珍貴既認同

平時番工,唔俾啲客投訴都偷笑,但今日竟然收到客人既花籃同鮮花,答謝我地一班同事既服務,心中有點安慰之餘,又有點唏噓.工作量咁大,資源咁少,各同事點盡力都好,個system根本就支撐唔住咁大既客源,加上客人又咩都要快,講條件.

其實係資本主義社會,一分錢一分貨大家都應當接受.無理由一千蚊可以買到個3G五百萬像數既手提話卦?五十蚊可以食到芝士龍蝦伊麵底卦?

講真,其他收費較高既同行公司,都唔會接受一啲太多野搞既客人,因為風險大,平時只會收啲輕手啲既CASE,但錢都係收得貴,逐個SERVICE同ITEM同你收,唔會好似我地間公司咁,房租一口價,全包宴.你係有choice,你簡得呢間公司,就要接受個服務水平,因為係你簡,無人迫你,付擔得起既,去搵其他同行公司幫手就好了.

社會既風氣又好鼓吹投訴,報紙雜誌為咗炒作,住住會大造文章,令大眾先入為主,抱住負面既心態.係日本ZARD既主音"土反"井泉水件事,人地有無話咩不滿,索償咁丫?

人應該為自己既選擇負責,而唔係將所有不愉快既事推到別人身上.手機壞咗,維修中心好多人等,係花時間,但無法子,鬼叫自己無係較人少黎既時間排隊,鬼叫自己無錢可以好豪氣咁買過部新既,鬼叫自己買著個品牌係麻麻地既,鬼叫自己唔少心跌咗個電話落地........而唔係對住啲姐仔哥仔發老脾,黑面,投訴,頂多係意見箱寫隻字話想多快啲啫.

呢個果籃同鮮花,令我感受到久違了既人情味同體恤,以及認同~

ps:讀書時都有聽zard既歌,原來"土反"井泉水已經四十歲,不經不覺間,自己都快三十歲,要好好珍惜現有既生活.

綿羊整備班

要keep住愛羊清爽俐落,人見人愛,除咗羊仔個款夠長青之外,最重要就係點樣打理佢啦.呢個箱就係呢四年黎,肩負打埋前任同現任愛羊既重任~

咁究竟呢個箱裡面有啲咩架生呢?等我同大家講解吓啦.

1) "省"銀膏: 用黎清去電鍍部件上既污漬(側架,牛角,軚,側鏡),效果比用普通水抺洗,更為光亮.

2) soft 99車腊: 日本品牌車腊,定期打腊既必需品.

3) soft 99膠品噴劑: 係seat位,羊身膠質部份噴抺,加強保護,防止老化龜裂,清除殘留係膠質parts上既腊漬.

4) 士啤頭盔套: 當正規頭盔套清洗完又未乾時,可以頂住檔先,係行李倉仔收放頭盔時唔怕整花.

5) 原廠碟鎖套: 用黎收納六角匙,換電時必備,由於太貼身,所以用一個既索繩布袋黎收藏碟鎖放行李倉仔.

6) 鈴木原廠工具包: 有簡單維修愛羊既工具,較常用係校側鏡既spanner(長期放係羊內),其他得個"擺"字.

7) 海綿雙面膠紙: 用黎貼年年更換既行車證,貪佢夠穏陣.

8) 衣服袋: 用黎收納飽受風吹雨打既布冚.揚一揚,摺好佢就隔住呢個袋黎收係行李倉仔,保持倉內清潔衞生.

9) tyre錶: 朋友們送既,由於我成日都係量度時放晒啲氣走,所以都係當收藏品,平時係油站打氣check就算.

10) 大塊布: 用黎墊住行李倉仔,定時更換清洗,保持乾淨.

11) 即棄手套: 保護住雙手黎進行清洗打腊,超市有得賣.

12) 抺布: 係雜貨鋪買既"祝君早安"或地踎平價毛巾都得,用黎洗抺同打腊,記住唔好買咁厚身.

除此之外,裝水既膠桶,洗擦腳踏地台既毛擦,沖走tyre鈴或其他車底部件污漬既壓力水壼,都係不可缺少o家~

記住,渣電單車唔代表要做污糟貓

斷背山

呢齣戲,當年係城中熱話,同性戀不再叫gay或者係lesbian,只會叫"斷背".

人們往往被社會價值所束縛,兩名男主角真心相愛,但由於世俗社會既唔認同,唯有放棄一齊生活,各自找個異性伴侣,組織一個社會接受既家.結果,兩個家庭都係唔開心,一個離婚收場,一個冷感婚姻.當其一個男主角死去後,另一位男角才後悔當初放棄一齊生活.

有人話同性戀會令社會變成絶後,無下一代,但如果個個都信佛出家,咪又係一樣會絶後;個個都話供養一個小朋友要四百萬,唔夠錢就唔生,咪又係絶後.點解只係針對同性戀呢?凡事太極端,都會變成壞事. 如果唔傷害到其他人,自己既取向,是否都應該受到尊重呢?

我問台灣女生會唔會怕我會變心愛男人,人家好肯定咁話"無可能,因為你太鍾意女人".

陳小姐變賴太

今晚係麗儀既新婚之喜,擺酒地點係尖沙咀中港城 既皇潮滙.我約咗德輝六點半係元朗西鐵站下既巴士站一齊搭車出去.

番完早更,兼且放工同台灣女生係市中心攞風扇,再上門安裝,無時間洽吓.搭巴士車程後期頂唔住,同德輝講想訓陣,近排番工實在係太忙啦....

女同事們著得靚靚咁出席,我本來諗住牛記笠記咁去,但人家話唔好,於是好隨意咁著件淺藍色恤衫,啡色褲,白色皮輕便鞋就出門口(實在太熱嘛...).

七點半到埗,但九點至上菜,肚餓又眼訓....唯有打住nds黎等.開席前有外賣証婚儀式,雖然熄咁啲燈,但都有好多賓客係枱度"治治浸".

新郎無咩特別表演,除咗時下婚宴場合必備既成長短片外，中段就有一個抽奬同啤酒競飲比賽．麥生同大ｖｉｃｋｙ同有上台，雞脾都半推半就咁參加，有心既女同事當然係出去企係台下支持啦．

麥生以兩秒既時間榮登冠軍寶座，真係好似倒入去咁，技驚四座，新郎既同事咁熟酒性都變咗陪跑．食埋糖水，我同ｊａｃｋｙ就走先，一齊行去ｐａｒｋｌａｎｅ地鐵站，蛟龍落去搭東鐵，我就行前幾步去等巴士．上車無幾耐就洽著，訓到撞玻璃．

下次去既，會係阿潘既婚宴ｌａ～

再買風扇

訓晏咗,搞到十二點幾至到市中心.今日既任務係買多把風扇,因為之次買果把好好風,所以今次買番同一型號,等伯母屋企可以涼啲~

本來泰林應該有貨,但人家話信唔過,於是去番中原買.俾咗錢至知而家無送貨服務,因為啲車同師傅忙於安裝冷氣,要自己提貨.早知就唔俾錢住,去泰林問吓有無送貨啦..

十二點半,時間有啲尷尬,因為趕住番晏,自己又渣羊仔黎.如果夠時間,就可以拎住個風扇去搭輕鐵送上台灣女生屋企,再搭輕鐵番市中心攞羊番工,但時間真係好趕,加上人家屋企都無人聽電話......(未訓醒)

最後決定唔攞貨住,等聽日番完早班,同人家去市中心攞貨,再上門安裝埋佢.一個人係市中心食老麥,跟住就騎羊番晏lu~

一直都display出黎既相

尋日行過idc,見到個3R相架($48),兩塊透明厚膠片以四角既磁石吸住,好鬼似我之前爛咗個款style,於是買落黎.以前個相架係兩塊玻璃夾住張相,再插入有直條坑紋既木底台上,當年係新墟既東江國貨既文具部買(蛇王輝對面).

中五升中六既年代買呢個相架,而其中一塊玻璃都崩咗忽好幾年,但用得就算.直至搬過黎新居時,驚塊玻璃會爆,先至無帶黎.

相架裡既相片,就有帶過黎,仲放係客廳度display出黎.呢張相係我中五夏天同崇真書友係屯門碼頭bbq聚會其中一張相.相中人係一個我曾經為佢流淚既男人,佢係我中一至中七都係同校既同學兼好友(除咗中二三係唔同班).中學過後,大家讀唔通科,但竟然都係讀同一間英國大學遙距part time degree,只係學科同agent唔同.

流淚係因為擔心好友既健康,經過兩次手術,卒之都搞好.雖然而家大個咗,各有各忙,但都久唔久出黎食飯聚吓,仲經常幫我搞電腦既事宜.

以前讀書,有時問佢一啲古怪問題,例如會考中文課,我問究竟仁係咩野,因為本本精讀,導引都唔同講法,搞到佢係電話度都"疾"咗"疾",諗咗陣至答我.可能佢心諗"背你就背啦,咁多野問既你?"

以前既年代,影張相都要湊夠一筒菲林至晒得,買又要錢,晒又要錢(所以多數都晒3R),相機都要係屋企人點頭至有得借黎用.讀書年代想影多啲相黎紀念都幾艱難.而家啲學生哥可以有多啲回憶,因為多數都有自己既一部數碼相機,再唔係手提電話都有相機功能,唔洗晒都可以load晒入電腦睇,方便得多.

可能因為難得,我咁多年都好珍惜呢張相,加上會考年代(崇真書院)係我讀書時期最開心既回憶.唔知下次為呢張相換相架會係我幾多歲呢?

今日同台灣女生食過最後兩塊隔夜pizza後就動身出去尖沙咀既文化中心,因為之前去中環時係地鐵站見到話有"不中不英"既展覽廣告.天色好差,係咁落雨,好在我地係地鐵站經隧道出,唔洗點淋雨.入場費每人$10,包睇全部咁多層.我地先去咗睇"不中不英"先.

因為人流管制既關係,我地係門外要等一等,但見到有九公格紙俾遊人寫字同掛係牆上,我同人家都寫埋一份,反正都係等啫~

幅牆真係好大架,好辛苦至係張大相度指番我地掛既字樣係邊個位架.

入到場,其實都唔係好迫人,仲以為係講香港既中英交錯,但原來都唔太係,當生活藝術好了,有啲失望.特別啲既都係有一間大房白色底色,用中文粗口編織到好似係一朵花咁,感覺好似係厨房鋪滿白底藍色彩繪花既瓷磚咁~(洗唔洗叫政府淫褻審裁處黎查封??)

之後去咗幾個展覽室,有現代畫,古畫,有皇帝墨寶,但都係地下個古代玉器同金器比較深刻同吸引.我本人就好鍾意個俾馬用既黃金馬鞍,展覽時係拆開一大塊一大塊咁(最大既一塊部件有我個身咁大),旁邊有幅成型既繪圖~人家問我隻羊仔啱唔啱用,我就話"刮花晒個包圍,兼重死我隻羊仔~"

可能晏晝一人食得一塊PIZZA,行緊文化中心時個肚已經打鼓,六點左右行完,就急急去搵地方食飯.我提意去人家做FACIAL附近既一間日本料理食(石亭),因為我有一次陪人家去做FAICAL時見佢門口有雜誌介紹既專欄,應該唔會太差掛.

六點半左左去到門口,望個牌都係啱啱做夜市時間,裝吓入面,好似無咩人,得一個四眼佬坐係壽司吧枱度.正當想開門之際,個四眼佬起身開門俾我地,原來係職員~

四眼佬好有禮咁端上茶杯同menu,跟住就坐番埋吧枱睇雜誌,人家見佢係睇緊本地既飲食雜誌~當我地落order時,佢就放低本雜誌,行去我地張枱,仲好有耐性咁講解雜錦刺身既內容同煙肉鮮蠔串燒既份量俾我地知.

呢個雜錦刺身有赤貝,鯨龍魚,三文魚,劍魚腩,甜蝦,帶子,吞拿魚同油甘魚.比較特別係鯨龍魚,好爽口;甜蝦,比較粗身同重蝦味;吞拿魚,唔會有渣同潺既感覺;劍魚腩,無元氣個啲咁有味,但都好有質感,唔會好似元氣個啲咁偶爾有啲係o趙唔到;油甘魚,個樣有啲似舊豬肉,無以前食過個啲咁"漏".

芝士雞翼真係脆口,內裡芝士溶溶地,好香口~

煙肉鮮蠔串燒好特別,煙肉保護住中間既蠔,燒起上黎都無話燶同變韌,我同人家鍾意既食物之終極fusion~

最後點既蒜香牛柳粒,口感麻麻,有啲老同韌.....星期六既尖沙咀,除咗我同人家竟然無人黎幫襯,變相包場食飯,有一份難得既寧靜~

食飽飽,我地搭地鐵去油麻地既百老滙電影中心睇1955既"珠光寶戲"priceless.雖然人家係食飯時打電話check到有呢個時間,但我地都係搏吓有無位架咋.開場前幾個字到埗,仲有位但幾前吓,無所謂啦,反正難得出開黎.俾錢時哥仔問我會唔會用積分換一張飛,咁當然好啦,埋單$44有兩張飛,抵!

起初以為齣戲麻麻地,但睇落都ok,男主(jean)角對女主角(irene)愛得過份,為咗同女主角一齊,不惜搭火車去搵irene,花光所有積蓄去滿足irene既高消費購物同享樂,為補償兼近距離相處.當所有錢花光時,irene話要走,jean竟然以褲袋裡既銀仔買多十秒鐘黎凝望,太痴情了.

西方人真係大方啲,明知個女仔係吊金龜,俾人包過同訓過,都唔介意.jean為咗找酒店數,要俾富婆包,出賣色相,又難得最後irene又唔介意jean都係俾人包過.jean一角真係對女角一往情深,最後為幫irene搵老襯,不惜放棄富婆,一無所有,好在最後都可以打動irene既芳心,irene亦可以話係浪子回頭~

女角又真係幾靚,男角雖然唔係湯丸型,但都好有男人既魅力.全程法文,靠晒字幕.priceless比之前睇既法國電電影"戀戀巴黎"好好多,係我心目中為法國電影挽回不少分數~

ps:$10入場費,係文化中心行到腳仔軟.....

買芝華仕送殺蟲水

番完夜班,訓到十二點就醒咗,出客廳錄野,但又再一次cut錯咗.....真係需要多啲了解部機..

叮番熱雪櫃入面既pizza黎做晏,慳番唔洗煮.
突然心血來潮,想執吓啲電單車既保險,牌簿,原廠單同catalog,於是搵晒啲file,信封,拉鏈袋出黎.原來都真係幾亂,搵個牌簿都搵咗好耐,仲以為唔見咗,如果急係上黎要搵,一定會好"忟".搵齊所有文件,將啲過期既三保單同維修單掉去,只係爭本clear book就可以好有系統咁keep好單據~唔覺唔覺,又渣咗電單車四年了~

近兩點先至出門搭小巴去相熟髮型屋剪髮,準備六月去影相嘛,加上咁鬼熱,都真係想偷薄啲.兩點多啲到達,等咗唔係好耐就可以洗頭同剪髮.相熟姐仔依舊健談,經查證後,原來5月1日睇完spider man3散場時撞見到既真係佢黎.同人家騎羊番屋企時,係老麥的士站附近見到既都係佢~之後講吓我去關島既野,同佢去日本既經歷.下一次黎就要去第二間,因為佢同另一間髮廊hairway合併.

行過五金鋪,買番支之前用過既六合一縲絲批,要$60,唔知鴨寮街會唔會平啲呢?行去市中心吉之島文具部買咗本clear book,然後去樓下精美買music & lyric既cd,再上去影視店租碟.正當俾錢時,發現銀包裡無咗張證,一定係上次台灣女生用完無俾番我.完手而回,去隔離惠康買殺蟲水同芝華仕(特價嘛).埋單時,阿姐話買滿$50就有折扣,但酒類就無,但過機時又有喎,結果出現一個好得意既情況:變相好似係買芝華仕送殺蟲水咁.

落去洗衣店攞番套西裝後,行番去泰林睇風扇,再去百老滙,中原,best.係best附近俾emily朋友仔見到我著住T恤短褲,手抽西裝個樣(好似好唔match咁).其實之前我上網check過german pool個網,已經睇中一款,咁多間都有,唯獨係百老滙無得賣.去番最平既泰林($330),哥仔話無貨,要訂貨,但包送貨.行去中原(信用咭優惠$338),但都係話無貨,要訂,聽日可以送貨.既然兩間都要送貨,咁咪又去番泰林囉,點知哥仔話要下星期至有貨同送到貨.最終走番去中原開單,兜兜轉轉,都係中原.問哥仔有無要指定咩咭,哥仔話"大新",哈好在有啫~

過對面百老滙問2G sd咭幾錢,哥仔答$180,其實都想去番中原買,但又懶得行番轉頭,於是即場買張,等六月可以用~

係巴士站等咗三個字至有車,一上車就坐望到司機既側邊位,將套西裝掛係扶度,唔洗拎住同摺皺.

天色愈黎愈差,當我落車時已經落一兩滴雨.急急腳行番屋企,無幾耐就倒水咁落,好彩趕得切~

放底背囊啲野,就著手將電單車啲單據同喜歡既catalog放晒入clear book,晚餐繼續食尋晚有剩既pizza~

無牌駕駛

朝早起身準備番早班,肚餓得滯,係客廳度食牛角包,飲益力多.台灣女生裝好身之後就騎羊番工.行咗兩三個羊位,突然醒起好似無"炆"門匙,於是人家落地行番入屋睇,真係仲插住係木門,真大懵~~

先放底人家,自己再去橋底排骨位,打開行李倉仔時至發覺自己無帶背囊,即係話無電話無銀包.除咗衫褲鞋襪,手錶,眼鏡,門匙同車匙之外就咩都無帶.好在我係將locker匙掛埋係抽門匙度,如果唔係,分分鐘衫都無得換黎番工.....

食早餐時慧賢借咗一舊水俾我,但我又係canteen撞到人家,於是同人家報案,借八達通買早餐,約定放工集合地點,再還番錢俾慧賢(唔該晒).

今朝都幾忙,只係講大話兼無賴客人同其無理兼"啷黎"家屬,己經用咗兩個鐘,要係咁打電話去其他部門查證,再打番去同家屬澄清及表明立場,再寫report咁寫,避免柀屈.顧客永遠是對的,聲大夾惡就可以.好似尋晚咁,俾我用電腦紀錄check到家屬老屈後,她只係黑住面講"咁咪當我記錯囉,我真係記錯啦,對唔住囉".如果掉番轉係我講,又會被人話態度有問題,要去投訴.....我都只能講"大家都係想搞清楚件事啫,而且我無話要你講對唔住丫"
放工同人家係建生食過晏,就騎羊番屋企沖涼訓覺.訓吓醒吓,加埋都有兩個鐘多啲既...七點幾人家叫醒我,因為要我拎張咭出去門外簽收pizza外賣.

$185有枱上咁多野食(兩罐可樂係私伙野),今次個cheesy bite pizza都只係將個芝心批邊變成可以一粒粒扭出黎食啫,但感覺好似無之前成塊芝心批咁"漏",無咁易滯.

你睇吓啲芝士真係會流出黎0架~人家留番個意式千層肉醬闊麵,聽日番早班係pantry食,話係"華麗既早餐"喎~食剩既pizza,我聽日sleeping又可以當做晏同晚餐.騎羊去盈記買楊枝金露做宵夜,跟住就番公司開工lu.

涼鞋惹的禍

今日番晏,收到台灣女生既電話,話係商場俾度門刮到腳指公忽皮,係咁流血.於是我叫人家過黎我度睇吓兼搞搞佢.黎到時已經止咗血,不過又真係剷咁忽皮,union麻麻地既....係人家口中得知伯母話佢食咗飯都無力拉度門.
人家好鍾意著涼鞋,但又論盡,真係想收埋晒啲涼鞋佢~

亞加瑪號

今日放假,騎羊仔接過台灣女生早更放工,就係屋企煮個麵食.人家食完就係梳化攤係度訓覺,我就上咗陣網.見人家未訓,自己都坐係梳化度洽咗陣

今晚約咗去跟大隻晶食盆,五點幾就出門口去輕鐵站,截大伙兒坐緊既610.可能大家都係番完早更,攰到係輕鐵上訓著晒,只係見Andy,雞脾,雞脾嫂係擘大眼~

落咗車,一齊行去馬田村附近既稻香等埋德輝,適巍伉儷,子健,gordron,就一齊行去木頭圍.其實都幾入吓,唔係村長帶路,真係唔知點入去,唔渣羊仔絶對係明智~

等咗好一陣先至開飯,今次個盆多料過上一次,又好食過上一次,夠味又唔太鹹

長毛既公子實在太好客,係咁為我地添上冰凍啤酒,大家飲極都飲唔完,於是唯有孭住背囊既我擔當阿加瑪號(Gundam中既運輸戰艦),搭載枱上既酒精小隊,雞脾都有幫手"立"啲走.

埋數四罐加兩支,真係幾重吓,好在我個背囊係有20L啫.今晚可以成班人出黎聚吓食野,感覺幾好~多謝大隻晶既款待同關心~salute!

緝拿歸案

番完夜,訓到十二點幾,收到洗衣機維修技工既電話,話點半會到埗.繼續訓到點半左右自已醒咗,但師傅要成近兩點至到.
師傅個樣有啲似林偉,渣公司偉仕綿羊上門.師傅話多數係個桶既螺絲鬆咗,所以轉動時動有聲響.拆外殼,收緊螺絲後,又真係無再有"叮叮"聲.師傅好好人,仲答咗我幾個洗衣機既問題添.婉拒我既冰凍可樂,師傅就騎羊離去.

鬼咁好天,食完個甜筒,就換上工衣,動手為愛羊清洗打腊.好耐都無幫愛羊打腊啦,上次清洗完,開始打腊時就落過雲雨,跟住就間斷咁落咗幾日...今次卒之都可以企企埋埋啦.搞咗近三個鐘,只係爭未"省"電鍍parts,因為唔見咗支"省"銀膏.番入屋沖個涼,始終都係唔憤氣,繼續全屋搜查,睇吓有無四圍擺,或都係跌埋一角.

當我拉開書枱隔離既箱時,俾我見到尋晚令台灣女生尖叫既george(某油漆廣告中,四腳蛇既名字)之遺體.話說尋晚人家係厨房尖叫,話見到有四腳蛇.我入去地氈式搜索,都係唔見,於是栅番厨房窗(人家怪我當初開咗隻窗黎通風)向邊位角位噴殺蟲劑,再栅埋度門黎焗過夜.初步懷疑george不敵毒氣,走咗出黎客廳唞氣,但最終毒氣攻心,與世長辭.....

兇手落網,case closed.

用膠袋包好,放入厨房既大袋垃圾,騎羊出門口時,順手扔落大型阿公垃圾箱.係市中心相熟影視店望咗好耐,"簡"咗隻tornado,但係俾錢時,見到姐仔手上有隻"冧歌有情人"music and lyric,於是問吓有無得租.姐仔點一點頭,就將一個光碟套貼係dvd盒內,睇黎係新番既碟,正準備上架.之前都有啲想去戲院睇,但無時間,今次仲可以係新碟頭啖湯,無花無漬,好似用$10買隻新碟番屋企睇咁,正呀~~

係惠康買咗啲野,就騎羊番屋企開洗衣機同煮單身漢餐.是日菜式係炒之前有剩既菜心(已洗好並放係雪櫃),同煎伯母醃既雞扒.由於塊雞扒太厚,所以要耐啲時間同有少少燶,睇黎下次都係用細火黎煎會隱陣啲.

食完飯,晾埋衫,洗咗啲碟,又急急騎羊接人家放工.我負責吸塵,人家負責抺地.我話不如我用地拖快快手搞掂,但人家堅持要手抺....激氣......

沖完涼,一齊係客廳睇music and lyric,都幾好睇,裡面既歌都幾好聽,最搞笑係pop個首"Pop Goes My Heart"既八十年代MV,動作搞鬼~片中男女主角一齊作既"WAY BACK INTO LOVE"都幾好聽,歌詞又好~

好多時我都係係電影裡搵到啱聽既歌,好聽既歌唔太多,尤其係港產,好多時啲詞都係"鑑硬"塞入首曲,無咩主題之餘,又要用假聲至唱到.

ps:最終都俾我係書枱右下格搵到支"省"銀膏~

穿梭維港

今日特登request放假,係為咗去搞美國visa.之前一晚台灣女生擔當秘書一職,覆核申請表格及相關證明文件,我只係負責簽個名,爽到爆~

係final check時發現要ID既copy,但夜嗎嗎,邊到可以影印呢?朝早十點半就要到領事館...HP DeskjetF380 All-in-One Printer.Scanner.Copier突然閃過我腦海,為我地帶來曙光,問題迎刃而解~

朝早七點四起身,帶齊文件,裝身後出路口截的士去西鐵站,坐西鐵到南昌再轉地鐵到香港站,行番去中環站至上地面.原先諗住食早餐,但最後為保安全,都係搞埋visa先.不熟地形既我地,揀咗搭的士去美國領事館,錶都無跳過,15蚊就落車~

十點多啲到埗,但見門外已排長龍去counter交表.我地先要俾保安check約期紙同袋,再排隊交表.當排到前面時,見好多個申請人都係唔太順利,係窗口俾職員發現填錯表同漏文件,搞到我地好緊張.其中一個窗口既姐仔好辣,係咁鬧阿婆阿伯同孫仔一家申請人."學校就咁寫中學,我洗mug你填咩,就係要知你係邊間讀嘛""呢度填咗未呀?"...加上一連串令人討厭既不耐煩表情.但當一個西人去搵佢補番啲資料時就變臉,顯出殷勤既態度及歡迎既笑容,真係狗眼看人底,俾我就一定會問佢攞名,話要見佢上司投訴佢.

好在我地去既窗口係一個好相與既阿姐,無咩點指細check我地張form填成點,收齊文件就俾張飛我地去隔check多次袋同拎晒啲電子產品出黎.過完第一個門口,再要過金屬探測機,個袋就要俾保安check多次.袋可以拎住,但所有電子產品(電話x2,DC x1,NDS x1)就要暫托.入多道門,卒之都到等候大堂,人家話唔夠英國領事館大同靚.坐定定等叫冧巴,第一次就去窗口打雙手既食指指紋;第二次就係見領事員,問我地去關島做mug東東,人家答結婚,美籍女子就恭喜我地就同我地講visa無問題.
行去隔離郵遞窗,每人交$25同地址表,預計星期五會收到掛號~好順利咁又搞好咗visa事宜,真係麻煩晒人家填form同執文件,一人一個file入好晒啲野,原來做老細有秘書係咁盞鬼~

十一點未夠就搞掂晒,肚仔餓,人家話不如去隔離電車站,搭電車上山頂食早餐,於是就走去買飛.對上個次搭纜車都係細炆仔個陣.今日唔太多人,又無咩國內自遊行.原來都真係幾斜吓架,好似過山車咁.

落咗纜車,我地經過淩霄商場,行去山頂廣場,見burger king造價有啲貴,於是去番老麥食晏.

雖然係平平無奇既老麥餐,但係山頂鋪位並無加價,仲附設露天望山景添,其實望出啲係見到海架~不過唔夠高影個海景咋~

因為人家約咗十二點去尖沙咀試妝,於是食飽之後,去埋洗手間就趕住走人,但途經精品店時,入咗去買啲磁貼黎點綴吓雪櫃,買滿四個有九折,埋單五十幾蚊~

落纜車時,見已經有好多人係度排緊隊啦,好彩我地無撞正人潮啫~我地坐觀光巴士落番中環地鐵站,沿途仲影埋山頂纜車站噴水池同美國領事館添~

好趕咁搭地鐵去尖沙咀,再衝去百利商場,但都遲咗大半個鐘,十二點九到埗....人家試妝,我就洽眼訓同打nds機械人大戰.三個妝都ok,感覺比較後生啲,三個鐘頭後就走人趕去下一站.

基於骨牌效應,搭地鐵都要遲大半個鐘至到下一站對面海中環揀關島既禮服(領位同邊位有織花o架)同人家做fitting,下次黎既時候就係攞機票同婚紗同禮服走啦~

不過姐仔話我對白鞋無綁帶,唔係咁好,最終訂咗對$300既珍珠白綁帶鞋,早知之前就唔買呢對啦..................

為咗慳啲錢,呀,唔係,係有情調啲,我地行番去碼頭搭船過番去尖沙咀.見相熟小食店就係左近,點可以唔幫襯吓,要復番上一次食唔到魷魚既仇嘛~

坐係石壆邊,一面望住維港,一面食辣魷魚同腸仔,好滿足咁就過番尖沙咀.夜晚係朗豪坊既元氣食野,好攰咁上巴士,訓到入屯門至知醒~

又一生物訪客

繼青蛙家訪後,今晚台灣女生又係浴室發現蝸牛先生~相熟既尖叫聲,入到浴室至醒起,其實尋晚飲完酒,返黎屋企沖涼時見過佢.

七分酒醉,極度眼訓,無戴眼鏡,花洒沖涼.見到牆上有一個啡色既物體,好似樹葉咁.用花灑沖佢落黎,踎底望,都係睇唔真係咩黎.沖完涼,刷埋牙,就爬上床訓,再無深究樹葉既問題

身為生物組既門生,當然要同蝸牛先生近距離接觸吓啦.一手帶住薄身保鮮袋,溫柔地捉住蝸牛先生既殼,另一隻手翻轉保鮮袋,再以雙手打結.蝸牛先生咁就被封印住係"保鮮結界"裡~

用花灑沖走蝸牛先生係沖涼格地上留下既黃色體液,再將結界連同厨房垃圾一併拎出去屋外,掉去大眾垃圾箱裡.

唔知係咪間屋太舒服,連青蛙先生同蝸牛先都要黎家訪同投宿?

好兄弟

朝早六點唔夠,就起身,仲早過番早,因為要幫師兄做兄弟.比原定時間(06:45)晏咗少少至到達集合地雍翠豪庭,新郎哥同眾兄弟已經花車佈置得七七八八,真係唔好意思..

好鬼熱,好後悔聽台灣女生話著底衫,我係師兄架車旁邊除咗件底衫至掂.
攝影師傅到埋,大家一齊向女家出發,我同大昌坐卓駒架車,德煇就渣新郎架車,william都有出車.係女家門口,有炮仗助慶.姊妹好斯文,主要都係要新郎做野,如宣誓,彈結他唱歌,問答遊戲.我地班兄弟連衫都無污糟到~
俾過開門利是,斟茶,影相,跟住就去男家人門,都係斟荼,影相咁上下啦,兄弟都係跟出跟入,用DC幫手影吓相,拎吓野,做吓佈景版,充撐場面咁.影相期間,係師兄家姐口中得知,阿b呢個稱呼~

十點半左右,我地一眾兄弟姊妹同攝影師就到酒樓飲茶,當然係出公數啦~

食完野,十一點多啲,我同德輝就攞燒豬送入男家.係停車場兜錯收費置,職員要我地停埋一邊,先以身份證登記,再入番商場客戶服務台交錢,但德輝話佢無帶ID咭,於是由我登記同落車去交錢.
十一點半多啲入到男家,係師兄屋企坐咗陣,都幾亂吓,仲亂過當初幫佢搬野入黎個陣.師兄車我地到元朗西鐵站,我就係輕鐵"洽"住眼訓咁番屋企.
係屋企沖個涼,就上床訓咗兩鐘唔夠,又再起身換衫出發去酒樓.

今次好準時,四點三到酒樓,但只見到兩個姊妹係度.打俾德輝,知道要係停車場等師兄架車,幫手落貨.係停車邊場坐邊同德輝閒談住黎等師兄.

搬完一輪貨,包裝同派小禮物,跟住就同滔爺滔嫂,漢爺培爺同jacky傾咗陣.德輝就忙住睇師兄既家姐點樣搞佈置,偷吓師咁,仲影埋相添,好認真~

其實之後都無咩野搞,都係坐底同入席既同事傾吓計..新人住場時,捉埋jacky同percy出去幫手放紙條禮炮.新郎表現邊彈電結他,邊唱歌,又有送99支玫瑰,之後有MC帶領既抽獎遊戲.我同德輝隨後既工作就係跟大隊去敬酒.  

去到大姐個枱時,點知光爺隊杯威士忌黎.無法子,焗住飲,一陣熟悉既燒喉味道,有啲似芝華仕.好在光爺俾番用黎跟敬酒大隊個杯啤酒過我,於是我一個轉身行到隔離枱就吐番落杯啤酒度,回避率80%!番到座位,隔離枱大姐大豆,大ricky開始係咁隊我地個枱飲,培爺首當其充,跟住就係大力,再殺到德輝同我.雖然有啲混亂,但都幾開心丫~

送埋客,等新人換好衫,執好野,就幫手枱去停車場.由於大ricky覺得唔夠喉,放是同雞脾,percy,子健,大力先去附近既酒吧,我搞掂埋啲手尾就去會合佢地.

飲完一set,又一set,我同percy兩點幾就走先,衰仔啲都咁話,真係好攰同辛苦,隻眼又腫又痛,都係坐percy順風的士番屋企抖吓先...

生活

今日番早時,師傅打黎約食下午茶,於是我放工係市中心行咗陣,三點三係稻香等師傅.好耐無同師傅聚吓,食完野,師傅話上我屋企坐兼參觀吓.我騎羊番屋企先,而師傅搞埋少少銀行野就搭巴士黎,當然我出巴士站接佢啦~

師傅都話新居幾好,抵租,好過之前市中心好多,仲話似係自己屋企多過係租添~~同師傅傾咗好多野,工作,屋企,前景,結婚事宜,理財....師傅俾咗好多意見過我,又話今日至知道我係比較灰,之前無諗過我係會咁.唔通我近來變得不苟言笑?我承認屋企事同結婚既壓力,的確令我心情上無咁開朗.

聽完師傅考試既故事,我諗到生活都係想開心啫,凡事盡咗力就好了.以前睇過一個專欄講及外國人既生活,佢地係主張work for life,而唔係life for work.意思係應該為生活而工作,而唔係為工作而活.工作係生活既一部份,並唔係全部.

最近子太多負面既事發生,結婚籌備又好緊張,因為我唔想有任何差池,或者係呢件事對我太重要啦.師傅提點咗我,咁辛苦去準備將來,都係想開心啲,咁點解今日既我會反而變得唔開心呢?或者顧慮太多,反而會縛手縛腳.

師母都有上黎屋企坐吓,都讚新居唔錯.坐多陣,佢地就去市中心食飯,而我就係屋企煲飯同滾熟之前台灣女生買落既獨立包裝咖喱雞脾.

內心太不凝煉了,真係需要靈修吓,好好咁為自己既存在重新定位.

撲飛

今日騎羊送過台灣女生番晏,自己就同羊仔過置樂食單身漢餐.之後係相熟商場行個轉,買咗個$9既透明dislpay盒仔,用黎晾起教皇~

騎羊去市中心,租咗隻dvd怒火反擊,又係惠康買咗個椰菜,一盆十二罐既可樂,兩排紙包檸檬茶,2罐tetley's同固力果朱古力百奇.用背囊同popeye環保袋黎載貨走,將啲貨放晒入羊仔既行李倉,瀟瀟灑灑咁騎羊番屋企.

四點多啲入到屋企,無幾耐人家打黎話原來今日真係有蜘蛛俠3上(睇報紙發現).之前我同人家講話買定飛,今日番完晏去睇,但人家一口咬定係3號至上.明明德輝話我night完之後訓醒就可以買飛睇,無理由記錯o架?原來係人家之前睇到5月3 號美國上映.
收到消後,打電話去凱都戲院問,得知十點有一場,啱晒人家放工去睇~換番出街衫,立即騎羊出新墟.五點唔夠去到新墟,係燈位望見戲院人山人海.一轉綠燈,片個靚彎,泊埋路邊,落側架,收頭盔,攞背囊.碟鎖都唔落,就跑去戲院撲飛.排隊時見大堂pannel顯示十點場已經無咩位剩,唯有碰運氣啦..去到counter,見仲有中間行數既最邊孖位,於是嗱嗱林俾錢買飛"唔該G1同G2丫~"

買完飛,係門口影番張相留念,因為好耐都無試過齣戲一上就去買飛睇,兼且仲要係人山人海,滿院咁滯.send個短訊俾人家報捷,行番去攞車,騎羊番屋企~

以前讀書時,逄星期六上午九點左右,無線就有蜘蛛俠卡通做,我個個星期六都起身睇o架.我本人都幾鐘意蜘蛛俠,因為佢係一個幾有血有肉既英雄.peter paker有感情既困擾,生活經濟既問題,唔完整既家庭.唔似得其他超級英雄咁,一係就專業人士兼生活舒適,一係就有好鬼有錢,再唔係就係政府無限支持...蜘蛛俠係一個較平民化既英雄,更能扣動觀眾既心~

仲記得蜘蛛俠第一集上映時,正係好友"八個洞"隻眼出事,需要入院做手術.本來諗住同楝哥一齊入戲院睇,但又搞到唔可以一齊睇.個次係我其中一次為男仔而流淚...做咗兩次手術,楝哥至可以出院,希望佢健健康康,但每次聽到佢話隻眼唔舒服時,都係好擔心.

係屋企坐陣,六點鐘洗落米煮飯,洗菜浸,.雪冰種,跟住出廳打blog.七點入厨房煮餸,七點半開飯,"男人煮既菜,雖然簡單,但都會好食o架~".

洗埋碟,收埋個冰袋入背囊,九點多啲就騎羊出發去戲院.九點半左右到達,當我落布冚之際,人家已經落輕鐵,行到戲院附近,仲見到我添..

戲院門口好鬼多人,仲多過晏晝買飛時.人家係許留山買咗杯五花茶飲,又係戲院門口既流動烤魷魚檔買咗$20貨.由於我地見有成三款,所以我地問老細邊種易咬口啲,老細介紹咗一款俾我地,問地要唔要辣.我地答要啲辣,佢就係鐵絲網面拑咗三隻上黎,再剪碎入袋俾我地.剪碎後好似少咗好多咁,$20貨變得好珍貴.....

入到戲院,滿座咁滯,好耐都無試過睇戲係咁多人.齣戲好好睇,魷魚又好鬼辣,兩罐可樂同一包檸檬茶都俾我同人家飲晒.新女角都幾省鏡吓,動作部份都幾正~播片期間,戲院職員都巡得幾密吓.

散場時見職員截住一個幾高大既男觀眾,唔知係咪捉到盜版呢?騎羊番屋企,兩個字就到埗,sleeping day都幾充實丫~