海鮮粥

平時唔太好粥品既我,真係唔病都唔會食一口粥,但面對呢碗海鮮粥,就另當別論~

今晚番夜,群姐話會煲粥,經過一輪磋商,我同哥頓都話想食蟹粥.起初都擔心群姐會就咁落幾條蟹柳(當蟹粥肉),豬潤(當係魚肝),鮮蝦腸粉(當蝦肉),黎冒充海鮮粥之名.

結果見到既係真真正正既蝦隻同蟹件,群姐仲話拎番黎時啲蟹仲會郁.味道當然係好味又唔齋啦~番夜食啲好食既野,係一種慰勞,因為實在太攰同忙了..

合理vs理想

今日番晏,個場正到爆,27友.我覺得開心唔單單係因為工作量少咗,而係可以花多啲時間落啲客仔上(無理者除外).足夠既人手,對客仔同自己既保障都多啲嘛~

係呢個行頭,無咩客觀標準黎反映工作表現特出.應該話係,攞得個牌,就當你係若干特別程序勝任同唔會出錯.行內無咩等定既公認持續進修課程,大家都只係報吓啲有興趣或hot topic,頂多讀個master係較有威信既學歷.

始終呢個field係將人地既野炒埋一碟,咩都識啲咁,但決策權唔高,有時仲有啲似係做個中介人咁既角色,所以我本人都幾接受para-professional呢個詞彙.

以前有諗過想做一個硏究生,可以致力去創造或改變一啲事物,就算唔係自己一手做,至少係有份去參予同付出,但好可能工作性質同而家既工種差唔多(唯命是從).不過一個個既project,好似感覺會好啲既,起碼無咁重覆嘛.

有諗過會再讀多少少書,但絕對唔會再係向上,而係橫向,增加自己係呢個社會上既生還率.講到底我都會做好呢份工,糊口其一,其次係因為有我需要守護既人~

繁忙的新界西人

朝早送過人家番工,騎羊番屋企洽咗個鯪鐘,就騎羊去新墟剪頭髮.由於早咗到,間野都未開,於是去咗銀行"唱"定啲$10紙黎發帖用.過咗十點行番去望,都係未開,於是行番去市中心既銀龍樓上間七仔涼吓冷氣兼睇有咩雜誌買,結果俾封面吸引既cg迷住咗,俾錢帶佢走.

再行番去間salon,卒之都開咗,相熟姐仔係門外同友人吹水.我向姐仔打招呼兼指向店內,示意入唔入得店內.姐仔叫我入去坐住先,啲細既未番.後黎姐仔話幫我乾剪住先,驚我要等得太耐.傾吓講吓,咁又剪完,不過好似短咗啲....

騎羊番老家收吓信,因為我仲未轉晒地址.見到間房又比上一次番黎攞信時亂同多雜物,大大部laser printer,一堆一堆既雜誌....算吧啦,我當年都只係周家門下既食客,而家出走,當然係更差啦.

番屋企放低啲野,就再騎羊去公司,因為今朝同羊仔送人家番工時,人家攞留咗個飯盒.公司停車場多咗個排骨位,唔知係咪有見愈黎愈多人開電單車呢?上到人家既單位,走向文員,問"唔好意思,我想攞啲野俾xxx".文員姐姐望一望我,"哦,送飯盒"跟住就幫我叫人家出黎,交收完畢,我就落番去騎羊仔歸家,幫羊仔清洗同打腊.

抺車期間,隔離屋既兩兄妹小朋友走過黎,係咁搞住我,又擒上羊仔坐.問呢樣又問個樣,一人一句,好混亂!

"唔好踩死氣喉","唔好敲尾燈殼","唔好篤個錶版".....最後要表明立場,如果佢地再係咁我會嬲兼鬧人,兩位小朋友至肯離開......但都繼續係附近追逐同玩波.

三點半至搞好隻羊,沖得涼同換得衫黎,四點至出門.上咗架53,行下路,勁多燈位同站頭,用咗十個字時間先出到荃灣.......由地鐵站起,經天橋同商場,去到酒店搵黃小姐攞帖.跟住行番去荃豐兜個轉,就去搭地鐵去太子會合人家.

同人家一齊上金都搵番之前係婚紗展睇中既印帖店,由於人多,等咗一陣至可以落order.當俾店員尋根究底既查問時,真係有啲不是味兒,有邊個想個婚宴咁唔人和丫.....最終決定用自己名義黎出,九月七號再黎對稿.

跟住我地又趕去下一站,尖沙咀既場地佈置公司.又係人多,所以要等一陣,sunny哥依舊體貼同幫得手.傾吓傾吓,成個design同之前唔同咗好多,但價錢反而平咗少少添.傾咗個半鐘有多,成九點至走人.

我地係位於北京道一號樓上既呢間日本食店用餐,貪佢平均消費較平(資料來源:雜誌附送既飲食指南).野食嘛麻地,只係個白汁蟹肉焗飯,又平又好食($40),總括其他野食,好似區內既惠比壽仲好食啲~~

值得一提既,都係可以係窗口位望到維港view.食完飯,搭260x番屯門,再轉的士番屋企.安頓好人家後,再坐andrew車去佢屋企試吓紅酒同傾吓計,今日真係有啲充實得滯........

ps:今日買既雜誌又幾多野睇,好過HIM同風度.

會展遊

今日同台灣女生出咗去會展既婚紗展,本來其的係買餅劵,但目標餅點(美心)今期竟然無擺檔.....自己又買唔成,又幫唔到阿潘買添.

行行吓,係一個紅酒檔試吓啲紅酒,本來都諗住快快搞掂埋佢,但打過電話俾andrew問,都係等埋同佢一齊試先.
四圍行吓,見到我地book咗個間攝影公司,之前又話唔會係會展擺檔sell客既,呃人~~

睇咗好幾檔回禮小禮物,一黎唔實用,一係就唔靚.結果睇中咗個中式簿皮既memo pad,實用嘛,起碼唔會好似收咗份垃圾或者係真情唔會帶番屋企丫.正當要俾訂時, 人家就話好暈同想嘔,檔位姐仔俾咗張橷人家坐,又用裝住外賣老麥既膠袋俾人家嘔.可能係場地太焗,人家唔太舒服,空肚又飲咗少少紅酒.
抖咗陣無咩野,我地就行埋樓上個家居用品展,買咗兩樽碧連潔白劑,行個轉就去搭車走人.

番到屯門就同人家係坤記食個粥餐,清清地,送人家上的士番屋企,而我自己就係市中心等埋阿潘,percy同阿強坐既的士一齊去黃金飲野聚吓~

飲完野,阿潘同阿禮話肚餓,要去新墟24hr老麥.我就跟大隊上的士,不過只係買咗個漢堡包外賣俾人家就再截的士番屋企.

入到客廳,人家真係乖乖咁訓係梳化度,電視仲係著住,而係梳化貴妃椅一角既nds就閃住綠燈(standyby mode)睇黎人家係打機打到攰就合埋個芒,擺埋一邊就訓.

我用袋外賣黎"香"醒人家,但不湊頝,於是將個包從個外賣紙袋裡拎出黎.香味果然倍增,係人家個鼻前揚黎揚去,最後人家都因漢堡包既香味同包裝紙既質感而甦醒~~見人家話抖完好啲,再食晒個包,先至安心啲.

放假男

咁早起身,唔係我番早,而係台灣女生番早班.人家忙於梳洗,而放假既我都有野忙...

就係係厨房為人家準備外賣早餐.無咩厨藝天份既我,只能夠為人家制作炸急凍薯餅同芝士炒蛋三文治.入好晒保鮮袋同食物盒,換過件衫就騎羊送埋人家番公司.

人家食早餐時特意用手提電話相機影咗張相,話啲芝士俾炒蛋既熱力溶化,變咗蛋同芝士融為一體咁.人家話口感唔錯,但本人覺得都只係入得口既水平,呢啲簡單野又有咩特色或驚喜可言丫.....

晏晝接埋人家放工,騎羊去市中心既美心皇宫飲荼,叫咗盎灌湯餃食,又真係幾食,啲湯有翅同瑤柱,好味~啱晒鍾意飲湯同食餃既人家.

其他點心都唔錯,人家仲話啲蒸鳳爪好"綿"又入味.埋單百三蚊,感覺環境同味道都好過稻香~

有幾好食?你睇人家邊搣住個叉燒包食,邊望住出邊車仔有咩食就知喇~

係市中心買埋啲餸,夜晚係屋企食.人家煑飯,我就吸塵同拖地.飯後一齊睇租番黎既"戰狼300"dvd.齣戲都幾好睇,絕無冷場,劈到頭甩腳甩手又甩,血花四濺,slow motion,血腥得黎又有啲藝術性,配樂激昂,值得一睇~

高效率

今日番早忙到嘔,早餐前風平浪靜,早餐後驚濤駭浪.放工去咗制服倉將啲舊衫褲報銷,好多都係洗到縮水,唔啱著.其實之前已經攞咗啲新,今次只係交番啲舊貨.

三點鐘至騎羊到置樂食晏,平時食開既單身漢燒味粉麵餐都加咗價($16>18).上咗去相熟商場行咗個轉,無咩心水,跟住行去藥房買柔順劑同藍威寶,騎羊去何福堂附近交石油氣費,再兜番去吉之島超市買紙巾.

見相熟品牌呢期以狗仔做招徠,於是邊奸笑邊排隊俾錢,因為人家怕狗嘛~~番到屋企好鬼攰,沖咗個涼,係梳化攤咗陣,七點鐘多啲又再騎羊出街.

先係埃索油站,等老豆落輕鐵,俾隻保溫杯同生日"小心意"過老頭子.老豆收過禮物,臉帶笑意,都有啲欣慰.雖然唔能夠令佢既生活環境有咩改變,但總算能讓他知道,仲有人會關心佢~

叮囑老豆袋好啲野,唔好就咁插係心口袋.老豆繼續踩單車番入村,我就騎羊去市中心.等得燈位黎,咁啱係村口油站撞番老豆.老豆問我做咩兜圈,我就話要經村內小路過番對面線去市中心.講完"小心啲啦",跟住我就俾油走人.兩父子一個踩單車,一個騎電單車,有點搞笑又微妙既感覺.

放低羊仔,行咗去日本城買抽濕器.雖然買得兩pack三個裝,但都幾大舊吓,所以先將佢地放係愛羊既行李倉.走番去影視店租埋隻"我愛籮霸"dvd,再係超級市場買咗一大袋野飲野食.一心諗住食老麥,不過抽住咁大袋野黎去搵位好似唔係太放便,於是重施故技,將啲貨放交俾羊仔看管住先,自己就孭住個頭盔去food court老麥食單身漢餐.

用咗唔夠三個字既時間食完個餐,買埋件italian tomato既士多啤利蛋糕,就騎羊番屋企落貨.帶埋人家既專用頭盔,兜番公司接放工.一日之內趕做咁多野,真係好攰......

收相簿

接過台灣女生放早班,騎羊去市中心惠比壽食晏.跟住就行咗去租碟同超市買餸,再騎羊去新墟街市買多少少野,急急番屋企準備晚飯~

係屋企食飯除咗係舒服啲,唔係同人迫同等位外,就係要等收四月份影既婚紗相簿同油畫啦~鑑於婚紗公司話六點至九點會送到上門,所以我地叫埋伯母一齊係屋企食住黎等收貨~

大約七點點左右,收到送貨公司既電話,於是出去門口收貨,人家話好似收兩個大pizza咁~~

食飽飽,執好枱,就開始拆pizza啦.人家話相簿盒有啲似用黎裝麻雀,但我就覺得幾靚丫.相簿比預期中靚,但無戴眼鏡既樣子又真係爭啲.人家同伯母都好滿意啲相,都總算有個交代~希望快啲可以收埋關島個本相簿啦~

O

朝早騎羊送過台灣女生番早班,去埋建生買麵包做早餐就番屋企,食飽後再訓.

訓到近十一點,收到andrew既來電,約係市心食晏.十二點九到稻香搵位飲茶,點知鬼咁多人,仲撞到豆媽係度等緊位添~~間間酒樓都人頭湧湧,唯有去食茶餐廳.本來個天都只係厚雲,所以至騎羊出市中心.但點知食完晏之後,開始落大雨,於是滯留係市中心買吓日用品,並叫人家自行搭的士番屋企先,未能騎羊接放工...

買埋yui既cd同煲劇情緣,見雨勢無咁變態,就著住雨褸,冒住雨騎羊番屋企.

今晚同大姐大佬,以及一眾圍內人,一齊同新星打邊爐.其實由舊年冬天起已經想去試吓,令次卒之都去得成.

久違了的熱情

今晚我同楝哥一齊去睇Brett Anderson,事源早幾日楝哥send sms俾我問我有無興趣去睇Brett Anderson concert,我當然一口應承啦.本來今日我要番晏,但多得先兆全既仗義,我至可以掉到番早更後去聽~~

預科個年,楝哥都有買suede既cd,我都係借碟聽至認識到Brett,佢把聲真係好正,加上band sound又幾合我心意.student training時代,suede有黎過香港開concert,但都無睇到,無腳嘛,但好似班中有女同學幾個一齊去聽.今次可以同中學書友去聽brett既live,感覺好似番番去中學時代般,記起pe堂同楝哥坐係球場偷懶傾計....

我地坐係藍區,開場前大家都乖乖咁坐係自己個位上.直至熄燈開show時,大家都進入瘋狂狀態,衝出去台下,有人係最前個幾排橷企係上面.本來楝哥無咩意思衝出去,但見勢色不對,"唔衝出去唔掂喎",我就帶領楝哥一齊衝埋一份,但最前既櫈位已經俾人企晒,於是我地睇中咗係頭幾排座位後既鐵馬,企係鐵馬條橫欄上面黎睇,如果唔係就真係睇唔到Brett既上半身0架~

雖然開頭啲新歌無聽過,但都好好聽(只係佢把聲就足以令我好似啲死0靚仔咁,衝出保安防線),可惜去到半個鐘後,Brett把聲開始有啲失準,高音有啲去唔到,可能係巡迴concert既消耗卦.Brett既台風,一如以往般"姣",正.一手流星鎚式"fing"咪,另一隻手瀟灑清脆咁凌空接番住個咪,型!(可唔可以apply平時番工既procedure度呢?)拍手,蘭花手,脫衣舞式除去外套,跳唱,跪地.....每一個動作,每一粒音都令台下既fans情緒高漲,舉手又狂呼,四處亮著dc芒.

十點開始encore部份,suede時代歌放出,beautiful ones,everything will flow,trash....全場大合唱,內儉既我都有唱埋一份呢

,原來live同自己係屋企聽cd既感覺真係可以差好遠喔~~

十點半完場,會場著晒燈,但台下觀眾仍然唔願走,係咁拍手,再叫encore,大家好似好唔想個concert完咁~盡興而歸,同楝哥一齊搭961番入屯門,係車上傾吓心事,都好耐無同佢兩條友出黎聚吓.操fit咗既楝哥真係好sharp,我係女都想挨落去丫~~~

由於live張相太細,所以特意係網上search咗兩張相俾大家睇吓Brett有幾型.

楝哥話佢個樣無咩點老到,而我就話"如果第時我老咗都好似佢咁型就好lu"

兩週月

晏晝三點同台灣女生係屋企食過日式炸蝦拼雞堡飯(由小弟主理),點解咁晏至食?因為我地今晚六點半要出到佐敦既童軍總會參予公司高層既公開論壇.

晏咗少少,六點九個字至上到去場地,地方又真係唔太大,一眼睇晒,同行同其他department都提出同工不同酬既質詢.不過見到連一間房都逼唔爆,又真係覺得大家有啲唔太熱心自己既福利同仕途.....

你有你既不滿,高層有高層既盡咗力,仲話係企我地個邊添,只係政府俾得唔夠多錢.高層人仕們又話唔知而家地區分店仲係以point13黎簽約,一係就係扮儍(表現出公司既奸詐),一係就中間有人違背中央指領(表現公司組織既行政鬆散).

係兩個鐘頭既論壇中得出一個訊息,2000年後入職point13既人士會劃一提升到point15,同最新入職既新力軍同酬,但其間既年資就係得補番point,加上幾時會加番去point15,就同普選一樣係無時間表......

高層話係不公平之中既一個改善既開始,未來會逐一去更改(唔知係咪空頭支票).本人覺得今次受惠既同袍唔多,如果做咗四年,都由point13升到point15啦,但其實佢地應該得到point17(由15升到17).只係入行少過兩年既point13同袍至可以直接得到原有既福利,而且仲未有確實執行日子.

八點半散場,同雞脾伉儷道別後,徒步行去朗豪坊food court食鐵板快餐.本來諗住去特別啲既地方食,但由於要出席forum,兼且我聽日又要番早,所以都係簡簡單單咁食餐晚飯.由於太肚餓,去咗pacific coffee飲杯咖啡同分一件藍梅芝士餅黎食.雖然係無咩特別,但今日由我騎羊接放工起,我地成日都係無分開過呢~

ps:高層們話另一位管理人仕周一獄要去出席馬術比賽場合,未能出席是次論壇........

九龍灣半天遊

今日同台灣女生出咗去mega box,不愧為暑假,係德福等接駁巴士時都花咗20分鐘,實在太多人等車啦...四點幾到埗,一入去就見到個扭蛋場,不過要俾五蚊至可以入場,即係點都要你扭隻至可以入去.我就乘上電梯時,影底呢個咁壯觀既場面~~

唔知今期係咪以扭蛋黎做招來,上到四樓都見到扭蛋dsiplay,隻蛋都幾大架,話晒都可以容納三個攬上身既毛公仔噃~

五點左右,行完b&q同spotlight,攰攰地,見有間叫cheese cake cafe既食店,就急急拖人家入去.店內格局都幾英式架~~

人家叫咗個american cake配cappuccino,我就叫咗件new york cheese cake配cafe o'lay.人家話啲蛋糕好食過pacific coffee,本人都有同感,而且呢度係有正餐供應,晏晝同晚飯都可以,不過無望menu,唔知貴唔貴.

本來一心諗住係b&q買塊厚啲既窗紗用黎遮客廳同走廊,點知一肚氣.睇啱一款,寫住$120/m,諗住買一米都夠啦.職員哥仔問我地要遮掩既尺寸(2m X1m),點知哥仔話要買三米,即係要成三百幾蚊,佢話一米其實唔係話fix死兩米高,以闊度既米數黎計,佢地既一米布係無兩米咁高.當人家話咁我地照買一米或兩米,又得唔得(自己打橫塊布黎掛咪得囉),點知哥仔話唔可以,而且有多既料係唔會俾番你,咁咪變相係有最底消費?又話啲野平,呃人!!

其實啲窗簾係有大陸公司既標籤,人家話雞脾嫂都係呢度搵到係大陸買個款窗簾.其他賣既野又好以係建築材料同工具多,現成既家具貨品好以幾少吓.講真係香港幾多家人可以買鬼咁多材枓番屋企擺,再得閒自己又鋸又釘丫?好似外國咁個個都有後花園同工具室咩?

spotlight啲款都好似麻麻地(老土),而且價錢都偏高....最後我地都係搭番穿梭巴士番德福,去番ikea睇,買咗一pack兩瑰,都只係兩舊水多啲.

由於行得夜兼晏食cheese cake下午茶,成十點我地至去元氣食晚飯.姐仔話15分鐘後就截單,十一點就打烊,問我地仲入唔入座.我地照入去,一坐底就落晒order,結果我地十點四個字已經食完兼叫埋單~~

ps:係lovely lacy買咗分新婚精品,當係周月日禮物,人家好歡喜~

潛入

今日接過台灣女生放工,騎羊入老家進行"拯救人質",目標;未經開封既超獸機神超合金,以及其他值得持續收藏既玩具同私人物品.

整個拯救行動係半個鐘頭完成,呢樣又拎,個樣又攞,結果兩大袋紅白藍袋.同人家拎出去路邊,call部的士,等咗唔夠兩個字時間.搬晒啲野上車,我就一個人騎羊緊貼人家坐住既的士番屋企.

鑑於近期老媽手段太過激進,為保收藏品之安全,所以進行是次行動.我既房間已變成一個雜物房,沒有打婦,一陣味兒,家人有幾想我番黎,可想而知.只係口講話在乎,但好多細節上可以睇出只係想控制,沒有一份尊重同體諒.要控制一個人既思想,實在太可怕......

風雨的一天

本來約咗十點半去觀塘原廠check車換機油,但送完台灣女生番工,番到屋企又訓到十點有多至起身.換得衫黎要成十點半至出車,中途係葵芳上呈祥道開始挨雨(條路已經夠"櫈"架啦....

),dum到黃大仙就晒太陽,名符其實"日晒雨淋",約十一點二十分到達原廠(咁辛苦至安全到埗,當然要影番張相啦).

報上車牌,交底車匙,就借厠所換衫.見天色唔好,早就帶定件spare衫.點解唔著定雨褸先?因為出門時係藍天白雲,出猛太陽,著住雨褸黎等落雨會好鬼熱,加上天文台都只係話局部地區有驟雨及狂風雷暴嘛.

睇多陣陳列電單車,就出發去相熟茶餐廳食晏.點都係忍唔住要回頭望多下愛羊,確定佢"羊"身既安全~

計埋八五折(13:10前埋單優惠),用三十一蚊就食咗呢個餐,仲係餐廳睇咗陣三色台既"惡作劇之吻"添~

食完飯,行咗去apm殺時間(等師傅搞好架車).收到老豆來電,話老媽問聽日會否出黎食飯當同老豆做生日,但叫埋人家同伯母出黎.咁咪又係困獸鬥兼且係迫講數?我一口推咗,仲同老豆講,咁大個人要對自己做過既事同講過既話負責,就算係阿媽同大佬都一樣,唔係咩都可以打橫黎,傷害別人.老豆不選擇反抗,但我絶對唔會妥協為免正面衝突,唯有避重就輕.

無幾耐收到原廠打黎,話可以攞車,於是又行番入工廠區.師傅話個綿格架變咗形,幫我換咗,可能係熱得滯變形.如果唔理,吸風入engine時會帶埋啲污糟野入副engine.原廠就係有呢樣好,咩零件都有,唔怕幫你溝啲雜廠parts整壞架車,人工貴啲都係咁話.
13:20走人,全程都無落雨,14:00就番到屋企.幫羊仔抺去包圍上既雨水及機油污漬.之後見手提有miss call,有voice mail.打去check吓,得知伯母話老媽打去騷擾佢,十次有多.另外,再有老媽既留言,一大堆難聽既說話,我無聽晒整過留言就删除咗.
打去問伯母,原來老媽問伯母有無說服我同人家.伯母答咗話要講既都已經講咗,但兩個後生既點做又真係管唔著,迫唔黎.點知老媽係咁猛打人地電話,又係咁講難聽既說話,"你地霸住個仔,你地勝利萬歲啦.....(下略)"

五點半左右,老媽打我手提,"卒之都肯聽電話嗱?"我叫老媽唔好再做啲騒擾別人既事(打電話),既然佢自己都唔肯承認自己既過錯,又有咩相商餘地,有咩好見呢.佢始終唔願去面對屋企搞到咁唔開心,都係佢既大話,手段,無理,專蠻.我真係唔想直指母親既不是,但無奈都要講出.

一如所料,得唔到佢自己既目的,就會發難,係電話大吵大鬧,一大堆難聽既說話,出言挑釁,聲大夾惡.說理無效,我唯有鬥大聲,瘋狂般對住手提咪位大叫大喝,再cut線.令老媽知道唔係得佢一個可以發難同唔尊重別人,讓佢知道我係唔會對佢既粗蠻行為妥協.

我忍唔住,打咗俾阿婆.同老人家講出我既實況,家中既內患.原來老媽真係隠瞞晒所有自己傷害家人既事,只係話老豆同我點對佢唔好.阿婆都話明白我既做法,知道老媽既無理同過份.我講明家中既事,只係唔想阿婆覺得有個孫仔變壞咗,當初信錯咗個女婿.講真,佢老人家仲有幾多時間,我真係好想同阿婆同阿公一齊食餐飯,影張相,但我真係迫於無奈....對唔住,兩位有份湊大我既老人家......

區內購物

番完夜,冒住細雨騎羊去建生買早餐後,立即番屋企.雖然夜晚唔係好忙,但放工時已經好攰.食過早餐後,就體力不繼,攤係梳化度訓咗個幾鐘至起到身(起身時外面落好大雨),去厠所沖涼,再入房訓......

訓到點幾鐘起身,騎羊送台灣女生番工司,落完客,就同羊仔去市中心.行咗陣超級市場睇吓有咩好買,再行番過去新墟吉野家食晏.途經idc時,見到有部軍曹轉眼鎖匙扣扭蛋機,於是掏出兩個五蚊銀出黎.

一心諗住扭水汪汪版keroro,其次就係嫉妒版tamama,點知結果係怒火版giroro.由氹人家歡喜,變咗係氹自己......

食完吉野家下午茶後,行番去市中心,係惠康買咗一大袋野,仲要係臨俾錢時,諗起未買柔順劑,於是"騰"番入去攞貨,跟住又醒起未買殺蟲水,結果又"騰"多一次,最終都買得齊啲野.

行番去吉之島買番隻保溫杯俾老豆,因為搬走之前都見佢用膠水黐膠邊,希望佢老人家會感受到一份小心意啦.

老豆,生日快樂~

朝早番工時,趁未太忙時,send咗個短訊俾老豆,無幾耐佢就打黎講咗幾句添(大家都係番工時間傾電話).係電話裡聽得出佢老人家都開心係今日收到個sms.未能同你食餐飯,實在對唔住,希望你知道我已為你準備好,只欠你肯多行一步.你不是孤獨的,由細到大,你都係我尊敬既爸爸.

放工同人家係秋田食過晏,就係吉之島買魚生.再騎羊去新墟既樓上燕窩莊買特價帶子.當人家同主婦們揀緊貨時,無意中俾我發現有鱷魚鞕賣,一盒兩舊幾水(有兩條)真係無諗過有啲咁既野賣~

訓咗兩個鐘多啲,就起身梳洗,兼享用人家準備既日式晚餐,真係辛苦晒.番夜前可以安在家中食飯,係最舒服既.

元朗晚飯後記(氹仔)

尋晚同台灣女生騎羊去咗元朗間氹仔食飯,事源上次係泰鍾意埋單時醒起好耐無黎呢間野食飯,掛住啲芝士汁,所以今次特意再回味.

頭盤我地叫咗個辣酒煮花螺,雖然係要成$88,但真係好食又惹味,而且隻數都唔少,超過三十隻o架~

主菜係芝士汁焗中蝦,啲芝士汁真係好好食,於是我提議叫客蒜蓉包黎"醮"啲芝士食,結果出黎既味道係好夾好正~

可能係啲芝士太飽肚,我地都食唔落最後先上既燒魷魚吊筒飯,只係食咗幾舊,剩餘既大半都係要打包走~

人家同我地都好滿意呢餐,相比上一次外出晚飯,真係天堂與地獄之別.....

ps:人家諗起好耐無去泰源大排檔,搵日放假騎羊入火炭幫襯吓先~~