第十五代手機-ALCATEL ONE TOUCN IDOL X

自Nokia轉出window phone後,我就無再固定手機品牌,只係睇性價比.今次揀咗Alcatel One Touch Idol X,貪佢5吋全高清芒,相機有1300萬像數,兼且行四核.只支援3G,但對我無影響,因我無諗住上4G計劃(有點貴哦).

我揀咗黃色,exactly係我第一部手機PF 768個隻色.機身夠晒薄,仲輕過Sharp SH930好多.雖然都係用Android機,但就無Sharp個介面咁好用,好多設定都係fix死咗,無得改,例如App Drawer一定係右下方,最左既頁面只係放wallpaper大小既相....(好唔捨得sharp可以係screen lock設定4張相,隨時轉都得)

話就話係法國品牌,其實手機業部已被中國TCL購入,說穿了只係中資法國品牌.電池消耗速度無舊機咁快(未知是否新電池既關係),影相既質數亦比舊機800萬像數有進步,機身無咁易發熱.舊年八月推出時$26XX,而家跌到$21XX兼恆生咭可以有$200回贈,好抵!

職員貼跟機芒貼失敗後,只係用HTC M8既貼黎頂當(貼唔晒成個面).當初幫我訂黃色機個位哥哥仔好好人,佢用另一部新機之芒貼幫我貼得靚靚.希望快的適應新機,同load番啲apps.

PS:手機Profile更新:
1st   Ericsson PF768                >黃色 sunday
2nd  Boch 909 Dual                 >灰色 people
3rd  Siemens A40                     >藍色 orange
4th   Ericsson T29                    >銀灰色外殼,紫色panel one 2 free
5th   Ericsson T39                    >灰藍色 one 2 free
6th   Sonyericsson T300          >紅色(紅豆) smartone 
7th   Sonyericsson T630          >黑色 smartone
8th   Nokia 6260                       >銀色 smartone
9th   Nokia 6270                       >黑色(深啡色,鋁金屬外殼) smartone
10th Nokia 6500 Slide             >銀色(鋁金屬外殼) smartone
11th Nokia N86 MP                 >白色 smartone
12th Nokia N8                          >橙色(鋁金屬外殼) smartone
13th Sony Xperia P                  >紅色 nwmobile
14th Sharp SH930                   >白色 nwmobile
15th Alcatel One Touch Idol X >黃色 nwmobile

花園新成員

呢個就係日本買既日本制豬型蚊香爐,細細個睇卡通時,不時見到冒著蚊香既豬仔,襯托夏日既意境,通常背景音效係蟬叫聲.

之前只係用金屬蚊香爐或餅乾罐黎點蚊香,但一落雨沾水就會生銹..而家有隻瓷制豬,就唔怕生銹,舊有既金屬品可以BBQ至用黎擴大防蚊範圍.

九洲旅行Day 8

今日就要番香港啦,見幸男對鞋殘殘地,於是拎出尋日係outlet買俾幸男既鞋,一於著住番香港.

未訓夠兼知道臨別在即,幸男同酒店床舖作最後擁抱.

係酒店大堂Check Out,放低行李暫託,台灣女生帶我地去附近既神社.櫛田神社比青井阿蘇神社更歷史悠久.

神社既禮節已難唔到幸男,無諗過白領人仕都會係朝早辦公時間黎神社.

神社當然有各種催運及平安符售賣，巫女確實令人明白神社係清淨地.

放香油錢,搖鈴,鞠躬x2,拍手x2,合掌,鞠躬.雖然未能滿分,但總算誠心尊重異國文化.

肚仔痛,人家暫代攝影,我就衝去WC.係咁傳統日式既地方,廁所真係"和式",雖然唔慣,但都要入鄉隨俗.

寫滿願望既繪馬木牌,唔知係咪要俾錢買番吉牌既呢?

櫛田神社佔地廣闊,出入口都唔至一個.其間發生一個小插曲,話說我見喫煙間有香煙自動販賣機,於是入錢買包番香港當手信.點知入錢後,機身亮著藍光,細看才發現要用IC咭拍著光位置.我用有限度既日文兼手機翻譯app黎向在場既老人家示意我係成年遊客,並想問佢借IC咭一用(我以為係身份證上之晶片).老人家答我佢無,並幫手問其他在場但唔識既煙民有無咭.雖然無功而返,老人家亦耐心解釋IC咭要申請.即使我聽唔明點樣至可以申請到張IC咭,但老人家既好客已令我感動.

烈日當空下,我地行咗十分鐘左右,去到麵包超人館.

由於最近J2播麵包超人,所以幸男都好鍾意麵包超人館呢個景點.

場內有大量玩意供小朋友享用,麵包主題當然唔少得.

幸男係呢個玩意裡,撞親頭頂,但無喊兼繼續去其他地方玩.

試玩區永遠都係咁邪惡,小朋友玩到唔捨得走時,父母就乖乖就範去隔離既精品部購買.好在平時帶慣幸男去玩具部睇玩具,甚少即場買玩具,多數係事後以行為良好兼大時大節至送俾幸男,所以幸男並無出現揼地扭買玩具既情況.

排隊玩滑梯時,幸男係咁望住滑梯上既小朋友,疑似心急地諗住"快啲啦,到我未呀?".

著地後,幸男以為再行上樓梯就可以再玩,結果俾職員攔截,並由頭再排過隊.

買雪糕送紀念杯,幸男食住雪糕同其他當地既小朋友一齊睇日文對白既麵包超人.

搭地鐵番博多站,突然落大雨,我要抱住幸男兼夾住把遮行去酒店附近既王將餃子享用午餐.

係香港都買過王將既急凍餃子,今次正好可以試吓地道新鮮既煎餃子.

幸男鍾意食冷麵,人家就同幸男共享,我就叫咗個叉燒拉麵.雖然叉燒拉麵無一風堂咁好味,但點都好過同一條街既二男坊.

番酒店大堂攞番行李,我地就搭地鐵去機場.雖然每一日都好攰,但幸男都能夠配合行程,無發脾氣,只係偶而撒嬌"好攰呀,到未呀?我無晒力啦,媽媽....".

落機時已見既神轎,因為要趕搭接駁巴士而無時間留步影相,結果要番香港呢一日至有機會補影.食用既手信全係機場內既商號購買,一次過好處理嘛.離開商號時,我才發現只顧手信,竟然忘了行李喼!呢個時候幸男已衝入商店,並喊著"係度呀!".原來我掛住俾錢,將行李喼冷落係收銀隔離既巷道....(幸男應記一功!)

雖然係博多站買定弁當上機當晚飯享用,但廉航職員不時於機內巡視,.一見到有乘客享用非航空公司提供之飲品或食品,職員就會上前阻止,結果我個和牛弁當要落機攞埋行李至有得食,機上偷食零食黎挨餓.好在幸男係機上有訓覺,醒咗就以櫻島買落既蛋糕仔頂肚.

有勞人家計劃行程,為咗打點行裝及照顧幸男,每日都係最早起身兼最夜訓覺.如果要我係二人世界與三人行旅遊之間作選擇,我會揀後者,是否我既心態已經不再年輕呢?

九洲旅行Day 7

今日天陰有雨,我地去outlet購物.話就話係大人買平嘢,結果都係為幸男添購童裝為主.我就買咗條日本制牛仔褲及一隻豬型蚊香壺(舊日式卡通片常出現).

Food Court人山人海,搵到張枱都要排餐懵至買到嘢食,再要等叫冧巴....食材真係好緊要,連food court既嘢食都無話志在充飢.當然廚師既心機都好重要,料理之心絶無因場合而改變.

食完晏,人家主攻女裝品牌,我就帶幸男去LEGO店,等幸男可以同一眾小朋友係兒童試玩區開心吓.

人家行完女裝,好趕咁去番店舖攞番個豬型蚊香壺,搭巴士去火車站,係天神站再轉巴士去褔岡塔.

廣場裡有個相機影相位,只要將手機或相機放係頂部,遊客行啱個位就可以啱啱好以褔岡塔作背景.

乖乖俾錢搭LIFT上觀光塔,閃光燈係黃昏入黑時份又大派用場啦~

呢邊腑瞰市內既繁華,另一邊可以遠眺博多灣之景色.

落一層就係Love Sanctuary,俾情侶黎扣上寫有倆人名子之鎖牌,並影相留念.雖然我地無買鎖牌,但都有趁高興影番張相.現場有職員用單反機為遊客影相,我厚住面皮請職員用我部相機為我同人家影相,好在職員樂意效勞.

幸男撥動心型鎖牌,好似玩緊算盤咁........

一個心型都唔平0架,成八十蚊咁滯,唔知當年我同人家係關島情人崖扣果個鎖俾人剪咗未呢?

落番地面,行去隔離既人沙灘商場睇吓有咩地方可以用膳.

一間餐廳俾人包咗場,得番呢一間BBQ(可能包場個間都係BBQ),於是用手機翻譯APPS配低能日文同店員溝通.

結果叫咗呢個海鮮餐,和牛要預早電話訂至有,我忍唔住同店員講"残念(ざんねん)"

人家負責燒烤,我就周圍影相,幸男忙住食嘢醫肚.

幫隔離枱一大班日本人影大合照後(手機,相機),委託該女士幫我地一家三口影相.

幸男最早食飽,唔知係咪唔啱食,食完幸男就繼續玩人力車.雖然之前幸男喊住咁話俾個大人打佢patpat兼要佢讓出人力車,但我諗應該只係有大人想自己既小朋友有得玩,就用手拍走幸男,並非全心毒打.

怕幸男一個人玩悶,我推住幸男架人力車沿沙灘邊旁既木條行人路疾走.

見有人係沙灘玩煙火,所以去收銀處睇下,原來真係有得賣,唔洗行番轉頭搵便利店.

沙灘太暗,我要用閃燈上既LED補光燈照住至可以成功點著煙火.

其實我地時間好趕,因為要趕搭最後一班番火車站既巴士,所以去到後段就幾支一齊燒,慳時間之餘又方便影相(光啲嘛).

幸男凝望著熌爍既煙火,唔知係咪諗番尋晚係鹿身兒島睇既煙花呢?雖然我無份玩,但見兩母子玩得咁開心,我都無咩所謂.聽日就搭晏晝機番香港,八日既行程,原本以為好多,其實都好快過.可以俾幸男既唔多,只希望幸男有個開心既童年.