雖然幸男起身會食支奶做早餐,但幸男都要跟我同台灣女生一齊落酒店餐廳食早餐.要幸男坐定定陪你食早餐,士多啤利果醬方包及鮮汁絶對唔少得.
食完早餐, 一齊去JR搞JR PASS預留車位,但人家唔記得攞schedule,要折返酒店攞.我趁呢段時間同幸男行地下商店街兼買咗支340円既玫瑰俾人家.人家番車站時,幸男呈上鮮花,做阿媽既當然開心.
人家忙於票務,幸男等到發悶,帶佢四圍行都無咩作用,只有冰凍野菜汁至可以安撫幸男.
搭特急列車時要係指定席車卡等,所以要落車時至可以行去車頭影相.
其實仲未到目的地,要再轉快速列車去門司港.雖然係用APSC支天涯影,但效果都唔差丫.
目的地車站俾我既感覺係有啲懷舊,簡簡單單,無咩花巧.
原來站內有好多懷舊用品,包括人力三輪車.
幸男對扮車長不大感興趣,唔知係咪怕熱同嫌啲衫係共用呢??
火車站行無幾耐就係火車博物館,幸男可入去己退役既舊式火車駕駛室內,親手觸摸各種制紐及裝置.其車裡面好熱,全金屬又無冷氣,睇耐啲都焗親.
場內有得玩小火車,由小朋友及陪同大人一齊控制小火車前進.早知唔坐後座,得個熱字,兼且無得係外面影幸男同人家於車內既樣子.
室內場館有大量火車既歷史文物兼相片海報,啱晒火車男既口味.
精品部擺滿各類火車主題既商品,文具襟章鎖匙扣都未夠,仲要有火車花紋既小童襪.我見到有<山幸海幸>火車名襟章,但又無搭過之餘,又好似太簡單,所以無買俾幸男.
火車路軌上漫步,夠晒浪漫,係火車博物館一定夠晒安全.
好幾架舊式列車,供遊客內進參觀,不過都係無冷氣,只係開咗部份門窗作通風.
呢個車卡要除咗鞋至入得去,等小朋友可以跑跑跳跳.
蒸汽火車有幾大架?睇呢張相就可以作參考.幸男以為黐住架火車一影得清楚,唔明白企前多一兩步,人物既比例會好一啲.
差唔多四點至去到隔離既門司港搵到間日式料理開餐,仲晏過番A放工食晏.辛苦成大半日,卒之都可以嘆番餐好既.
大熱天時,當要有去食雪糕消暑,之後入咗商場避雨兼買咗隻貓公仔俾幸男上色當自制紀念品.
回程搭火車時幸男就訓著,轉車時都係全程抱住.到目的地時,幸男至訓醒,可以行去車頭影相.
晚飯前帶幸男去咗Tomica Shop朝聖,店內無咩人,所以幸男可以獨佔試玩區域.
夜晚因為係天神搵唔到日式大排檔之所在,所以番酒店附近搵咗間燒肉店開餐.
我地揀咗個100分鐘既Premium Course放題(大人每位三千円多啲), 所以海鮮材料都包,牛肉種都多啲.
店內都有本地人幫親,而我地坐個張枱附近有一枱係香港人一家大細黎食.食物同氣氛都唔錯,可惜埋單時竟然收我三個大人錢,明明menu話小學生以下係(無料)唔收錢.我問職員小朋友是否計人頭,該名職員笑住答我係,於是我要求睇番個menu,並指住小學生以下無料既位置."ボーイは四才"我據理力爭下講出小朋友只係四歲,另一位較年長既職員聽完就去收銀機退番錢俾我(我估係以為遊客唔識睇MENU同講就偷雞).
PS:幸男油既貓貓公仔都幾有個人風格架
