SUPER MARIO BROS MOVIE

今晚一家三口去市中心StagE睇超級瑪利奧兄弟電影，無諗過一隻2D橫向闖關救公主既遊戲，可以演化為一個童話故事。

電影巧妙地將任天堂遊戲世界既角色穿插電影，交織出豐富既故事橋段。反派庫巴首先去企鵝王國(過往超級瑪利奧兄弟遊戲其中一個關卡)，奪取寶物箱既無敵星。

水喉匠瑪利奧兄弟於維修城市Brooklyn地下渠道時，誤闖神秘水渠通道，去到奇異世界既蘑菇王國(LUGI則墮進暗黑之國)。

經過MARIO KART，MARIO PARTY，任天堂大亂鬪等遊戲洗練後，碧姫公主唔再係齋等人救既角色。今次肩負保衞蘑菇王國使命，帶同MARIO同KINOPIO一齊前往森林王國借兵。

Mario單挑Donkey Kong Jr一幕，感覺有啲似黑豹既王族對戰場口。

之後既捷徑回國劇情，變成MARIO KART，惹笑之餘，亦充滿回憶。相信戲院內觀眾，不論大小年紀都熟識道具既用法~

庫巴雖然係奸角，但儍更更咁鍾意碧姬公主，令成個故事更偏向童話。最後一眾角色被捲回現實世界既Brooklyn，MARIO同LUGI兩兄弟成功借助無敵星既力量打敗庫巴，成為2個世界既英雄。

PS:升中後既幸男無小學時期既積極，多咗無名執著(青春期?)。失去光環既幸男，變得興趣主導地學習，因為努力多一點不會讓中游份子有大進步成果.......

新視界

今日收到電話短訊，兩星期前配既眼鏡已經到貨，所以騎羊同台灣女生出V-CITY食晏兼順道攞眼鏡。特意配番現役單一度數眼鏡既框，因為OWNDAYS門市既框真係好唔掂，亦為自己容易接受。正正係番眼鏡88配HAMAMOTO框，順便問漸進鏡既選擇與OWNDAYS之分別，最後至係88配有廿個分層既蔡司鏡。

試帶完就去一田超市會合人家，88職員話我好似都幾適應新鏡(無暈到坐低或面有難色?)，我仲答職員:我今晚會帶住佢黎睇英超。爭取時間作磨合，商場內一路嘗試望唔到遠近同位置既感知，買齊嘢開車前至換番舊鏡。

雖然話漸進鏡可視區域呈T型，但邊界有幾濶確實要試過至知。望近嘢要用鏡片既下半截，方便睇手上既電話或書本或手錶，但當無近物時，下層貨架既影像會變矇糊，繼而影響腦部既判斷以致近似頭暈既不適。晚飯時間一如往常向右回頭望電視，當回頭望番飯枱近物時有暈船浪既感覺(地平線左右搖蕩)，真係要趁呢兩日放假，要好好適應新視界。

給幸男的筆記型電腦

2020年頭買既AVITA LIBER NOTEBOOK(紫色)已經再一次鉸位鬆脫，於是決心搵過部後繼機體。綜觀性價比同硬件規格，揀咗SAMSUNG GALXY BOOK2(只得Graphite色)。由於GALAXY BOOK3就出，所以有得平少少($6699) 。趁大假最後一天，出去太子始創中心既SOLAR買機(price.com預留)，當年部AVITA LIBER都係SOLAR買，不過而家佢同KOOL BOX平分一個大舖。

由$3599既14吋機升級至$6699既15.6吋機，由8GB RAM配i5處理器躍升至16GB RAM配i7處理器，WINDOW亦由10轉為11。配置既升級，應該夠幸男用到中三，寄望大廠既品質會比AVITA高(耐用一點)。

灑一身汗

久休復出跑步，以5K作適應，已不復5分鐘1公里步伐。以往可以無顧慮地話跑就跑，幸男既出世令生活轉變好多，所有嘢都要小朋友作中心，留力照顧。

幸男升中，原以為會多一點自己時間，但原來心智品行上既照料變成另一項長跑。

PS:近兩年每天都有拉筋，先至可以勝任騎電單車以及工作上既活動量。

唔願面對既DIY

新買既洗衣機前日送到，但可惜電線比過往用開既THOMPSON及SIEMENS都要短，所以要暫用拖板供電。上網搵防水拖板，見HKTVmall有售，但只有無未摻線既係英國品牌(3年保用)，已摻線既得一年保用。屋企無鉗剪(只得較剪)，一額汗之下，成功搞掂開著洗衣機兼無跳電制。

話晒戶外用電，點都係穩陣啲好，但要自己DIY，唯有上網跟圖駁。呢幅圖令我諗起初中IS(Integrated Science)，以前鍾意上IS去窺探世界既運作法則。

PS:由於要買滿一定金額至可以送貨，所以直接係商戶網站訂購(同價$80)兼另俾$32順豐運費。其實我好怕DIY，因為怕煩......

小型家電回收

之前換咗個新PRINTER，但舊果部一直放係士多房，今日忽發奇想，用個紮實既不織布袋同洗衣機布冚用既行李帶作固定。

刻意採用溫文駕駛，避免突然變速或進取式入彎，誠惶誠恐，順利到達綠在屯門。為保護地球而將廢物分類，確實花時間，但話晒有架電單車代步，無理由唔行盡一分力。

PS：當初出車加配原裝後座椅背，只為乘客既舒適及安全感，無諗過會用黎擴充載貨量。

中一親子活動日

台灣女生與大學書友外遊，今日既學校親子日由我代為出席。每次望到綠色油漆外牆都覺得怪怪的，明明以前係啡色紙皮石。由於要逗留成個上晝，所以搭巴士出行。

先聽講座，再參予親子活動，包括相方了解問卷，家長(蒙眼下)被兒女照顧行去特定課室，分享話題，以及二人三足。蒙眼之下，幸男俾我既提示唔多，幸好我了解學校佈局。借樓梯扶手之軌跡及腳尖試探，成功上兩層樓梯，去到圖書館。

二人三足番禮堂(唔太大問題)，跟住就睇《媽媽的神奇小子》。對故事唔太感興趣，或許背境歷史上既前設，或許取景上既簡陋…

鈴芽之旅

今日同台灣女生去市中心睇新海誠既新作-《鈴芽之旅》，感覺比上次既《天氣之子》好，可以話係《你的名字》完美版。網上好多人話《你的名子》，《天氣之子》同《鈴芽之旅》係災難主題三部曲，我就不敢苟同(唔通真係諗定3種災難?)。我認為新海誠好著意將日本既傳統文化注入其美學觀，融入其故事創作。《你的名子》用上巫女與繩結，《天氣之子》用上睛女(睛天娃娃)，《鈴芽之旅》用上地震相關既神話。

女主角岩戶鈴芽意外遇上問路既男主角宗像草太，由於其查訪區內廢墟所在，令鈴芽非常在意。番到學交既鈴芽，望見廢墟所在地有紅光衝天(其他人望唔見)，於是動身去查看究竟，其發現宗像草太係擔當壓制地震既關門師。

由於鈴芽誤將壓抑地震(蚯蚓)既要石釋出，宗像草太被化身為貓既要石注入鈴芽房內既三腳櫈。鈴芽帶住化身為三腳櫈既草太去追捕要石，並沿途代草太用鑰匙去鎖定"門"壓制地震。

PS:すずめの戸締まり直譯應為鈴芽之關門，不過《鈴芽之旅》恰好交代離家出走幾日短線關門團之旅

兜風&另類藝術照

收工約咗阿基係公司集合，一齊出車去深井機場核心計劃展覽中心兜風，由我帶路，三個字左右就到達。泊好坐駕，行落海美灣望海。

SHARP Aquos R6真係幾虧下，平時影相會較暗之外，係極端環境下仲會有負片作品。已諗定後繼機為SAMSUNG FLIP 5，寄望早日推出，可以用新機去旅行。

PS:對上一次黎已係近一年前，心路經歷不少

回聲牆演算法

早前係YouTube睇過舊香港廣告，跟住就久唔久餵我睇懷舊廣告短片。80年代起，唔少廣告用當紅明星做主角，令大家會係劇集分段之間留意廣告偶像。即使無明星效應，廣告都會以靚畫面配廣東歌，生活化或搞笑主題.....感覺係當時既生活簡單點，以努力，進步，及美好生活作主調。

今日被餵既係沙田第一城既樓盤廣告，同而家既科(虛)幻樓盤廣告相比，當時既影像相當寫實。只有屋苑外觀及周邊環境(行人視點)，最後報上單位最低價格及佈局(2房1廳只售18萬幾起)。

PS:舊廣告既故事性及玩味較高，締造不少經典回憶。

愛旳沉默

屋企有個慣例，就係幸男係客廳做功課或溫書時，電視機係唔會開著，以示支持幸男既努力。雖然變相我少咗用電視打機或睇劇既時間，但好想身教俾幸男知要為人設想。既然要靜靜地，咁不如玩玩具丫。難得扚起心肝幫邪虎丸變身，當然要拎埋龍王丸出黎襯吓。

始終唔慣無説明書，要對住個電腦芒黎變形。雖然可以自己print出黎作保存，但紙質同印製點同商業印刷比呢？

PS:係我擁有過既邪虎丸玩具中，千値練呢款係最完美兼最貼近動畫設定。

MASK

今日取消口罩令，早更前去康買麥當勞早餐，沿途只有一兩個路人無戴口罩。入到老麥，排隊等嗌野食既只有我以真面目見人。

舊年年初日本開始有赤の他人の証明写真扭蛋，俾大家望到疫情前隨街可見無口罩既面容，可見大眾對復常既寄望。口罩讓人覺得環境不安全，人與人之間多咗一份阻隔。疫情間才發現，以往他人(甚至陌生人)既笑容，係給予自己動力既來源之一。

臉上既微風，空氣既濕度，氣味既滲雜，令我再一次感到活著而非幸存。

風馳電掣

家長日，騎愛駒載埋人家去學校門口會合幸男（由婆婆家出發），一齊去見班主任。成績表交收兼講解，老師對幸男既評價，同我平時既洞察相若-興趣主導。10分鐘會談後，一家三口去咗禮堂既三聯書展睇書，無諗過老夫子會以教科書形式承傳落去。

揀吓揀下，咁又8本書。除咗一本係學術向，其他都係消閒書，其中一本係我揀既偵探小說<迷宮裡的魔術師>。好耐無睇偵探小說了，唔知忍唔忍到暑假長途機至睇呢?

兩母子搭輕鐵番屋企，我就自己兜去外母屋企攞幸男既書包，番屋企放低，就再騎TMAX出去德福訂床褥（慳時間嘛）。床褥已足11年，不經不覺已有凹位，訓醒肩背骨同腰都會酸。無聊幫櫃檯出面既啤啤熊影相，無諗過原來打咭可以平一舊。耐何我無社交帳戶，唯有send張相俾人家代勞。由於開單既職員生手，搞咗一輪至可以行番去HKU Space攞車，比預定時間遲咗近半個鐘至番到屋企食晏(人家嗌定點心外賣)。

PS：計落條數打咭有平既錢，都夠我今日既來回油錢。

舂坎角望海

龍翔道經東隧過海，沿大潭道成功修正幾次出錯路口，卒之望望到港島南區既海景，重現網上介紹圖。

帶埋A7iii黎影相，無謂嘥咗個無敵海景嘛~今次係我第一次自己出港島遊車河，上一次係二千年頭同德輝出九龍cut唔切線，行咗西隧過海.......

竟然有人可以出到咁遠黎釣魚，藝高人膽大。

果然係南區，多人玩遊艇風帆(諗起TENET)。用TAMRON 28-200黎zoom到盡，效果都還可以。

台灣女生話自己去過舂坎角，我譏諷一定係初戀喇，所以我今日既目標，就係對住個海黎聽宇多田光既"初恋"。

廿零度兼藍天白雲，觀塘至東隧小塞，無諗過會經過拜山路段。雖然跟住語音導航，但都有兩三次因導航無言而出錯路口。由於試過係落斜堀頭路驚險u turn，所以係舂磡角道中途向小休食煙既外賣羊大叔詢前路斜度及狀況。

揸成個鐘車出黎，無理由唔發呆(吹海風)多一陣，原本遠處既風帆群都開始駛近。

開頭係男人團放無人機，臨走時黎咗一家三口，父女既溫馨背影令我駐足。

臨走前用相機影番張旅遊介紹照，以另一個焦距去欣賞。

下次再黎的話，會騎愛駒到炮台位外既平地。雖然外賣大叔話我架車咁大同少吊腳，都剷到盡頭既平台泊停，但我都係泊咗係舂坎角公園路邊。

樹蔭同兩側既高牆，感覺好舒適，但有個小心山泥牌…

回程行淺人灣道去薄扶林道，經西隧沿昂船洲大橋及汀九橋歸家。雖然隧道費要$13+$25，但經歷係值得既。以前學校旅行坐旅遊巴行大潭道水霸段，今次騎愛駒行既感覺好正。長途旅途之後，愛駒起動爽快及敏銳咗。畢竟跑羊要高速疾走，而非燈位開停…..睇黎要搵定下次遠途既目的地。

PS:發呆期間，收到工作坊既通知-三月初就調配到新工作坊。

重遊鹿頸

是日放假又好天，心血來潮兜去鹿頸吹風，其實只係愛駒無乜行長途，食油多咗又唔爽。今次跟住高德地圖去，途經龍山隧道，唔洗好似以前咁經粉嶺同坪輋，7個燈位就到埗。由於第一次行呢條路(十年前無)，又咁多拖頭車，好驚自己cut錯線番大陸。泊愛駒埋路邊，用SHARP AQUOS R6自拍，效果一般，純志在打咭。

對上一次黎都係同台灣女生拍拖時代，咁又10年有多。士多食店隔離既泊車位有私家車，唯有泊前少少既行人路。

齋睇唔幫襯，因為出發前至係市中心食完晏，影張樹蔭照就折返攞車。回程行新娘潭路，經大尾督出大埔，再上公路番歸。當打既十年，不自不覺間流走了，忙著照顧幸男及近期既"疫情".......想珍惜自己多啲，想自私多啲，放縱一下。

PS:幫襯過既陳鳯記已執笠(我都要睇番舊相至知係呢間)，有點唏噓。