HEART ATTACK後感

星期一晚飯局同女同事口角後拉扯,只著過一次既毛衣就咁俾人抓穿咗個窿,好似星矢入面,件聖衣俾人打爆咗咁....

女人就係咁,平事就要男女平等,當形勢不利時就會進入弱者模式,話啲男人無風度,小氣.唔夠玩咩,一哭,二罵,三上吊,總有一招湊效~男仕總係要讓女仕,"算啦,啲女人係咁架啦,算啦.."

港女呢個名稱,唔係單單係大陸女人對香港女仕們既貶稱,只係大多數香港女仕俾人既感覺都係不太溫柔,要求高,自我中心永無錯,現實等.....

其實我都識得一啲女仔或同事唔係好似典型港女咁,佢地都係出於污泥而不染,希望他日港女呢個名字會係俾人多點正面既感覺同經歷.

初試婚紗禮服

今日台灣女生放工約咗我同伯母係兆康西鐵站集合,一齊坐西鐵去美孚轉地鐵去九龍塘站.人家既老友brendea(伴娘)早已係該站等我地.

由brenda帶路,我地一行四人行咗兩個字多啲就到"法國婚紗".
四點左右,我地一坐低,職員姐姐仔就係我地張枱放低幾本新娘婚紗同晚裝既書仔俾我地揀.我地好似溫書做功課咁睇,其實都係人家同brenda揀多,我同伯母都係係咁丫歇吓...始終都係後生女揀會好啲既~~

集低好幾件心水既冧巴,人家先試緍紗.人家問我意見時,我都係話"試埋其他個啲先."試完幾年之後,最後人家都係兩件最合心意既婚紗之中揀咗一件係當晚著~我本人都覺得幾啱人家同好睇~brenda俾既意見當然係功不可抺啦~

跟住人家就試埋晚裝,經過一輪評判既俾分同人家自己照鏡後既感覺,人家揀咗一套紅色同金色,再揀埋一套較plain掛(因為其他款係好幾個"囍"字锈係度,有啲搞笑同"learn")~
男仕禮服就比較少款,職員姐姐一車推出黎俾我揀,試試著著,都係黑白各一,但要補錢(有啲覺得係老屈,唔洗加錢既真係好麻麻....)

好可惜brenda同伯母揀唔啱,唯有係出邊再睇吓啦~我地成七點至離開婚紗店，臨走前人家仲揀咗兩套accessories.我地搭的士去九龍城食晚飯,去咗間brenda成日去既相熟店食泰國菜.
食飽飽就同brenda分手,而我同人家,伯母就一齊搭61x入屯門.係市中心落車買番件衫同褲,就行番去人家屋企~

ps:今日真係麻煩晒brenda
    "對不起,我的未婚妻,我給你的真的不太多~"

不敵寒流

今朝番完夜,著好最暖既裝備(天蠶衣,fleece jacket,羊毛外衣,電單車褸,頸巾,厚身出街褲,雨褲,新手套),騎羊去建生買早餐.行燈位都覺得好凍,無咩暖意.天文台話市區十一度,我諗屯門低兩度都係九度啫,騎羊上公路番屋企時直情係好似寒勁入侵咁.番到屋企,急急入屋,再攞房既電子鐘出去"騎樓"既雜物上度吓有幾凍.隔一陣睇,嘩~7.7度呀!!!!

騎羊撞風再減幾度,咁我咪好似係雪櫃入面渣車?(雪櫃係5度或以下嘛)睇黎我既裝備保暖極限只可以係十二三度....今次無凍親都已經係執番身彩~~唔通真係要買埋原裝電單車褸既夾綿內jacket至可以成個冬天都可以暖笠笠咁騎羊?? 

狼狽

今日係街度見架honda cbr150拖住住尾,好似新娘拖尾裙咁.行埋去睇,原來係個布冚被大風吹翻咗,得尾碌個鎖扣住.我始終覺得電單車係方便,但都唔可以太唔留意存放方面既問題.

我仲記得有一年我同大佬健去咗馬來西亞旅行,我既前羊burgman150泊咗公司停車場(只係落咗側架),更放低條車匙俾德輝得閒幫我run吓羊仔.點知有一日聽導遊講香港將會打九號風球,於是夜晚打漫遊俾德輝問吓羊仔情況.德輝話我隻羊係停車場被颱風吹冧咗,係暴風雨下打橫訓係地,碟鎖係度悲鳴,布冚被吹翻,雨水係seat邊滲入行李倉仔,內面既迷你地圖王濕咗一半,其他野都濕咗,一邊前包圍同腳踏台膠邊兼包圍花咗(軚的都花咗)....

本來豆姐用遮護住德輝黎抬起架羊,但太大風大雨,於是收遮,快手快腳咁救起小羊,兼且泊去另一邊有橋底cover兼有石屎柱擋一面風既位置避風,諗番都真係感動,多謝德輝同豆姐,"風雨同路"咁幫我照顧羊仔.

自此自後我就泊羊仔係果個避風位,除非有人霸咗我呢個半私家位啦.不過後黎security哥哥唔俾我咁泊,一定要我泊係鐵絲網後有線既排骨位(新劃既,舊排骨位因會俾泊咗車既私家車位box住而改咗係橋底鐵絲網外).新排骨位格數較多同闊,而且唔會俾其他私家車困住,所以我都好樂意使用.而家撞正打風日子,我都會落大架,兼且會加多條繩縳住條鈴,唔洗被大風吹翻布冚咁狼狽.

ps:仲有兩次幾狼狽既經驗,

1)p牌新羊落地,攞車後第二日係公司停車場舊排骨位"吞"車時跌車,自此以後吞車除咗係直線向前,否則一律坐住seat 位黎吞位;

2)係05年既一日,發現burgman150被人拉倒(市中心),布冚穿咗,行李倉仔側既包圍花咗,左邊側鏡變斷肢,.自此以後,久唔久換吓泊街既地方,盡可能遠離酒吧同壞份子聚集既地方,唔好揀太靜既地方.

放羊

返完早更同阿潘係自己村口間茶餐廳食下什茶,交流吓婚宴心得同問題.

跟住就番屋企抺羊打腊,中途阿潘打黎話帶mocha一齊黎我樓下,佢想拗番盞燈仔,於是無幾耐佢就人,車,狗,一齊同我屋企門口~
隔離屋地下既住客同阿潘好好傾,因為大家都係養狗.阿潘話佢都幾健談,但我答我住咗兩年都無同佢講過一句說話..

mocha怕陌生地方,係咁望住車門,阿潘唯有俾佢上番車攞番啲安全感.我就一面抺羊打腊,一面同阿潘傾吓野,阿潘仲試玩我部大牛龜nds添~~

搞到六點幾,阿潘至走人,我執埋少少手尾,沖個涼,就騎出去run吓副engine.原本係上元朗公路走轉高速,係元朗廣場折返,上番公路.心血來潮,走咗去三聖黃金個邊.一時興起,係黃金繼續行下路,經小欖去深井. 係陳記門口u turn折返,再行番下路入屯門.回程時已覺肚餓兼手指凍,新手套都cover唔到長時間高速既heat loss~

係置樂停車,落好碟鎖就跑入麥記去厠所兼洗手,再出counter買個超值套餐+蘋果批,配以熱朱古力黎保暖~好趕好趕咁食完個餐,又騎羊去接台灣女生放工~

人家話唔太涷(可能我係公路食得太多風,覺得幾凍吓>_<),想同我出市中心望吓有無平野執,於是去咗市中心行個轉,買咗少少野就騎羊送人家番屋企~


ps:今日抽到時間打理吓隻羊,幾好搵日book番個期,帶羊仔番原厰check車同換油過新年就更加好啦~

龍鳳鈪

今日番晏都早咗少少起身,約咗台灣女生十一點九係人家樓下等,一齊騎羊去市心食晏晝兼買龍鳳鈪.

呢個款其實係我係just diamond網站,搵番我地對結婚介指介紹時無意click到既.於是send俾人家睇,再搵咗日去鋪頭睇實物,人家睇過都話靚,我都覺得個款係較特別,唔會好似一般款式咁"抛拋地"外邊,通花金鈪一對.

尋晚人家都同伯母去睇過呢對鈪同去其他老牌金店睇過,人家都係喜歡呢對,而伯母就擔心呢款唔係用足金所以有啲抗拒,後來得知係足金之後都話係靚.金店姐姐仔認得人家,仲幫人家留起住先,用個盒入住黎得我地再黎睇.(其他客唔會係厨窗睇到呢款)

雖然係比傳統既貴啲,但真係靚嘛~加上老媽都未必會打多對俾人家,人家又唔會有親戚黎.金價都唔會點跌o架啦,而且姐姐仔話呢個係06年既價,可能會追上07既差價(信一半好嘞),咪當早啲買,早啲見到條實數囉.姐姐仲話如果各分店都賣晒,就要訂造,咁個價就會係最貼而家既金價,即係會比現有既定價貴.

俾完錢,騎羊送人家番屋企,自己就好趕咁騎羊番晏,婚禮事宜又完成一項,又要努力儲錢了~

俄羅斯方塊,慘敗~

番完晏騎羊去台灣女生屋企坐吓,一齊打吓機.今次我地玩俄羅斯方塊,nds版比以前多咗樣item功能.當食到"?"磚時,就會抽到道具黎對付另一方(一貫孖室兄弟既陰濕作風).

人家係咁贏,仲話"點呀,無好啲咩?你抽唔到道具?無理由o架?",同時間人家既道具同combo已令我既畫面愈積愈高...........清極都清唔切.

後來聽番人家講,原來以前玩俄羅斯方塊係玩到最快同高level,真係錯晒,同咗個"俄羅斯方塊之逹人"玩添.......

ps:孖室賽車都話有得追,俄羅斯方塊真係砌慢啲同衰啲都唔掂.....

烤芝士

今日放假,等台灣女生起身後(番完夜更),同人家出咗荃灣一間叫CAFE TROIS食瑞士烤芝士.其實係人家幾日前係雜誌見到介紹,就打電話BOOK枱,因雜誌話得一個電爐.

人家BOOK三點,但我地因唔太識路,兜到三點半至到達.門面同坐位幾舒適,姐仔都話好多人都係訂咗枱但搵唔到就無黎到.

set好個爐,放到成枱都係配料,就開始呢個瑞士烤芝士餐.根據姐仔既說法,大多數配料係即食,只係蘑菇,洋葱,蕃茄同薯仔塊需要放係爐面燒熟吓.電爐既下層有四個有柄既方兜仔,將芝士片放係兜仔,再插入下層加熱.等芝士塊熔化時,就用木鏟仔幫手,將又熱又軟既芝士淋上自己喜歡既配料上(可以薯塊或法國麵包塊墊底)薯塊係唔夠用黎食晒啲配料,所以我地要問姐仔攞啲法包片.

人家食得幾開心同滿足,可能係我太肚餓既原故,我食到有啲呆呆地,前前後後我地食咗成兩個鐘.即使好肚餓,但都要等至有得食o架.食完晒,飲埋杯咖啡,好似都係無食正餐咁飽,所以本人建議都係tea time時食好啲~

當時我覺如果有個細碟仔或兜仔黎送個配上配料同芝士既薯塊或麵包塊入口會無咁le hea,但當我地食完出門口時至見後面個枱有細碟仔.......

我同人家行去地鐵站,人家去上環上堂,我就搭巴士番入屯門.係屋企食完晚飯,騎羊出市中心既百佳買特價既CP雲吞,再送上人家既屋企,由伯母代收,跟住就騎羊入村番屋企lu~

立立雜雜的一天

今朝番完夜,攰都係騎羊時一度訓著咁滯.買完麵包,安全番到屋企門口,落咗個側架,忍唔住係坐位上合埋眼"洽"陣,抖夠至落車開門入屋.攰到係張床度等熱水沖涼時洽著咗三個字,沖完涼又再訓過.一點鐘起身,好趕咁梳洗換衫,騎羊去接台灣女生放工,去咗太興食晏.

送埋人家番上樓,我就騎羊去市中心搞支票戶口,同去申請credit咭,方便遲吓買家電時撞吓有無優惠.之後再去百佳買咗支w40油筆,用黎俾個布冚鎖頭用.經過法國緍紗時,醒起租車未搞,於是入去問吓價,同睇吓啲租禮服既plan,最後決定落訂book租衫,租車就hold住先,等埋人家既意見.(結婚事宜又安排好一樣~)

本來諗住去置樂逛吓,但太攰啦,騎羊番屋企小休吓.

係屋企食過晚飯,騎羊去卓爾居既kfc買蜜蜜燒雞翼俾人家做晚更宵夜.心諗人家一家係好趕咁出門,於是打俾人家叫佢係樓下等我用羊仔送人家番工(早就帶定"女友專用頭盔").
係公司放低人家同kfc雞翼後,騎羊番入村.坐咗陣,執埋隻card reader同燒埋隻碟就出去搭輕鐵搵andrew.

係景峰個球場傾咗好耐,一方面擔心佢會疏忽身邊既人,一方面又希望佢工作順景,早日放底擔子~兩條友傾到三點幾四點至散,一人一支大啤同一罐大啤~

不衛生是也

行過街,見有一架綿羊泊係路邊,個頭仲就咁掛係側邊....話晒都係腳踏台附近,咁樣個頭盔會好唔乾淨兼會整花,再笠番落個頭度,真係不太衞生....

有時又會見到啲前輩將個頭盔掛係側鏡上,但咁會唔會頂親個內綿o架?話晒個側鏡都係有邊同角位喎,唔係好似人頭咁圓碌碌喎~

頭盔幫鐵騎擋風擋雨,又同塊面及頭髮咁貼身,係咪應該好好咁打理吓佢呢?

SPIDI, my favourite

尋日番完個早更又係散晒,同台灣女生搭輕鐵去市中心既kfc食飯,再行去置樂買R4咭.
係"家樂"問價,竟然係三百八十幾,仲話之前個日仲賣緊四百八十幾,好缺價.去另一間較細間既鋪頭問,平$70~好可惜係last一個兼係哥仔用黎試俾客睇兼自娛(俾錢至知......算啦,鬼叫有平咩

).買埋張1GB micro sd咭就走行埋一邊,用人家部機試過無問題,就離開商場.

 
行番去新都商場附近既巴士站搭67x出九龍,我同人家都係車上面訓覺.先係太子落車,去花墟附近既嘉利貿易公司睇電單車手套,因為之前係安定買個對唔暖,俾人搵笨.之前上網睇過啲款,所以揀咗三間去睇.

其實之前我都係呢間買而家用緊既冬天手套,今次都係見番面善既肥哥仔~佢一見我同人家入黎就叫我地隨便係玻璃櫃揀黎試,仲立即栅埋度門,等我地可以靜啲咁睇.哥仔好好人,又有耐性同我地介紹同俾意見.本來都係一心買番spidi,但為免重犯心急買錯野既決定,於是趁哥仔行開咗,我地講句"唔該晒先~"跟住就走人,再去亞林,駿榮睇吓,但都係spidi最掂,於是又行番去花墟.
我地入到鋪,繼續睇番之前皮同潛水料個兩款,阿姐見有客叫番哥哥仔出黎,哥哥仔係office好趕咁走番出黎,再俾吓意見,仲介紹一對特價抵買既款(ZEPHYR H2O OUT),$288原價$360.皮個對較笨重,潛水料較slim,但同皮款一樣要成五舊幾水,哥仔話zephyr只係舊款啲,但同潛水料一樣咁上下暖,於是決定買zephyr~~~

而家我巳經有三對spidi既手套,厚(左邊紅色,新買),中(中間藍色,三年前買),薄(右邊全黑皮制,四年前師傅送).始終都係spidi物有所值,又襟用,以後都係不作他算~~

行番去兆萬,睇咗陣野,去咗登打市廣場既樓上食肆"地道"自家燒食晚飯.本來係$98一位任食(汽水任飲),但點知我地早咗幾分鐘入坐,所以要俾多少少錢.........

地方ok,職員態度好好,可以邊食火煱,邊用炭爐自己燒串燒食.由於食物一般,所以應該下次都唔會再試.我地臨走時至見到門口寫住憑公司證件可以有九折(即係變相免加一),錯晒.......

ps:今日最大收穫係買到SPIDI手套,靚仔又執到平貨(之前買個對好雞既皮手套都要成三舊水)

崇真小聚

今日約咗oscar,thomas,fire 佬同楝哥五點半係市中心巴市總站集合,主題係eric clapton演唱會.成朝無食過野,本來諗住先去置樂買雞蛋仔食,同買多張R4咭,點知趕得滯,買唔切,唯有下次啦~
今次好難得地大家都好準時到市中心,搭E33係機場落車,係意粉屋食飯,笑吓食吓又一餐.跟住我地搭機場快線去博覽會.成車都係老外,落車行去表演個HALL既就更加係俾老外包圍,好似去咗外國咁~

由於我地既票價唔夠一千,只可坐bowl位,同個台成45度角有多,要側身同拎頭,下面過千蚊張飛至可以舒舒服服咁對正個台黎睇~個場都幾滿o架.

成晚只係有一半時間係唱歌,其中只有一半時間eric佬唱歌(全場時間之四分之一),其餘一半時間係吉他show.感覺係老將帶住啲後生既出黎攞吓經驗(踢波帶新人落場試腳咁上下~).

兩粒半鐘完場,"安歌"時間全場起身,邊聽邊"un",後排南亞裔阿姐又扭腰,又摷頭,又搖膊...好忙咁

.同學們話麻麻地,主角時間唔夠多,同無咩招牌舊歌.

坐我隔離既楝哥話"唔係太多歌識添,新歌唔太熟.."

我答"都好丫,我一首都唔識....."

楝哥立即笑到見眼唔見眼,其實我只係預科時聽過佢一隻碟同single,令次都係襯吓熱鬧兼見識吓國際巨星~

不過感覺蠻好的~

一行人搭x33番入屯門,一個鐘唔夠就到,快~期望搬出黎之後,多啲同崇真兄弟聚吓.

怒

今日返完早更,騎羊去台灣女生樓下接人家去市中心既秋田食飯.食完飯,行去置樂行個轉,買咗個黑色人造皮ndsl機套($35),好低~跟住送人家去華都上巴士出去上堂.

夜晚同老豆老媽係藍地間酒樓食飯,其間老媽話過埋年打電話同啲親友請飲.見之前老媽話要請番倉做清潔既老細同事去飲,要預一枱,又話之前請過佢飲既親友都要請番人,於是我講咗句最多擺廿枱(老媽問我在先),無謂既就唔好請啦.(我同人家共需11枱多啲,保守評估剩7-8枱)

點知老媽一句話"咩係無謂?"之後唔停咁講話我計住啲錢,大不了佢自己出錢.我答唔單至係錢既問題,人愈多,照相時間愈少同愈趕,場面亦愈難控制.加上有牙齒印,"洽"過老媽既"親友",又真係無必要請.

老豆加口話請飲無話咩牙齒印,都係做場戲,咁我咪話老媽想請邊個咪邊個囉(已經有啲火,因我都係見老媽個勢似會得幾多,同一心係間接提醒吓).

老媽又答我向親友問唔出係唔係真係會黎同幾多人黎,又話我好性...........(下略)老豆借詞叫我踩佢部單車返屋企先黎拉開我同老媽,但老媽見我起身時就話我廻避黎無意思.

盛怒既我坐番低,掉番條單車匙俾老豆,話唔係我唔走,係老媽話我廻避,再同老媽講"唔廻避,而家坐低,講呀".

講講吓老媽話我自老豆單野後,我睇唔起佢,唔老like佢.一輪爭論後,老媽以淚彈迎戰,本人見再講都無意思,於是再應老豆既借詞,幫老豆推單車入村先.

無錯,我的確唔認同佢既做事方法同為人(尤其係經過老豆單野之後),但今次事件真係客觀對事為先.

1) 酒店擺酒,要報實枱數,當晚枱數不能臨時加,只可減,差價以食物酒水黎補償.如果老媽係咩都定唔到幾多人會黎咁又點搞呢?人太多無位坐,到時至叫人地走或話"都係唔請你黎飲"?

2)之前酒席日子,地方,家長會面,已經係咄咄逼人,最後都係我作出讓步同更改黎配合,會面更係生吞till剔及無理既態度,今次請人既項目都係要堅持己見,繼續為難?

3)發生咁多事,大家既關係真係麻麻,之前老媽仲話日子唔啱的話就唔會同兼唔會同親友講娶媳婦,唔通咩都要佢發板,我非要做一個愚孝既仔不可?

另一樣令我不快既事,係之前俾佢砌生豬肉既老豆,竟然幫老媽講說話.我唔係嬲老豆,佢都只係唔想咁嘈,搞埋餐飲,分開住就算.我只係覺,老媽屈到老豆點唔好點衰,老豆無報復之餘,仲以和為貴咁對老媽,實在太難為老豆,老媽亦顯得更不仁....

擺酒結婚,我一直堅持唔用屋企錢,就係唔想俾老媽之後數"你咁巴閉,擺酒咪又係靠我"我唔想我太太聽到呢啲說話,我更唔想呢啲說話令我同老媽既關係雪上加霜.而家自己出錢,都要面對咁多阻撓同說話.....唯有繼續頂落去..

ps:騎羊上人家屋企坐同傾吓,人家話未見過我咁嬲,打住nds既"押忍",心情至可以平復啲(分散吓注意力卦?!)

遺傳?

放工騎羊番屋企放低啲野,再去去台灣女生屋企.老豆問我有無買薯片,我話無,仲問佢係咪好想食,跟住佢答唔係問吓啫.

老豆返入房後,我至醒起前一兩日佢同我講唔知係屈臣氏定萬寧,品客有做特價.於是照計劃騎羊去人家屋企,係上樓前買雲吞俾人家時,順道買咗啲脆口零食.

以前細個,老豆久唔久會買啲零食返黎,而家年紀大咗,又無咩多餘錢,無去超市掃貨lu..

人家都話我好鐘意食"o習o習"聲既零食,睇黎似係童年情義結兼有少少老豆遺傳~~

Deja Vu & 清湯坑腩煲

食過下午茶,係村口搭小巴去新墟"巴倫紐荷"買飛睇Deja Vu.由於未夠鐘(四點未夠,但睇五點十個字),於是上台灣女生屋企先,途經街市既書報攤時買埋今期既game next~

係人家屋企打孖宝賽車打到五點四,先至急急腳咁行去戲院(連去置樂睇ndsl機套都無時間...).

齣戲麻麻地,因時光倒流黎更改命運兼救人巳係舊橋,加上文戲較多,最後至多啲動作場面.

睇完戲,我地搭輕鐵去和生食晚飯,叫咗泰式辣鳳爪,燒豬頸肉,吉列炸蝦球,同久違了既清湯坑腩煲.前兩味人家食過番尋味,炸蝦麻麻地,坑腩煲仍舊係咁正~唔係好食得牛既人家試過都話好香~~

食飽飽,搭番輕鐵上人家屋企,坐多陣,打多陣機,聯誼吓,咁又一個假期了~

訓醒覺,四圍騰

番完夜,係房訓到十二點九就醒咗,於是動手洗衫.約兩點多啲,騎羊去接台灣女生放工.等人期間,又忍唔住要同愛羊影吓相,之前隻羊唔太多相,有啲後悔,加上隻羊又抺好無耐,上鏡啲嘛~二黎當打發吓時間嘛~

同人家去市中心小巴黎食晏,新地鋪好似仲迫過之前二樓個時,我例牌叫烤牛肉凍檬,人家要札肉蝦湯檬,多叫一客小食,但唔太好食......

食完野,行咗上去老麥隔離間電子遊戲店睇吓NDSL既機套,但店員行開咗,著住燈但拉閘,於是我地行個轉再去,但都係未有人番....

騎羊送人家返屋企,自己再同羊仔兜去置樂睇吓機套,見有兩款都ok,分別係$35同$40,搵日同人家一齊黎揀先~

夜晚係屋企食飯,食完飯再騎羊去人家樓下接番工(夜班).由於人家好多時都好遲出門,次次都係好趕,於是騎羊黎幫手.人家知道我係樓下好開心,因為唔怕等輕鐵而遲到.

兩個字時間就送到人家到更衣室門外,自己再同羊仔行轉黃金,係商場既迴旋處折返歸家.

係房訓咗陣,再搭輕鐵去景峰搵andrew飲吓傾吓.人大咗,多咗好多煩惱,希望andrew可以早日達到目標~

ps:開seat位行李倉攞出背囊時(因要攞頭盔俾人家),突然叮一聲,一望地下,原來係之前配俾雞脾但又失踪咗既locker匙!唔通一真攝係側邊既開口袋??

押忍

今日番完晏,騎羊上台灣女生屋企坐吓,當然唔少得打陣機啦.呢隻打氣game,好似太鼓逹人咁,要捉timing,但要用筆按touch screen上不同既位置.

內容係要幫唔同既人打氣,黎等佢地可以渡過難關.第一個故仔係一個中學生係房溫習,但俾客廳既屋企人既笑聲同耍樂聲嘈住.人家話好似我平時A/N咁,俾人嘈住無得訓~諗諗吓,又係喎

每關既故事都係搞搞笑笑,好有以前細個打紅白機時既感覺~人家一路睇住我打,一路笑啲故事卡通~

ps:手腳不協調同音樂天份奇差既我只有玩住easy mode先,但都好吃力.......

羊口統計

今日放工同阿潘,阿飛一齊去建生食晏,傾咗陣就坐番阿潘車係公司停車場攞羊.一入屋就開檔抹羊打腊,上次幫愛羊打理都己經係廿日前既事,無法啦,之前病咗一輪同天氣太凍呀嘛~為咗有效率咁管理愛羊,我跟隨cappuccino既做法,開本簿仔黎記錄入油既價錢同日子,抹羊既日子,以及維修換油既日子同價錢~(我之前隻burgman150都有o架)

希望今年可以真係做到10日左右就抺羊打腊啦,同埋愛羊健健康康,黎緊回暖時同台灣女生去多啲地方~

時令煲仔飯

今日番晏,係canteen食零七年第一個煲仔飯.前排canteen厨房裝修,搞到晚晚無啖好食,黎黎去去都係牛豬雞扒意粉同飯....所以呢個久休復出既煲仔飯係顯得特別突出~~

記得year3 時係兒科有個小學學生妹問我一個IQ題"食邊種飯係最殘忍?"我當時唔識答.原來答案係"煲仔飯",因為要煲個仔黎整

跟住佢又問多個問題"你有無睇過齣叫<鹹濕頭拎拎>?"我當時答無喎.跟住佢就話"你咪係鹹濕頭拎拎囉~~"原來我答佢時不自覺地搖咗頭......(又俾個豆丁玩多次添....)

ps:呢味叫瑤柱滑雞煲仔飯,屬性為即制類.

週月驚喜兼食霸王餐

今日番完個早更,好鬼攰..放工騎羊去置樂食單身漢餐,再上相熟商場買咗部白色NDSL黎送俾台灣女生,配埋"特別裝備",等人家可以有多game玩.鋪頭姐仔話送機套,屏幕貼各一個,但個套真係好核突....我同姐仔講可唔可以唔要個機套扣番$30(因為姐仔話價值$30),但姐仔話唔可以咁....於是將個屏幕貼轉做原廠個款(都好丫,仲好過機套篤眼篤鼻)

買完野,騎羊返入村,立即入房去叉電,再send短訊俾阿嫲子問吓相熟網站.人家黎到屋企,係房見到部ndsl就好開心,仲話可以玩双打孖宝賽車~

係屋企坐多陣,set埋部機,約六點幾搭小巴出市中心食飯.今晚係意粉屋食霸王餐,唔駛錢就可以走點解?因為之前用大新咭簽脹既底單換咗兩張價值150既套餐coupon(咁又慳咗三舊水)

由於係coupon既套餐,所以選擇唔太多,只係得四款.我地叫咗菠蘿煙雞肉炒飯同白汁蜆肉天使粉,跟龍蝦湯同iced cappuccino.人家一路等食,一路打新機(見下圖)~

食飽問侍仔洗唔洗俾加一,哥仔話"大新coupon餐?唔洗o架啦.ok o架啦"跟住我地行咗陣,係吉之島運動部買咗pack長波襪(朝早騎羊無咁凍嘛~)再係百佳買咗啲早餐同特優裝牙刷連牙膏.

週月飯局有大新請食飯,人家又喜歡份禮物,可惜上面個mon有一個光點,試機時睇唔到添....

ps:是次購物卒之都唔係錯晒(之前既DOA extreme2,電單車皮手套都係嘥錢...)

特別鳴謝阿麻子既技術支援

寒風強,騎愛羊;有福氣,一肚氣

今朝番早更,得十度左右,於是著上駕駛生涯最暖既裝備:天蠶衣,fleecejacket,出街抓毛衫,頸巾,電單車褸;下半身就係厚身出街褲外加條雨褲擋風~

效果都唔錯,起碼唔會好似以前咁,著得厚又唔方便,但又唔係太暖,打住冷震咁黎行車....舊年凍到十度時,係會唔渣羊仔番工放工,等寒流減退至騎番羊仔.而家只係欠一對更暖既手套,上次個對皮手套真係見到都火滾.

夜晚約咗ben弟同佢女友sam一齊去何福堂附近既"有福氣"打邊爐.因為之前同人台灣生經過時見好多人排隊,我番夜買宵夜時都係見到有人係門外等位,所以人家話搵日黎試吓.

八點去到時己經有好多人等緊位,我地等咗半個鐘多啲至坐底.呢度係平日$78,週末$88,九點後平$10.排住隊至知原係食麻辣火煱,不過一場黎到咪試吓囉.

我地叫咗個鴛鴦湯底,嘩,你睇幾咁變態!呢個己經係小辣.我見咁恐怖,於是用個"喱"撈起晒啲辣湯配料,但都好辣,食到我一額汗.....加上店內幾熱吓,啲職員都係著短袖衫,我著住件fleece打底,食到標晒汗......

話就話任食,其實都唔太多選擇,豆腐又無,蝦又無.....啲料又唔新鮮,好多野都係要另外俾錢叫,啤酒又苶選擇,又唔抵飲埋單每人都要百二蚊,唔抵!早知係咁去大戶人家食無咁嬲,真係搵著ben弟同sam黎搞都唔係好明點解咁人黎排隊幫親,仲見到有人走個陣時攞埋卡片走添,好似要介紹俾人或者係會再黎食咁.

我地行去盈記食糖水坐多陣就散,我同人家行番上樓.

ps:餐晚飯真係食到一肚氣,都唔知食咗啲咩,錯晒....

無咩斬獲既嘉年華

今日騎羊去台灣女生樓下,接人家去建生既椰林閣食晏,之後係附近既五金鋪買咗把鎖.呢個銀色鎖頭幾西化吓,諗住搵日拎出去刻埋命落去,等六月去關島時,可以係情人崖塔實把鎖,再將鎖匙扔落海(意思係永遠都開唔番把鎖,永不分離).其實係人家係雜誌睇到呢個當地景點同做法,我只係去買個鎖啫~~

夜晚我同人家出咗去金鐘添馬艦附近既AIA環球嘉年華,$150入場費包四十個攤位遊戲金幣,全場機動遊戲任玩~之前係SUZUKI食餐飯真係麻麻地,相信下次都唔會再有交易
入場劵係一隻紅色既紙手扼,我同人家唔係好玩得太刺激既機動遊戲,所以只係玩咗摩天輪,大韆鞦,碰碰車(好耐無玩過,感覺唔錯,仲同人家兩架車對頭邊貼邊咁係度打轉,好似MI2咁).其他時間都係去玩攤位遊戲,我地只係贏到兩支花公仔,但其他人好多都拎住一袋二袋細公仔或一隻大公仔......

玩到九點唔夠就走人,走去AMC睇"緣份精華遊"(咁啱等番LAST兩個位,同一個單丁位)

人家幾鍾意齣戲,我就嫌兩位女角(琪溫絲莉,金美倫戴雅絲)有啲老態啫...
ps: 情人崖http://hk.travel.yahoo.com/051204/62/1j997.html

根據傳說，女方為查莫洛人中之貴族，為門當戶對的考量，將愛女許配給一位西班牙軍官。殊不知女兒已有同族的心上人，小兩口各決定私奔，無奈女方家人苦苦追趕，將兩人逼至今天的情人崖，兩人於是從高崖跳下殉情，結束這段不被祝福的愛情。

escort

今日騎羊出大角咀間安定,因為師兄今日出車大日子~由於改路既關係, 兜咗幾個圈至去到間鋪頭..三點半唔夠到逹,師兄又未到,於是睇吓啲手套,因為我想買對保暖啲.係店員既介紹吓,買咗對三舊幾水既皮手套(出血x1).

等到師兄到達,食過下午茶(師兄請,萬歲~)俾埋尾數,裝埋個尾箱,check埋車身號碼同其他細節,約近五點就出發~

師兄呢架係02年既BURGMAN400,個款係最早期.我帶路去附近油站入油,跟住再帶頭上公路.上到公路就幫師兄守尾門,頂位後面啲車,唔好俾人推,轉線時又早啲CUT定黎幫師兄護航,我地有行埋汀九橋黎試車.全程好安全咁就番到入黎屯門啦.(師兄都渣都幾好丫)

兜去紅橋買多個頭盔,再同師兄兜番去公司,德輝食完飯落黎睇吓師兄隻羊同兜咗個圈.我都試騎過400cc既動力好似係推住你黎行咁,好有力~原來我都渣到400cc丫~

番入村放低隻羊,夜晚出去同andrew係大戶人家打邊爐,聚吓傾吓.

對新手套都好似無我舊個對咁暖......俾人搵笨.........又話夠暖........唔夠專業...........亂咁up.....

早知就唔咁心急買啦,再唔係就買對貴啲日本個款,呢對既評價係"雞"!!!!近排成日都俾呢個字困擾住.

今日可以陪師兄出車,感覺幾好,因為好似真係可以幫到朋友咁,平時師兄幾關照我o架嘛~

謹祝 師兄路路亨通~

和生

今返夜,唔去買蛇羮,唔去買楊枝金露,去咗好耐都無幫襯既"和生"買泰式辣鳯爪同燒豬頸肉做宵夜.

尋晚買過呢兩款外賣俾台灣女生食,人家都話好食~以前住quarter時,好多時都同班兄弟落黎食晚飯,飲吓啤酒.

畢咗業,好多時都黎呢度買卤水鵝做夜班宵夜,但由於女同事唔太有興趣,所以都轉買壽司,魚生,之後都無咩點再黎呢度. 

人手都無咩點變,都係個幾個相熟哥哥仔同阿叔,唔覺唔覺又幾年啦.公司足球部既同事就都耐唔耐黎食飯,貪佢夠就腳卦,沖完涼行過對面馬路就有得坐又幾方便既.

都想搵日約番班兄弟黎聚吓,懷舊之夜嘛~

同行

好耐無試過訓兩個鐘就番工,但為咗兄弟,一切都係值得既.

佢實在承受太多了,好可能係之前既能力評估同處埋手法不當而搞到百上加斤,但願艱難既日子快啲過去.


不過有時真係要多啲問吓周遭朋友兄弟既睇法,大家一齊係有限既選擇中,搵個最可行既方法.一個人諗,好易轉牛角尖.