訓咗四個幾鐘就醒咗(十二點多啲),之後同台灣女生一齊出去輕鐵站去市中心,再轉巴士出沙田行吓.係路上見到藍天白雲,我就諗起以前細個成日俾老媽話我係"一舊雲先生",成日唔識做功課同成績唔好,成日遊魂,好似舊雲咁係天上無目的咁飄浮,心不在焉....
一落車,勁肚餓,係人家帶領下去咗美心mx食下午茶,豉油皇雞脾+紅豆冰.星期六,鬼咁多人,人山人海,好唔容易至搵到張枱.排隊時,有個太太叫老公去買飛,叫個細路女(都唔知讀小學未?)一個人坐係張枱兼睇住老公個袋,自己就排住隊攞野食,等老公交飛.太太排係我前面,不時回頭望吓個女坐成點.我忍唔住同個太太講"不如你去睇住個女,等你先生買完飛,就排番我前面啦"太太告謝完就番埋去陪囡囡,叫老公排番去我前面.我同人家講呢件事,仲問人家mug我個樣好惡咩?點解唔主動問吓我可唔可以幫佢地頂住先?人家話可能係香港人通常無咁好心卦....
其實今日既目的係西田大減價,我地先去咗帝京酒店對開既特賣場,睇中咗件t 恤(六五折),阿姐話有得試,但個試身室係臨時搭既,又窄又矮,我要踎底身至可以伸高對手換衫....啱身,但等一千零一件,check過無野就照俾錢~
跟住去咗男仕部買咗$100野,又係ice fire 買咗打迷彩自動縮骨傘,八折後$94.4,雖然無最鍾意既灰色迷彩,但都好過要原價買咁肉赤丫.係無印又搵到件特價錢既短袖恤衫T恤$100,平~最後係espirit再買咗短袖同長袖恤衫各一件,特價嘛~湊埋人家條裙,可以做埋會員有discount咭.雖然有啲大出血,但全部都係特價同抵買品.
夜晚我地係UCC食,第一次食,感覺都ok,兩個人兩舊水多啲~人家叫咗個海鮮拼盆餐配滴餾炭燒凍咖啡.而我就叫咗個什扒飯配凍泡沫意式咖啡.
ps:今日都可以話係大豐收~
