一朝早起身拉喼趕搭火車,早餐都係買外賣快餐上車食.今日我地要去釧路,過一晚夜.車程四個鐘,真係幾係嘢,坐到你籮柚痛....
沿途除咗訓覺,就係望窗,話晒長途車,服務員推車仔賣小食飲品,等乘客可以補給吓~~
坐走廊另一邊既日本大叔,好有系統咁開檔,先用報紙鋪地面,除咗對鞋,踏上報紙面放鬆吓雙腳.跟住開包nuts食,再開啤酒飲,將飲剩既倒入一個有擰蓋既玻璃樽黎存氣,留番之後黎慢慢嘆.偶爾拎起部數碼相機,影吓窗外既景物,真係好寫意~~
由於多行李,我地讓晒人地落車先,所以一落車,職員就拉繩封門口,進行打掃.
個車站唔係好大,到處都有旅遊介紹,地圖同單張,而我就發現呢張蒸氣火車濕原號既廣告~
一出車站就見到呢三個雪人全家福,仲要一人一頸巾,真係幾盞鬼同應節!
第一次係零下八度既北海道 見到電單車,感動!!其實佢係郵差送信既50cc車,真係只限代步.
釧路比起札幌當然係鄉下啲,不過呢度好特別,到處都有廣播,令你恍如置身係一個大型商場裡面咁~~
雖然係無咁人多同繁忙但,我偏偏就喜歡呢種恬靜.
雖然係無咁人多同繁忙但,我偏偏就喜歡呢種恬靜.
晏晝個餐,我地係和商市場食"車仔飯".首先係一個檔口買啱自己份量既白飯,跟住就行去啲買魚生既檔口,逐一選擇自己喜愛既魚生,豐儉由人~~.
同二条市場一樣,都係有蟹賣,不過呢度就連生猛既蟹都有得賣~
唔知啲當地人多唔多買番屋企當做餸呢?擺咁多隻出黎又係咪賣晒o架??
之後我地行咗入去附近一間百貨公司既起級市場,見到呢度有小朋友專用既購物車,每架都插住支畫有動物公仔面部既旗,好搞鬼.呢個小妹妹見到我地想影佢就雞咁腳咁推車走,睇黎佢都揀咗唔少野喎~~~~~
買完野,我地食埋個雪糕先走.日本啲嘢食既選揀都比香港多好多,唔會話道道都係個幾樣俾你揀,而且味道都好好.
番酒店途中經過一間叫"柳月"既和菓子店,人家對眼發晒光,於是入去買咗少少,試吓好唔好買番香港做手信都好嘛.
行到酒店隔離,有呢間好自家制feel既和菓子店,見佢掛晒啲獎狀出黎添.可能近六點,就收工,唔少和菓子已經買晒,唯有同大叔影番張相,同埋買一串仔和菓子走人.店鋪既古舊同簡約,令人有"家"既感覺.
夜晚我地去一間五十年歷史既炉端燒食飯,但由於通街都係炉端燒既食店,真係眼花兼頭暈,睇地圖都唔知邊條街.走去停車場問收銀既大叔,佢笑住咁行出黎,指示係對面馬路行入啲就係我地既目的地.一入到好多人圍住個炭爐黎坐地下,好在都仲有位招呼我地呢兩個外人.
店鋪裡有位能操流利英語既阿姐同我地落單,而且仲有英文對照既menu添,放心晒.
樣樣都好食,較特別既係呢條叫kinki既魚,係"伙頭智多星"卡通片裡,連味皇集團法國菜部主任夏仲基先生都選用既優質食材!佢原本係紅色,眼大大好似大眼雞咁,但肉質就好滑同美味,旅遊書都有介紹.menu上呢隻魚係無定價,只係有個range,阿姐話今日既來價較貴,建議我地可以揀較經濟同多客人點既魚種.經我同人家商量,一場黎到,香港又無得食,點都要試吓,於是都係點咗一條kinki.
能操英語既阿姐除咗係點菜時俾唔少中肯既意見外,仲幫我地影相.另外一個阿姐又教我地點食條魚,等我地唔好嘥咗啲魚肉.
一客既帶子就已經有四大粒肉,哈哈~其實點菜時,我都嘗試讀出menu上既日文名,因為好似有誠意啲,大家都開心啲.我仲用半日半英咁話俾佢地知我地係北海道 第一次見到雪同埋黎呢度旅當係渡蜜月.
番到酒店,我同人家各自去大浴場沖涼,浸溫泉水.儍更更既我唔知自己浸過露天風呂,只係知道推開過一度門,覺得好凍,跟住就走咗落池水度.
釧路俾我既感覺蠻親切,可能當地人生活無咁都市化同急忙,起碼大家可以有時間多點體會生活,而唔係為工作而生活~
