係TMAX專用表,家係其他車都係用呢張呢?

臨近六點,主動打去車行問,原來差唔多搞掂,叫我行住去車行先。明明睇過天文台APP話六點半至落雨,無耐眼見雨勢綿密....

例行換機油同油隔之外,針對空轉死火事宜,職員話已update電腦,唔通其他同期車款都有呢個問題?

撻車起動順暢，著定雨褸準備全程捱雨。撞正放工時間，葵芳段冒雨塞車慶幸慢車怠速無再死火。電動風擋大派用場，Traction Control System 加上ABS，俾車主多一份安心。到屯門又係市中心塞一段，番屋企時下半身已濕到入底…

平成出發,令和歸返

早更過後,騎愛駒去老家附近既進逹食過雞翼薯條,就番屋企補眠,因為夜晚要去機場接機。三婆孫4日3夜既旅行,我日日都番工咁滯。唯一既假期都番咗公司加班3個鐘,夜晚同慧賢及Ben哥食飯聚舊。

幸男一轉彎就見到我,立即向我揮手,好似外國讀完書番黎既戲情......幫手推行李去搭的士站,先送外母到樓下,再番自己屋企。

無諗過我都有手信,仲要係日本版既水猶木芝華仕18~三婆孫見證日本年號交替，幸男最開心莫過於買到新幹線戰士玩具。比起前年跟永安既九洲團，今次東瀛遊既廣島大板德島團，，較得團友歡心～

PS: 趕時間，入到機場至係接機Hall A 附近食晚餐。一碗拉麵都要八十幾蚊，仲要得叉燒及腩膏各一…加多4塊叉燒，咁又過一舊水(仲要味道一般)…

斬料

小時候，老豆老媽久不久就會約埋阿婆阿公一齊係深井食燒鵝(地理上亦係中間位)，今日我就騎愛駒去買鵝掌鵝翼番老家黐餐。

75蚊一份例牌，阿姐都答唔實斬碎有幾多隻既份量。為穩陣見，買咗2個例(1個中)。回程時睇錯路牌，繼續行公路出荃灣…要係舊i cable大樓對開既迴旋處回頭，唯有當兜風兼俾機會愛駒鬆筋骨。

PS:臨走時見門外開始多人等位，路旁既等候區，充滿著3代同堂既回憶，記起心急入座叫果汁先生既心情。

實試斷貨NOKIA 9 demo機

早更過後,係市中心食晏,順便去CSL試吓NOKIA 9既demo機。2kPOLED屏幕真好靚,而且機身好輕。親身試影JPEG相,顏色偏向中性,都真係要等5秒有多,但我就無睇到韌體係咪新既版本(CSL應該唔會自己米卦?)。

 有別於焦距不一既雙鏡頭NOKIA 7 PLUS,NOKIA 9可以係同一個取景距離拍攝散景模式,用家不用行好多步。

同一個企位,用NOKIA 7 PLUS既出品作比較,分別未至於2.5倍靚(5鏡 VS 2鏡),但相片既光暗份佈就非常平均,唔會部份光位過曝。下次帶埋台灣女生去試影人像,睇吓係咪網上傳聞中既黑面照先~

PS:CSL職員話唔知幾時番貨,百老滙職員都話開賣日起只番過3部機(當然售罄),但可以留電話作通知。

MOTOPLEX=亞林電單車

一心騎愛駒出土瓜灣亞林電單車睇Taichi雨褸，竟然搬咗舖！打電話去查詢，女職員答已搬去碼頭附近一年。上網搵咗一輪，至知改埋名叫Moto Plex , 高德地圖上亦未更新，只有導航失準既Google map有更新地址。以附近既工廈作目的地，聽住高德都要兜3次至成功搵到目的地，點解個店名唔可以明眼啲？(靠taichi  logo)
店舖大好多，唔再係齋做Aprilia代理，連Piaggio,Moto Guzzi,Vespa都收歸門下。當初網上介紹歐洲車旗艦店時，真係無諗過係亞林……

試網上介紹既新款雨褸，心儀既黃黑色無我size(大)，女職員説我揀其他顔色。螢光黄似交通警，紅色撞我件冬天褸，黑色又無線條，結果一片心託台灣女生係日本訂貨，暑假旅行時交收。

真係好近碼頭，巴士站附近馬路泊滿旅遊巴。

新聞話旅客迫入土瓜灣，今日親眼見到，不過應該只限附近既商舖，未波及較後既土瓜灣道。

PS: 行去亞林舊址途中，見警察抄牌，急急回頭開車兜去下一個街口。再行到去舊址時至發現變咗幼稚園。受精神打擊下，差啲認唔到路行去攞車…

代啤

夏日將至，唔想飲多咗卡路里既我，選擇無酒精啤酒作消暑豪飲。早更收工，騎愛駒去置樂既HKTV MALL攞貨。明明無酒精，但交收時要我簽已成年聲明。

除咗All free，今次仲買埋asahi既保健啤(好似coke plus)。試過Suntory all free同Asahi zero，都係Asahi Zero最似普通啤酒味(只係剔除酒精味道)。

PS: 平時係一田買開代啤及特别版啤，但近來都無乜入貨，結果要上網撲貨…

區內睇日本偵探電影

今晚約咗台灣女生一齊去英皇睇<<假面酒店>>,男女主角為木村拓哉以及長澤正美,夠晒卡士。節奏明快,省卻了日式推理小說既慣性冗長。線索之間有小故事穿插，增加不少趣味性。結局出人意表,我同人家講笑"似唔似係悠長假期既復仇版?"

晚飯係華都既轉角享用,晚市好似唔太多人。

套餐可以揀湯或沙律,我當然係揀後者~

人家點咗蜆肉意粉,配是日特飲。

蜆份量都唔少,其他食店都只會得五六粒,絶對做唔到蜆多過意粉既賣相。

我點咗個紅酒燴牛肋條,味道唔錯,只係肉質有點老韌,份量當然係好足料啦,睇黎平時一個人都可以黎享用一人前晚餐。

PS:今次既戲飛係買一送一,因為托阿嫂用滙豐SIGNATURE卡買飛。網上購票唔收手續費,仲可以whatsapp接收二維條碼戲飛~

性價比>耐用度

電腦組裝工程因軟件而停滯，以平板電腦作頂替打BLOG。原本邊打邊飲台灣女生訂俾我既大沼啤,但打打吓連個KEYBOARD都壞埋........

上網睇過，我部機已下架，全線新型號背部附有支撑架(抄surface?)，故磁貼鍵盤連摺叠式支架亦成為絶響…TECLAST X3PRO用咗唔夠3年,曾因螢幕有一橫行死點而番大陸原廠換芒(一年左右)。諗住捱到4年就當賺咗,而家唯有物色一下藍牙鍵盤及平版支架.....

拾號公社

今晚同馬sir去咗新墟既拾號公社食飯,因為豹哥推介呢度有多款支裝手工啤。超級市場唔係成日都有手工啤賣,可以係度試啱邊款口味,先至上網訂購,咁就唔怕要湊最低消費而煩惱。

$260一個主菜,想升級為有餐湯及迷你牛角包,要另外柯打一杯非酒精飲品.....味道唔錯,只係溫度有點攤涼,可能被貝爾特既熱碟所寵壞~

PS:馬sir食完飯跟我番屋企,砌上星期買既電腦料。電腦白痴既我,只係幫到手用curved artery forceps將display card端子線插入底板。新底板未能認出及重啟window 7,睇黎聽日要出去買wind 10至可以收科.......

CB400 X 大棠 X TMAX

前陣子愛駒慢車怠速時死火,唔知係咪少上公路,不利排走引擎沉積物。心血來潮,收工約康楠一齊出車上大棠,讓愛駒舒展一下。CB400領航之下,TMAX全程緊隨,並一齊全力上山。

全黑環境下,nokia 7 plus既自拍鏡頭夜拍好唔掂,有啲似feature phone既30萬像數既時代。

呢張相都要康楠用電話既LED燈作補光,先可以認得出係BBQ枱位置望向山下。做個好司機,康楠飲忌廉,我就飲代啤~是晚厚雲,睇唔到星星同月亮,傾完電單車嘢,就一齊落山。由於要趕12點前去加德士入油(特選星期六),所以無跟康楠去朗屏買宵夜。

PS:重覆著空波，俾油，刹車…落山路程令我再一次體會到棍波既優勢，唔怪得Initial D係無人揸自動波落山～

燃えろ！俺のカロリーよ！

最近上磅現重咗,現已150磅.....今日都有去球場跑步,8公里唔夠(消耗445kcal),跑咗八個字,都算有耐力,並達成一星期跑3日既計劃。下星期落雨,唔知夾唔夾到跑步添。其實自少都喜歡跑步,初中時會約馬sir係市中心跑,遲到要請飲麥當勞汽水或凍檸茶。

沖完涼,騎愛駒出市中心會合人家同幸男,係鮨千寿享用考試慶功宴。

幸男望完餐牌,除咗雞皮及雞翼串燒之外,要食黑毛和牛粒串燒！！我哋叫咗份香葱蒜牛肉串燒代替，加埋蟹籽軍艦，蕎麥麵，眼闊肚窄既幸男只係食剩1/3蕎麥麵。

串燒雞翼係難以抗拒，連平時避食雞皮既我都要投降～會員APP優惠之下,人均消費$333。雖然係貴啲,但味道同選擇足以補償~

PS:希望今年可以多點運動,重拾活力身段,以配合愛駒TMAX~