好多人睇既港產片

今晚同台灣女生去咗凱都戲院睇"葉問",唔知係星期日既關係定係齣戲太有吸引力,除咗頭幾行外,座無虛席.

今次甄子丹既角色係一代宗師葉問,無咁之前"龍虎門"同"導火線"裡自戀狂既感覺.動作導演係由洪金寶擔當,加上由葉氏後人作顧問,動作部份無前作咁浮誇.

成齣戲既感覺有啲似精武門,喚起中國人既愛國心.動作方面好正,無咩冷場.雖然明知係做戲,動作同故事同事實有出入,但又真係睇得好投入同興奮.美中不中係座我同人家後面既一對中年男女,久唔久高談濶論,當正係屋企睇電視咁........

散場時各人都情緒高漲兼交頭接耳,係後樓梯出口聽到一個小妹妹問佢父母"青泉(任達華)係咪主角黎呀?"

我的縮影??

尋日買既Hoegaarden禮合裝送咗個迷你杯爉燭,襯落之前係OK換既鬆馳熊,好似平時我坐係梳化度飲啤酒,食薯片兼睇電視咁~~

邊有人會約係呢度等人0架?

人山人海,公眾假兼大特賣既百貨公司之服裝部,有無諗過有人會約係呢度等人集合呢?

話說尋晚外母上我地屋企食飯留低咗部手提,今台灣女生就約外母大人三點鐘係吉之島既服裝部等.

當我放工騎羊去到市中心,得知呢個消息時就覺得好好笑.咁多人行黎行去,服裝部又唔係一眼就望得晒,加上以外母大人既身高,身影會被貨架完全擋住,點搵呢?

人家聽過之後,先知自己蠢咗,結果人家同我要輪流擠入人群,係服裝部行個轉,見吓外母係唔係度.最後無手提電話睇時間既外母大人,遲咗近廿分鐘到達~

師父愛師母,師母愛師父

見到咁靚既花車,就知道係搞喜事啦~今日就係Baggio同Sharon既好日子,我同楝哥就有份參加兄弟團~

雖然要一早起身,但能夠同好友分享佢人生中重要既時刻,實在十分難得.新郎哥好錫住我地班兄弟,所有遊戲都係佢一力及承擔(一索得南,問答matching,愛的宣言).

中一就識baggio,之後轉校兼搬出馬鞍山,好難得大家都keep住聯絡交往,無論係讀書,定係成長過程,baggio都係好關照我,故有師父之稱.

記得中學時期有一次baggio入屯門搵我,約咗係大會堂等,點知等咗好耐都唔見人.當時手提電話唔普及,無得confirm係咪唔記得約會,但我都堅信baggio一定唔會爽約.一個鐘後,師父卒之出現,原來係大塞車,可見大家自小都係以"信"建邦.

 唔好見新郎哥咁好笑容,其實眼淺既佢,曾經係斟茶時段,感動到喊,要入洗手間洗面.為咗令新郎哥快啲調節好心情,我開玩笑咁講"你今日係吳彥袓黎o架嘛,就算個人好攰,個樣真係唔可以攰,記唔記得個廣告?"L'OREAL MEN EXPERT

雖然有啲突發事情,但係一對新人,親友以及一眾兄弟姊妹既努力下,一切都迎刃而解,順利過度.好高興能夠為一對新人做一點事,出一分力~

PS:初中同學之一兼班花既vinky都有出席,LKKC 1C班重現眼前(Baggio都係我地同班)~

sphagetti house芝士火煱+ASKA live

今晚同台灣女生去文化中心大劇院聽ASKA演唱會,之前我地係旺角既意粉屋食芝士火煱.一個SET都只係$288,兩個人share,加多少少嘢,都夠食飽飽~

演唱會無想像中咁多舊歌,新歌又以慢板為主.雖然ASKA把聲唱咩都咁好聽,但欠缺舊歌,少一份共鳴.另外CHANE & ASKA盛極一時既作品都係快歌,所以同是次演唱會係截然不同.

最後以SAY YES作完結,但唔會點解管弦樂團既演奏好似無之前既歌咁豐厚,但能夠一睹真身,以及聽到aska現場"神級"既演唱,都已經完了自己既小小心願.希望他日佢同CHAGE會一齊黎香港唱番啲經典作品,令我可以情緒高漲,兼重拾青春既回憶~~

RILAKKUMA換購行動

今日番晏係CANTEEN食飯時,大豆攤開報紙話"好得意呀,個公仔".我一望,原來係台灣女生鍾意既"輕鬆熊",$38隻又真係幾抵,之前買既背囊扣都要成三十幾蚊啦~

放工即刻騎羊同人家去建生既OK換購,好在仲有得換(雖然我諗住plan B順序:大興,新墟,置樂,黃金海岸).見有唔少人換緊,於是我派人家去COUNTER叫阿姐留住兩隻熊仔先,阿姐仲話得番最後一箱貨,而我就係度揀特價零食,湊夠四十蚊消費.

最後開開心心咁載住RILAKKUMA同KORELAKKUMA番屋企~~

Ronnie出嫁

今日係ronnie既出嫁日, 為咗影相好睇啲,我特意係中午時間剪頭髮,再番屋企裝身.西裝骨骨咁趕去搭西鐵駁地鐵去尖沙咀伊甸園觀禮

 觀完禮,一眾同事各自組隊行街,而我就去pier side邊欴black russian邊等台灣女生.Emma咁啱又係度,大家一齊有傾有講,當然唔少得既係小食助興啦(以前係李白吧我同教練都經常開餐).係酒吧邊飲邊食,邊傾計係我最喜歡既室內活動~

七點多啲,我地就起程去北京道一號既帝廷酒家,時間啱啱好,可以同一對新人影相~由於第二日要A/N,所以同人家食埋甜品就走先,以免無位上巴士.唔能夠等埋RONNIE送客,再一次祝福佢,唯有係呢度補番數啦,"恭喜晒~~"

PS:十二點多啲番到屋企,發覺密碼轉咗,入唔到門,要打俾樓上問個究竟.如果再夜啲番而又無人接聽電話,都唔知點算........

閉關潛修

今日台灣女生足不出戶,因為人家要為明日既短期課程既考試作準備.八點幾人家就起身食早餐溫書,係sofa邊食早餐邊睇火影忍者(尋晚錄底)既我真係有啲愣然.

晏晝人家煮番尋晚打邊爐既剩餘物資兼加兩個公仔麵,夜晚叫外賣kfc,睇黎溫書既意志好堅決.雖然中途有睇世界文化遺產(都係之前錄落)同小睡,但都叫有心丫.

究竟臨急抱佛腳既人家,可唔可以pass呢?聽講唔合格要重考架喎~

ps:我今日係家中洗碗,洗衫,晾衫,摺衫,執衣櫃

LIVE ON MARS

 之前逄星期日都會錄國際台既"LIVE ON MARS"廻轉幹探,但上星期己經係大結局,我今日至捨得將佢係HARD DISK删除.

除咗70年代既英國背景以及懷舊服飾吸引外,純英式口音既對白(尤其係主角SAM TYLER既阿頭-GENE HUNT),暴力粗獷既查案手法,以及主角回到過去既迷團,都係令我集集追既原因.

起初以為LIVE ON MARS係因為主角因交通意外,神智回到70年代,覺得社會環境同規範截然不同,而覺得生處另一個星球.去到結局至知道,MARS既由來,主角以卧底身份去進行警風整頓行動,收集證據.
現代既生活記憶,只係主角童年因交通意痛失雙親係病房三星期發呆,以及前往做卧底時被車撞倒短暫昏迷既夢景.
PS:http://www.bbc.co.uk/lifeonmars/

脾脾結婚了

今日係Gabriel既大喜日子,再一次見證一段愛情長跑既成玏,好"鄧"呢位好兄弟開心,一直都覺得佢同阿嫂好襯~~

以往拍拖都係一年多就散了,可能係思想唔得成熟,唔夠包容,又或者係無考慮清楚就開始一段感情(浪漫主義嘛,愛總是來得突然),所以特別為愛情長跑感動.

祝Erica同Gabriel永遠快樂~

MACROSS FRONTIER

 今日卒之都睇晒一套25集既macross frontier,好耐都無試過咁迷去追一套動話,比之前睇既gundam 00更出色~~今之既故事同元祖macross,macross plus, macross 7 有時間性既連繫,如果有睇晒前作的話一定會更加投入,就算無睇晒,元祖作品係基本功~

超時空要塞裡面,歌曲係重要既一環,元祖作品既歌曲,愛・おぼえていますか ,私の彼はパイロット ,令好多fans令下深刻印象.今集除咗動聽既新歌外,呢兩首經典金曲都會被新一代歌姬重新演釋.

主角架戰機VF-25真係幾型,十二月尾至公開發售超合金DX版,雖然呢個模型(要自己砌)未上色,但已經好吸引了~

ps: http://www.macrossf.com/

擺酒一週年

上年既今日就係我同台灣女生既擺酒日子,朝早起身,食過早餐後,就搭小巴去新墟既花店攞訂好既花球,正正係舊年接新娘用既款式.

十點唔夠就到,老闆娘仲用絲帶紮緊個花球,我仲順便買埋個啱插既玻璃花樽添.搭番的士番屋企,都只係十點二三左右.訓緊既人家俾我打著既房燈同叫聲整醒,一擘大眼就見到呢個花球,好開心同驚喜~~

 晏晝係屋企享用民用版芝士火煱,原身個set得一個candle,我地見唔係太夠火力,於是用多四個蠟燭(之前係泰國買),實行五爐頭芝士火煱.貪方便係taste買既現成芝士火煱包(tiger版-瑞士制),白酒味好重,但芝士味好似唔太夠,鹹口咗少少.

夜晚同人家番去外母屋企,一齊出去熊貓酒店食自助餐,食品質素同選擇都下降(晚市竟然無生蠔),但外母又食得好開心.食飽飽,係荃豐行咗陣同買咗MACROS F同彈劾凰既DVD,番到屋企人家話要同個花球影相黎留念.

基於無咩生活照,於是隨意影咗呢張相,人家話我應該拎住支啤酒會襯啲~~多謝上年參加我地婚宴既朋友同嘉賓,你地既參與俾我地好多美好既回憶,讓我地感受到大家對我地既愛護~

ASKA SYMPHONIC CONCERT 08 HK -我的青春回憶

今日係canteen食完早餐睇報紙時,見到aska symphonic concert 2008 hk既廣告,好suprise!中學時chage & aska已經好紅,係香港好多歌手都有翻唱佢地既改編歌.

當時亞視播"101次求婚",主題"say yes"好hit,本人亦都好鍾意,成套"101次求婚"追晒黎睇~~

放工同台灣女生騎羊入村同老豆食過下午茶,番屋企抖陣就搭小巴出市中心大會堂買飛.好在都仲有位剩,於是買咗中價飛兩張,今次都係第一次同人家睇唱歌表現,希望唔會悶親人家(始終佢無經歷過果個年代,兼且係陪我睇嘛).

"佢(aska)會唔會唔唱果首歌(say yes)0架?"

"唔會0架?"

"買定蕉入場,如果佢唔唱,我就扔蕉,嗌"回水,速磅!""

呢個時候,幫我地出緊飛既票房阿姐係度笑我既孩子氣說話.........

ps:http://hk.youtube.com/watch?v=3jMmh0doz6w&feature=related

    http://tw.youtube.com/watch?v=MFTqBjB-Oqg&feature=related

家中海鮮打邊爐

 今晚約咗外母作客家訪兼享用海鮮宴打邊爐,一枱都係火煱料.

由於無人啱肥牛,所以兜美國肥牛係我一個人獨享.特價既美國桶蠔,用黎打邊爐,味道都唔錯,不過可能太大隻要烚耐啲,所以邊位會較易韌.越南鮑魚片(四十蚊),又無諗過幾好食同爽口.

重頭戲就係日本既松葉蟹($150有找),完全令我同台灣女生重拾係日本蜜月旅行既感覺,啖啖肉既蟹棒,真係好"先"(鮮)丫~~

其實今晚人家係準備配料時,發生咗少少意外.當人家切筍時,我話"啲筍好毒架喎",點知轉頭人家就"扇"手兼打直劏到手,攪到外母要頂替入厨.唔好睇佢好似無咩嘢咁,止血同包紮時,又叫又咪埋眼..........

期待之作

卒之都見到上咗色既英格倫啦,起初以為今年年尾有得買,原來要出年三月,繼續等.......

考試見世面

今日同華b一齊出去CMC上堂考牌,以為09:00至開始,於是係茶餐廳食早餐,到埗時去埋厠所,入到課室至知原來係08:30開始,即係遲咗20分鐘.......

一心諗住可以同組,點知分到課室都唔同,結果同一素未謀面既女仕一齊練習2人模式同考試.

睇碟video,練習,考試,睇碟video,練習,考試,番課室考paper.考第一個試時,有個幾嚴既考官入黎做我個組既主考.

"太快了,你既速度快過100下,有120下,如果你咁快既話,我就睇吓你完唔完成到5 個cycle"

尋日至實戰過,一個人做5個cycle係無問題的,但其於係考牌,唯有"忍".......(減速咪減速囉)

"啱啦,總之記住bee gees首歌stayin alive<註1>(ha ha ha ha ,stayin alive stayin alive),果幾個ha既beat,你黎就係學呢招,所以要俾$400"考官傲氣地說.事後課室內既同學都話"你地個examiner好鬼嚴喎"

我覺得大家都係成年人,如果我做得唔夠好,唔需要用教小朋友既方法黎模式黎教書同俾意見.有時俾啲空間對方,用客觀或禮貌既方式黎表達不可以嗎?(唔通我似恐佈份子,暴力主義者?)大家都只係想達到目的,點解一定要加啲說話或同令人難受既語調對話.

唔通香港人既習慣係咁,你有求於我,你受制於我,你就要受我氣.諗諗吓都係,番工時老細都係咁對啲打工仔(老生常談:出黎打工係要受氣),顧客對服務生亦一樣(老生常談:顧客永遠是對的),話你咪話你囉,唔太顧及你既感受.問題出現咗,唔係應該諗解決方法,或改善方法嗎?大家都係想要個目的啫,言語衝突,只係係雙方既障礙.

一點半至走人,結果係pass晒,感覺唔太好,因為整體覺得好似好亂咁.遲到既我向導師攞filter同mask時,導師只係叫我用唔應該拆開黎用既mask同filter,要到好後期至俾番個我(仲要俾個位嚴考官話我好唔出聲).課室環境麻麻,時間控制又唔太一致,不過導師既態度幾nice.

註1: http://hk.youtube.com/watch?v=OCAjmuA1HDk&feature=related 根據我反覆既計時,"hahahaha"四個音共用了約2秒,60除2再乘4,等如120!

ps:放學就同小歌仔,華b去咗新星飲茶,傾吓食吓咁.之後自己搭地鐵去百老滙電影中心換飛,行番旺角時就打消行波鞋鋪(睇跑鞋同小型足球),以及去尖沙咀買嘢既念頭,太攰了...........

神探阿蒙

每逄星期三都會錄明珠台既神探阿蒙,好多時都係第二日至睇番.之前完咗一個season,心情都有啲失落.喜歡阿蒙既頭腦同觀察力,潔癖同312種恐懼亦十分搞笑.

由細到大都鍾意睇偵探片,記得中學時睇福爾犘斯故事,令我由課程既英文閱讀本,轉去圖書館搵中文翻譯小說,後黎轉睇赤川次郎既小說本.漫畫方面,金田一少年事件簿當然係睇晒啦,楝哥介紹既感應少年亦好好睇,後黎既偵探學園Q就較為遜色,可能係集多人既力量,感覺較為鬆散.

台灣女生話如果我好似阿蒙咁整齊同乾淨就好,其實我都係一個幾企理既男仕丫~~

秋季打邊爐

今晚約台灣女生係沙田上完堂,番入屯門一齊食晚飯,由於成十點二番到市中心,所以去稻香打邊爐.本身一個湯底都要$48,但阿姐話一斤中蝦連湯底$100,我地當然欣然接受啦(賣剩貨都好丫).

唔知係咪經濟唔好影響市度,今晚無好似平時十點都仲有人等入座,而且餐牌上既火煱配料無之前咁多選擇.不過我地都係叫到一枱都係嘢食.睇番隔離枱,人地兩個人都無我地叫咁多嘢食.

今次可能人少兼夜,阿姐無收起豉油既配料,我見有沙嗲醬,於是用個碗仔留起佢,久唔久就"畢"番啲沙嗲醬落個湯底,確保唔會因為加水而溝淡啲味.

夜更愛心飯盒

今晚番夜更前,係屋企訓醒就叮番熱台灣女生為我準備既飯盒,有菜有肉有海鮮~

以前既我通常只會食叮叮珍珠雞,杯麵,薯片,雜糧.....而家有正餐食,當然好好多啦,起碼唔係一個人既感覺嘛.

多謝人家既辛苦準備,希望啲更期可以夾啲,能夠多啲一齊買餸煮飯~

關係

唔知係睇得<<神探加利略>>多定係近來既生活體會,物理唔合格既我突然諗想呢條formula,覺得人與人之間既關係(牽引力)跟雙方係對方心中既份量(m1 m2),大家既距離(r)

有時即使成日見面,生活距離近,但大家係彼此既心裡只係佔很少既份量,大家既牽引力只會係很弱.

好朋友與見面之交既分別,應該都係雙方既亙相著緊及重視程度既差異而已,呢份差異足以彌補距離既不足.

至於點樣去影響對方增加或減少自己既份量,除咗緣份,那就要睇自身既性格以及付出了.

鼎泰豐

今晚台灣女生拉我去尖沙咀間鼎泰豐食飯,由於怕人多,所以六點半左右就去到攞位.其實番完早更,騎羊去買老麥外賣番屋企同人家食個陣都只係三點多啲,所以唔太肚餓.唔知係咪因為食欲既問題,覺得醉雞肉質唔太滑,不過味道ok. 

睇起上黎好似好少既台式紅燒牛肉麵,原來幾多牛肉沉底,味道唔錯,其實我都好耐無食台式牛肉麵.

 人家好鐘意食既炸肉排,最終食唔晒要打包拎走.

主打既蟹粉小籠包,味道一般,同上年係夜上海食既簡直係兩回事.最後無上鏡既係蒸餃,都係一般,唔係好明點解咁多人排隊等位(七點左右門外人山人海).

食完嘢,行咗陣sogo就去搭車番屋企,A完出黎咁行都幾攰...............

無味燒烤之炭世界

今日同台灣女生騎羊去藍地既炭世界燒嘢食,見佢新開張兼近近地嘛.$78一位,另加$20開爐費,包一支750ml水同罐裝飲品一罐.

好可惜食品選擇唔多,竟然連牛扒都無晒.....好多肉類都無咩味,只係得咖哩魷魚係有番啲味道.我同人家下次都唔會再幫襯,雖然好肚餓,但無奈要燒啲無味既嘢食,真係好想快啲"質"飽個肚就走人.

呢次都可以話係最近最唔掂既燒烤經驗..........唔太明點解其他入場既人仕好似無咩投訴同不快咁,可能大家只係志在搵個地方一班人食煙兼隊酒罷.

http://www.yl.hk/tskbbq/

日式韓陽苑-盛八

今日台灣女生帶我出去旺角食日式烤肉店,雖然上錯樓,但最終都係隔離個座大厦搵到(上次人家跟大學書友黎食過).人家諗食mug諗到頭都大,因為好多嘢都想食,但又要點得精打細算.....

結果我地叫咗鮑魚仔,帶子,香草汁脾肉,山葵味(wasabi)一口牛,厚切牛胸腹肉,同埋無上鏡既生蠔同和牛橫間肌(超美味)~~
起初店內唔係好多人坐,但到七點過後就開始人多起黎.雖然係日式餐廳,播放既音樂係hip pop......唔識欣賞之餘,又覺得有點格格不入,可能日本年青一代好狂熱hip pop吧!?埋單六百幾,七八成飽,後來去買冬甩食就啱啱好~~其實好多樣嘢都想叫,例如和牛,黑牛,黑豚肉,長腳蟹,海鮮拼盤等,只係價錢有一點點貴丫.........
ps:行咗陣兆萬,都無咩新玩具係特別吸引...

台灣女生牛一

今日係台灣女生牛一,雖然無準備生日禮物,但都有出街食飯.我帶人家去黃金海岸沙灘附近既餐廳食飯,由於時間尚早(六點都未夠),於是先食住大大隻既美國生蠔做頭盤.

開埋支白酒,沙灘海景,燭光晚餐正式開始~當然唔少得一張合照啦~~叫咗個二人餐,但係有啲嘢唔啱我地食(例如煙三文魚沙律,同鵝肝),厨房都肯幫我地轉凱撒沙律.明哥就幫我地諗咗用龍蝦焗薯細盤黎代替鵝肝.

由於頭盤一打生蠔實在太肥美,搞到我地之後既菜都食得較慢,而侍應生亦同厨房夾番慢上菜時間.

主菜既紅酒汁牛扒好好食,大蝦帶子長意粉都唔錯. 大家都飽到捧住個肚,最後我地問侍應生可唔可以將甜品既芝士蛋糕轉做雪糕(無咁滯嘛),侍應生話都應該要轉,睇我地都係食唔落份芝士蛋糕.......

臨尾我地仲同明哥影咗張合照,多謝今晚咁周到既招待,人家話好客既明哥一啲都唔似我之前所形容能操流利"熱血"對白既男子.

作為浪漫生日飯局既完結,我帶人家落去沙灘邊行邊傾,希望人家歡喜呢餐一號風球既生日晚餐啦~~

崇真七子聚首一堂

今日早更放工後,就騎羊番屋企吸塵收拾吓個客廳,因為今晚會考書友會黎家訪.

對上一次班兄弟黎我屋企玩都已經係年頭既事,好開心今日可以人齊.pizza hut加KFC外賣,sparkling wine加紅酒,打wii,打牌,笑聲,喧嘩聲,一班舊同學,好正~

每次既聚會我都會好珍惜,因為14年既友誼,真係好難得,人生又有幾多個14年呢?希望黎緊聖誕可以再聚一聚,兼且可以多啲女伴參加啦~

ps:今晚卒之都清咗上次條麻雀數.........

父子sms

中國人出名內憸含蓄,尤其係家人之間既感情表達,但今日我就用文字直接表達父子間既心意.

今日放假,騎羊出市中心補給日用品時收到老豆既電話,約食晏.騎羊番屋企放低啲嘢時至醒起台灣女生放一點,可以同老豆三條友係市中心一齊飲茶.由於要番至再出門,兼且無攞定張籌等枱,於是要等成個鐘至有位入座,失策.....

好難得老豆可以偷到時間出黎飲茶,平時俾老媽check住晒,好多時都係快餐店或茶餐廳食.可能等枱等得太耐,老豆食飽就話番屋企先,不過我同人家都好開心可以陪吓佢老人家,至起碼我地唔會俾面色同無理取鬧,而係真誠關心佢嘛~

家常便飯

台灣女生為咗提升我既胃口,以免日漸消瘦,今晚特意下厨,等我可以安在家中,舒舒服服咁攝取營養.咁啱係百佳買蟹時竊聽阿姐話白蝦減價,於是今晚以海鮮為主題.結果食咗好多, 兼開埋罐啤酒飲

食飽之後就打晏晝買番黎既disater-day of crisis,雖然畫面唔及xbox360同ps3,但集射擊,拯救,逃生,電影式冒險於一game,確實令我繼mario kart後再度投入Wii機既懷抱.獨特既體感玩法,令投入度大增~

可惜玩完個序章就load 唔到隻game,吊癮.......唯有聽日碰運氣騎羊兜去睇吓有無得換過隻啦....

ps:有位朋友擔心我女人唔會煮飯俾我食,睇黎呢位朋友可以少擔心呢~~~~~

EAGLE EYE

今晚同阿禮,阿潘一齊睇eagle eye,本來諗住幾好睇,但點知故仔同智能叛變差唔多.

電腦入侵各網絡黎進行改朝換代既計劃,但反駁位好多,例如:點解唔係日常生活細節上,逐個政府官員做低,而等一個各官員聚集既機會,兼選擇大費周章咁安排炸彈組裝及引爆呢?(交通意外殺男主角既哥哥都做得出咯)

另外,係野外電塔殺人一幕,點解電腦可以咁準繩令一條斷咗既電纜打落一個逃走既人呢??

如果諗住入場睇既朋友,真係要三思呀~遲啲租碟睇就好了...........