北海道-尾站札幌

今日已經係日本之行既最後一天,聽日就會係札幌搭飛機去東京再轉機番香港,所以要好好咁享受埋今日既行程~

我地早餐係LeTAO食芝士蛋糕餐,一塊cheese cake配紅茶或咖啡.尋日人家已經話呢度既芝士蛋糕係好好食同出名.

係咁靚既地方嘆cheese cake,當然要影番張相啦.食落果然零舍不同,星巴克,太平洋咖啡店既產品真係頓時行埋一邊.

出面有露天枱座,但由於落雪,所以都俾一舊舊既棉花糖佔據住~下層係主攻外賣同其他制成品,如紅茶葉,咖啡豆同朱古力.有好多學生黎買嘢同試食,人家話一定係啲父母見仔女去學校旅行,搭單叫佢地買手信.

我地繼續行,係呢間店鋪停咗一停,因為佢賣既係海鮮燒~

四眼哥仔好好人,收我地齊頭數,唔通睇我地係外人既份上?

咁大隻螺,啲肉都唔會話韌口,話時話我都係第一次食燒螺.

我地再去食巨型燒八爪魚丸,成個拳頭咁大o架!

呢間咁靚既屋,其實係一間食店,唔知係咪有樓上雅座呢?

時間緊迫,除咗食嘢,我地只係有少少時間行尋晚關咗門既玻璃制工藝店.本來要十一點check out,我地同屋主講好咗十二點都得,但最終我地都遲咗十多分鐘至交屋.屋主咁好人,硬係要影番張相啦~

到達札幌時人家有啲肚餓,所以係火車站月台食咗碗天婦羅蕎麥麵.

都幾多人幫襯吓,得阿姐一個人一腳踼,後來人家發現呢間咁細既麵檔都係"株式會社".

係酒店放底行李後,我地去咗電視塔,其實都無咩野,只係到此一遊,影張相.隔離既空地就準備緊雪祭,一舊舊既冰磚係貨車吊落黎.

係斑馬線口見到呢羣白鴿,好似係等過馬路咁.

時計台都係一樣,影過張相就算,入場要俾錢,但我地唔懂日文,所以入去都無咩作為..

行番去酒店附近既商場,有啲肚餓,所以買隻炸脾食,食材唔同,隻脾都香啲滑啲~

再去排隊買條魚形燒豆沙餅,真係幾好食,唔怪得咁多人排隊買啦~

買咗啲和菓子手信,番酒店放低,再出黎食晚飯.我地四點幾行過,諗住入黎食少少野,點知係休息時間,所以晚飯時間再黎過.好多人等位,我地都等咗成個鐘至有位.

係呢度要叫咗杯drink先,串燒就無次都係要打孖咁叫,唔可以單叫一串.眼見都好多日本人係度食嘢,可能有酒飲,所以大家都好開懷,氣氛同聲音都係熱熱鬧鬧,有別於一般餐廳既拘謹.

接咗order後,店員就係你面前燒,食咗好幾樣串燒,最正都係雞翼,所以再叫多round~

本來諗住去番第一晚幫襯既拉麵檔,但發現流動車不在,原址附近修路工程,真係可惜.....未能為日本之行劃上完美句號.

ps:係loft搵番之前見睇中既紅色牛皮電話繩,雖然成八十幾蚊,但番工咁辛苦,咪當係送俾自己既獎勵囉,又難得黎到日本嘛~~~

北海道-夜訪小樽

今朝特意早啲起身,係房間浸多次溫泉,日光日白就可以望清楚海景,仲可以係天上見到好多飛鳥~

另一邊就可以望到少少函館市,朝早好似凍過尋晚好多咁,仲落咗陣雪添.

浸溫泉真係好舒服,就算出邊好凍,落咗池就一啲都唔凍.以前睇過本書,話所有生物都係源自海洋,包括人類,所以我地去海灘,沖涼時係會覺得放鬆同心情愉快,唔通係真既?

我地拖住個破冰喼,冒住風雪行去市電站.即使係有蓋遮掩既市電站,啲風雪都係打橫咁吹埋黎,你睇人家要拉住頂帽就知幾勁啦.

去到JR站,見人頭湧湧,閘口同其他電子告示版話早上幾班車因天氣關係"休運",咁咪即係無車去札幌?係票務處問過,可能要等夜晚七點幾個班車,一係就去巴士.去到巴士站,姐仔話要五點幾至有車,去到札幌都同火車差唔多時間.我地仲要係札幌轉火車去小樽,咁點算呢?

正當我地番火車站商量時,有個的士司機走埋黎"殺菠蘿?"(sapporo),開價要六萬円.....真係好過去搶..........

最後我地決定係車站等天氣好轉時既特別班次,咪當打風等輕鐵啫.我地就係咁成為咗火車站裡面其中一對滯留旅客.

最終我地搏到12:25既臨時班次(原本我地坐11:00),無得坐指定席,但都上到自由席,話晒都驚三班車既人迫埋上同一班嘛.沿途都見到大風大雪,當去到札幌轉車時,見到列車上鋪滿厚厚既冰雪,而路軌上就見到一塊塊既硬雪.

轉車去小樽,落車係民宿放底行李,就趕住去行街,因為呢度啲店鋪多數六點就收舖.我地第一時間走咗入去一間賣音樂盒既大店,裡面有好多外式外類既音樂盒,流行曲既都有,你睇吓幾多~

點解叫做大店?你睇吓就知,成個倉庫都係音樂盒,仲有陳列玻璃精品既閣樓添.

本人就好鍾意呢set玻璃精品,型到爆,價錢都係型都爆......

六點鐘就關門,無情講,出到已經黑齊.小樽既夜色富有懷舊色彩.

我地繼續去啲未關門既玻璃精品店,話晒小樽出名音樂盒同玻璃精品嘛.

咁靚既玻璃工藝品,價值當然係勁啦,仲要係眼看手勿動!

我地既背後就係小樽運河 ,雖然落雪,但只係得1.8度.

呢度好多店鋪都係由以前既貨倉改建而成,呢個倉裡面有好幾間獨立食店,中央有一個賣乾貨既小攤檔.

我地去咗一間成個倉咁大既食店食燒烤,因為人家睇中咗人地個餐有蠔燒,於是一份期間限定既海鮮,另一份係什扒.

由於係倉庫,所以樓底好高,毫無壓迫感,地方大到可以容納三百人.食物就真係好新鮮,最出色既就係海鮮set.鮑魚大隻得黎又嫰口,唔會好似酒樓食鮑仔咁韌口.燒蠔當然無令人家失望啦.

食店有個攤位係俾啲顧客用扇貝既殼黎畫寫留念,我地都有用marker畫咗塊,放係呢張鋪滿花厘花碌貝殼既枱上.

我地行番去小樽站搭JR,因為我地既落腳地係近南小樽站,期間我地仲經過咗一條被停用既舊火車路軌.無特別既紀念館,只有一塊介召既石板,因為佢己經融入咗現今既行人街道.

我地既民宿其實係一家當地人後園既別館,座立係一個高地既邊角,好似懸崖邊咁.裡面既陳設好古雅,間屋有成75年歷史(起初人家仲驚係咪鬼屋黎).雖然係咁,但裡面電視,暖氣,熱水一應俱全.

飯廳外有個露台,側邊有張梳化床添,我幾欣賞佢既大玻璃摺門.又大又舒服,少了酒店既公式,多了住家既溫暖,我同人家都好鐘意.

ps:http://homepage1.nifty.com/sakanouekan/set.html