今日係大假既第一日,亦都係我地一家去日本九洲旅行既第一日.由於係搭廉航,無午餐供應,所以我地check in後,係機場內食埋個晏早餐至過境上機(54閘口,坐巴士去停機坪).
三個鐘頭機,落機等好耐至過到境,再搭機場巴士去轉地鐵,卒之都到酒店所在既博多.放低兩個大喼,先至可以拎番個相機出黎影吓街景,行去附近既車站商場行吓兼搵地方食晚飯.
咁啱有間拉麵店叫二男坊,當然要幸男行去影番張相啦.日本既街燈係白光,所以影街景人像都好舒服.
人來人往,充滿城市色彩.酒店行過去車站商場都係十分鐘左右,新幹線,地鐵,西鐵都有得搭,非常方便.
商場林立,唔知我地有無時間行兼且買到啱心水既嘢呢??
第一站係去商場裡面既火車玩具專門店,裡面有得俾錢玩模型電車,真係有個制俾你控制火車行走同埋站.店內仲有大量同火車有關既玩具及商品,啱晒火車迷.基於禮儀,無係店內影相,只係門口既襟章扭蛋機為幸男影snap shot.
商場既賣點之一係天台有小童專用既小火車,今日無時間,所以只係小火車主題既休閒座位影住相先.
一眾團友太攰,無咩心機再去搵地方食嘢,於是行番去近酒店既<二男坊拉麵>.店內既裝飾簡樸,以食材包裝紙作牆紙,紙巾盒同撥扇掛係牆上.日本俾人既印像係先進,但無諗過仲會用撥扇,因為當地人既冷氣唔會好似香港咁凍到要著外套.地鐵站內都係貼滿省電既海報,唔知係同關閉部份核能發電站有關定係本身都係致力減排二氧化碳.
係店員既幫助下,總算成功係售票機買食卷.唔好睇個麵咁靚,其實味道無賣相咁好.麵質偏硬,雖然我地已揀正常既硬度.叉燒偏瘦兼韌,湯汁較稠及鹹口,幸男食兩啖就話唔好食,只係勉強完成剩下既份量同食餃子.
番到酒店,幸男就享用起市買既日本蕉,應該唔會餓襯.平日幸男要媽媽講故事至訓,今日幸男攰到沖完涼就自己訓著.人家開住燈整理日用品同行裝,都無阻幸男既睡意.
