臨生日前病倒

生日週將至,可惜兩母子相繼不敵上呼吸道感染.午餐過後,幸男要訓晏覺療傷.

PS:晏晝馬sir黎幫手搞電腦display卡,幸男醒咗就同馬sir一齊係手機睇YouTube既經典足球明星金球(可惜我掛住打ROCKMAN 11,無幫佢哋影相)~

30th週年之作,Rockman 11

早更過後，騎羊去置樂利寶商場格價，最終以$230購入美版MEGAMAN 11(日版ROCKMAN未出兼會貴啲)，順便换埋塊爛芒貼($9X)。

無Pro Controller之餘, 兼方便過唔到關就放埋一邊，唯有以手提形式黎打呢隻出名難玩既game。一如舊作1,2............要跳過8個關卡, 並打倒各駐關卡大佬,最後向Dr Wily城堡進發!

PS: 唔睇片頭都唔知,原來MEGAMAN係家務機械人,臨時拉夫變咗係戰鬥型機械人,去對抗Dr. Wily.

$9X蚊既體驗

第一次係戲院飲啤酒食爆谷,呢個套餐要成差唔多一舊水,話晒係生啤,所以我都係課金。原本諗住係屯門睇"我老婆日日都扮死",但場次疏落兼就唔到台灣女生,結果落畫都睇唔成。YOHO MALL既My Cinema反而場次多啲兼無話好似英皇同StagE咁一星期就落畫。十二點前都有早場優惠,$55張飛咋~~

呢齣戲其實係人家話想睇,故事話男主角對上一段婚姻只維持到3年,故男主角係第二次既婚姻向女主角有共識,三年後就再決定是否大家繼續走下去。正當共識時間將至,女主角每一日都以各種死狀黎迎接男主角回家。笑料之中,亦帶出夫妻維繫之道及難處~院內有唔少女性觀眾睇到喊,我就覺得坦誠以外,各方都要有共同目標及內涵才可以走得更遠。

晏晝係日本料理"穴"享用,午市定食好似比較抵食~

PS:晏晝大佬黎家訪,因為幸男約伯伯黎打SWITCH。首先玩MARIO KART 8,之後再玩1 2 SWITCH。

Deliveroo佬

中午之前,將中秋貢品香印提子及南水梨,安放係愛駒座位之下,出發去外母家。

上外母家交收生果,自己就化身做Deliveroo佬,將婆婆既愛心餐送去小學。

番工之前,係相熟茶餐廳食晏,座位下都有另一批貨,準備晚間交收。

收工番屋企前,騎跑羊去Brian樓下,其實係非常之咁順路。

交付既,就係之前買落既本地手工啤禮籃(除咗最右果支係英國FULLER)。本人就較鍾意少爺啤IPA同Pale Ale,但招紙上寫明攞奬既,係香港啤酒大浪灣。

諗清楚至開車

黃昏時份，奉命到約定位置等接貨。愛駒載貨量鋭減，每次出車都要諗清諗楚。

好似今日咁,為咗載貨,自己就要將銀包電話鎖匙放係腰包,再要帶個專用行李袋放係油缸前。由於香印提子唔壓得,所以花咗唔少時間去就位,用紙箱撕出黎既紙皮作間板....................

十號風球山竹

朝早起身仲係8號風球，仲可以搭輕鐵番工，但07：45就轉9號波,09:40就轉10號波。自己係工作崗位忙,台灣女生亦係屋企忙。公家路去水渠位被上游既樹枝樹葉同垃圾諸塞,人家要冒險出去以地拖刷清走堵塞物,幸好有鄰居男丁幫手。

P更同事冒住十號颱風番工，有啲坐公司定點接送車，有啲坐私家車。早更同事一心趕搭公司車番屋企，但由於太多蹋樹，路面情況欠佳，大家都滯留係公司……

坐咗個幾鐘，阿Jim老豆開車黎接佢走，我同Jason 都有順風車係輕鐵站附近落車(多謝占世伯)。路面除咗蹋樹，仲有唔少被颱風吹倒既雜物，包括鐵皮屋頂。

蹋樹除咗折斷，仲有連根拔。路上無行人又無車行走，到處都有破壞痕迹，有點似人類文明走到盡頭(walking dead或北斗之拳情節)…呢個颱風既破壞力，可以話係近乎天災。

唔通輕鐵站附近既屋頂，係咪由左邊既屋飛越行人路兼四條行車線呢？

比平日用多咗時間行番屋企，除咗不時要停低休息以暫避疾風，更要留意前方有無潛在被吹倒既物件。荒廢既鐵皮貨倉，鐵皮圍板被吹倒並堵塞行人路，幸好仲有一條小路可以兜，接替保衛家園。

PS:番到屋企時見愛駒安好，頓時覺得鎖大架功能好偉大～沖完涼攤係床，先感覺到腹部，大腿兼小腿好寃痛(逆風而行)。

語音導航硬件入手

兜入元朗,係近千色附近既鬼祟位放低愛駒,徒步行去千色二樓既手機配件店,為咗買區內至平既Nakamichi MyEars II藍芽耳機(price.com至平價$700)。臨上二樓前,係千色地下果層既Studio A逛吓,見賣成$9xx,心中暗喜~~

上網搵過一千蚊左右既ture wireless藍芽耳機,Nakamichi MyEars II性價比最高,因為可以左右單獨使用,變相係3.5hr X 2,夠晒騎羊去遠地方用。收納盒可以為耳機充兩次,點兜錯路都可以聽住語音導航番屋企。店員好好人,俾我係店內戴住頭盔試用,確保夾我個頭盔內綿。黎緊番原廠check車,就唔怕蕩失路啦。

其實有個再平啲既方案,但係大陸牌子,所以都係揀番日本品牌Nakamichi。雖然個模係向大陸買,但理應內件係自家設計。

夜晚同台灣女生係市中心蒲田食,無蟶子賣,所以叫咗蒸蝦代替,仲有蠔餅及扁肉湯。

元朗回程番屋企時已用新耳機配高德地圖，接受無乜問題，音量就要調至僅次最高。

夜晚用熱熔膠槍，將今日係燊光買番黎既地拖架黐上外牆，以後就唔怕大風吹跌晒清潔用具。

PS: 成功以新坐駕載人家番屋企～

特選星期六

開始習慣新拍檔既電子介面，以往只能靠油錶針及已行走之里數作參考，TMAX會係油缸尚餘最後3公升時作出提示(油錶計最後一格閃爍)，並會以fuel trip去提示後備油缸啟動後既路程。

放工兜去相熟油站入特價白金旋風，騎羊入元朗買宵夜。除咗肚餓，其實都想俾機會愛駒走動下( 平日番工短程兼多燈位)。

PS:排咗四個字左右就到手，騎羊番屋企同台灣女生一齊食。

開學週

開學頭2星期都係番半日，是日休假，所以去接放學兼食晏。

肚餓等食樣…校服仲係好直,應該無咩粗魯唔檢點行為~

拉麵上枱，幸男抹手準備開餐，呢下至望到佢後尾執頭髮好亂。自己細個時係番半日小學,每次見幸男要番成日學,都戥佢辛苦。

家居星期六

忙咗成個下晝,卒之都完成黃金十二宫聖域~今次以前6後6既隊式排列，各人手攜著頭盔，好似影畢業相咁。

夜晚係屋企食BRUNO火鍋，海鮮食材當然唔少得, 始終係屋企抵食啲，至少飲品慳唔少。

新買既空氣清新機，除咗用黎除裝修既VOC，更可以散去火鍋過後既氣味。

裝修過後，客廳多咗空間，幸男可以係地下碌住黎玩。

臨訓前，幸男要人家陪玩鬥獸棋。本人一向唔太有耐性於棋盤,但幸男自從小二老師介紹棋藝之後,要求婆婆及媽媽買棋。

Keyless的匙扣

夥拍新坐騎已一星期,除咗車重,車高及系統性能外,更要適要銳減既載貨量。平日安放係前方收納空間既御守,直接用作keyless既匙扣,因為袋係褲袋時好難掏出黎。御守表質細軟,唔怕會刮花keyless硬殼,而且效果非常日系~

生活亦重回舊軌,可以輕鬆落燊光食晏,及於藍地買簡單日用品。

夜晚番老家黐餐前,同台灣女生及幸男係市中心星巴克坐吓,見有新飲品ICY COLD推介。

杯蓋獨特既設計，方便客人直接呷入頂層豐厚既奶泡,以漸進式去中和突如其來既Espresso勁道。

密室開機事件之BRAVIA sync

搞咗成個幾星期，以多個HDMI線接駁模式及電視設定,卒之都搵到破解sound bar平夜自動啟動問題。平時以ARC經SOUND BAR出聲時(如打機及睇MY TV SUPER機頂盒),OLED智能電視要設定BRAVIA Sync。

其他HDMI器材都會被智能電視認知及聯系,理應會作出最佳既輸出。當熄電視及SOUND BAR時,可能會有電子脈衝流動,令SOUND BAR以為電視已著並需以ARC經SOUND BAR播放聲軌。

只要熄電視時,係設定上將BRAVIA sync關上,就可以避免說明書上無記載既常遇問題。

第三代坐騎:TMAX 530 DX

十二點前,趕得切去太子萬里達攞車。太耐無買車,兼且上次以上會形式買車,完全唔記得要準備現金俾尾數兼其他雜費(行車證及布冚),搞到要行去附近既櫃員機㩒錢。行番去車行時,已見到愛駒安放係店外,當然忍唔住用手機影吓相先。

其實呢次係我第一次見到實物,好有古時憑相揀老婆既感覺。由於TMAX存貨量少兼搶手,客人只可以訂購形式買車,無法係車行睇陳列(陳列車都會好快賣出)。消光藍既主色,帶一點紫藍調。粗獷外型之中,亦帶有精細既線條美,婉如著上修身剪裁恤衫既大塊頭。

由於要等安裝椅背,先去搵地方食飯,無意中搵到間新開既泰式食店,計埋凍飲成$69。

見仲有時間,去埋花墟既GIT攞訂購既幸男專用頭盔(細碼J.O系列)。

果然係啱啱運到香港,24/7至出廠咋~明知電單車收納格無法容納紙箱,所以只係孭住個頭盔走人。

原定跟住google map語音導航去加德仕大坑東站入油,點知一個前200米右轉既落差,令我迷路至楓樹街......得一格夠行30公里既油,情況令人著急,幸好見到南昌邨,安心走上相熟西九公路歸家,成功捱到老家油站。

闊座墊兼座高800mm(雙腳落地模式,只可以前掌觸地),加上近個半月既真空期,令我有P牌新手上路既緊張感。50:50既車重分佈,15吋鈴配上800mm之座高,530cc雙氣缸既推動力,調製出優越既操控感,重拾學棍波車時既感知。新搭擋無視汀九之夏日橫風,於公路上一直安穩疾走~

與二輪立下契約,直至體力不支的一天。上一代坐騎與我夥拍了12年,如TMAX 530 DX可以走12年的話,屆時我會係一個50歲既銀髮族~

後座椅背,除咗添加一分休閒風,亦給乘客一份安全感。本人好喜歡車尾燈之分離佈局,以及獠牙式白光頭燈。

KEYLESS系統之外,把手上仲有唔少制鈕,真係要花點時間去摸索及牢記。尤其係店員叮囑我,記得泊車後按"off"鈕,並確定TFT屏幕關閉,否則一至兩個鐘就搾乾電池......

以往可於座墊前方爭取落腳停車既空間,但新羊座墊最前端係硬身車殼,一唔醒起就"un"中.........

車冚唔係舤布料,所以輕身兼摺埋都無咁佔位置。起初仲擔心是否啱有椅背既車款,結果都係非常匹配。

頭盔專用既櫃間，卒之齊晒一家三口。

另外購買既行李袋(龍骨位之上)未能收納J Cruise，但順利容納幸男既細碼J.O。

SKYWAVE 250SS座位下既收納空間能吞下兩個全面型頭盔兼布冚,但TMAX 530 DX就少了一個全面型頭盔。平日外出補給日用品,唯有用埋放唔到大人頭盔既行李袋~

PS:晏晝入完油,兜咗去新墟睇幸男踼波,順便向幸男介紹新坐騎。