今日第一個景點係柳川,先搭地鐵去天神站,再轉西鐵,落車後上火車站附近既接駁小巴(船公司提供).無諗過車站出口,派宣傳既年長船職員,一路帶我地去接駁小巴停車處,竟然係小巴既司機.
100円租一頂帽俾幸男,湊熱鬧之餘,又可以擋太陽.好在呢隻船剩餘既吉位可以容納我地一家三口,不用等下一班船.
船家係一位年過五十既長輩,沿途船家講解景點,以及自己於當地既生活.
幸男唔太鍾意竹帽既繩帶,所以台灣女生以自己既帽同幸男交換.太陽猛又熱,出動長袖衫黎防曬,電動風扇作降溫.
江戶時代既護城河,現已融入大眾既生活,例如河上食店,以及沿河邊既住宅都會有個小小碼頭上落船之位置.
船家熟練地帶我地遊走水道,坐定定既遊客都要少少低頭迥橋,船家更要彎腰.中間時段,船家係暗格拎出保溫袋,向大家派發冰種黎消暑.
船上有唔少日本人,有來自東京,外地既除咗我地香港外,仲有韓國.落船既地點並非上船位置,岸上有數間食店及商舖.
原本領隊諗住去本吉屋總店,但見近近地有間分店,於是省番啲腳骨力.店舖以和式為主題,客人坐係榻榻米上之坐墊,享用矮枱上既美食.
領隊熱到話要啤酒,幸男就有KIRIN橙汁.見咁高興,一齊碰杯合照.
飯粒吸收了鰻魚燒汁,幸男第一次燒食鰻,忍唔住同人家講"好好食丫,媽媽".雖然係貴啲(9千幾円,兩個鰻魚定食,一枝大ASAHI及一支KIRIN橙汁),但味道絶對令你覺得下一餐食平啲都值得.
由於番火車站既免費小巴一個鐘至一班,於是我地食完飯坐的士去火車站附近既小型商場行之西松屋行吓,慳番啲時間嘛.
幸男有童裝收穫,我就只係行咗間賣遊戲機及CD DVD既店舖.原本想買個紅色既Wii U雞髀制,但見平時都少時間打機,於是打消念頭.
搭番新幹線落鹿兒島,係車站買定弁當,因為我地趕去碼頭觀賞煙花.
一出車站就見到好多穿梭巴士送遊客去會場,所以我地跟當地人一齊排隊上巴士.如果照原定計劃搭市電,都唔知迫唔迫到上月台....好多當地男女穿上浴衣參加煙火大會,我著酒店訓覺著個套都可以丫~
會場附近有各式食品檔攤,感覺好似年宵熟食檔咁.
行到最近碼頭既空地,已有不少遊客霸定位,除咗野餐用既布蓆,露營櫈都出動埋.
行李喼內既腳架,就係為咗今晚而準備.趁天未黑,一家三口影番張家庭生活照先.
黑豚肉弁當,內裡包羅萬有,包括飯卷,燒鯖魚及炸物.
雖然和牛弁當唔係熱呼呼,但和牛配上盒內既醬汁,令我食得好知味.
大會廣播倒數後,花火大會正式開始.第一次影煙花,可以認到係煙花懸掛於天上已經好開心.
好難至可以揀到幾張無咁失敗既相,因邊影邊試設定.
中途有休息時間,我同幸男出咗去小食檔排隊買燒魷魚.番到入會場就已經開始第二輪煙花,我趁無人排流動廁所,帶幸男去小解,再返回人家留守既地蓆.幸男同人家邊食燒魷魚邊睇煙火,幸男仲同人家講"我同爸爸買咗啲好正既嘢番黎丫".
咁大個仔未試過咁近睇煙花,預科時都只係企係太空館邊望維港煙花.今次日本既煙花大會,又多又密,好靚.環境好好多,起碼有得坐之餘,大家都有合理既空間.
PS:最後有ENCORE時段,令到收晒相機同腳架既我可以全心全意欣賞煙花.散場時要大排長龍搭臨時巴士,但當地人非常守秩序,絶無打尖及嗌霎.我地成功趕得切搭原定既新幹線番博多,今晚除咗幸男小朋友外,我同人家兩位大人都好開心~
