經典子彈火車款式,今日我地搭新幹線去鹿兒島,車程為個半鐘.新幹線俾我既感覺好似係陸上既飛機,唔單止係速度,設備既先進與飛機相若.
一落車就見車站內有賣日本燒酌既商店,另一邊更有大型玻璃櫃展示外款日本酒,睇黎燒酌係鹿兒島出名產物手信.
晏晝我地係車站附近既商場food court享用,幸男就好喜歡呢個冷麵(幸男叫"凍磞磞麵麵").我就因為一朝早就肚疴而無咩胃口,所以只係同台灣女生食商場賣既吉列芝士雞塊同燒八爪魚丸.
酒店房間好細,唯一既賣點係望正車站商場頂既摩天輪,人家為幸男精心安排.
跟住我地去搭市電前往碼頭, 感覺有啲似平時搭輕鐵咁.
碼頭當然係搭船,目的地係櫻島,鹿兒島著名既火山島.
係香港少搭船,所以幸男表現興奮.由於艙外大風,所以幸男唔係全程都係甲板吹住海風.
當地廣告將櫻島火山比喻為一個冒出水蒸氣既水煲,近山頂右邊既白煙唔通係火山冒出黎既?
碼頭裡有渡輪模型於玻璃櫃內展出,幸男看得入神,可能諗點解可以做到咁精細同逼真呢?
等咗大半個鐘至有得上最後一班既觀光巴士,坐定定咁望風景,到特定觀點時,司機會俾五至十五分鐘大家落車影相.
呢張相係同車既西人先生幫我地影既,都叫做係火山做背景丫.
幸男鍾意貓,見到貓仔懶洋洋地訓覺,忍唔住要行過去望吓同打招呼(另一隻貓貼住牆角打側訓).
大草地最啱小朋友走動,屈係觀光巴士,可以鬆吓手腳.
呢個雕塑係紀念某年既音樂節,真係夠晒抽象(搵笨)........
卒之都到距離火山最近安全範圍之展望台,人家背後既山脈凹位,就係當年火山爆發岩槳侵蝕既痕跡.原本叫咗同車既一個日籍拎住單反既男子幫我地一家影合照,但可惜攞位攞到個人好細粒......
坐觀光車落番山,我地行去浴足溫泉,都要成廿分鐘,啱晒行到腳仔完.幸男起初話啲水太熱,但慢慢逐啲逐試就適應咗,可以放晒雙腳入去浸(人家氹幸男浸完對腳就會多番啲力).
碼頭裡有好多人黎釣魚,有小朋友亦都有後生一輩,唔似香港清一色係老一輩.好喜歡係碼頭吹海風,感覺同個海好近,悠閒輕鬆既感覺.
臨近黃昏,無用腳架,無用水平儀,只是隨心的影下眼前既景致,其他時間用肉眼及身心去感受呢一刻,有點似<發夢王大冒險>中既道理.
拍拖既一齊黎釣魚,香港地應該唔會有咁既場面.我見釣魚既當地人會向入口既老職員道別,唔知係咪租LOCKER定係去碼頭垂釣係要俾錢既呢.....
經過月讀神杜,可惜己近六點,賣符既職員已關門大吉,只好當參觀古物建築(幸男最愛踼沙石....).
上船時幸男從人家口中得知要離開櫻島,頓時哭成淚人,話唔捨得.小朋友既率直,令為人父親既我,肯定了認真對待自己感覺既性情.
幸男喊到攰,落船上車無耐就訓著,番到鹿兒島車站商場享用晚餐時都未醒,結果人家要抱住幸男黎食鐵板燒.
雖然有英文MENU, 但我盡量用日文黎講出我想要既食品,尊重當地文化嘛.
除咗黑毛和牛,呢個芝士茄子我都好鍾意食~~
食到尾段,幸男訓醒,我地以白飯及預先留定既和牛及魷魚黎招待幸男.
食飽飽,向商場頂層既摩天輪進發.為咗坐呢個透明卡箱,我地等咗半個幾鐘,點知透明部份已經成磨沙,太多花痕,令望出去既景色無預期般清晰.
背囊裡既閃燈大派用場,不過都要試好幾次至有咁既光景.其實上摩天輪之前我地去咗機舖,點知職員同我地講一堆日文,睇番告示板至知小學生六點後唔可以逗留遊戲機中心.
番到酒店房間,見商場頂既摩天輪閃住不同既色調,於是熄晒房燈黎影,好在最愛既紫藍色影得最好.
PS:當摩天輪停轉及熄燈時,幸男喊起黎.我同幸男講"摩天輪都要收工食飯休息嘛,飯都未食好慘喔"
