TRANSFORMERS

細個時已經好鍾意變形金剛,柯柏文呢啲大粒佬當然夠份量啦,但我最like既係爵士,鋼鎖同tracks.以前無錢買咩新玩具,莫講話買變形金剛既玩具,頂多都係有一次番大陸時,用新年利是錢買咗個博派既恐龍幫劍龍.大陸版平啲,但都買唔到我心愛既鋼鎖,其次翼龍都無,唯有買劍龍......

個陣時每變形型金剛玩具都有一張變色貼紙,隨住溫度上升而變色.冬天時金黑色,當你用手指捽佢時,搞到佢慶慶地就開始變色,係當時係一個gimmick黎架~

呢個gimmick就無係前幾年推出既BINALTECH系列(註1)延續落去,但變形系統就精細同變態得多,當中master piece(柯柏文,星星叫,麥加登)更加係令人驚訝~

雖然荷李活電影版既TF(TRANSFORMER-變形金剛)係造型上係麻麻地,但遲啲上畫個陣,我都會同朋友仔去睇吓.動畫中偶爾有啲人與機械人之既間小插曲,鍾意兩幫人係度駁火,,睇吓正義既博派點去救地球,其實都有啲似睇機械人版既警匪片~

註1:BINALTECH系列既背景係TF逗留係地球同人類一齊上太空做野時,惹到金屬病原,令身體開始受到侵蝕.球球人為咗救佢地,於是黎個汽車大翻新,以時令最新既車種黎作新驅體既藍圖,可能覺得佢地個款太classic,都係時係轉吓卦?

疏懶了

不時都有用本簿仔記低愛羊既資料,清洗日子都唔例外,每次抺車都會寫低日子同代號,"C"就即係cleanse,齋掃塵,落皂水,再過清水...;"W"就即係wax,打腊.通常都會抺車加打腊,但有時天氣唔好,又或者係無時間,就會無打腊.

今日晏晝同愛羊搞清潔,之後落簿時至發覺,原來對上一次已經係一個月前既事.無法啦,去關島個大假又好忙,番到黎香港又成日落雨,咪由平時兩個禮拜拖長到四個禮拜囉.真係要俾多啲時間羊仔至得.

無題

番完夜班,訓咗三個鐘多啲就醒咗.起身執吓啲家電單據,保用證,因為之前都係一叠咁塞埋一邊,而家就入晒落本clear book度,整齊美觀.

搞到點幾鐘至換衫出門去剪髮,因為天氣實在太熱啦...今日個天都幾好,有一忽仔藍到有啲似關島.搭小巴去新墟,今次要去新店,因為幫襯開個間同另一間合併咗.由於唔記得係邊間,只係記得大豆話合併我地會去同一間salon剪髮,所以打電話問大豆.

得知門號後,入去問相熟姐姐仔有無番工.聽到個"有"字,就再繼續向店內推進.呢間salon啲細既真係好in耳環多就不在話吓,連唇環都有,金毛髮型,cool到爆既面容.直至相熟姐姐仔出現後,才感覺到少少人間溫暖......tiffany問我可唔可以俾佢十分鐘,扒埋個飯盒先.我當然話可以啦,但後尾我至同佢話番其實我都未食飯,我係搏有人剪緊,排咗個位就去食埋個飯,再番黎剪髮,但點知唔洗得,挨住肚餓先.........

洗頭組既職員都幾後生吓,可能係初出茅廬,比較自我,唔太懂世面.話說剪到咁上下要沖頭,個靚妹竟妹一句話"唔得閒喎,有野做緊"黎拒絕理髮師.就算係無佣分或者唔係跟呢位理髮師,都唔洗係眾人面前咁對答丫.

一路傾關島既經歷同大陸人食狗既惡行,唔覺唔覺咁又一個鐘兼且剪完.行咗去吉野家食遲來的晏晝飯(近四點),又無諗過加兩蚊可以餐飲汽水轉凍奶茶咁盞鬼~

約咗台灣女生係市中心等,一齊睇吓買咩餸咁.最後決定係吉之島買牛扒同魚生(加埋雪櫃既雞堡)做晚飯,搭巴士番屋企~

簡簡單單既煎牛扒,都要煎兩次至得,第一次裡面太生,煎多次至可以接受,不過都無煎到塊扒韌晒,好彩啫~係吉之島買既日式牛扒醬汁都幾好味,伴埋日式刺身,fit到漏. 

Wii樣

中午同brenda,rita,iris一齊打的出市中心.本來諗住飲茶,但係咁多人,於是轉去食老麥.食完野,大家就各自搭車走.

晏晝就同人家係屋企打咗陣wii sports,胡鬧吓咁啦~相信呢部家庭遊戲機會為我地帶來唔少歡笑~

尋日試部Wii時,整咗自己個樣落部機度.整完之後,都覺得幾似吓,台灣女生既同學話都係咁話~

今日就整埋人家個樣落部機度,以後打双打game時就可以夫妻檔咁拍住上啦~由於選擇所限,呢個version已經係最近似既一個.

而家我有一部大牛龜NDS,人家有一部NDS Lite,廳有一部Wii,屋企好似變咗任天堂殖民地咁~~

20小時

朝早八點半起身,好趕咁梳洗,騎羊出門,因為約咗andrerw同八個洞一齊係市中心老麥食早餐.其實今日佢地要上庭,因為佢地俾漁農署周到係郊野公園踩單車.

食飽飽,同埋阿brian一齊四條友去court,上六樓入court.徐咗八個洞係著恤衫西褲外,另外兩人都係牛記笠記,andrew仲要著短褲添.

一聲"coort",大家一齊企起身.原來大多數人都係衰無牌販賣,或都係阻街咁.個官都幾cool,三句說話就ko一個被告,"2米x3米係咪?","有無野要講?","罰款$xxx".每一個被告俾人叫到個名,就要係個位企起身,身出去中間既位,對住個咪同個官. 

坐咗唔夠半個鐘就到andrew佢地個名,全場只有佢地唔係衰阻街同無牌販賣,但都係三句就俾個官ko,落樓下二樓交錢.出咗庭,係二樓繳費處等交錢時,我都有上前同佢地一一握手,話"成功釋放",而andrew就答"辛苦晒",好以真係打玩官師咁~

趕時間,所以無等佢地俾錢,我就走先,因為約咗elton一點鐘係尖東等.番到屋企放低隻羊,試吓屯宿之男送黎既新婚兼入伙禮物-任天堂wii.唔知點解,駁咗色差線,畫面有啲斜紋雪花,但係用普通AV線就無問題.打俾阿潘問,佢話係屋企試個陣只係用av線,無用色差.出師不利,於是pack番好成set機入盒,諗住出完尖東,就入番屯門去置樂間舖頭搞搞佢.

人家食過我外賣番黎既老麥早餐,裝好身就一齊出去搭小巴再轉260x出尖東.落車打俾elton,佢話係萬豪酒店等,唔太熟路既我,只有跟住人家行.我地係lobby啲梳化交收款項,又傾吓有關報案紙既事宜.係隨後既閒談得知elton都係買咗部美版wii,兼且拎咗去好景"維修",但番酒店試又成日都仲係load唔到碟,搞到日日都要去好景朝聖咁....

我同elton講話我地帶咗部wii出黎,陣間番入屯門搞,大家傾多陣遊戲機野,我同人家就告辭先.

曬又熱,我地行番去新世界中心既巴士站等車.見未有車,於是"呢"咗係隧行人道口避太陽.雖然係玻璃頂,但都好過出去乾煎丫......

搭車番入屯門途中,人家話舊雲好以個佛像咁,細心望吓窗外,又真係有啲似喎~如果係大佛隔離出現咪好囉,有個伴無咁悶嘛.

去到置樂,店鋪哥仔只係換過條色差線俾我,我問可唔可以而家試埋,佢話電視啲線好亂,好難轉線黎試俾我睇.順手同佢講張單同部wii既機身號碼唔一致,應該張單抄錯咗冧巴.同人家坐小巴番屋企,立即試吓,點知都係一樣.打電話去舖頭,今次哥仔話照睇係個火牛有問題,叫我帶隻牛去換,真係有啲心灰意冷,係咪耍我o架?

四點半有多,騎羊山發,先放低人家係市中心去會合今日既訪客,我再同羊仔去置樂換過隻火牛.半信半疑咁騎羊番屋企,今次卒之都無問題,畫面靚靚~~

駁好晒啲線,沖埋個涼,無幾耐,人家同佢既大學同學已經坐的士到達屋企.一伙人連埋入伙禮物-麻雀枱同麻雀魚貫入場,其實之前都有見過部份訪客,所以都唔會話分唔到邊個打邊個,但仁哥既聲線真係比預期中溫文~

幫手開埋張麻雀,一枱打牌,剩餘既打wii(由brenda指導下),我就騎羊去田中買外賣.泊好羊仔,要行去"禁"錢,經過田中附近既相鋪時,撞到猛將.跟住再向千色廣場方向行,係舊B仔大坑渠撞到適巍嫂,原來阿嫂同適巍去食田中,適巍泊車,阿嫂去攞位."禁"完錢,係田中見到適巍同阿嫂等緊位,傾咗幾句,就去落外賣order.傾多陣就有等攞外賣,臨走前仲見到之前poly實習生既阿玲.佢問我認唔認得佢,但我趕住攞外賣,之後又見佢同隔離既朋友傾計無拎過黎,所以無佢講byebye同話佢知我記得佢既名,希望佢唔會嬲啦~

將外賣魚生放入環保購物袋,以冰種冰鎮住.行番去搵羊仔,安放好環保袋係行李倉仔.臨開車前叫人家order定pizza hut外賣,跟住就騎羊番屋企.

等埋pizza hut外賣,八點多啲就正式開餐.其實仲有一位男仕(阿健)未到,但大家都一致通過食住等.唔知點解支香檳酒咁多氣,係厨房角向對角開,都反彈到腳邊.廳個冷氣唔太夠力,要開埋晾衫房既冷氣至好啲,可能太多人兼且出邊真係太熱啦~

食野時大家一齊睇係關島既短片同相,跟住就繼續打牌同打wii,我當然係襯埋一齊玩wii sports啦.跟住又七個人一齊玩nds孖室賽車.

十二點左右,唔過夜既訪客由我同人家escort下出去搭小巴出九龍再自行轉車.跟住大家就一齊玩pictionary益智遊戲,我同人家一組,最後係包尾收場,但過程都幾搞笑既,尢其係香港小姐一題,阿健畫既香港真係惹笑~

玩到四點鐘,大家至訓覺(阿健自己出去搭小巴),brenda同rita訓sofa,而iris就訓晾衫房既sofa床.由朝早起身到訓覺,咁又廿個鐘,仲要去咗好幾個地方添,勁~~

bandai新婚精品

番完夜班,訓醒同台灣女生搭車出去搵janet搞保險既事宜.四點鐘出到去旺角kfc,傾咗陣,交埋少少文件,janet就走先.我同人家就食埋個kfc下午茶至離開.行過朗豪坊,係ans睇到呢set公仔,人家話好靚.跟住我地行兆萬時,又見到有呢set公仔賣.人家好似愈睇愈鍾意咁,所以就買咗落黎,擺係屋企搞吓新婚氣氛都好丫~

本來話會今日打電話俾我地既elton潛咗水,無聲無影咁...唯有睇吓呢一兩日會唔會打俾我地啦.

由於太晏同攰,所以都無再去啲咩地方,搭巴士番入屯門,係置樂間孖仔記食打冷野做晚飯,sleeping day真係不太適宜遠行.......

home leave

今日訓到好晏,早餐同晏晝都係一餐過.話晒係大假最後一日,大家都想多啲時間留係家中抖吓.台灣女生出動之前係吉之島買既咖啡壼同ucc藍山咖啡粉,精心泡制香濃餐飲.人家不嬲鍾意飲咖啡,所以我都好讚成係吉之島買呢set野($100有找),當係嗜又好,招哹朋友仔又好,氹吓自己都要嘛~

搞吓呢樣,搞吓個樣,煮得黎都成兩點,都係"熱氣"下午茶餐咁啦(炸雞堡+炸薯條).咖啡味道比普通即沖既好,但始終都係出去咖啡店飲好好多啦,話晒人地係搵食o架喎.

晏晝出市中心行吓,買埋餸,就番屋企.餸菜雖然係簡單,但勝在可以安在家中唔洗排隊等入座.

食飽飽,洗埋啲碗碟,同人家係客廳飲住紅酒仔,食住三文魚刺身黎睇明珠台既"ocean eleven".假期咁就完結啦,聽朝早仲要出去對面海還婚紗禮服,跟住就要番晏lu,繼續沉重既工作......

搵笨自助餐

尋晚番到屋企,執野同洗衫洗到成三點幾至有得訓,期間仲要吸吓麈添.訓到唔願醒

,但台灣女生話係book咗枱係汀九既帝景酒店食lunch buffet.其實之前想book夜晚,但成個六月都full晒,所以至轉booklunch.咁鬼攰,無力騎羊,又要搭車,不如唔好去啦~~死都唔願起身既我,繼續蜷縮係床上.點知人家話"有好美味既生蠔食喎~~"我對眼立即張開,望向人家,"生蠔?"

就係咁,我就落床梳洗,換衫出發.我地搭小巴出去汀九.今日曬到嘔,好在有帶遮,沿途見到呢個係汀九橋底望向青馬大橋既景觀,但係個天都係無關島既咁藍丫~~

雖然我地改咗晏啲,但我地都係遲到,一點半至到.地方好鬼細,又好鬼嘈,野食又少.但最重要係"無生蠔食"!!!!!!

山長水遠黎到無生蠔食,只係得鮮蝦同龍蝦仔冷盤..........................目光投向人家,原來人家book枱時根本無問到有無生蠔食,只係一廂情願以為係有得食,我真係食懵咗,竟然無問人家有無confirm,俾生蠔沖昏咗頭腦........

食物選擇少,又唔太好食,真係食到慶慶地(連雪榚都係得番一隻味!).去市中心食惠比壽都無咁嬲,唯有用龍蝦仔黎插海蝦喉,以作洩憤.

關島遊 day 4-我們要走了

食完早餐,我地行咗出去露天花園行吓同影吓相,因為係日係last day,無咩特別行程,只係諗住會去多趟jp store買野,+/-去水族館.今日著既情侣裝,係前晚係酒店附近既ABC store買既.鬼佬地方係唔同啲,人家要著童裝size,我只係著細碼......

臨別在即,大家都唔太捨得咁藍既又同咁闊既海景,始終呢個行程係有啲趕既..

跟住我地落埋去沙灘影吓相,由於係歸酒店地方,所以唔似得阿公既沙灘咁熱鬧.其實我地都無好悠閒咁係沙灘hea吓,見到人地咁歎,真係唔抵得....

番上房望多次出面既杜夢灣,人家話呢個方向係望到日落架,好可惜第一日我攰得滯要訓,無陪人家一齊係露台睇日落.

另一樣令我唔捨得既,就係呢張六呎床,king size~~~打橫訓都得既,啱晒我呢啲咁反訓既人丫~~~

我地執好晒野,落lobby check out兼放低行李.跟住就係酒店門口問的士大佬係咪有free ride去DFS.司機話有,我地上咗車之後,佢問我地點解知有free ride.基於線人叫我地要保密消息來源,我地只係話係有朋友舊年黎結婚搭過free ride.即使其中一個司機懷疑消息既來源係正確,我地都係守口如瓶

落咗車,入咗去DFS行個轉,做戲做全套嘛~基於時間關係,我地只係行去ABC Store買多少少野,無再上jp store.大約一點鐘,我地就趕去海洋水族館,呢度夜晚九點後有得係入面坐低飲野,唔知收費貴唔貴呢?

係世界最長既水族館隧道裡面影咗張相,咁啱又有條鯊魚遊埋入鏡添~館內有好多魚,又有好似係龍躉既生物,水母,蜘蛛蟹,海星,海鰻....最後有個開放式既地方,遊客可以仲手入池內摸海星同鯊魚.海星既感覺好似橡膠咁,而鯊魚就好似"鞋鞋"地咁

~又呃又氹,人家至肯以秒速仲手落水池摸鯊魚仔(約一條臂咁長),仲要好驚嚇咁既樣子

買埋紀念品,請職員幫我地一齊影張合照.當地人見到我地件衫,又點會好意思拒絕幫我地影相呢?

臨走人家係門口同假鯊魚影相,而家就咁精靈,正話摸鯊魚仔個陣唔係咁架噃........

本來諗住行去第一日食鐵板燒既日本餐廳joinus食晏,但去到時已經兩點多啲,過咗人地既lunch hour,中間係落場時間,無得食....於是我地坐lam lam車番酒店,去之前諗住去但又打退堂鼓既Jamaican Grill睇吓有無野食.我地唔知站點分佈,諗住有個站名係我地酒店個名,埋應係酒店附近禁制落車.但當行前多一段路就到時,架車突然左轉,上咗個高啲既好多既地方,原來係K-mart.我上前問司機我地有無miss到站,佢話未到,無miss到.當下一個站真係我地酒店時,司機用個咪叫"marrilott hotel",好似驚我地唔識落車~

呢間Jamaican Grill係以燒烤食品做招來,你睇吓個牙籤兜就知道啦~好在佢有開門,如果唔係都唔知去邊度食野好.....

人家叫既係牛扒飯,啲飯麻麻地好食,塊扒就ok啦,比起尋晚個塊當然係爭啲啦.

我叫既係烤雞飯,雖然係半隻,但係都幾大份吓,啲肉仲好嫰滑添,有少少驚喜~

行番去對面,就係我地住既酒店.坐係lobby等elton黎接我地(佢話四點三係lobby等).真係最後一次望關島既海景lu,唔知會唔會再有機會再黎呢?

同酒店一對情侣,隔離酒店既一家三口,半個鐘唔夠,我地就到機場.同elton道別後,入去排隊攞登機證,再去做行李寄存.呢度好老土,要你自己拎個喼去排x光機前.如果你個喼係上咗鎖,就要等你個喼過咗x光機至可以走,因為可能要搵你黎開喼,但又唔會以時間序黎排隊,得個等字....

跟住我地去上層過海關,今次除咗跟身袋要過x光機外,自己要過金屬探測器都好正常.但真係無諗過連對鞋都要除出黎,放落個兜度,過x光機;過金屬探測器前要除埋條布腰帶,話有金屬扣喎,搞到要著住對韈仔抽住褲頭黎過金屬探測器,好狼狽,如果無著韈咪要赤腳行......

過埋海關,跟住就有一個鐘唔夠既時間等上機(六點四機).我地坐低飲埋杯咖啡,就去上機lu.上機時,服務員見到我地件t恤就出口讚"nice shirt!".我地係food court飲咖啡時見到既關島足球隊,原來係同我地同機.我行去厠所時,其中一個球員望到我件衫,笑住咁話"i love Guam~"

九點幾就番到香港,係免稅店見有芝華仕賣.問過姐仔,話可以買1公升酒,於是俾錢買咗支平價1L裝既芝華仕(起初以為係750ml),好開心~~但係有朋友話其實又好似唔帶得,不過都過咗關咯,算啦~~

放多兩日假就要開工,真係想個假期長啲,浪漫既外遊,就告一段落o勒~
ps:人家話我每次去旅行都無話失眠,仲比平時食得多野啲

關島遊 day 3-我們出海了

本來今日可以九點係lobby等,但由於我地同酒店一對couple又係約咗今日去玩水上活動中心,但要就佢地係仲係水漲時玩水上電單車,所以變咗八點三係lobby等上車,好唔夠訓添~~

一落車就落陣雨黎,之後咁啱又俾我地見到彩虹,仲影埋相添~個對couple玩水上電單,我地就繼續等大半個鐘,先至夠鐘玩我地既第一個活動,唯有亂咁影吓相啦.

呢度啲雨,都真係過雲雨咁,好快就又係藍天白雲,不過遲啲雨季就可能會差啲.今日整體黎講都係比尋日多雲,如果今日至影相就無咁靚啦,lucky~

除咗我地兩對couple係華人之外,其他黎呢個水上活動中心既都係日本人(起碼有五十人).日本姐姐身型真係比例較好,只不過啲皮膚同個樣子都真係麻麻,個個都化晒妝黎遮,有啲仲成個京劇樣添....衣著係較好睇,吾妻仲話啲衫係香港都無得賣,激氣添~連個阿嬸都著see through格仔外套,兼且塗埋指甲油~(睇黎佢係一個攝影發燒友)

時間夠,點齊名,大家就上晒一架大巴.坐半個鐘車去關島既另外一邊既碼頭出海,我地就係上呢隻船去睇海豚啦.話就話九成既遊客會睇到海豚,但我地出咗海好一段時間同兜咗一輪,都唔見海豚既踪影,唔通我地就係剩餘既一成遊客,只係出黎得個晒字???

正當大家都有啲失望既時候,海豚就三五成群咁出現啦!!個海真係好藍架,影出黎既效果無親眼睇咁靚.

佢地好好奇,有時會游到好近我地隻船(當時行得好慢),呢幅就係其中一條海豚高游過本船時,俾我影到既快相~佢地仲久唔久跳出水面玩表演,有幾吓佢地仲加埋淩空轉体(好似花式溜冰咁),我地都有拍到短片留念.

跟住我地就一船人就著上救生衣,輪住咁玩香蕉船.人家話好驚,但平時佢坐我車尾行八九十都係咁啦,有咩好驚呢?可能係佢唔識游水卦.我同人家坐第二橫行既隔離位,其實唔係好快同擺,只係有幾個浪仔跌吓啫,我都係坐住黎洽眼訓,不過啲海水真係零舍鹹,個浪花打黎塊面,舐少少都覺得鹹得辛苦~

番到碼頭,坐番大巴番去水上活動中心.一落車就去排隊攞野食,大會午餐係咖喱炸雞飯(都幾好食既).諗住買罐可樂飲,但見到賣成$2美金一罐,之前係便利店賣都係$0.65咋,食水又幾深喎......

唯有買一罐分黎飲啦,反正都未必一個人飲得晒.

食飽飽,我地又去下一個項目,坐架細啲既車,去另一個碼頭上船出海.先玩多次香蕉船,但今次激啲,因為船家故意掟彎令香蕉船會突然加速,兼且會有浪既起伏,跌蕩感較重,我都無上晝咁悠閒洽眼訓,要拿實個扶手.今次無帶泳鏡出海,連雙眼都要俾超鹹海水"醃"到唔舒服,係咁標眼水~

坐後邊既日本女仕向前"鐘",帶位帶盔頭冚埋人家既膊頭,人家事後話好鬼痛~

跟住就係重點活動,sky rider啦.我地要好似相中人咁坐係個附有降落傘既金屬架入面.呢個架放係船尾部份既平台上,仲拍住一個拖拉機添.

當船隻加速而拖纜放長時,個金屬架就好似風箏咁飛起升高,最高會達到十層樓咁高.係上面可以俯瞰多層次既海水藍色,以及沿岸風光,當地導游話係其他地方係搵唔到.

人家起初都好驚,但係我呃呃哄哄吓,人家都上咗去玩,落番黎時話都唔係好驚啫.我自己就覺得幾安全丫,可能係我有打ace combat,慣咗高空view.船長同船員好鍾意船上個幾位日本後生女,係咁用日文聊人地"kawaine~~"(好可愛),又問人地叫咩名,回程仲俾佢地其中兩位坐係駕駛位,親自教授渣船,仲俾佢地打真軍試添~

上咗岸,坐番車去水上中心已經近三點,自己落水玩既時間得番一個鐘左右,因為要趕四點最後一班車番酒店,如果唔係要自己諗辨法番去.人家話要玩扒艇,但正正係潮退,扒幾扒就濶淺,要我人手推船,回程時大部份距離係我又拉又推咁玩人肉快艇........
好攰.......呢度既近岸既水位,係潮漲時都只係到大人既心口高,潮退時得上五吋下五吋咁矮,但一到有浪既位,就會係無底深海~

一來一回已經夠時間上水執野走,趕搭尾班巴士番酒店.其實好多時間都係用咗黎搭車轉船,同埋排隊玩活動.如果報玩多啲野都真係唔夠時間去玩,如果啲活動地方可以集中啲就好lu.

番到酒店沖個涼,訓咗陣.七點幾至去到酒店附近既商場呢間叫TONY ROMA'S既美式餐廳排隊等食飯.話說係尋日華僑阿叔車我地由CRYSTAL CHAPEL番酒店時,我地問佢有咩抵食好食,而佢介紹食酒店自助餐同呢間餐廳.我地都有行去日藉媽媽YOKA介紹既JAMAICAN GRILL望過,見好似門面無咁靚之餘,又無話有咩出名,於是行番去TONY ROMA'S食出名既牛肋骨(佢門牌寫住"FAMOUS FOR RIBS",講個信字O架咋,而且我都係FAMOUS FOR RIBS丫).再者,黎到美國地盆,點可以唔去見識吓扒房呢?

之前食晚飯都唔洗排隊,因為早就訂咗位,但今晚係自己摸上門,幾多人係門口等.人氣咁高,應該都唔會難食得去邊丫~姐仔話要等15-30分鐘左右,係香港排隊食飯閒閒地都大半個鐘黎講,我地當然欣然接受啦~

攞位時收到個黑色盒仔,我地見人地有位時,手上既盒會閃燈,有無震就唔知喇.唔夠半個鐘到我地有枱,但個盒無閃無震,只係聽姐仔叫我地個姓至知有位,唔通咁橋壞咗?

睇完個MENU我叫咗個16安士T骨扒,飲品我就叫咗iced cappuccino,我仲同姐仔講"i love cappuccino"

人家叫咗個full size(12條)既牛肋骨,飲品本來叫橙汁,但姐仔話好細杯,ice ted會大杯啲抵飲啲,於是改叫ice tea~

人家話個ribs好"林",肉同骨係可以一刀分開,掂~而我既t骨扒都好嫰口,無渣又唔韌,正~個焗薯上有牛油同芝士碎粒,真係好好食同吸引,唔怪得美國人咁多DM啦,成日咁食法真係唔係太好.

雖然我地食唔晒,但都真係好飽同好滿足,臨走都要同門口塊招牌影番張相留念~跟住我地行咗去jp store,因為的士佬話十分鐘多就到,所以我地無等lam lam車.行到目的地要成半個鐘,擺明無幫襯就俾人昆..唯有當係飲後散步.....

去到jp store,又真係幾多野睇同賣,人家買咗啲髮夾,同手信食品,我就係quick silver買咗條布腰帶俾percy做生日禮物.最後臨走同人家各人買一副太陽眼鏡,等聽日有得用,日頭行街真係好辛苦,眼都擘唔大.

由於十一點已再無lam lam車,所以又要繼續行路.回程經過間abc store,人家話又有啲肚餓,於是又入咗去買咗個汔水+熱狗餐黎醫肚,正話唔係食到好飽架咩?我就真係食唔落o勒....

聽日last day得半晝時間,真係有啲唔夠喉同唔捨得,如果有多日whole day既話,感覺就會好好多,無咁趕嘛~