關島遊 day 1-我們到埗了

落機時都只係五點鐘,超過廿四小時無訓過,勁攰~過完海關,攞埋兩個喼,就係大堂等接待我地既favor tour職員.見到有人著住紅色T恤,行去佢前面,見到心口有"favor tour"字樣,於是上前報上名來.

等埋其他團友,就一齊上咗架大巴,開始city tour(其實只係太早,酒店又未check得in,dump吓大家波鐘啫,順便係車上sell下你地報local tour嘛)

第一站:K mart
呢個係24小時營業既大型超級市場,大成點?咪好似睇西片,啲西人推住架鬼咁大既手推車黎買野,又推埋出去停車場搬貨去架私家車度咁囉.呢度連花園俾小朋友玩既鞦韆都有得賣,西人鍾意既燒烤爐當然都係任君選擇啦~我同人家只係買咗支頭髮定型spray(行禮個日用)同兩支水,因為當地導遊話自來水既礦物太多,煲咗都唔飲得,所以家家戶戶都要去買水飲用.

第二站:迷你自由女神像

落車就係要同呢個複製既迷你神像影張相,以及聽導遊講吓佢既由來,其他時間都係望住個海.

第三站:阿布根堡

有幾個炮台,可以俯瞰杜夢灣同附近既區景,又係影張相,聽段故就上番車,鴨仔團是也...

第四站:拉提石公園,西班牙廣場,聖母瑪麗亞教堂

有八舊見證關島土著原居民文化歷史既石柱既公園,對面馬路係一個有西班牙總督宫邸同朱古力屋既遺跡既廣場.

再行過啲就係聖母瑪麗亞教堂(天主教教堂之總壇),裡面有好精細既玻璃彩圖,以及聖物,係當地第一座天主教教堂既舊址.

第四站:戀人岬 two lovers' point

其實呢個係一個展望台,但有一個傳說話一對戀人係呢度跳崖殉情.好多情侣都黎呢度"塔"上把鎖,再將鎖匙扔落大海,喻意永不分離.我同人家當然係早有準備刻有我地名字既靚鎖,黎見證吓我地既戀情啦~

跟住我地就上番大巴,填吓我地想玩啲咩活動同飯局,九點幾到酒店就落車.當要俾報local tour既錢時,發覺人家袋內既信封既錢不見了,摷均個袋都係無,導遊上車check過我地既座位都無,唯一解釋係有人係車上偷咗.出師不利,當然唔開心,人家自責,我又覺大意輕心.我用我剩餘既盤川黎俾local tour錢,再同人家好灰咁等上房......

係大堂等咗大半個鐘至有得上房,沖個涼,就去lobby會導遊去報警.導遊渣車送我地去察館,但等咗好一會兒至有警察招呼我地.我地講個經歷佢知,話懷疑係坐近我地既團友"目及"到人家個袋有銀包,於是趁我地落車觀光時摷袋.警察叔叔好嚴厲咁話導遊無好好咁叫我地攞走財物同看管車內物品.佢仲一口就話唔會係團友做,似係司機做多.

諗諗吓又係,你話係地下或椅上執錢同銀包都話丫,而家係開袋兼落手摷喎,罪惡感大好多.而且我同人家唔知上戀人岬展望台要俾$3入場費,所以人家要番上車攞錢.好可能司機見到人家上車攞錢,所以就鎖定人家個袋可能仲有貴重野.如果我地無貪方便同嫌麻煩,堅持攞晒啲袋落車,就無事啦...(又或都袋定入場費)

報完案都成十二點,又攰又眼訓又無mood又肚餓,我地聽導遊之前既推介,去咗附近一既叫"joinus"既日本餐廳食鐵板燒.有飯,湯,日式沙律;主菜有牛扒,雞扒,豆腐,煙肉包蝦;配菜有芽菜,洋葱,青椒,紅蘿蔔,餐飲為ice tea.埋單都係$37美金,比起香港食真係平好多(上次係旺角食都要近$500,仲要唔太飽...)我太肚餓,連沙律都食埋落肚(平時唔多食),成大碗飯都食晒,所有餸都食晒.....人家都話無咩幾何見我食咁多野~

係導遊既即時安排下,接我地去政府部門做結婚登記既華僑,直接係我地食飯既商場接我地(本來話係13:30酒店lobby等),免得我地兩頭撲無時間.當地既人員做野真係無咩壓力同慢,仲要打錯我地啲資料好幾次....

由於職員話要英文簽名,情急之下我用咗個好簡單既簽名,當地人同人家都話真係好簡單.

mememomo,搞到成三點幾至走得人,番到酒店,我沖個身,就訓覺叉電,人家就打點吓細軟,同係露台欣賞日落.

訓醒計吓數,決定取消last day個日既活動,吐番啲現黎食飯,夜晚就照去睇鋼管舞.九點半係lobby等,導遊開車黎接我地.其實間野好近我地既酒店,行都行到去.入場費位位$30美金,包一支細啤酒.場內有好多日本遊客,佢地都好踴躍咁將一張張$1美金放係台上,等女郎上前用酥胸或口從客人身上夾走或舔走,兼且會主動牽著客人既手去"遊覽山峰"同參加"豪華團".

其中一個女郎主動走到人家面前表演同邀請人家"遊覽山峰",我唯有乖乖咁呈上$1紙幣俾人家用黎打賞女郎

經人家驗證,原來係膺品睇咗好幾個姐姐既表演,我地十點半走人,中途見到係飛機坐我地後邊既一對老夫婦添~

導遊應我地所求,係K mart放低我地.為咗慳啲錢,所以我地簡咗係呢度食快餐pizza,好在今朝係度見到有up dup快餐食啫,當體驗吓快餐高熱量飲食文化

一眼望晒咁多野食,盛惠$15美金,我地食剩兩條芝士條餅,坐多陣就慢慢行番酒店(十分鐘多啲).

聽日就去行禮啦,有啲緊張,希望一切順利,將我地既心情推番上高位啦~

ps:唔開心在意外令今次既旅程蒙上污點,未能盡興,以及怪自己監督不周,未能俾人家最好既安排同回憶...