家庭日@星期六

晏晝台灣女生同幸男搭小巴出市中心去攞位食拉麵,我就騎愛駒去外母屋企攞幸男既書包同食物袋,但我無諗過會被倆母子野生捕獲都唔知......

另類父子合照,我仲係懵然不知,係烈日下保持緘默。

我就根據任務指令,先去外母屋企,幫幸男攞書包同番學用品。

到市中心會合倆母子,啱啱有位入座。每次都要提醒幸男唔好飲咁快,否則未食飽就見底......

人家帶幸男去踼波,我就臨散場時入替人家,騎愛駒接幸男番屋企。

人家準備晚餐,我就偷時間去球場跑步,好難得可以享受休閒時刻。唔知係咪聽漏提示聲,以為自己跑極都未夠5km,停步兼停錶時,先知已跑咗6km,自已嚇自己啫~

 收到幸男既來電,話15分鐘後就開飯。預啱時間,番到屋企就開餐。人家係西鐵站既社企買晚餐材料,總好過係一田買現成餸菜翻熱丫~

放工入元朗

捱完個早更,騎愛駒入元朗,係目的地附近搵咗間茶餐廳食晏。咁好陽光,當然要試吓NOKIA 9 PureView既攝力。

雞翼薯條下午茶,永遠係至愛,依然記得舊對白"我鍾意食雞翼薯條得唔得丫?"。味道同質感有啲似CANTEEN大家樂既炸雞翼,回味夾雜著回憶。

行去隔街既波衫舖,問可否代波衫印字。年輕店員叫我跟卡片上既負責人直接聯絡查詢,可惜結果係失望......

太陽猛烈,匿埋一邊遮蔭位,用智能電話上網SEARCH"元朗波衫印名",搵到間DIRECTSOCCER球衣專門店。該店之社交平台未見有聯絡電話,我又無臉書帳號作留言查詢,唯有騎愛駒去望吓。好在有開店兼有代客印名,"MESSI 10"盛惠$180。

順便去買跑步腰包,係大馬路搵唔到雄峯,原來不敵舖租,搬上樓上舖。用GOOGLE搵,街景只見萬寧,原來係萬寧隔離既唐樓樓梯入口........

結果揀咗mont bell既Cross Runner Pouch($200有找),試過可以收納6吋芒既Nokia 9 PureView,兼有個分間放一兩條鎖匙。

台灣女生放工係超市買材料,安在家中邊睇電視邊開餐,飯後重拾昔日追劇時光～

接考試生放學

同康楠,嘉耀睇完<哥斯拉II:王者巨獸>，就去接幸男放學。幸男話要食outback,雖然明知幸男食唔晒一個兒童餐，但我都係心軟入座…

飲完忌廉湯就將沙律交俾爸爸,等待主菜炸雞枊薯條。幸男食咗一半多啲,剩底既用外賣盒拎走,搵晚當宵夜食埋佢(蒸焗爐健康炸)。

其實我個藍芝士漢堡餐都係食唔晒,放棄底面麵包,並將薯條放入外賣盒。

送上婆婆屋企,順便將單車摺好,搭的士番屋企。下次出球場跑步,幸男就可以自己踩單車，唔駛追到氣咳～

PS:<哥斯拉II:王者巨獸>雖然唔算出色(只係將舊故事重新包裝),但都比NETFLIX既3部曲動畫好。忽發奇想,如果基多拉出玩具,可以3條頸上既頭,向上拉走而底部有一個新軟膠頭頂上補替,重現再生劇情就好了。

翻煲GUNDAM 00

之前趁Cheapy執笠前,買咗GUNDAM 00既dvd。畫面像數不足,唯有係電腦dvd rom播黎睇,仲要校細啲個畫面以防爆格。用genki藍牙5.0aptx駁DSR7BT耳機,效果好過齋出JBL Charge 3喇叭。

葛拉漢與主角F剎那既執著,以Union之Flag機體越級跳戰GN dive既Gundam Exia,非常熱血～期待往後Flag小隊既雄姿～

PS: 事隔十年，仍然最喜歡GUNDAM 00

NOKIA 9 PUREVIEW VS NOKIA 7 PLUS

唔怕貨比貨,最怕唔識貨,Nokia 9 PureView既攝力確實不容置疑,塵埃既細緻,膠面既凹凸感,令相片處理既時間變得合埋~

 番老家黐餐時,隨心用Nokia 9 PV與Nokia 7 Plus拍比較照。

驟眼睇,Nokia 7 Plus好似夜景較好,但肉眼所見,夜空無咁純黑,香港既光害理應存在.......

街燈夜景,對焦點為白色房車,Nokia 9 PV自動以ISO6400拍攝,無諗過可以直迫DC既ISO值。

Nokia 7 Plus自動以ISO1000作拍攝,成像則比較鬆散,樹冠既細節亦相對失色。

天橋街景人像夜照,較果相當出色~

Nokia 7 Plus卻失去了背景暗位細節之餘,前方受光主體既成像都略遜一籌(頭髮,衣服皺摺)。

總結：5鏡頭無5倍靚,但細節上絶對有優勢。5鏡疊影HDR下,夜空光害及厚雲亦會變得明顯～即使每張相要花6秒左右去呈現,我亦無悔揀選Nokia 9 PureView (往後軟體更新可縮短時間就更好) 。

第十九代手提電話

心血來潮打電話去市中心百老滙問吓NOKIA 9番貨未,點知職員話有貨番,仲問我有無落訂。我答職員:"上次你哋同事話未知幾時至番貨,所以只係留電話等覆",店員話有幾部現貨可以俾walk in客。收線後,打去豐澤問,有一千零一部機。一樣係$4988豐澤跟機送芒貼同機殼,總好過百老滙既Micro SD咭及充電寶。託台灣女生收工經過市中豐澤代買,原來中銀卡可以平150,於是親自騎羊出市中心~

卒之都可以再一次支持NOKIA,機背滑溜,呈夜空藍色調。今晚主力叉電同安裝番啲常用APPS,未能試其他功能表現。

手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile
16th Alcatel One Touch Idol 3 >灰色 Sun Mobile
17th BlackBerry DTEK 60       >鈦灰色(玻璃背面) Sun Mobile
18th Nokia 7 Plus                    >黑色(玫瑰金色金屬邊框) Sun Mobile
19th Nokia 9 PureView           >藍色 (反光夜幕藍)Sun Mobile

PS:中午時份,收到速遞公司電話,之前訂既GENNKI 藍牙到手~

試駁SWITCH DOCK,完美呈現聲畫同步(為晚間打機做好準備)~Creative藍牙2.0真係無得比，早知當初唔嘥果$300…

GUINNESS

今日同老豆一齊去接幸男放學,一齊搭輕鐵再轉西鐵出尖沙咀K11,一齊去GUINNESS推廣攤位飲下午生啤~印象中老豆無接過我放學,只係有一次送我番學黎睇住我還番同學送俾我既小食玩具機械人(塑膠料).......

為免影響校風,特意帶咗件出街衫俾幸男換。幸男話好肚餓,見雞翼上枱,就即刻拎起牙籤將雞翼放入口(之後連牛肉批都唔放過)。無諗過會有後生女仔黎飲酒兼打咭,望落又唔似遊客丫。

原本諗住係綿泡上印上LOGO或自設拉花,但由於要搭枱,怕行去搞一搞拉花就無埋個位,所以打消念頭........

OUTBACK唔再有得飲GUINNESS生啤,所以特意約老豆放假日出黎飲番杯~

託幸男用我部NOKIA 7 PLUS,幫我同老豆影相,色水同A7III實在差太遠....如果而家有部NOKIA 9,唔知會相差幾多呢?

PS:趕得切放工人潮前搭西鐵,夜晚係新斗記坐住黎等埋台灣女生一齊食飯。

ROCKMAN11結局合照:集體童年回憶

幾經無數既嘗試，成功突破Dr.Willy城之三個關卡兼大佬,最後同Dr.Willy作生死戰,獲得happy ending大合照~

Dr.Willy既坐骷髏戰機,並不難對付,只要用Blast Man配Power Gear攻擊,就可以炸到HP見底。

例牌有二段變身,核心機會向玩家投擲齒輪,兼兜圈撞擊玩家。

當HP值扣至一半時,核心機以Power Gear, 及Speed Gear 輔助攻擊。只要精準運用SpeedGear,就可以迴避兼擊中駛倉裡的Dr.Willy。

 經典畫面重現,假意投降~

Dr. Willy乘機偷走,並表明敵意,會捲土重來~~結局係預其之中,玩家卻能重溫兒時既回憶,"只要努力練習,一定可以爆機"。幸男恭喜我打爆洛克人,但諗起尋晚幸男俾山埃貼士打8位關卡boss,覺得好好笑"都打得贏丫~"。

PS:臨打Dr. Willy之前既一關,玩家要再一次擊倒8位關卡BOSS。每打倒一個,就有HP回復道具一個(回血一半左右),真係要好好準備E及W罐頭,因為中途無得save。

愛子心切

踏入初夏,太陽開始猛烈,為免幸男坐電單車後座時被太陽曬傷雙手,特意買咗對防曬降溫手袖。

四點半去接幸男放足球班,頭盔配上茶色鏡,又有手袖,咁就唔怕幸男辛苦啦~(不過低燈位都係會好熱.......)

Spoiled boy

是日放假,晏晝係燊光食完飯,就騎愛駒出市中心,買定茶點俾幸男。先係華都既山崎望吓,見無士多啤梨蛋糕,於是落吉之島超市既Italian Tomato買。"皇牌士多啤梨蛋糕",令我諗起卡士蘭既皇牌"肝美健"......買多一件TIRAMISU俾台灣女生,當晚飯後既甜品。

番屋企將蛋糕放入雪櫃，再騎愛駒去接放學。幸男書包都唔駛孭,番到屋企沖完涼就嘆茶點。

為免過份溺愛小朋友,叫幸男斟咖啡作回禮。仲記得曾經問過幸男,第時會否係咖啡店做暑期工,幸男答唔會。其實當時我一心去幸男做暑期工既咖啡店,搏有杯大少少既溫情咖啡0架嘛.....

PS:Switch既俄羅斯方塊呢期有復古game boy主題,除咗綠色螢幕及單色磚塊外,音效都係當年既腔調,夠晒原汁原味!

上網睇攻略

凋空及卡關多時,最終都要上網睇YOUTUBE,先至可以成功跳坑,進而打大佬。第一個search到既片係用主角武器打,扣血速度慢,於是自己邊估邊撞,試到blast man好似好啲。上網搵到第二條片(ex模式ALL RUN),原來power gear夾blast man至係王道,再加埋3段時間既走位,成功過關~

過多兩關就可以到終極頭目,希望可以盡快爆機!