今日第一個節目就係去車站商場頂既小火車,幸男係售票機接過車飛就自己排隊.
咁啱好多家長都帶小朋友上黎,所以小火車係滿座.
坐完火車,我地去埋隔離既鉄道神社.起初以為係有平安符賣,但又唔覺有頂多係行到尾有個好小型既位置俾人放香油錢.
反而有啲似祭祀攤位咁,有小食同飲品賣,兼有傳玩意.呢款係100円一個紙網既撈波子,幸男成功撈到波子,但再試就破網.
另一款就係100円有三發既木塞槍,好似卡通裡日式溫泉旅館既玩意.幸男始終等四歲唔夠,要大人幫手,可惜三發全落空.....(如果係bb彈槍我一定表現好啲)
幸男話要坐多次小火車,人家就幫幸男霸定部有輔助轆既單車,等幸男可以駁住咁玩落去.
樓上既觀景台好大風,幸男怕企係枱上,於是改為坐枱影相,反而得出悠閒自然既效果.
等上火車時,幸男已玩到攰得滯,訓著咗.
訓醒時已去到下一個景點-海之中道海濱公園.
第一件事就係去餐廳開餐,買咗食卷,一片心等叫雞牌號碼.我點既炸豬扒飯唔錯,幸男亦鍾意食腐皮烏冬,無諗過主題公園既餐廳一點都沒有放棄食物既質素.
當人家邊食天婦羅邊整理行程時,我就帶幸男去附近既沙池上既人造山丘玩.幸男原本唔夠膽跑上較高既山丘,但經過多番嘗試,卒之都成工登上.
其實餐廳望正摩天輪,幸男卒之都等到上摩天輪啦~幸男玩到身水身泙,要拎住風扇黎逄溫.
唔知點解有一個摩天輪卡箱內有隻大維利寶寶係裡面,幸男當然係欣然接受啦.
香港好難搵到呢啲咁長既滑梯,而且仲要係有滾筒既.原本我只係怕愈sir愈快,點知係愈sir愈熱!隔住牛仔褲都熱到入我籮柚,我忍唔住同幸男講"好熱呀".
汽車博物館內,有得玩高卡車,人家當然係要我陪幸男一齊開車.
自己日文不濟,所以唔太明老職員既意思,結果我揀越野路段.路面除咗不平坦外,仲要有大量雜物,如木板,石頭及螺絲....架車係咁"櫈",幸男就係咁笑.最平坦既都係臨番入pit個段,我同幸男講好似玩瑪利奧賽車咁.
幸男都技癢,要自己玩番轉車.
行去海洋館中途,大家都熱到要去買雪糕食.唔少當地遊客都係呢個中途站小休兼以冰點解暑.
海洋館內一大賣點,當然係海洋劇場.咁啱遠處落完雨出現彩虹,海豚加配彩虹,十足童話卡通咁.
相比沖繩既海洋劇場,九洲呢個就比較多訓練員架馭海豚作高速表演.另一特別之處,就係訓練員會係池外吊高皮球,引海豚躍出水面,並以撞入水池之衝力,向圍觀既小朋友擊出水花.可以近距離望見海豚飛躍,兼且被潑水花,每一位小朋友都笑逐顏開.
幸男連底衫都濕埋,見精品部有T恤賣(百鬆啲港紙),於是買咗件作替換.個一刻想起,海豚表演是否特意整濕小朋友啲衫,以促銷紀念T恤??
夜晚我地去番天神食飯,途經毒男聖地"AKB48 CAFE & SHOP".咁啱之前睇MUSIC STATION時,幸男有睇過AKB 48既表演,我仲問幸男鍾意邊個姐姐添.
今晚既主菜係一風堂總店既拉麵,淨係中間舊明太子就知道"無得輸"!
相比第一晚個間二男坊,幸男食得開懷好多.麵條有彈力,叉燒肥瘦適中,湯底味濃但唔鹹口,飲晒成碗湯都唔覺膩.幸男食紫菜個樣好似瑪利奧叔叔.
跟住我地再行去體會日式大排檔-屋台,睇均都係呢檔最多人幫襯,所以我地決定等位.
咁細既地方,可以供應熟食及冷凍飲品,真係"麻雀雖小,五臟俱全".鐵板牛扒,燒雞翼,配凍燒酌同凍梅酒,雖然環境較悶熱同擠迫,但味道搭夠.
入住既酒店外型呈三角型,設計時尚,樓下對面馬路就有便利店LAWSON,啱晒我買啤酒上酒店享用.
香港特價賣十蚊罐,係日本賣240円(18元港紙),所以我揀香港無得買既限定釀造版,無咁蝕嘛(味道比普通版濃厚)!幸男沖完涼就訓,我就係床度嘆啤酒,辛苦人家為明日行程作準備及整理行李.
