朝早起身梳洗,騎愛駒送幸男番學。唔洗孭書包兼點對點到埗,幸男當然開心,不過始終都係媽媽好~
就啱時間,近中午時份出去葵芳區廠既盈康陳列室。其實之前問過hernia帶,但話6月至會番貨,所以今日出去攞貨。
跟住語音導航出發,確實係唔會點蕩失路~如果搭巴士再行過黎,都真係會耐啲兼無咁開心。再次輸入目的地,安心踏上歸途~
同台灣女生夾啱時間,係幸男學校附近泊好愛駒,走去攞定位等倆母子入座(放學時間多人嘛)。
人家送幸男上婆婆屋企,我就去老豆屋企交收貨物,再番屋企放低愛駒。預啱時間搭輕鐵去兆康站,會合人家搭西鐵入朗屏。
之前係Cozzi 掛單既按摩店換政策,酒店分支要獨立套票,所以今次去咗朗屏Rainbow既分支。帶住口罩黎被按摩,真係有點未能達至放鬆為主題。趴係度按背個段時間,呼吸確實比較困難及不適(技師應該都比平日吃力)。
按完都近6點,兵分兩路,我去V city牛角等位,人家上外母屋企接幸男。幸男當然鍾意食燒肉,其實爸爸媽媽都係～
疫情下餐廳有生啤供應已屬難得,仲要係$48,點可能唔要番杯！
除咗信用咭套餐之外,我哋仲散嗌咗份和牛拼盤(放大假食好啲)～
PS:自從市中心間金舌結業,我哋就轉咗黎V city既牛角。雖然舊址轉手為放題形式既牛角,但質素比唔上金舌 (即使大家都係做放題) 。
